Marko 14 - AHYERƐLƐ KRONGRON

Bɛbɔ Yesu ti so porɛ

¹ Né waha elenyɔ maa bedi Abɔtra ne Paanoo Kabrɛdi aluolue ne. Na asɔfo mbanyi ne ahyerɛlɛfoɛ nemɔ bɛpenane atee bɔ bɛkɔfa so bɛkɔhye Yesu kudɛɛ, ná bahu ye ɔ.

² Na bɛhane kyɛ, “Yɛngɔyɔ sɔ wɔ aluolue ne abo, anyɔ a né mmenia bayɔ basabasa wɔ maen ne anu.”

Braa bie tutu sakyeɛfona gua Yesu ti so

³ Na mmerɛ bɔ né Yesu wɔ Betania, wɔ Simɔn kwataniɛ n’awuro berɛ, bɔ ɔtenane ase kyɛ odidi nen, braa bie bɔ otira towaa nyɔboɛ serɛ, bɔ sakyeɛfona nyɔboɛ serɛ wɔ nu ɔ wale berɛ. Ɔbɔle towaa ne, na otutuli sakyeɛfona ne guale Yesu ti so.

⁴ Nakoso né ebiemɔ wɔ berɛ bɔ wanyɛ bɛ fɛ wɔ bɛ nu ɔ, na besisele kyɛ, “Nzu ati yeɛ wasɛkye sakyeɛfona ye ɔ?

⁵ Ahaa bɛkɔhora bɛkɔtɔne sakyeɛfona he maa ɔkɔbo denare ɛyaa nza, ná bafa sikaa ne bama ehiafoɛ.” Na bedwudwole braa ne.

⁶ Nakoso Yesu sele kyɛ, “Ɛ́mɔyakyi ye! Nzu ati yeɛ ɛmɔha ye ɔ? Bɔ wayɔ wama me ne, ɔte nikyee piri paa.

⁷ Ofikyɛ ɛmɔ ne ehiafoɛ wɔ berɛ daa, na mmerɛ biala bɔ ɛmɔkuro ne, ɛmɔkɔhora bɛkɔboka bɛ; nakoso me de, nna ɛmɔ ne me yeɛ bɛwɔ berɛ daa ɔ.

⁸ Bɔ ɔkɔhora ye yɔ yeɛ wayɔ ye; wali moa wapopa me nipadua wafa wanwondɛ me sielɛ.

⁹ Nahorɛ nu, mekã mekyire ɛmɔ kyɛ, ewiase nekaa biala bɔ bɛkɔhã nzɛmba he nen, bɔ braa he ayɔ ne koso, bɛkɔhã bɛkɔfa bɛkɔyɛ ye ngayeɛ.”

Yudase pene so kyɛ ɔkɔye Yesu kɔma

¹⁰ Yeɛ Yudase Yiskariote, bɔ ɔte asuafoɛ buru ne nyɔ nemɔ anu ko ne, ɔhɔle asɔfo mbanyi nemɔ berɛ kyɛ ɔkɔye Yesu kɔma bɛ.

¹¹ Na bɛtele sɔ dwirɛ ne nen, ɔyɛle bɛ fɛ, na bɛbɔle ye anohoba kyɛ bɛkɔma ye sikaa. Yiti ɔpenane atee bɔ ɔkɔfa so kɔye ye kɔma, wɔ mmerɛ bɔ ɔsɛ ɔ nu.

Yesu ne ye asuafoɛ di Abɔtra aluolue

¹² Paanoo kabrɛdi aluolue kyẽa bɔ oli moa, bɔ beku Abɔtra boaen nen, Yesu asuafoɛ nemɔ bisale ye kyɛ, “Nisua yeɛ ekuro kyɛ yɛkosiesie maa ekodi Abɔtra aleɛ ne ɔ?”

¹³ Na ɔsomane ye asuafoɛ nemɔ nyɔ, na osele bɛ kyɛ, “Ɛmɔhɔ kuro ne anu dɔ, na biaa bie bɔ ɔso bua bɔ nzue wɔ nu ɔ okoyia ɛmɔ; ɛ́mɔli ye si,

¹⁴ na awuro bɔ okoowura nu ne, ɛmɔhã behyire awuro ne mene kyɛ: Kyerɛkyerɛniɛ ne nwa, ‘Ɛwɔfoɛ sua bɔ nu yeɛ me ne m’asuafoɛ yɛkoli Abɔtra aleɛ nen, ɔwɔ ni?’

¹⁵ Na okohyire ɛmɔ asaso pirikua bɔ basiesie nu kama dada wɔ aborɔsaen so, na berɛ yeɛ ɛ́mɔsie Abɔtra aleɛ ne bɛ́ma yɛ ɔ.”

¹⁶ Na ye asuafoɛ nemɔ besili nu bɛhɔle, beedwuli kuro ne anu, na benwuni nikyee biala kyɛbɔ ɔhã hyirele bɛ ne; na besiesiele Abɔtra aleɛ ne.

¹⁷ Na odwuli nɔsoa nen, ɔne asuafoɛ buru ne nyɔ nemɔ bɛwale.

¹⁸ Na bɛtenane ase bɔ bedidi nen, Yesu sele kyɛ, “Nahorɛ nu, mekã mekyire ɛmɔ kyɛ, ɛmɔ bɔ ɛmɔ ne me yɛdidi ye, ɛmɔ anu ko kɔye me kɔma.”

¹⁹ Na bɛ wora bɔle, na bɛhyɛle ye bo bebisabisale ye ngoko ngoko kyɛ, “Me ahɔ anaa?”

²⁰ Na obuale bɛ kyɛ, “Mmenia buru ne nyɔ ye anu ko, bɔ ɔne me to asaa didi wɔ talie nu ye, ye ɔ.

²¹ Sona Awa ne ɔ́kɔ kyɛbɔ bahyerɛ bafa ye nwo ne, nakoso kuro sona bɔ ɔkɔye Sona Awa ne kɔma ne de, ye yaakɔ! Sɛ banwo sɔ sona ne po a, ahaa ɔte paa ma ye!”

Awurade Adidie ne bohyɛlɛ

²² Na bedidi nen, Yesu fale paanoo, oyirale so, obubuli nu, ɔfa mane bɛ, na osele kyɛ, “Ɛmɔle, ɛhe te me nwonaen.”

²³ Na ɔfale kulie, na ɔlale ase nen, ɔfa mane bɛ, na bɛ mukoraa bɛnone bie.

²⁴ Na osele bɛ kyɛ, “Ɛhe te me mogya bɔ ɔte apam foforɛ mogya bɔ mmenia pee ti béhwie bégua ɔ.

²⁵ Nahorɛ nu, mekã mekyire ɛmɔ kyɛ, mengɔno bobe nzaa ko kɔpem kyẽa bɔ ngɔno ye foforɛ wɔ Nyameɛ ahennie ne anu ɔ.”

²⁶ Afei bɛtole ayɛyelɛ dwein, na befili berɛ bɛhɔle Olive Bokaa ne aso.

Yesu hyɛ Petro nzano nwo ngɔm

²⁷ Na Yesu sele bɛ kyɛ, “Ɛmɔ amukoraa ɔkɔyɛ sundidua kɔma ɛmɔ, ofikyɛ bahyerɛ kyɛ, ‘Ngopura mmoaenneafoɛ ne, na mmoaen ne kɔbɔ aya.’

²⁸ Nakoso me wutingyelɛ asi ne, ngoli ɛmɔ nyunu moa ngɔhɔ Galilea.”

²⁹ Yeɛ Petro sele ye kyɛ, “Sɛ ɔkɔyɛ sundidua kɔma bɛ mukoraa po a, me de, ɔngɔyɛ sundidua ngɔma me.”

³⁰ Na Yesu sele ye kyɛ, “Nahorɛ nu, mekã mekyire wɔ kyɛ, ɛnɛ kɔngɔen ye, kyɛ akɔ bɔ pɛen nyɔ ne, né aha ye pɛen nza kyɛ ɛnze me.”

³¹ Nakoso Petro sili so anyeborolɛ so kyɛ, “Sɛ ɔba kyɛ me ne wɔ yɛwu po a, mengɔpa wɔ si le.” Na sɔ ala yeɛ bɛ mukoraa bɛhane ɔ.

Yesu bɔ mbaeɛ wɔ Getsemane

³² Na bedwuli nekaa bie bɔ bɛfrɛ berɛ Getsemane, na osele ye asuafoɛ nemɔ kyɛ, “Ɛ́mɔtena wa, na mekwaabɔ mbaeɛ.”

³³ Na ɔfale Petro, Yakobo ne Yohane bokale ye nwo so, na aworabɔlɛ ne ahunundetelɛ hyɛle ye bo tɔle ye so.

³⁴ Na osele bɛ kyɛ, “Me kra wora abɔ paa kɔ ewue nu; ɛ́mɔtena wa, ná ɛ́mɔwɛne!”

³⁵ Afei ɔhɔle ye nyunu kãa, obutuli berɛ, na ɔbɔle mbaeɛ kyɛ, sɛ ɔkɔyɛ yé a, ahaa sɔ mmerɛ ne ofi ye so hɔ.

³⁶ Na ɔhane kyɛ, “Baba, Baba, nikyee biala nzo wɔ yɔ. Ye sɔ kulie he fi me so! Nakoso nnɛyɔ bɔ mepena, na mmom bɔ ɛpena ɔ.”

³⁷ Na ɔwale oonwuni bɛ kyɛ balela, na obisale Petro kyɛ, “Simɔn, alafe hɔ ɔ? Angora anwɛne dɔnhwere komapɛ po?

³⁸ Ɛ́mɔwɛne ná ɛ́mɔbɔ mbaeɛ, ná ɛmɔangɔ nzɔhwɛ nu. Sunzum ne kuro de, nakoso anwoɔnaen ne yɛ mmerɛ.”

³⁹ Osa hɔle ɔɔbɔle mbaeɛ, na ɔhane edwirɛ komapɛ ne ala.

⁴⁰ Na osa wale bɛ nwo berɛ nen, onwuni bɛ kyɛ balafe bieku; né bɛ nye twaa so, na bannwu mmuayɛɛ bɔ bɛ́fa bɛ́ma ye ɔ.

⁴¹ Osa wale ye pɛen nza so, na osele bɛ kyɛ, “Ɛmɔtɛda, ɛmɔtɛde bɛ nwome? Wayɛ yee! Mmerɛ ne adwu! Ɛ́mɔnea, bɛ́ye Sona Awa ne béwura bɔnefoɛ sa.

⁴² Ɛ́mɔdwɔso! Ɛ́mɔma yɛhɔ! Ɛ́mɔnea, bɔ ɔbaaye me ma ne, wawa!”

Bɛhyele Yesu

⁴³ Na berɛ ne ala, ogu so bɔ odwudwo nen, Yudase bɔ ɔte asuafoɛ buru ne nyɔ nemɔ anu ko ne, ɔwale. Na né ɛlɔen bɔ betiratira ngrandɛ ne mmopura, bɔ befi asɔfo mbanyi ne ahyerɛlɛfoɛ ne maen mbanyi mɔ berɛ ɔ bɛboka ye so.

⁴⁴ Na sona bɔ ɔyele ye mane ne, né wali moa wamaa bate ye bo kyɛ, “Sona bɔ ngɔfe ye noa ne, ye ɛne; ɛ́mɔhye ye, ná ɛ́mɔtira ye nu yé bɛfa ye bɛhɔ.”

⁴⁵ Na ɔwale ne, ɔhɔle Yesu nwo berɛ ndɛndɛ so, na osele kyɛ, “Rabi”, na ɔfele ye noa.

⁴⁶ Na bɛɛsosɔle ye nu bɛhyele ye.

⁴⁷ Na bɛ bɔ né begyigyi berɛ ne, bɛ nu ko hwene ngrandɛ, na ɔfa bɔle ɔsɔfo panyi paa n’akoaa pɛle ye so.

⁴⁸ Na Yesu sele bɛ kyɛ, “Yiti ngrandɛ ne mmopura yeɛ ɛmɔfa bɛbakye me ɔ, kyɛ awerɔm awueniɛ bɔ ɛmɔba ye so ɔ?

⁴⁹ Né me ne ɛmɔ yɛwɔ asɔneyɛɛ sua ne anu meyɛ ngyerɛkyerɛ daa, nakoso ɛmɔangye me; na Ahyerɛlɛ ne, kyɛbɔ ɔkɔwa nu ti ɔ.”

⁵⁰ Afei asuafoɛ nemɔ amukoraa bɛyakyili ye berɛ bɛnwatili.

⁵¹ Na aberandeɛ bie bɔ né wafa nwera wapɛ ye bo ɔ olili Yesu si. Bɛhyele ye,

⁵² nakoso ɔyakyili nwera ne berɛ fale ye nwo tole so nwati hɔle.

Yesu gyi Yuda badwa nyunu

⁵³ Bɛfale Yesu bɛhɔle ɔsɔfo panyi paa ne berɛ. Né asɔfo mbanyi ne maen mbanyi ne ahyerɛlɛfoɛ nemɔ amukoraa baayia berɛ.

⁵⁴ Na Petro lili ye si wɔ nziɛ nziɛ oodwuli ɔsɔfo panyi paa n’aluo berɛ, na ɔne asomvoɛ nemɔ bɛtenane berɛ kyɛ ɔto see.

⁵⁵ Na asɔfo mbanyi ne badwafoɛ nemɔ amukoraa bɛpenane adanzeɛ bɔ bɛkɔfa bekotia Yesu, bɔ bekogyina so bekohu ye ɔ, nakoso bannya bie;

⁵⁶ ofikyɛ mmenia pee bɔ belili adanzewia betiale ye ne, bɛ noa anzɛ.

⁵⁷ Na ebiemɔ dwɔsole belili adanzewia betiale ye kyɛ,

⁵⁸ “Yɛtele kyɛ ɔka kyɛ, ‘Ngobubu asɔneyɛɛ sua he bɔ bafa asaa yeɛ basi ne, na ngɔfa ɛlɛsa ngosi foforɛ bɔ nna asaa yeɛ bɛfa besili ɔ.’ ”

⁵⁹ Nakoso ɛhe po nwo adanzeɛ ne, bɛ noa anzɛ.

⁶⁰ Afei ɔsɔfo panyi paa ne dwɔsole gyinane b’afia berɛ, na obisale Yesu kyɛ, “Yiti engobua ye nwo bie? Nzikyɛ anwo yeɛ mmenia hemɔ bédi adanzeɛ bétia wɔ ye?”

⁶¹ Nakoso Yesu yɛle dinn, na wammua ye nwo bie. Na ɔsɔfo panyi paa ne sa bisale ye kyɛ, “Wɔ ole Kristo ne, Bɔ Wanya Saleɛ n’Awa ne anaa?”

⁶² Na Yesu buale kyɛ, “Yoo, Me ole ye; na ɛmɔkonwu Sona Awa ne kyɛ ɔte Tumi sa famaa so, na ɔ́ba anwuro munungum nu ɔ!.”

⁶³ Yeɛ ɔsɔfo panyi paa ne sunzuale (ye bɔbɔ) ye ndaadeɛ nu hane kyɛ, “Nzikyɛ adanzefoɛ bieku yeɛ yɛhia ɔ?

⁶⁴ Yeɛ ɛmɔate ye musue dwirɛ ne. Ɛmɔdwene ye nwo sɛ?” Na bɛ mukoraa bebuale ye foɛ kyɛ ɔfata ewue.

⁶⁵ Na ebiemɔ hyɛle ye bo bɛfefele nwɔserɛ beguale ye nwo, bɛkatale ye nye, na bɛbobɔle ye, na besele ye kyɛ, “Hyɛ ngɔm!” Na asomvoɛ nemɔ bobɔle ye nye so.

Petro po Yesu

⁶⁶ Né Petro wɔ aseɛnwo dɔ, wɔ aluo berɛ, na ɔsɔfo panyi paa n’afaneɛ nemɔ nu ko wale berɛ.

⁶⁷ Onwuni Petro kyɛ ɔto see, ɔneane ye haa, na osele kyɛ, “Wɔ koso, né ɛne Nasarɛteniɛ Yesu yeɛ bɛnate ɔ!”

⁶⁸ Nakoso Petro sale kyɛ, “Bɔ ɛkã ye, menze, yeɛ mende ye bo po.” Yeɛ ofili berɛ hɔle ngurolo ne anu dɔ, [na akɔ bɔle.]

⁶⁹ Afaneɛ ne sa nwuni ye, na ɔhyɛle ye bo hã hyirele bɛ bɔ begyigyi berɛ ne kyɛ, “Akoaa he boka bɛ so.”

⁷⁰ Na Petro sale bieku. Na wangyɛ biala, bɛ bɔ begyigyi berɛ ne sa sele Petro kyɛ, “Amba, ɛboka bɛ so, ofikyɛ ɛte Galileaniɛ, [na wɔ dwudwolɛ po kyire sɔ.”]

⁷¹ Na ɔhyɛle ye bo lili amoen tale ndaen kyɛ, “Biaa he bɔ ɛmɔkã ye nwo dwirɛ ye, menze ye!”

⁷² Na berɛ ne ala, akɔ bɔle ye pɛen nyɔ so. Na Petro kayele edwirɛ bɔ Yesu hã hyirele ye ne, kyɛ, “Kyɛ akɔ bɔ pɛen nyɔ ne, né ahã ye pɛen nza kyɛ ɛnze me.” Na otikyele esuɛ nu.