Marko 16 - AHYERƐLƐ KRONGRON

Yesu wutingyelɛ

¹ Na afofikyẽa ne pɛle nu ne, Maria Magdalene, Yakobo maame Maria ne Salome bɛtɔle ayirefona kyɛ bɛkwaafa bɛpopa ye.

² Na dapɛn ne anu kyẽa bɔ oli moa ne, ye ngyerɛmɔ tutututu, bɛhɔle asieleɛ ne aso, bɔ né eyia apukye ɔ.

³ Na bebisabisale bɛ nwo kyɛ, “Nwa yeɛ okomunu nyɔboɛ ne kofi asieleɛ ne noa kɔma yɛ ɔ?”

⁴ Nakoso bɛmane bɛ ti so nen, benwuni kyɛ nyɔboɛ ne amunu ato ahameɛ; né ɔte piri paa.

⁵ Bewurale asieleɛ ne anu ne, benwuni aberandeɛ bie bɔ owura ataadeɛ fufue tendenn kyɛ ɔte asieleɛ ne famaa so berɛ, na bɛ kunu tele bɛ.

⁶ Na osele bɛ kyɛ, “Nnɛmɔma ɛmɔ kunu te ɛmɔ. Ɛmɔpena Nasarɛteniɛ Yesu bɔ bɛbɔle ye mmeamudua nu ne. Watingye, ɔnne wa. Ɛ́mɔnea nekaa bɔ bɛfale ye bɛtole ɔ!

⁷ Nakoso ɛmɔɔbɔ ye asuafoɛ nemɔ ne Petro amaneɛ kyɛ ódi ɛmɔ nyunu moa kɔ Galilea; na berɛ yeɛ ɛmɔkonwu ye ɔ, kyɛbɔ ɔhã hyirele ɛmɔ ne.”

⁸ Na befili asieleɛ ne anu befitele ndɛndɛ bɛnwati bɛhɔle; ofikyɛ ahunundetelɛ ne ɛserɛ tɔle bɛ so. Na bammɔ so bangyire ebiala, ofikyɛ né besuro.

Yesu ye ye nwo ali kyire Maria Magdalene

⁹ [Na kyẽa bɔ oli moa ne ngyerɛmɔ tutututu bɔ odwɔsole nen, olili moa yele ye nwo ali hyirele Maria Magdalene, bɔ otuli sunzummɔne nzoo fili ye nu ne.

¹⁰ Na ye koso ɔɔbɔle bɛ bɔ bɛ ne Yesu natele, bɔ né bɛ wora abɔ ná besu ne amaneɛ.

¹¹ Nakoso bɛtele kyɛ watingye ná ɔte ase, ná wanwu ye nen, banne banni.

Yesu ye ye nwo ali kyire asuafoɛ nyɔ

¹² Na ɛhe asi ne, ɔyele ye nwo ali sue foforɛ nu hyirele bɛ nu nyɔ, wɔ mmerɛ bɔ né bɛnate atee so bɛkɔ akuraa nu ɔ.

¹³ Na besale bɛ si bɛɛbɔle bɛ ngaa ne amaneɛ, na banne bɛ koso banni.

Yesu ye ye nwo ali kyire asuafoɛ buru ne ko ne

¹⁴ Na ɛhemɔ asi ne, ɔyele ye nwo ali hyirele asuafoɛ buru ne ko ne wɔ mmerɛ bɔ né bedidi ɔ. Na ohwili bɛ nyunu wɔ elelɛ bɔ banne banni, ɔne b’asoserɛ nwo, ofikyɛ banne bɛ bɔ benwuni ye kyɛ watingye ne banni.

Yesu fa nzɛmba ne soma bɛ

¹⁵ Na ɔhã hyirele bɛ kyɛ, “Ɛmɔhɔ wiase amukoraa bɛɛhã nzɛmba ne behyire abɔdeɛ amukoraa.

¹⁶ Sona bɔ okole koli ná bɛkɔbɔ ye asu nen, bekole ye ngoa; nakoso bɔ onne nni ne de, bekobua ye foɛ.

¹⁷ Na bɛ bɔ bede bedi ne, nzɛngyerɛnneɛ hemɔ yeɛ okoli bɛ si ɔ: Me dumaa nu, bekotutu sunzummɔne mɔ; bɛkɔhã edwudwolɛ foforɛ mɔ;

¹⁸ bɛkɔma ewoo mɔ so, na sɛ bɛno nikyee biala bɔ ɛborɔ wɔ nu a, ɔngɔyɔ bɛ huu; bɛkɔfa bɛ sa bekogua ayarefoɛ so maa bɛkɔte apɔ.”

Nyameɛ fa Yesu kɔ nyameɛso

¹⁹ Na afei, Awurade Yesu dwudwo hyirele bɛ yiele nen, Nyameɛ fale ye hɔle nyameɛso, na ɔɔtenane Nyameɛ sa famaa so.

²⁰ Na bɛ de, bɛhɔle bɛɛhane nzɛmba ne nekaa biala, na Awurade fale bɛ yɔle adwuma, na ɔfale nzɛngyerɛnneɛ bɔ ɔboka so ne aso ɔfoale edwirɛ ne aso. Amen.]