Marko 12 - AHYERƐLƐ KRONGRON

Hwɛsofoɛ bɔnefoɛ biemɔ nwo anyandera

¹ Na Yesu hyɛle ye bo dwudwo hyirele bɛ wɔ anyandera nu kyɛ, “Biaa bie yɔle bobe boo, olele ye nwo bra yiale, ɔpɛle nu kumaa bɔ betwi nzaa wɔ nu ɔ, osili abandenden wɔ nu, na ɔfa wurale hwɛsofoɛ biemɔ sa, na otuli atee hɔle maen bie aso.

² Na bobe mmaa telɛ dwuli ne, ɔsomane ye somvoɛ ko maa ɔhɔle hwɛsofoɛ nemɔ berɛ, kyɛ oole bobe boo ne anu mmaa ne bie wɔ bɛ berɛ ɔbrɛ ye.

³ Na hwɛsofoɛ nemɔ hyele ye bɛbole ye, na bɛmaa osa hɔle nzanza.

⁴ Osa somane somvoɛ foforɛ maa ɔhɔle bɛ berɛ, na ye wora bɛbɔle ye fɛɛ, na beguale ye nyunu ase.

⁵ Na ɔsomane somvoɛ foforɛ bieku, na ye de, behuni ye; na foforɛ pee bɔ osa somane bɛ ne wora, bɛbole ebiemɔ, yeɛ ebiemɔ wora behuni bɛ.

⁶ Afei né waha ye sona ko: ɔte ɔwa bɔ ɔla ye ahone nwo ɔ. Nziɛ ye, ɔsomane ye bɛ berɛ, na osele kyɛ, ‘Mma ne de, bɛkɔfa anidie bɛkɔma ye.’

⁷ Nakoso sɔ hwɛsofoɛ nemɔ sisele bɛ nwo kyɛ, ‘Bɔ odi ye bia ne ɛhe; ɛmɔbra ma yɛhu ye, ná agyapadeɛ ne ɔyɛ yɛ deɛ!’

⁸ Yiti bɛhyele ye behuni ye, na befindini ye bɛtole bobe boo ne asi dɔ.

⁹ “Nzikyɛ nikye yeɛ bobe boo mene ne ɔkɔyɔ ɔ? Ɔkɔwa koohu hwɛsofoɛ nemɔ, ná wafa bobe boo ne wawura mmenia foforɛ sa.

¹⁰ Aso ɛmɔkkenngale Ahyerɛlɛ he le, kyɛ, ‘Nyɔboɛ bɔ suasilɛfoɛ bɛpole ye ne, ye ala yeɛ waayɛ sua ne ndweasoɛ nyɔboɛ titire ɔ,

¹¹ Awurade yeɛ wayɔ ɛhe ɔ, na ɔyɛ nwanwa wɔ yɛ nye so’?”

¹² Na ahaa bɛpena kyɛ bɛkye Yesu ɔ, ofikyɛ benwuni kyɛ anyandera bɔ obuli ne, ɔne bɛ. Nakoso né besuro ɛlɔen ne, yiti bɛyakyili ye berɛ bɛhɔle.

Ɛtoɔtualɛ nwo adwobisa

¹³ Na bɛsomane Farasiifoɛ biemɔ ne Herodefoɛ biemɔ maa bɛhɔle Yesu berɛ, kyɛ bɛɛfa edwirɛ besua ye ngaen.

¹⁴ Na bɛwale nen, besele ye kyɛ, “Kyerɛkyerɛniɛ, yɛse kyɛ ɛte nahorɛniɛ, na ɛnyɛ nyeyemuɛ; ofikyɛ ɛmva wɔ nye ndo mmenia bɛ dibea, na mmom ekyirekyire Nyameɛ atee ne nahorɛ nu. Aso mmeraa ma ate kyɛ yɛtua ɛtoɔ yɛma Kaesare, anaakyɛ ɔmma ate? Yɛ́tua anaakyɛ nnɛmaa yɛtua?”

¹⁵ Nakoso Yesu nwuni bɛ nyaatwom nen, obisale bɛ kyɛ, “Nzu ati yeɛ ɛmɔbaatetɛ me noa ɔ? Ɛ́mɔfa denare ko bɛbrɛ me ma nnea.”

¹⁶ Bɛfale ko bɛbrɛle ye, na obisale bɛ kyɛ, “Nwa mvonini ne dumaa yeɛ ɔwɔ so ye?” Na bebuale ye kyɛ, “Kaesare deɛ ɔ.”

¹⁷ Yeɛ Yesu sele bɛ kyɛ, “Nzaade ɛ́mɔfa Kaesare deɛ bɛ́ma Kaesare, ná ɛ́mɔfa Nyameɛ deɛ bɛ́ma Nyameɛ.” Na ye nwo yɛle bɛ nwanwa.

Ewutingyelɛ nwo adwobisa

¹⁸ Na Sadusiifoɛ bɔ bɛnwa awufoɛ dwɔsolɛ nne berɛ ne, bɛwale Yesu berɛ beebisale ye kyɛ,

¹⁹ “Kyerɛkyerɛniɛ, Mose hyerɛ mane yɛ kyɛ, ‘Sɛ bienzua bie oliɛma bienzua wu yakyi ɔye berɛ, bɔ wanwo ba biala ne, odi kyɛ oliɛma ne gya braa ne, ná ɔwo mmaa ma oliɛma ne.’

²⁰ Tie, aliɛmaa mmienzua nzoo bie bɛtenane ase. Bɔ oli moa ne gyale braa, na owuli bɔ wanwo ba ɔ.

²¹ Bɔ ɔtɔ so nyɔ ne koso gyale sɔ braa ne, na owuli bɔ wanwo ba ɔ. Na sɔ ala yeɛ ɔtole bɔ ɔtɔ so nza ne ɔ.

²² Yiti aliɛmaa nzoo ne amukoraa begyale braa ne bɔ banwo ba ɔ. Na bɔ ɔpɛ ye bo ɔ, braa ne koso wuli.

²³ Yiti awufoɛ dwɔsolɛ ne anu, sɛ bedwɔso a, bɛ nu nwa yeɛ braa ne kɔyɛ ɔye ɔ? Ofikyɛ, mmenia nzoo ne gyale ye.”

²⁴ Na Yesu buale bɛ kyɛ, “Aso nna ɛselɛ bɔ ɛmɔnze Ahyerɛlɛ ne ne Nyameɛ tumi ne ati yeɛ wamaa ɛmɔafõ ɔ?

²⁵ Sɛ bedwɔso befi awufoɛ nu a, bengya, yeɛ bɛmva ebie bɛmma agyaa, na mmom bɛte kyɛ nyameɛso abɔfo mɔ.

²⁶ Bɔ ɔfa awufoɛ dwɔsolɛ nwo de, aso ɛmɔkkenngale ye wɔ Mose nwomaa ne anu, kyɛbɔ Nyameɛ dwudwo hyirele ye wɔ ngyɛkyerɛ ne anu kyɛ, ‘Me ole Abraham Nyameɛ, Yisake Nyameɛ ne Yakob Nyameɛ’ ne?

²⁷ Ye de, ɔtte awufoɛ Nyameɛ, na mmom ɔte ateasefoɛ Nyameɛ, yiti ɛmɔafõ bɔkɔɔ.”

Mmeraa titire ne

²⁸ Na ahyerɛlɛfoɛ nemɔ nu ko bɔ ɔtele kyɛ besu aporowaa, ná onwuni kyɛ Yesu abua bɛ yé ne, oobisale Yesu kyɛ, “Mmeraa dwirɛ beni yeɛ ye nwo hia paa ɔ?”

²⁹ Na Yesu buale kyɛ, “Mmeraa dwirɛ bɔ ye nwo hia paa ɛhe: ‘O Yisrael, tie! Awurade yɛ Nyameɛ te Awurade komapɛ twe;

³⁰ na fa w’ahone amukoraa ne wɔ kra amukoraa ne w’adwene amukoraa ne w’anwoserɛ amukoraa kuro Awurade wɔ Nyameɛ dwirɛ.’

³¹ Bɔ ɔtɔ so nyɔ ɛhe: ‘Kuro ebiɛngo dwirɛ kyɛ wɔ bɔbɔ wɔ nwo.’ Na mmeraa dwirɛ biala nne berɛ bɔ ye nwo hia tra ɛhemɔ ɔ.”

³² Na ahyerɛlɛniɛ ne sele ye kyɛ, “Amba, kyerɛkyerɛniɛ, ahã nahorɛ, ofikyɛ Nyameɛ te komapɛ, na ebiala nne berɛ kyɛ ye ngome twe;

³³ na sɛ ɛfa w’ahone amukoraa ne wɔ ndeaseɛ amukoraa ne wɔ kra amukoraa ne w’anwoserɛ amukoraa ekuro ye dwirɛ, ná ekuro ebiɛngo dwirɛ kyɛ wɔ bɔbɔ wɔ nwo a, ɔte paa tra ɛyeralɛ afɔleɛ ne afɔleɛ amukoraa.”

³⁴ Na Yesu nwuni kyɛ ahyerɛlɛniɛ ne wama mmuayɛɛ nworɛ nu nen, osele ye kyɛ, “Ɛne Nyameɛ ahennie ne b’afia atee wanwa.” Na ebiala angora ammisa ye edwirɛ biala ko.

Kristo ne nwo adwobisa

³⁵ Mmerɛ bɔ né Yesu ɔyɛ ngyerɛkyerɛ wɔ asɔneyɛɛ sua ne anu ne, obisale kyɛ, “Ɔyɛle sɛɛ bɔ ahyerɛlɛfoɛ nemɔ bɛnwa Kristo ne te Dawide awa ɔ?

³⁶ Ofikyɛ Dawide bɔbɔ nate Sunzum Krongron so hane kyɛ, ‘Awurade sele me Mene kyɛ: Tena me sa famaa so, kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’

³⁷ Dawide bɔbɔ frɛ ye Awurade, na ɔwale ye sɛ bɔ ɔɔyɛle ɔwa ɔ?” Na ɛlɔen ne tiele ye wɔ anigye so.

Ahyerɛlɛfoɛ nwo kɔkɔbɔlɛ

³⁸ Na Yesu ngyerɛkyerɛ ne anu, osele bɛ kyɛ, “Ɛ́mɔnea ɛmɔ nwo yé wɔ ahyerɛlɛfoɛ nemɔ nwo. Bɛ yeɛ bekuro ndaadeɛ ndendenn wuralɛ bɛnate, ɔne kyɛ mmenia kobisa bɛ ahye wɔ dwaaso ɔ,

³⁹ ɔne mbanyi bia wɔ nyianu sua mɔ nu, ɔne mbanyi bia wɔ ɛpoentolɛ bo ɔ;

⁴⁰ bɛ yeɛ bɛbɔ akunafoɛ mmrasua apoo bede bɛ nningyein ɔ, nakoso bɛpati bɛbɔ mbaeɛ tendenn bekyire. Na bɛ yeɛ bekobua bɛ foɛ piri paa ɔ.”

Braa kunaniɛ hianiɛ bie afɔleɛ

⁴¹ Na Yesu ɔɔtenane fotoɛ alaka ne anyunu berɛ, bɔ né ɔnea kyɛbɔ mmenia wora ne bɛfa sikaa begua fotoɛ alaka ne anu ɔ. Na esikafoɛ pee bɛfale sikaa somaa beeguale nu.

⁴² Na braa kunaniɛ hianiɛ bie koso wale, na ɔfale mbɛsaa nyɔ bɔ ɔte daama ooguale nu.

⁴³ Na Yesu frɛle ye asuafoɛ nemɔ wale ye nwo berɛ, na osele bɛ kyɛ, “Susu amba, mekã mekyire ɛmɔ kyɛ, sɔ kunaniɛ hianiɛ he, wafa somaa wagua nu watra ebiala bɔ wafa bie waagua fotoɛ alaka ne anu ɔ.

⁴⁴ Ofikyɛ bɛ mukoraa, bɔ bele ye maa wabu bɛ so ne bie yeɛ bɛfa beeguale nu ɔ; nakoso ye de, ofili ye hiaa nu fale bɔ ole ye amukoraa, ye nikyee biala, yeɛ wafa waagua nu ɔ.”