Marko 7 - AHYERƐLƐ KRONGRON

Tetefoɛ ngyerɛkyerɛ

¹ Farasiifoɛ mɔ, yeɛ ahyerɛlɛfoɛ nemɔ nu biemɔ befili Yerusalem bɛwale, na bɛbɔle nu bɛwale Yesu berɛ.

² Benwuni kyɛ ye asuafoɛ nemɔ nu biemɔ bɛfa bɛ sa bɔ ye nwo nde ɔ bedidi, bɔ okyire kyɛ bennwunzi bɛ sa ɔ.

³ (Ofikyɛ né Farasiifoɛ, yeɛ Yudafoɛ amukoraa bennidi, sana banwunzi bɛ sa koraka, ofikyɛ né betira mbanyi mɔ b’amammerɛ ne anu.

⁴ Sɛ befi dwaaso bɛba a, bennidi, sana benwunzi bɛ nwo koraka. Na amammerɛ pee boka so bɔ betira nu kɔteree ɔ: ebie ole kulie, ndalie, kɔɔbere ayaa ne didipono nwo nwunzinɛ.)

⁵ Yeɛ Farasiifoɛ ne ahyerɛlɛfoɛ nemɔ bebisale Yesu kyɛ, “Nzu ati yeɛ w’asuafoɛ nemɔ benni mbanyi mɔ b’amammerɛ so, ná mmom bɛfa bɛ sa bɔ ye nwo nde bedidi ɔ?”

⁶ Na obuale bɛ kyɛ, “Odi sɔ kyɛ Yesaya hyɛle ɛmɔ, nyaatwomfoɛ nwo ngɔm ɔ, kyɛbɔ bahyerɛ ye kyɛ, ‘ ‘Maen he bele bɛ noa mbaen yeɛ bedi me ni ɔ, nakoso b’ahone de, ombingye me.

⁷ Bɛsɔne me mbaen, na mmenia nhyehyɛleɛ yeɛ bekyirekyire ɔ!’ ”

⁸ Ɛmɔafa Nyameɛ ahyɛdeɛ ne bato ahameɛ, na kuro sona amammerɛ nu yeɛ ɛmɔtira ɔ.”

⁹ Na osa sele bɛ kyɛ, “Ɛmɔafa nworɛ atee so bapo Nyameɛ ahyɛdeɛ ne, kyɛbɔ ɔkɔyɛ bɔ ɛmɔkoli ɛmɔ bɔbɔ b’amammerɛ so ɔ!

¹⁰ Ofikyɛ Mose hane kyɛ, ‘Di ɛse ne eni ni,’ yeɛ: ‘Ebiala bɔ ɔkɔhã ɔse anaa oni nwo dwirɛ tɛɛ ne, ehunɛ yeɛ odi kyɛ beku ye ɔ!’

¹¹ Nakoso ɛmɔ de, ɛmɔnwa: ‘Sɛ ebie kã kyire ɔse anaa oni kyɛ: Nikyee bɔ ahaa ekonya kofi me berɛ ne, ‘ɔte kɔban’ (bɔ okyire kyɛ ɔte ayɛyɛdeɛ ma Nyameɛ) a,

¹² ye de ɛmɔmma ɔnyɔ nikye fee mma ɔse anaa oni ko;

¹³ na ɛmɔfa ɛmɔ amammerɛ bɔ ɛmɔkyirekyire ne bɛsɛkye Nyameɛ dwirɛ ne. Na nningyein pee bɔ ɔte kyɛ ɛhemɔ yeɛ ɛmɔyɔ ɔ.”

Bɔ ogua sona nwo fiɛ ɔ

¹⁴ Afei Yesu frɛle ɛlɔen ne maa bɛwale ye nwo berɛ, na osele bɛ kyɛ, “Ɛmɔ amukoraa, ɛ́mɔtie ná ɛ́mɔte ye bo.

¹⁵ Nikyee biala ɔnne sona nwo bɔ ɔkɔ ye nu a ɔkora gua ye nwo fiɛ ɔ; na mmom nikyee bɔ ofi sona nu ba ne yeɛ ogua ye nwo fiɛ ɔ. [

¹⁶ Bɔ ole asoɛ tie ne, maa otie!”]

¹⁷ Na ofili mmenia ne anu berɛ hɔle awuro nen, ye asuafoɛ nemɔ bisale ye anyandera ne abo.

¹⁸ Na osele bɛ kyɛ, “Ɛmɔ koso, ɛmɔ ndeaseɛ wɔ dede sɔa? Aso ɛmɔnze kyɛ nikyee biala bɔ ofi sona nwo ná ɔkɔ ye nu ne, ɔngora ngua ye nwo fiɛ ɔ?

¹⁹ Ofikyɛ ɔngɔ ye ahone nu, na mmom ɔkɔ ye kunu, na ɔsẽ gua yaen nu.” (Ɔhane he fa tele aleɛ mukoraa nwo.)

²⁰ Na ɔtoale so hane kyɛ, “Bɔ ofi sona nu ba ne, ye yeɛ ogua ye nwo fiɛ ɔ.

²¹ Ofikyɛ sona nu, ye ahone nu yeɛ adwenemmɔne, adwamanbɔlɛ, awue, awuelilɛ, agyaasɛkyelɛ,

²² anyeboroborolɛ, amumuyɛɛ, nnakannaka, ahohwibra, akɔnnɔ tɛɛ, musue dwirɛ, ahandaen ne ngwaseasɛm fi ba ɔ.

²³ Bɔne hemɔ amukoraa befi sona nu yeɛ bɛba ɔ, na begua sona nwo fiɛ.”

Amaenmaensoniɛ braa bie gyidie

²⁴ Yesu dwɔsole fili berɛ nen, ɔhɔle Tiro ne Sidon mbɔtam. Ɔhɔle awuro bie anu; na ahaa né ɔmbena kyɛ ebiala te ye nga, nakoso wangora wamva ye nwo wamvea.

²⁵ Na berɛ ne ala, braa bie bɔ né sunzummɔne wɔ ɔwa abaayaa so ɔ tele ye nga, na ɔwale ɔɔkotole ye gya bo.

²⁶ Sɔ braa ne te Helaniɛ, na aworɛ nu, ɔte Siro-Fonikeniɛ. Na ɔsrɛle ye kyɛ otu sunzummɔne ne fi ɔwa brasua ne anu.

²⁷ Nakoso Yesu sele ye kyɛ, “Ma mmaa nemɔ bɛ ko yi koraka, ofikyɛ ɔtte mayee kyɛ bɛkɔfa mmaa mɔ b’aleɛ bekogyi bekogua ngyea berɛ ɔ.”

²⁸ Na braa ne buale ye kyɛ, “Ɔte sɔ, Awurade, nakoso ngyea bɔ bɛwɔ ɛpoen ne abo ne, bɛsesa mmaa nemɔ b’aleɛ boso bedi.”

²⁹ Na Yesu sele ye kyɛ, “Ɔnate edwirɛ he bɔ ahã ne ati, kɔ, na sunzummɔne ne watu wafi ɛwa brasua ne anu.”

³⁰ Na odwuli ye awuro nen, onwuni kyɛ ɔwa brasua ne la mba so, bɔ sunzummɔne ne watu wafi ye nu ɔ.

Yesu sa emumu asotiniwaaniɛ bie anwonyerɛ

³¹ Afei Yesu sa fili Tiro mbɔtam, na ɔɔpɛle nu wɔ Sidon, na ɔfale Dekapoli mbɔtam wale Galilea ɛpo ne anwo.

³² Na ebiemɔ fale asotiniwaaniɛ bie bɔ osa te emumu ɔ bɛwale ye berɛ, na bɛsrɛle ye kyɛ ɔfa ye sa gua ye so.

³³ Na Yesu fale biaa ne fili ɛlɔen ne anu hɔle ahameɛ, ɔfale ye sa mmɛseka wurale ye so anu, na ɔfele nwɔserɛ fa hane ye temverema;

³⁴ ɔtole ye nye neane nyameɛso, oguale anwongokoɔ, na osele ye kyɛ, “Hefata!” Bɔ ye bo kyire “Bukye!”

³⁵ Na berɛ ne ala, ɔtele edwudwolɛ, ye temverema nyamaa sangyele, na odwudwole kama.

³⁶ Na Yesu kanzole bɛ kyɛ nnɛmaa bɛbɔ so bekyire ebiala; nakoso ogu so bɔ ɔkanzo bɛ ne, né bɛ koso begu so bɛbɔ ye dawure.

³⁷ Ɛhe yɛle bɛ nwanwa maa ɔbole so, na bɛhane kyɛ, “Wayɔ nikyee mukoraa yé; ɔma asotiniwaafoɛ po bɛte dwudwolɛ, na ɔma emumu mɔ bedwudwo.”