Marko 6 - AHYERƐLƐ KRONGRON

Bɛpo Yesu wɔ Nasarɛte

¹ Yesu fili berɛ hɔle, ɔwale ye kuro, na ye asuafoɛ nemɔ ne ye bɛhɔle.

² Na afofikyẽa dwuli nen, ɔhyɛle ye bo yɛle ngyerɛkyerɛ wɔ nyianu sua nu. Mmenia wora bɔ bɛtele ye ngyerɛkyerɛ nen, bɛ nwo dwirili bɛ, na bɛhane kyɛ, “Nisua yeɛ biaa he oosuane ɛhemɔ ye? Nworɛ beni yeɛ bafa bama ye sɔa ye? Ɔyɛ sɛɛ yeɛ ɔyɔ anwanwadeɛ hemɔ ye?

³ Aso nna Maria awa bɔ ɔte bakaa dwumvoɛ ne ɛhe? Aso nna Yakobo ne Yose ne Yudase ne Simɔn b’eliɛma ne ɛhe? Nna oliɛma mmrasua mɔ yeɛ yɛne bɛ wɔ wa ye?” Yiti bɛpole ye.

⁴ Nakoso Yesu sele bɛ kyɛ, “Anidie mmɔ ngɔmhyɛlɛniɛ, sana ye bɔbɔ ye kuro, ye abusuafoɛ nu ne ye awuro ama nu.”

⁵ Na wangora wanyɔ anwanwadeɛ biala wɔ berɛ, sana ayarefoɛ kãa bie yeɛ ɔfale ye sa guale bɛ so maa bɛ nwo sale ɔ.

⁶ Na ɔyɛle ye nwanwa kyɛ banne banni ɔ. Na ohyinini nguraa nemɔ anu yɛle ngyerɛkyerɛ.

Yesu soma asuafoɛ buru ne nyɔ ne

⁷ Ɔfrɛle asuafoɛ buru ne nyɔ ne maa bɛwale ye nwo berɛ, na ɔhyɛle ye bo ɔsomane bɛ nyɔ nyɔ, na ɔmane bɛ sunzummɔne mɔ so tumi.

⁸ Na ɔhyɛle bɛ kyɛ nnɛmaa bɛfa nikyee fee betu b’atee ne, sana pɔmaa ngome; nnɛmaa bɛfa aleɛ, anaa bɔtɔ, anaa esikaa bɛbɔ b’abɔsoɛ nu;

⁹ na mbaboa de odi kyɛ bewura, nakoso nnɛmaa bewura ndaadeɛ nyɔ nyɔ

¹⁰ Na osele bɛ kyɛ, “Nekaa biala bɔ ɛmɔkɔhɔ awuro bie anu ne, ɛ́mɔtena berɛ maa oodwu kyɛ ɛmɔkofi berɛ bɛkɔhɔ ɔ.

¹¹ Na nekaa biala bɔ berɛ ama bengole ɛmɔ, anaa bengotie ɛmɔ dwirɛ nen, sɛ ɛmɔfi berɛ bɛkɔ a, ɛ́mɔporoporo ɛmɔ gya bo mvuture bégua berɛ ma ɔyɛ adanzeɛ hyire bɛ.”

¹² Yiti besili nu bɛɛbɔle edwirɛ ne dawure kyɛ odi kyɛ mmenia sakyera b’adwene.

¹³ Betuli sunzummɔne pee, na bɛfale olive ngoo bɛpopale ayarefoɛ pee bɛsale bɛ anwonyerɛ.

Asubɔlɛniɛ Yohane wue

¹⁴ Ɛhene Herode tele Yesu nga, ofikyɛ né Yesu dumaa adwu dede. Na ɔhane kyɛ, “Yohane bɔ né ɔbɔ asu ne watingye wafi awufoɛ nu, yiti yeɛ ɔmaa ole tumi ɔyɔ anwanwadeɛ hemɔ ye.”

¹⁵ Né ebiemɔ bɛnwa, “Elia ɔ,” yeɛ ebiemɔ koso bɛnwa, “Ɔte ngɔmhyɛlɛniɛ kyɛ daa tete ngɔmhyɛlɛfoɛ nemɔ nu ko.”

¹⁶ Nakoso Herode tele sɔ dwirɛ nen, ɔhane kyɛ, “Yohane bɔ mbɛle ye ti ne yeɛ watingye wafi awufoɛ nu ye.”

¹⁷ Ofikyɛ né Herode bɔbɔ wasoma maa baahye Yohane, na ɔmaa beguale ye ngɔnzɔngɔnzɔ bɛfale ye bɛtole kuku nu, ɔnate Herode aliɛma Filipo aye Herodiase ti, ofikyɛ né Herode agya ye.

¹⁸ Né Yohane ahã ahyire Herode kyɛ, “Mmeraa mma ate kyɛ egya eliɛma aye ɔ.”

¹⁹ Na ɔnate ɛhe ati, Herodiase fale Yohane nwo dwirɛ siele ye ti anu, kyɛ onya ye a okohu ye. Nakoso wannya ye nwo ate,

²⁰ ɔnate kyɛ né Herode suro Yohane, ofikyɛ onwuni kyɛ Yohane te teneneeniɛ ne krongronniɛ. Yiti ɔbɔle Yohane nwo waen. Né Yohane noa dwirɛ ma Herode ye ti anu yɛ ye basaa; nakoso né okuro kyɛ otie ye noa dwirɛ ɔ.

²¹ Afei Herodiase sa hane Yohane. Ɔwale kyɛ né Herode odi ye krakyẽa. Ɔtole poen mane ye atitirefoɛ ne ye safohene mɔ ne Galilea mbanyi.

²² Na Herodiase awa brasua wale oogole abilie maa ɔyɛle Herode ne bɛ bɔ ɔne bɛ bayia berɛ ne nyemene. Yeɛ Herode sele abaayaa ne kyɛ, “Nikyee biala bɔ ekuro ne, bisa me, na ngɔfa ngɔma wɔ.”

²³ Na ɔfale ndaen foale so hyirele ye kyɛ, “Nikyee biala bɔ ekobisa me ne, sɛ odi m’ahennie bue po a, ngɔfa ngɔma wɔ.”

²⁴ Na ofitele oobisale oni kyɛ, “Nzikyɛ yeɛ mmisa ɔ?” Na ye koso obuale ye kyɛ, “Asubɔlɛniɛ Yohane ye ti.”

²⁵ Na berɛ ne ala, abaayaa ne wale ɛhene ne berɛ ndɛndɛ so oosele ye kyɛ, “Mekuro kyɛ ɛfa Asubɔlɛniɛ Yohane ye ti bɔ ɔla prɛte nu ɔ ɛma me kekesaala ye.”

²⁶ Edwirɛ ne hale ɛhene ne paa, nakoso ɔnate ndaen bɔ ɔtale ne, ɔne bɛ bɔ ɔne bɛ didi ne ati, wangora ye noa kakyi.

²⁷ Na berɛ ne ala, ɛhene ne somane adumfoɛ nemɔ ko, na ɔhyɛle ye kyɛ ɔɔpɛ ye ti bra. Na ɔɔpɛle ye ti wɔ kuku nu dɔ.

²⁸ Ɔfale ye ti ne tole prɛte nu wale, ɔfa mane abaayaa ne, na abaayaa ne koso ɔfa mane oni.

²⁹ Na Yohane asuafoɛ nemɔ tele sɔ dwirɛ nen, bɛɛfale ye fuin ne besiele ye.

Yesu ma mmenia apee nnu aleɛ

³⁰ Asomafoɛ nemɔ sa wale Yesu berɛ, na bɛhane bɔ bayɔ ne bɔ bahyirehyire amukoraa behyirele ye.

³¹ Na Yesu sele bɛ kyɛ, “Ɛmɔɔsẽ bɛhɔ nekaa bie bɔ berɛ te dinn ɔ, ná ɛmɔɔle bɛ nwome kãa.” Ofikyɛ né mmenia pee bedi bɛ so akɔneaba, bɔ né bennya alagye po ná badidi ɔ.

³² Na bɛ ngome bɛfole ɛlɛen bɛhɔle nekaa bie bɔ berɛ te dinn ɔ.

³³ Nakoso mmenia nwuni bɛ kyɛ bɛkɔ ɔ. Né bɛse bɛ, yiti bɛ koso betutuli amirika bɛfale ase befili nguro ne amukoraa so beebuale bɛ noa so.

³⁴ Yesu fili ɛlɛen ne anu dwuli ase, na onwuni mmenia wora nen, bɛyɛle ye anwumvo; ofikyɛ né bɛte kyɛ mmoaen bɔ belle neafoɛ ɔ; na ɔhyɛle ye bo hyirehyirele bɛ nningyein pee.

³⁵ Na odwuli nɔsoa ne, ye asuafoɛ nemɔ wale ye berɛ beesele ye kyɛ, “Ɛwa te ɛserɛ so, yeɛ aleɛ koso adwo.

³⁶ Yiti maa bɛhɔ namue ne nguraa bɔ bɛwɔ mbɔtam wa ye anu, ná bɛɛtɔ aleɛ bie beli.”

³⁷ Na obuale bɛ kyɛ, “Ɛ́mɔma bɛ nikyee ma beli.” Na bebisale ye kyɛ, “Yɛɛtɔ paanoo denare ɛyaa nyɔ yɛfa yɛma bɛ ma beli anaa?”

³⁸ Na obisale bɛ kyɛ, “Paanoo nyɛɛ yeɛ ɛmɔle ɔ? Ɛmɔhɔ bɛɛnea.” Bɛɛneane, na besele kyɛ, “Nnu, yeɛ tiré nyɔ.”

³⁹ Afei Yesu sele bɛ kyɛ bɛ́ma mmenia ne amukoraa bɛtenatena ɛserɛ ne aso fekue fekue.

⁴⁰ Na bɛtenatenane ase fekue fekue, ɛyaa yaa, ɔne aburannu aburannu.

⁴¹ Afei Yesu fale paanoo nnu ne tiré nyɔ ne, ɔtole ye nye neane nyameɛso, anwuro, oyirale so, obubuli paanoo ne anu, na ɔfa mane ye asuafoɛ nemɔ kyɛ bɛhyɛ bɛma mmenia ne. Na ɔhyɛle tiré nyɔ ne koso mane bɛ mukoraa.

⁴² Bɛ mukoraa bedidili bɛmane bɛ ko yili.

⁴³ Na paanoo ne tiré ne, bɛsesale ye bo mboporoka ngɛndɛen fokyefokyee buru ne nyɔ.

⁴⁴ Bɛ bɔ belili paanoo ne, né mmienzua te apee nnu.

Yesu nate ɛpo nye so

⁴⁵ Na berɛ ne ala, Yesu mane ye asuafoɛ nemɔ fole ɛlɛen nu, kyɛ beli ye nyunu moa bɛhɔ asue ne asi dɔ, wɔ Betesaeda bue nu dɔ, ná ye de ogua ɛlɔen ne ate koraka.

⁴⁶ Na oguale bɛ ate yiele nen, ɔhɔle bokaa bie aso ɔɔbɔle mbaeɛ.

⁴⁷ Odwuli nɔsoa nen, né ɛlɛen ne adwu asufia; na Yesu de, né ye ngome waha etii so dɔ.

⁴⁸ Na onwuni kyɛ bɛ nwo ahyere bɛ wɔ ɛlɛenhanɛ nu, ofikyɛ né mvrama tu yia bɛ. Na aleɛ baahye ne, ɔnatele ɛpo n’anye so hɔle bɛ nwo berɛ, na ɔyɛle kyɛ osã bɛ nwo.

⁴⁹ Nakoso mmerɛ bɔ benwuni kyɛ ɔnate ɛpo n’anye so nen, besusuli kyɛ ɛnwomee ɔ, na bɛteateane nu;

⁵⁰ ofikyɛ bɛ mukoraa benwuni ye, na bɛ nwo dwirili bɛ. Na berɛ ne ala, ɔne bɛ dwudwole, na osele bɛ kyɛ, “Ɛ́mɔma ɛmɔ ahone tɔ ɛmɔ kunu, me ɔ; na nnɛma ɛmɔsuro!”

⁵¹ Afei ɔɔtoale bɛ wɔ ɛlɛen ne anu, na mvrama ne yakyili tulɛ. Na bɛ nwo dwirili bɛ paa,

⁵² ofikyɛ né bennya bɛttele paanoo ne nwo nzɛngyerɛnneɛ bo, ofikyɛ né bapirim b’ahone.

Yesu sa anwonyerɛ wɔ Gɛnesarɛte

⁵³ Bɛpɛle nzue ne beedwuli Gɛnesarɛte aseɛ so, na bedwuli ase.

⁵⁴ Befili ɛlɛen ne anu bedwuli pɛ yeɛ mmenia nwuni ye ɔ;

⁵⁵ na betuli amirika behyinini mbɔtam berɛ amukoraa, na bɛhyɛle ye bo bɛsoale ayarefoɛ wɔ ndwundwondwo nu bɛwale nekaa biala bɔ bɛtele ye nga kyɛ ɔwɔ ɔ.

⁵⁶ Na nekaa biala bɔ ɔhɔle ne, kyɛ nguraa nu oo, kuro nu oo, anaa namue nu oo, bɛfale ayarefoɛ bɛɛsamone dwaaso, na bɛsrɛle ye kyɛ ɔma bɛfa bɛ sa bɛhã ye ataadeɛ noa ala; na mmenia wora bɔ bɛfale bɛ sa bɛhane ye ne, bɛtele apɔ.