Marko 5 - AHYERƐLƐ KRONGRON

Yesu tu sunzummɔne

¹ Beedwuli ɛpo ne asi dɔ, wɔ Gadarafoɛ aseɛ so.

² Na ofili ɛlɛen ne anu dwuli pɛ, biaa bie bɔ sunzummɔne wɔ ye so ɔ ofili asieleɛ ngumaa nemɔ anu dɔ ooyiale ye.

³ Né wafa asieleɛ ngumaa nemɔ nu wayɛ ye atenaleɛ. Né sona biala ngora mva ngɔnzɔngɔnzɔ po ngyekye ye ko;

⁴ ofikyɛ mmerɛ pee yeɛ bɛbɔle ye panwu ná beguale ye ngɔnzɔngɔnzɔ ɔ, nakoso ɔtetele ngɔnzɔngɔnzɔ ne anu, yeɛ obubuli panwu ne anu. Na ebiala angora ammrɛ ye ase.

⁵ Alehyeleɛ ne alesaleɛ biala, né ɔwɔ asieleɛ ngumaa nemɔ anu ne mmokaa nemɔ aso ɔteatea nu, ná osa fa nyɔboɛ pepɛpepɛ ye nwo.

⁶ Na mmerɛ bɔ onwuni Yesu wɔ dedeede nen, otuli amirika ɔɔkotole ye nyunu;

⁷ na ɔteane nu serɛserɛ kyɛ, “Yesu, Anwuro Anwuro Nyameɛ n’Awa, nzikyɛ yeɛ me ne wɔ le yɔ ɔ? Meta Nyameɛ ndaen kyɛ, nnɛteetee me.”

⁸ Ofikyɛ né Yesu ahã ahyire ye kyɛ, “Wɔ, sunzum tɛɛ, fi biaa ne anu fite!”

⁹ Afei Yesu bisale ye kyɛ, “Wɔ dumaa li sɛɛ?” Na obuale kyɛ, “Me dumaa li Ɛlɔen, ofikyɛ yɛsone.”

¹⁰ Na ɔsrɛle Yesu pee kyɛ nnɛmaa ɔfoa bɛ fi sɔ aseɛ ne aso.

¹¹ Né mbrako kure pirikua bie bedidi wɔ bokaa ne ngyɛnu.

¹² Na sunzummɔne nemɔ amukoraa bɛsrɛle ye kyɛ, “Foa yɛ kɔ mbrako nemɔ anu, maa yɛɛwura bɛ nu.”

¹³ Na Yesu mane bɛ ate. Na sunzum tɛɛ nemɔ fitele beewurale mbrako nemɔ anu. Na mbrako kure ne piane bɛ nwo wii bɛtorotorole bokaa twɔndworɔnn ne beeguale ɛpo ne anu bewuwuli. Né bɛ somaa kɔyɛ apee nyɔ.

¹⁴ Bɛ bɔ bɛnea mbrako nemɔ aso ne bɛnwatili, na bɛɛbɔle amaneɛ wɔ kuro ne anu ne namue nemɔ anu. Na mmenia hɔle kyɛ bɛkwaanea edwirɛ bɔ wasi ne.

¹⁵ Bɛɛtole Yesu berɛ, na benwuni biaa bɔ mmerɛ bie né sunzummɔne wɔ ye so ne, bɔ ye dumaa li Ɛlɔen ne, kyɛ ɔte berɛ ɔ, kyɛ owura ataadeɛ, ná ye adwene wɔ berɛ ɔ, na besurole.

¹⁶ Na bɛ bɔ benwuni bɔ wasi nen, bɛhane kyɛbɔ biaa bɔ né sunzummɔne wɔ ye so ne osi nyane ayaresa ɔ, ɔne bɔ wato mbrako nemɔ ɔ nwo dwirɛ behyirele mmenia ne.

¹⁷ Na bɛhyɛle ye bo bɛsrɛle Yesu kyɛ ofi bɛ mbɔtam berɛ hɔ.

¹⁸ Na mmerɛ bɔ Yesu yɛle kyɛ ɔkwaatena ɛlɛen nu ne, biaa bɔ mmerɛ bie né ole sunzummɔne ne srɛle ye kyɛ ɔne ye kɔɔtena.

¹⁹ Nakoso Yesu ambene, na mmom osele ye kyɛ, “Kɔ w’awuro, w’abusuafoɛ berɛ, ná kɔhã anwanwadeɛ piri bɔ Awurade ayɔ ama wɔ ɔ, ɔne kyɛbɔ wasi wanwu wɔ anwumvoin ɔ kyire bɛ.”

²⁰ Yiti osili nu hɔle, na ɔhyɛle ye bo bɔle anwanwadeɛ piri bɔ Yesu ayɔ ama ye ɔ nwo dawure wɔ Dekapoli, na ɔyɛle bɛ mukoraa nwanwa.

Yairo awa brasua ne braa bie bɔ mogya tu ye ne

²¹ Yesu tenane ɛlɛen nu pɛle ɛpo ne wale ye si dɔ bieku, na mmenia pee bɛɛpɛle ye nwo beyiale. Né ɔwɔ mboanoa berɛ.

²² Na nyianu sua nu mbanyi nemɔ nu ko wale ye berɛ. Ye dumaa li Yairo. Na onwuni Yesu nen, obutuli ye gya bo berɛ,

²³ na ɔsrɛle ye paa kyɛ, “Mma abaayaa pena wu, yiti mesrɛ wɔ, baafa wɔ sa gua ye so maa ɔte apɔ, ná onya ngoa.”

²⁴ Yiti Yesu ne ye besili nu kyɛ bɛkɔ, na mmenia birikabirika betu belili ye si, na bɛhyerele ye so.

²⁵ Né braa bie bɔ mogya atu ye afoɛ buru ne nyɔ ɔ ɔboka so.

²⁶ Né wanwu amaneɛ pee wɔ safoɛ pee bɛ sa nu, né bɔ ole ye amukoraa wafi ye sa, nakoso anwuro ala yeɛ né anwonyerɛ ne ɔkɔ ɔ.

²⁷ Né wate Yesu nwo dwirɛ dada; yiti owurale mmenia ne anu wale Yesu si berɛ, na ɔfale ye sa hane ye ataadeɛ ne.

²⁸ Ofikyɛ ɔhane kyɛ, “Sɛ mefa me sa mekã ye ataadeɛ ne ala po a, ngɔte apɔ.”

²⁹ Na berɛ ne ala mogya bɔ otu ye ne pɛle, na ɔtele nga wɔ ye nwonaen nu kyɛ ye anwonyerɛ ne ahɔ.

³⁰ Na berɛ ne ala, Yesu tele nga wɔ ye nu kyɛ tumi bie afi ye nu. Ɔkakyili ye nwo wɔ mmenia ne anu, na obisale kyɛ, “Nwa yeɛ ɔfale ye nwo hane m’ataadeɛ ne?”

³¹ Na ye asuafoɛ nemɔ buale ye kyɛ, “Enwu kyɛ mmenia wora he ahyere wɔ so, nakoso ebisa kyɛ, ‘Nwa yeɛ ɔfale ye sa hane me ne?’ ”

³² Na Yesu fale ye nye fale nu kyɛ okonwu sona bɔ wayɔ sɔ ne.

³³ Né braa ne se bɔ wahɔ so wɔ ye nu ɔ, yiti ole esuronyi ne anwopopolɛ oobutuli Yesu nyunu berɛ, na ɔhane nahorɛ ne amukoraa hyirele ye.

³⁴ Na Yesu sele ye kyɛ, “Mma brasua, wɔ gyidie ale wɔ; kɔ asomdwee nu, na w’anwonyerɛ ne ɔhɔ bɔkɔɔ.”

³⁵ Yesu gu so odwudwo nen, bɔfoɛ biemɔ fili nyianu sua nu panyi n’awuro beesele kyɛ, “Ɛwa brasua ne awu. Nzu ati yeɛ egu so ɛha kyerɛkyerɛniɛ ye ɔ?”

³⁶ Nakoso Yesu tele edwirɛ bɔ bɛhane nen, osele nyianu sua nu panyi ne kyɛ, “Nnɛsuro, wɔ de dedi.”

³⁷ Wamma sona fee anni ye si, sana Petro ne Yakobo ne Yakobo aliɛma Yohane ngome.

³⁸ Odwuli nyianu sua nu panyi n’awuro berɛ nen, onwuni kyɛ mmenia bɛteatea nu, besu ná bɛbɔ awuye ɔ.

³⁹ Na owurale awuro berɛ nen, osele bɛ kyɛ, “Nzu ati yeɛ ɛmɔteatea nu ná ɛmɔsu ɔ? Akwadaa ne owwuli, na mmom walafe.”

⁴⁰ Na Bɛserele ye. Nakoso ɔmane bɛ mukoraa befitele, na ɔfale akwadaa ne baba ne ye maame ne bɛ bɔ bɛboka ye so ne ɔne bɛ hɔle nekaa bɔ akwadaa ne la ne.

⁴¹ Ɔsɔle akwadaa ne sa, na osele ye kyɛ, “Talita kumi!” bɔ ye bo kyire kyɛ, “Abaayaa, mekã mekyire wɔ kyɛ, dwɔso!”

⁴² Na berɛ ne ala, abaayaa ne dwɔsole, na ɔnatele. (Né wali afoɛ buru ne nyɔ.) Na bɛ nwo dwirili bɛ paa.

⁴³ Na Yesu kanzole bɛ kitii kyɛ nnɛmaa bɛbɔ so bekyire ebiala, na osele bɛ kyɛ bɛma akwadaa ne nikyee ma oli.