Marko 10 - AHYERƐLƐ KRONGRON

Yesu yɛ agyaayiralɛ nwo ngyerɛkyerɛ

¹ Afei Yesu fili berɛ hɔle Yudea manzini nu ne asue Yɔɔdan si dɔ; mmenia birikabirika wale ye berɛ bieku, na kyɛbɔ né ɔtaa yɔ ne, ɔyɛle ngyerɛkyerɛ hyirele bɛ bieku.

² Yeɛ Farasiifoɛ wale ye berɛ kyɛ bɛbaatetɛ ye noa, na bebisale ye kyɛ, “Aso mmeraa ma ate kyɛ bienzua yira ɔye anaa?”

³ Na ye koso obuale bɛ kyɛ, “Nzikyɛ mmeraa yeɛ Mose hyehyɛ mane ɛmɔ ɔ?”

⁴ Na bebuale kyɛ, “Mose mane ate kyɛ ɔhyerɛ agyaayiralɛ krataa ma braa ne, ná oyira ye.”

⁵ Na Yesu buale bɛ kyɛ, “Ɔnate ɛmɔ asoserɛ ti yeɛ ɔhyerɛle sɔ ahyɛdeɛ ne mane ɛmɔ ɔ.

⁶ Ɔnate kyɛ, ofi mmerɛ bɔ Ɛdangama bɔle aleɛ ɔ, ‘bienzua ne brasua yeɛ Nyameɛ bɔle bɛ ɔ.’

⁷ ‘Na ɛhe ati bienzua kɔyakyi ɔse ne oni berɛ, ná wafa ye nwo waabata ɔye nwo,

⁸ ná bɛ munyɔ bayɛ anwoɔnaen ko.’ Yiti bɛtte nyɔ ko, na mmom bɛte anwoɔnaen ko.

⁹ Ye sɔ ati, bɔ Nyameɛ ahã abɔ nu ne, nnɛma sona biala tete nu.”

¹⁰ Na bɛhɔle awuro nen, ye asuafoɛ nemɔ bisale ye sɔ dwirɛ ne ala bieku.

¹¹ Na osele bɛ kyɛ, “Ebiala bɔ okoyira ɔye, ná okogya braa foforɛ nen, né wasɛkye agyaa watia ɔye.

¹² Yeɛ sɛ braa ne koso yira ohu ná ogya biaa foforɛ a, né ye koso wasɛkye agyaa.”

Yesu yirayira ngwadaa

¹³ Na bɛfale ngwadaa bɛbrɛle Yesu kyɛ ɔfa ye sa gua bɛ so, nakoso ye asuafoɛ nemɔ dwudwole bɛ bɔ bɛfale bɛ bɛwale ne.

¹⁴ Na Yesu nwuni ye sɔ nen, wanyɛ ye fɛ, na osele bɛ kyɛ, “Ɛ́mɔma ngwadaa nemɔ ate ma bɛbra me berɛ, na nnɛma ɛmɔsi bɛ ate; ofikyɛ ɛhemɔ sɔa ye yeɛ Nyameɛ ahennie ne ɔte bɛ deɛ ɔ.

¹⁵ Nahorɛ nu, mekã mekyire ɛmɔ kyɛ, ebiala bɔ wanne Nyameɛ ahennie ne wando nu kyɛ akwadaa ne, ɔngɔhɔ nu le.”

¹⁶ Afei ɔyɛle bɛ atuu, ɔfale ye sa guale bɛ so, na oyirayirale bɛ.

Esikaniɛ bie ne daa ngoa

¹⁷ Yesu pene atee so bɔ ɔkɔ nen, biaa bie tuli amirika ɔɔkotole ye nyunu berɛ, na obisale ye kyɛ, “Kyerɛkyerɛniɛ paa, nzu yeɛ nyɔ ná manya daa ngoa ɔ?”

¹⁸ Na Yesu bisale ye kyɛ, “Nzu ati yeɛ ɛfrɛ me sona paa ɔ? Ebiala nne berɛ bɔ ɔte paa ɔ, sana Nyameɛ ngome twe.

¹⁹ Ɛse mmeraa dwirɛ ne: ‘Nnɛdi awue, Nnɛsɛkye agyaa, Nnɛwua, Nnɛdi adanzewia, Nnɛdi aminɛ, Di ɛse ne eni ni.’ ”

²⁰ Na biaa ne buale ye kyɛ, “Kyerɛkyerɛniɛ, mvi me ngwadaa nu yeɛ mali ɛhemɔ amukoraa so ɔ.”

²¹ Yeɛ Yesu neane ye haa, na ohurole ye dwirɛ, na osele ye kyɛ, “Waha wɔ nikyee ko: Kɔ ná kɔtɔne bɔ ele ye amukoraa, ná fa sikaa ne ma ehiafoɛ, na ekonya agyapadeɛ wɔ nyameɛso; ná afei bra baali me si.”

²² Na edwirɛ he mane biaa ne nyunu yɛle bosaa, na ole aworabɔlɛ sili nu hɔle; ofikyɛ né ole anwonyadeɛ pee.

Anwonyadeɛ ndrasoɛ

²³ Yeɛ Yesu totole ye nye bra yiale, na osele ye asuafoɛ nemɔ kyɛ, “Yeɛ ɛmɔanwu kyɛbɔ osi yɛ se ma bɛ bɔ banya bɛ nwo kyɛ bɛkɔhɔ Nyameɛ ahennie ne anu ɔ!”

²⁴ Yesu dwirɛ bɔ ɔhane ne yɛle asuafoɛ nemɔ nwanwa. Nakoso Yesu sa sele bɛ kyɛ “Me mma mɔ, ɛmɔanwu kyɛbɔ osi yɛ se ma bɛ bɔ bɛfa bɛ nwo bɛto anwonyadeɛ so kyɛ bɛkɔhɔ Nyameɛ ahennie ne anu ɔ!

²⁵ Ɔyɛ mmerɛ kyɛ afupɔngɔ kowura drɔwaa bɔen nu tra kyɛ sikaniɛ kɔhɔ Nyameɛ ahennie nu ɔ.”

²⁶ Na ɛhe yɛle bɛ anwodwiri mmorosoɛ, na besisele bɛ nwo kyɛ, “Nzaade, nwa yeɛ bɛkɔhora bekole ye ngoa ɔ?”

²⁷ Yeɛ Yesu neane bɛ haa, na osele kyɛ, “Kuro sona bue nu de, ɔngɔhora ngɔyɛ berɛ, nakoso nna Nyameɛ bue nu ɔ; ofikyɛ Nyameɛ bue nu de, nningyein mukoraa kɔhora kɔyɛ berɛ.”

Yesu si lilɛ nwo akatuaa

²⁸ Na Petro hyɛle ye bo sele ye kyɛ, “Eh, yayakyi nningyein mukoraa berɛ yaali wɔ si oo!”

²⁹ Na Yesu buale kyɛ, “Nahorɛ nu, mekã mekyire ɛmɔ kyɛ, ebiala nne berɛ bɔ ɔnate me ne nzɛmba ne ati wayakyi awuro, anaa aliɛmaa mmienzua, anaa aliɛmaa mmrasua, anaa seɛ, anaa niɛ, [anaa yeɛ], anaa mmaa, anaa aseɛ mɔ berɛ,

³⁰ bɔ ongonya sua mɔ, ne aliɛmaa mmienzua, ne aliɛmaa mmrasua, ne niɛ mɔ, ne mmaa, ne aseɛ mɔ mmɔhoɛ ɛyaa, bɔ ndaneanyeɛ koso boka so, wɔ kekesaala ye wiase ye anu ɔ; ɔne daa ngoa wɔ wiase bɔ ɔ́ba ne anu ɔ.

³¹ Nakoso mmenia pee bɔ bali moa ne, bɛkɔha nziɛ, yeɛ bɛ bɔ baha nziɛ ne bekoli moa.”

Yesu hyɛ ngɔm bɔ ɔtɔ so nza fa ye wue ne ye tingyelɛ nwo

³² Né bɛnate atee so bɛfo bɛkɔ Yerusalem, na né Yesu li bɛ nyunu moa. Ɔyɛle asuafoɛ nemɔ nwanwa, na mmenia bɔ beli ye si ne koso besurole. Yeɛ ɔfale asuafoɛ buru ne nyɔ nemɔ hɔle ahameɛ bieku, na ɔhyɛle ye bo hane amaneɛ bɔ ɔbaanwu ye ɔ hyirele bɛ kyɛ,

³³ “Ɛ́mɔtie, yɛ́fo yɛ́kɔ Yerusalem, na bɛkɔye Sona Awa ne bekowura asɔfo mbanyi ne ahyerɛlɛfoɛ sa, na bekobua ye ewue foɛ, ná bafa ye bawura Amaenmaensofoɛ sa;

³⁴ Bɛkɔgoro ye nwo, bɛkɔfefe nwɔserɛ bekogua ye nwo, bekofi ye mbire, ná bahu ye, na ye ɛlɛsa ne aso okotingye.”

Yakobo ne Yohane pere dibea

³⁵ Sebedeo mma Yakobo ne Yohane wale Yesu berɛ beesele ye kyɛ, “Kyerɛkyerɛniɛ, y’abisadeɛ biala bɔ yɛbaafa yɛto wɔ nyunu ne, yɛpena kyɛ ɛyɔ ma yɛ.”

³⁶ Na obisale bɛ kyɛ, “Nzikyɛ yeɛ ɛmɔpena kyɛ meyɔ mema ɛmɔ ɔ?”

³⁷ Na bebuale ye kyɛ, “Yɛpena kyɛ w’animnyam ne anu, yɛ nu ko tena wɔ sa famaa so, ná ko wora ɔtena wɔ sa bɛen so.”

³⁸ Nakoso Yesu sele bɛ kyɛ, “Ɛmɔnze bɔ ɛmɔbisa ɔ. Aso ɛmɔkɔhora bɛkɔno kulie bɔ meno ne (noa), anaakyɛ asubɔlɛ bɔ bɛfa bɛbɔ me ne, ɛmɔkɔmaa bɛkɔfa bɛkɔbɔ ɛmɔ anaa?”

³⁹ Na bebuale ye kyɛ, “Yɛkɔhora.” Na Yesu sele bɛ kyɛ, “Amba, ɛmɔkɔno kulie bɔ meno ne (noa), yeɛ bɛkɔfa asubɔlɛ bɔ bɛfa bɛbɔ me ne bɛkɔbɔ ɛmɔ de,

⁴⁰ nakoso bɔ ɔtena me sa famaa so ne me sa bɛen so de, nna me deɛ ɔ bɔ mefa mema ɔ; na mmom bɛkɔfa bɛkɔma bɛ bɔ basiesie bama bɛ ɔ.”

⁴¹ Na mmerɛ bɔ asuafoɛ buru ne tele sɔ dwirɛ nen, bɛhyɛle ye bo bɛfɛle Yakobo ne Yohane so yaa piri paa.

⁴² Yiti Yesu frɛle bɛ maa bɛwale ye nwo berɛ, na osele bɛ kyɛ, “Ɛmɔse kyɛ bɛ bɔ bebu bɛ kyɛ bɛte Amaenmaensofoɛ ahemvo ne, bɛhyɛ bɛ so, yeɛ bɛ mbanyi mɔ koso bedi bɛ so tumi.

⁴³ Nakoso ɛmɔ nu de, ɔnzɛ kyɛ ɔba ye sɔ ɔ. Na mmom ebiala bɔ ɔpena kyɛ ɔyɛ ɛmɔ so panyi nen, ɔsɛ kyɛ ɔyɛ ɛmɔ somvoɛ;

⁴⁴ yeɛ ebiala bɔ ɔpena kyɛ odi moa wɔ ɛmɔ nu ne, ɔsɛ kyɛ ɔyɛ ɛmɔ amukoraa b’akoaa.

⁴⁵ Ofikyɛ Sona Awa ne po wamma kyɛ bɛso ye, na mmom kyɛ ɔbaaso, ná ɔfa ye ngoa ɔto berɛ ode mmenia pee ngoa.”

Yesu te Batemeo nye

⁴⁶ Afei bedwuli Yeriko. Na mmerɛ bɔ Yesu ne ye asuafoɛ nemɔ ne mmenia pee befi Yeriko bɛkɔ nen, né Timeo awa Batemeo, bɔ ɔte anyesiniwaaniɛ ɔ, ɔte atee noa berɛ ɔsrɛsrɛ nikye.

⁴⁷ Na mmerɛ bɔ ɔtele kyɛ Yesu bɔ ofi Nasarɛte ahɔ ɛne nen, ɔhyɛle ye bo teateane nu kyɛ, “Dawide Awa Yesu, nwu me anwumvoin oo!”

⁴⁸ Na mmeni pee hwili ye nyunu kyɛ omua ye noa. Nakoso bekye po yeɛ ɔhɔle so teateane nu serɛserɛ paa kyɛ, “Dawide Awa ee, nwu me anwumvoin oo!”

⁴⁹ Yeɛ Yesu gyinane, na osele kyɛ, “Ɛ́mɔfrɛ ye bɛbra!” Yiti bɛfrɛle anyesiniwaaniɛ ne, na besele ye kyɛ, “Ma w’ahone tɔ wɔ kunu, dwɔso, na ɔfrɛ wɔ!”

⁵⁰ Odwale ye tena guale nekaa bie, odwɔsole, na ɔwale Yesu berɛ.

⁵¹ Na Yesu bisale ye kyɛ, “Nzu yeɛ ɛpena kyɛ meyɔ mema wɔ ɔ?” Na anyesiniwaaniɛ ne buale ye kyɛ, “Kyerɛkyerɛniɛ, mepena kyɛ menwu nikye.”

⁵² Na Yesu sele ye kyɛ, “Kɔ, wɔ gyidie ale wɔ!” Na berɛ ne ala onwuni nikye, na olili Yesu si wɔ atee ne aso.