Marko 13 - AHYERƐLƐ KRONGRON

Asɔneyɛɛ sua ne sɛkyelɛ nwo ngɔm

¹ Na mmerɛ bɔ né Yesu fi asɔneyɛɛ sua ne anu ofite nen, ye asuafoɛ nemɔ anu ko sele ye kyɛ, “Kyerɛkyerɛniɛ, nea nyɔboɛ nyemene biemɔ ne sua nyemene biemɔ!”

² Na Yesu buale ye kyɛ, “Yeɛ enwu sua mbiri mbiri hemɔ? Bɛngɔyakyi nyɔboɛ bɔ ogyi nyɔboɛ so ɔ wɔ wa bɔ bengodwiri bengogua ase ɔ.”

Ndaneanyeɛ ne amaneɛnwunɛ

³ Né Yesu te Olive Bokaa ne aso, wɔ asɔneyɛɛ sua ne ndendeneɛ so; na Petro, Yakobo, Yohane ne Andrea bebisale ye ahameɛ kyɛ,

⁴ “Kã kyire yɛ, kyinzu yeɛ ɛhe kosi ɔ? Yeɛ nzɛngyerɛnneɛ beni yeɛ okohyire mmerɛ bɔ ɛhemɔ amukoraa bɛkɔwa nu ɔ?”

⁵ Na Yesu hyɛle ye bo hã hyirele bɛ kyɛ, “Ɛmɔnea yé na ebiala annakalaka ɛmɔ.

⁶ Ofikyɛ mmenia pee bele me dumaa bɛkɔwa bɛkɔɔhã kyɛ, ‘Me ole ye,’ na bɛkɔlakalaka mmenia pee.

⁷ Na sɛ ɛmɔte koɛ mɔ ne koɛ mɔ nwo ngunga a, nnɛmɔma ɛmɔ kunu tete ɛmɔ; ofikyɛ odi kyɛ ɛhemɔ sisi, nakoso né ayieleɛ ne onnya oddwuli.

⁸ Na maen kodwɔso kotia maen, ahennie kodwɔso kotia ahennie, aseɛwosolɛ kosisi nekaa ahoroɔ, yeɛ ɛhɔen [ne ɛhawo] kɔwa, Na ɛhemɔ amukoraa bɛte aworɛ nu yealɛ bɔ oli moa ne.

⁹ Nakoso ɛmɔ de, ɛ́mɔla ɛmɔ nwo so, ofikyɛ bɛkɔye ɛmɔ bɛkɔma mbanyi badwa, na bɛkɔbo ɛmɔ wɔ nyianu sua mɔ nu. Na ɔnate me ti bɛkɔfa ɛmɔ bekoogyina amrado mɔ ne ahemvo nyunu, na ɛmɔkoli adanzeɛ bekohyire bɛ.

¹⁰ Na nzɛmba ne, odi kyɛ bedi moa bɛkã bekyire maen maen amukoraa.

¹¹ Na sɛ bɛkye ɛmɔ bɛfa ɛmɔ bɛkɔ badwa nyunu a, nnɛma ɛmɔdi moa bɛdwenedwene bɔ ɛmɔkɔhã ɔ nwo. Na bɔ bɛkɔfa bɛkɔma ɛmɔ sɔ mmerɛ ne ala nu ne, ye ala yeɛ odi kyɛ ɛmɔkã ɔ; ofikyɛ nna ɛmɔ yeɛ ɛmɔdwudwo ɔ, na mmom Sunzum Krongron ne ɔ.

¹² Aliɛmaa kɔye aliɛmaa kɔma maa bekohu ye, seɛ kɔye baa kɔma, na mmaa kodwɔso kotia awofoɛ, ná bamaa bahu bɛ.

¹³ Ɔnate me dumaa ti, mmenia mukoraa bɛkɔpɔ ɛmɔ, nakoso bɔ okotindim koodwu ayieleɛ nen, ye yeɛ bekole ye ngoa ɔ.

Akyiwadeɛ bɔ ɔbɔ maen ne

¹⁴ “Na sɛ ɛmɔnwu akyiwadeɛ bɔ ɔbɔ maen ne, kyɛ ogyi nekaa bɔ ɔnzɛ kyɛ ogyina a, (bɔ ɔkenga ne, maa ɔte ye bo), ye de, bɛ bɔ bɛwɔ Yudea ne, odi kyɛ bɛnwati bɛkɔ mmokaa nemɔ aso;

¹⁵ na sona bɔ ɔwɔ sua ti afia ne, onni kyɛ odwu ase, anaa owura ye awuro nu kyɛ ɔkwaaye nikyee bie fite.

¹⁶ Sona bɔ ɔwɔ fieso ne, onni kyɛ osa ye si kɔ kyɛ ɔkwaafa ye tena.

¹⁷ Na pemvoɛ mɔ ne bɛ bɔ bɛma mmaa nyɔfone wɔ sɔ mmerɛ ne anu de, bɛ yaakɔ!

¹⁸ Na ɛ́mɔbɔ mbaeɛ ná wanzi wɔ prakasua mmerɛ.

¹⁹ Ofikyɛ, amaneɛnwunɛ bɔ ɔkɔwa sɔ mmerɛ ne anu ne, ofi mmerɛ bɔ Ɛdangama Nyameɛ bɔle aleɛ bɔ ɔbaadwu ɛnɛ ɔ, ye sɛso ɔwwale le, na sɔ bieku koso ngɔwa le.

²⁰ Na sɛ Awurade ande sɔ ngyẽa ne aso a, ahaa ongole sona biala ngoa; nakoso ɔnate bɛ bɔ waneanea nu waye bɛ, bɔ ɔsale nu yele bɛ ne ati, wate ngyẽa ne aso.

²¹ “Na sɛ ebie kã kyire ɛmɔ kyɛ, ‘Nea, Kristo ne wɔ wa!’ anaakyɛ, ‘Nea, ye yeɛ ɔwɔ dɔ ne!’ a, nnɛma ɛmɔde bedi.

²² Ɔnate kyɛ, kristo ngondombofoɛ ne ngɔmhyɛlɛfoɛ ngondombofoɛ kodwɔso, na bɛkɔyɔ nzɛngyerɛnneɛ ne anwanwadeɛ mɔ, na sɛ ɔkɔyɛ yee a, bɛkɔlakalaka bɛ bɔ Nyameɛ aneanea nu waye bɛ ne po.

²³ Yiti ɛ́mɔla ɛmɔ nwo so, ofikyɛ mali moa mahã ye mukoraa mahyire ɛmɔ dada.

Sona Awa ne walɛ

²⁴ “Na sɔ mmerɛ ne anu amaneɛnwunɛ ne asi ne, eyia kɔkakyi awosii, na ɛsraen ngɔta,

²⁵ anwuro nzramaa kotutu kogua ase, na anwuro tumi mɔ kɔwoso.

²⁶ Na afei mmenia konwu Sona Awa ne kyɛ ole tumi piri ne animnyam ɔ́ba wɔ munungum nu ɔ.

²⁷ Na ɔkɔsoma ye abɔfo mɔ maa bɛkɔɔboaboa bɛ bɔ waneanea nu waye bɛ nemɔ bekofi mvrama nna nemɔ anu, kofi aseɛ noa koodwu anwuro noa.

Borɔdoma bakaa ne nwo nikyeesualɛ

²⁸ “Borɔdoma bakaa nwo anyandera ne, ɛ́mɔma ɔyɛ nikyeesualɛ ma ɛmɔ: Sɛ ye mmaen nemɔ nya yɛ frɔmfrɔm, ná ɔfefɛ a, né ɛmɔse kyɛ ahuhuro mmerɛ apingye.

²⁹ Sɔ ala yeɛ ɛmɔ koso, sɛ ɛmɔnwu kyɛ sɔ nningyein hemɔ besisi a, odi kyɛ ɛmɔnwu kyɛ wapingye, na wadwu anoa nu berɛ.

³⁰ Nahorɛ nu, mekã mekyire ɛmɔ kyɛ, aworɛ ndoatoasoɛ he ngɔpɛ nu, sana ɛhemɔ amukoraa basisi koraka.

³¹ Anwuro ne aseɛ kɔpɛ nu kɔhɔ, nakoso me dwirɛ de, ɔngɔpɛ nu le.

Kyẽa ne ne dɔnhwere ne

³² “Nakoso kyẽa ne ne dɔnhwere ne de, ebiala nze, abɔfo mɔ bɔ bɛwɔ nyameɛso po bɛnze, yeɛ Baa ne koso nze, sana Baba ne ngome.

³³ Ɛ́mɔla ɛmɔ nwo so, ɛmɔwɛne ná ɛmɔbɔ mbaeɛ, ofikyɛ ɛmɔnze kyẽa horɛ bɔ mmerɛ ne kɔwa ɔ.

³⁴ Ɔte kyɛ biaa bie bɔ otuli atee yakyili ye awuro berɛ, bɔ ɔfale ye awuro ne wurale ye ngoaa mɔ sa, bɔ ɔfale ebiala adwuma wura ye sa ngoko ngoko, ná ɔhyɛle anoa wɛmvoɛ ne kyɛ ɔwɛne ɔ.

³⁵ Yiti ɛ́mɔwɛne! Ofikyɛ ɛmɔnze kyẽa horɛ bɔ awuro ne mene kɔwa ɔ: sɛ nɔsoa oo, anaa abunnamu oo, anaa alebahyene oo, anaa ngyerɛmɔ oo,

³⁶ ná wammamvu ɛmɔ nu wannwu ɛmɔ kyɛ ɛmɔalela ɔ.

³⁷ Na bɔ mekã mekyire ɛmɔ ye, mekã mekyire mmenia mukoraa. Ɛ́mɔwɛne!”