Marko 2 - AHYERƐLƐ KRONGRON

Yesu sa bubuaniɛ bie anwonyerɛ

¹ Ngyẽa kãa bie asi ne, Yesu sa hɔle Kapanɔm, na mmenia tele kyɛ ɔwɔ awuro.

² Yiti mmenia pee wale berɛ bɔ né bɛnzo anoa nu berɛ po ɔ, na ɔhane nzɛmba ne hyirele bɛ.

³ Na bɛfale bubuaniɛ bie bɔ mmenia nna bɛso ye ɔ bɛbrɛle ye.

⁴ Na ɔnate mmenia wora ne ati, bannya atee bangɔ ye nwo berɛ. Yiti bɛpale sua bɔ né Yesu wɔ nu ne aso, betofili nu tokuro, na bedwurale bɛen ne wɔ mmerɛ bɔ né bubuaniɛ ne ɔla so ɔ bɛtole nu dɔ.

⁵ Na Yesu nwuni bɛ gyidie nen, osele bubuaniɛ ne kyɛ, “Mma, bafa wɔ bɔne bahyɛ wɔ.”

⁶ Nakoso ahyerɛlɛfoɛ nemɔ nu biemɔ bɔ né bɛtete berɛ ne, bɛdwenedwene ye nwo wɔ bɛ nu kyɛ,

⁷ “Nzu ati yeɛ biaa he ɔma edwirɛ sɔaa fite ye noa ɔ? Ɔkã musue dwirɛ! Nwa yeɛ ɔkora fa bɔne kyɛ ɔ? Sana Nyameɛ ngome!”

⁸ Na berɛ ne ala, Yesu nwuni ye wɔ ye sunzum nu kyɛ sɔ yeɛ bɛdwenedwene wɔ bɛ nu ɔ, yiti obisale bɛ kyɛ, “Nzu ati yeɛ ɛmɔdwenedwene ɛhemɔ wɔ ɛmɔ nu ɔ?

⁹ Beni yeɛ ɔyɛ mmerɛ ɔ? Kyɛ bɛkɔhã bekohyire bubuaniɛ ne kyɛ, ‘Bafa wɔ bɔne bahyɛ wɔ’, anaa kyɛ bɛkɔhã kyɛ, ‘Dwɔso, fa wɔ bɛen ná nate’?

¹⁰ Na kyɛbɔ ɔkɔyɛ bɔ ɛmɔkonwu kyɛ Sona Awa ne ole tumi wɔ aseɛ so, kyɛ ɔfa bɔne kyɛ ti ɔ,” na osele bubuaniɛ ne kyɛ,

¹¹ “Mekã mekyire wɔ kyɛ, dwɔso, fa wɔ bɛen ne ná kɔ w’awuro!”

¹² Odwɔsole, na berɛ ne ala ɔfale ye bɛen ne, na ofili bɛ mukoraa bɛ nyunu berɛ hɔle. Yiti bɛ mukoraa bɛ nwo dwirili bɛ, na bɛhyɛle Nyameɛ animnyam bɛhane kyɛ, “Yɛnnwuni ɛhe bie le!”

Yesu frɛ Lewi

¹³ Yesu sa hɔle mboanoa; na ɛlɔen ne amukoraa bɛpɛle ye nwo beyiale, na ɔyɛle ngyerɛkyerɛ hyirele bɛ.

¹⁴ Na ɔpɛ nu kɔ nen, onwuni Alfeo awa Lewi kyɛ ɔte nekaa bɔ bedide ɛtoɔ ɔ, na osele ye kyɛ, “Di me si.” Na odwɔsole lili ye si.

¹⁵ Na mmerɛ bɔ ɔtenane ase kyɛ odidi wɔ Lewi awuro berɛ nen, ɛtoɔdidelɛfoɛ ne bɔnefoɛ pee koso bɛ ne Yesu ne ye asuafoɛ nemɔ bɛtenane ase kyɛ bedidi; ofikyɛ né bɛsone yeɛ beli ye si ɔ.

¹⁶ Na ahyerɛlɛfoɛ bɔ bɛte Farasiifoɛ ne, mmerɛ bɔ benwuni Yesu kyɛ ɔne ɛtoɔdidelɛfoɛ ne bɔnefoɛ bedidi nen, bebisale ye asuafoɛ nemɔ kyɛ, “Nzu ati yeɛ ɔne ɛtoɔdidelɛfoɛ ne bɔnefoɛ bɛto asaa bedidi ɔ?”

¹⁷ Na Yesu tele sɔ nen, osele bɛ kyɛ, “Bɛ bɔ bɛte apɔ ne, benhia safoɛ, na mmom bɛ bɔ bɛnde apɔ yeɛ behia ye ɔ. Mamma kyɛ mebaafrɛ teneneefoɛ, na mmom bɔnefoɛ.”

Akɔngyere nwo adwobisa

¹⁸ Né Yohane asuafoɛ ne Farasiifoɛ bɛyɔ akɔngyere, na mmenia biemɔ wale beebisale Yesu kyɛ, “Nzu ati yeɛ Yohane asuafoɛ nemɔ ne Farasiifoɛ asuafoɛ bɛyɔ akɔngyere, ná w’asuafoɛ mɔ de bɛnyɔ akɔngyere ɔ?”

¹⁹ Yeɛ Yesu buale bɛ kyɛ, “Ɔkɔyɛ sɛɛ né atɔmvorɛ bo ama bali abuadaa, wɔ aberɛ bɔ atɔmvorɛ biaa ne ɔne bɛ wɔ berɛ ɔ? Bɛ ne atɔmvorɛ biaa ne wɔ berɛ angome ye de, bɛngɔhora ngoli abuadaa.

²⁰ Mmerɛ bie kɔwa bɔ bɛkɔfa atɔmvorɛ biaa ne bekofi bɛ nwo bɛkɔhɔ ɔ, na afei bekoli abuadaa sɔ mmerɛ ne.

²¹ Ebie mva ɛtena monɛ sii nda ataadeɛ daa nu; ɔba ye sɔ a, ndetamuɛ ne te fi nu, foforɛ ne te fi daa ne anu, na ye tetelɛ ne yɛ piri.

²² Yeɛ ebie mva nzaa monɛ ngua nwomaa ngotoku daa nu; ɔba ye sɔ a, nzaa monɛ ne kɔma ngotoku nemɔ kote, na nzaa ne kohwie kogua, yeɛ ngotoku nemɔ koso kɔsɛkye. Na mmom bɛfa nzaa monɛ begua ngotoku foforɛ nu.”

Afofikyẽa nwo adwobisa

²³ Afofikyẽa bie, ɔɔfale aburoo boo bie anu. Na bɛkɔ nen, ye asuafoɛ nemɔ hyɛle ye bo bɛpombale aburoo ne bie.

²⁴ Na Farasiifoɛ nemɔ bisale ye kyɛ, “Nea, nzu ati yeɛ bɛ́yɔ bɔ otia mmeraa kyɛ bɛyɔ ye afofikyẽa ɔ?”

²⁵ Na ye koso obuale bɛ kyɛ, “Aso ɛmɔkkenngale bɔ Dawide yɔle ne le, mmerɛ bɔ olili amia ná ɛhɔen huni ye ne bɛ bɔ bɛboka ye so ne?

²⁶ Kyɛbɔ ɔhɔle Nyameɛ awuro, wɔ ɔsɔfo panyi paa Abiata aberɛ so, ná oolili paanoo krongron bɔ otia mmeraa kyɛ ebiala koli ɔ, sana asɔfo mɔ ngome yeɛ bedi ɔ, ná osa mane bɛ bɔ bɛboka ye so ne koso bie ne?”

²⁷ Na osele bɛ kyɛ, “Sona ti yeɛ bɛhyehyɛle afofikyẽa ɔ, ná nna afofikyẽa ti yeɛ bɛbɔle sona ɔ.

²⁸ Yiti Sona Awa ne te afofikyẽa so koso Mene.”