Maenbulɛfoɛ 6 - AHYERƐLƐ KRONGRON

Midianfoɛ hyɛ Yisraelfoɛ so

¹ Yisraelfoɛ yɔle bɔ ɔte bɔne wɔ AWURADE nyunu ɔ, na AWURADE fale bɛ wurale Midian sa afoɛ nzoo.

² Midian lili Yisrael so, na ɔnate Midian ti, Yisraelfoɛ bɔle bɛ nwo adwaa wɔ mmokaa so, nyɔboɛ bɔ wasi sua mɔ nu, ɔne anwoserɛ afealeɛ mɔ nu.

³ Ofikyɛ mmerɛ biala bɔ Yisraelfoɛ kɔyɔ eboo ne, né Midianfoɛ ne Amalɛkefoɛ ne eyia afiteleɛfoɛ bafa ngondii baateta bɛ.

⁴ Bɛbakyekye b’asikyeleɛ bepingye Yisraelfoɛ, na bɛsɛkye bɛ fieso nningyein alaa kodwu Gasa wɛen so. Bɛnyakyi aleɛ kaala po, anaa boaen, anaa nandwie, anaa afunum ko po wɔ Yisrael.

⁵ Ofikyɛ Midianfoɛ ne bɛ nyɛmmoa mɔ bagua berɛ mitimiti kyɛ ngyein, na bɛfa b’ɛtena sua mɔ po bɛboka so bɛba. Bɛ ne b’afupɔngɔ mɔ, sɛ ɛka bɛ po a, ennwu bɛ noa. Yiti bɛba a, bɛsɛkye aseɛ ne aso nningyein amukoraa.

⁶ Ɔnate Midianfoɛ ti ɛhɔen huni Yisraelfoɛ paa. Na Yisraelfoɛ sũ frɛle AWURADE kyɛ ɔɔpepɛ ole bɛ.

⁷ Midianfoɛ ndaneanyeɛ ne ati, Yisraelfoɛ sũ frɛle AWURADE,

⁸ na AWURADE somane ngɔmhyɛlɛniɛ wɔ Yisraelfoɛ berɛ maa oosele bɛ kyɛ, “AWURADE Yisrael Nyameɛ nwa nyoo: Me yeɛ nyele ɛmɔ mvili Misraim, ná nyele ɛmɔ mvili ngoaasolɛ nu ɔ.

⁹ Nnele ɛmɔ mvili Misraimfoɛ sa nu, ɔne bɛ bɔ né bɛhyɛ ɛmɔ so amukoraa bɛ sa nu. Afei mvoane bɛ mvili ɛmɔ nyunu na mvale b’aseɛ mmane ɛmɔ.

¹⁰ Na nga ngyirele ɛmɔ kyɛ, ‘Me ole AWURADE ɛmɔ Nyameɛ; Amorifoɛ bɔ ɛmɔte b’aseɛ so ne, nnɛma ɛmɔsɔne bɛ nyameɛ mɔ.’ Nakoso ɛmɔandie me dwirɛ.”

Gideon

¹¹ AWURADE abɔfo hɔle ɔɔtenane Abieseniɛ Yoase eluii ne abo wɔ Ofra. Sɔ mmerɛ ne, né Yoase awa Gideon ɔboro atokoɔ wɔ kumaa bɔ betwi nzaa nu ɔ nu, ofikyɛ né ɔfa fea Midianfoɛ.

¹² AWURADE abɔfo ne yele ye nwo ali hyirele Gideon, na osele ye kyɛ, “Koɛhonɛniɛ ahoneserɛniɛ, AWURADE gyi wɔ si.”

¹³ Yeɛ Gideon buale ye kyɛ, “Me mene, sɛ AWURADE gyi yɛ si a, nzu ati yeɛ amaneɛ he amukoraa atoto yɛ ye? Ye anwanwadeɛ mbiri mbiri bɔ yɛ nana mɔ hane ye nwo dwirɛ hyirele yɛ kyɛ, ‘Aso nna AWURADE yeɛ ɔyele yɛ fili Misraim’ ne, bɛ wɔ ni? Kekesaala ye de, AWURADE aye ye sa yɛ bo, na wafa yɛ wawura Midian sa.”

¹⁴ Na AWURADE pɛle ye nye neane ye sele kyɛ, “Anwoserɛ bɔ ele ye ne, fa kɔ kole Yisraelfoɛ fi Midian sa nu. Me yeɛ masoma wɔ ɔ.”

¹⁵ Gideon buale kyɛ, “Me mene, me yeɛ nne nwa bɔ mekora mepepɛ mede Yisrael ɔ? Manase abusua kure nu, m’abusua yeɛ yɛte awiɛmvoɛ koraa ɔ, na m’abusua nu koso, me yeɛ nde kãa paa ɔ.”

¹⁶ Na AWURADE sele ye kyɛ, “Ngogyina wɔ si, na ekohũhũ Midianfoɛ nemɔ amukoraati.”

¹⁷ Yeɛ Gideon sele AWURADE kyɛ, “Sɛ anya alo me de a, né nzaade maa nwu sɛngyerɛnneɛ bɔ okyire kyɛ wɔ yeɛ ɛne me dwudwo ye.

¹⁸ Mesrɛ wɔ ala, nnɛfi wa kɔ, kɔpem kyɛ ngɔwa wɔ nyunu, na ngɔfa m’afɔleɛ ngoosie wɔ nyunu ɔ.” Yeɛ AWURADE sele ye kyɛ, “Ngɔnwondɛ wa maa okoodwu kyɛ ekosa kɔwa ɔ.”

¹⁹ Yiti Gideon hɔle ye awuro oohuni abɔngye akrɔngrɔma ko tone, na ɔfale esam olonka buru yɔle taterɛ kabrɛdi. Ɔfale naen ne guale kɛndɛen nu, yeɛ ɔfale turoo ne guale kukue nu, na ɔfa brɛle ye wɔ eluii ne abo.

²⁰ Na AWURADE abɔfo sele Gideon kyɛ, “Fa naen ne ne taterɛ kabrɛdi ne gua nyɔbotaen he aso na hwie turoo ne gua so.” Na ɔyɔle sɔ.

²¹ Yeɛ AWURADE abɔfo ne, pɔmaa bɔ otira ye ne, ɔfale ye noa ne hane naen ne ɔne taterɛ kabrɛdi ne. Na see gye fili nyɔbotaen ne anu ɔɔyerale naen ne ɔne taterɛ kabrɛdi ne. Na AWURADE abɔfo ne, otu minini fili Gideon nyunu.

²² Afei Gideon nwuni kyɛ AWURADE abɔfo ɔ; na Gideon sele kyɛ, “Dé me oo, AWURADE Nyameɛ! Ofikyɛ magyina AWURADE abɔfo nyunu manwu ye nyunu.”

²³ Nakoso AWURADE sele ye kyɛ, “Asomdwee ha wɔ. Nnɛsuro, na engowu.”

²⁴ Gideon sili afɔleɛ bokyea mane AWURADE wɔ berɛ, na ɔtole afɔleɛ bokyea ne dumaa AWURADE te Asomdwee. Afɔleɛ bokyea ne tɛ gyi Abiesefoɛ kuro Ofra nu maa waadwu ɛnɛ.

²⁵ Sɔ kyẽa ne kɔngɔen, AWURADE sele Gideon kyɛ, “Fa wɔ baba nandwie nyii bɔ ɔtɔ so nyɔ, bɔ wali afoɛ nzoo ne. Bubu wɔ baba ye Baal afɔleɛ bokyea ne gua, ná pɛ bosoen Asera dosii bɔ ɔwɔ ye ngyɛnu berɛ ne to.

²⁶ Si afɔleɛ bokyea ma AWURADE wɔ Nyameɛ wɔ bokaa he ti afia, ná hyehyɛ afɔleɛ bokyea nyɔboɛ ne pɛpɛɛpɛ. Afei fa nandwie nyii bɔ ɔtɔ so nyɔ ne, ná fa bosoen Asera dosii bɔ ɛkɔpɛ ne boka so bɔ naen yeralɛ afɔleɛ.”

²⁷ Yiti Gideon fale ye somvoɛ nemɔ anu buru, na ɔyɔle kyɛbɔ AWURADE sele ye ne ala. Nakoso né osuro ye abusuafoɛ ɔne kuro berɛ ama, yiti wanyɔ ye eyia na mmom ɔyɔle ye kɔngɔen.

Gideon bubu Baal afɔleɛ bokyea

²⁸ Kuro berɛ ama dwɔsole ngyerɛmɔ tutuutu ne, benwuni kyɛ ebie abubu Baal afɔleɛ bokyea ne, ebie apɛ bosoen Asera dosii bɔ ogyi ye ngyɛnu berɛ ne wato ase, na ebie afa nandwie nyii bɔ ɔtɔ so nyɔ ne wabɔ afɔleɛ wɔ afɔleɛ bokyea bɔ basi ne aso.

²⁹ Yiti bebisabisale bɛ nwo kyɛ, “Nwa yeɛ wayɔ sɔ nikyee ye?” Bebisabisale nu dee ne, bɛtele kyɛ Yoase awa Gideon yeɛ wayɔ sɔ nikyee ne ɔ.

³⁰ Yiti kuro berɛ ama sele Yoase kyɛ, “Ye ɛwa ne bra wa maa yɛhu ye, ofikyɛ wabubu Baal afɔleɛ bokyea ne, yeɛ bosoen Asera dosii bɔ ogyi afɔleɛ bokyea ne ngyɛnu ne koso, wapɛ wato.”

³¹ Nakoso Yoase sele mmenia bɔ bedwɔso betiale ye ne amukoraa kyɛ, “Aso ɛmɔ yeɛ odi kyɛ ɛmɔko bɛma Baal ɔ? Anaa ɛmɔ yeɛ odi kyɛ ɛmɔko ye ti ngondii ɔ? Ebiala bɔ ɔkɔho kɔma Baal ne, kyɛ odwu ɛhema ngyerɛmɔ ne, odi kyɛ beku ye. Sɛ Baal te nyameɛ a, ɛ́mɔma ye bɔbɔ ɔho ye ngondii, ofikyɛ ye afɔleɛ bokyea yeɛ babubu ye ɔ.”

³² Yiti sɔ kyẽa ne, bɛtole Gideon dumaa Yerubaal, bɔ ye bo ole: “Maa Baal ɔne ye beli,” ofikyɛ wabubu ye afɔleɛ bokyea.

³³ Afei Midianfoɛ, Amalɛkefoɛ ɔne eyia afiteleɛfoɛ amukoraa bɛboale bɛ noa, bɛpɛle asue Yɔɔdan, na bɛɛkyekyele asikyeleɛ wɔ Yesreel bɔnza ne anu dɔ.

³⁴ Nakoso AWURADE Sunzum wale Gideon so, na ohuli totorobɛndo ne fa frɛle Abiesefoɛ amukoraa maa belili ye si.

³⁵ Gideon tuli ɛbɔfoɛ maa bɛhɔle Manase aseɛ so amukoraa, na bɛbɔle bɛ amaneɛ maa bɛ koso beelili ye si. Osa tuli ɛbɔfoɛ maa bɛhɔle Asɛ, Sebulɔn ne Nafetali aseɛ so, na bɛ koso bɛɛbokale ye so.

Nyameɛ ma Gideon sɛngyerɛnneɛ

³⁶ Yeɛ Gideon sele Nyameɛ kyɛ, “Kyɛbɔ ɔkɔyɛ ná male mali kyɛ ɛkɔfa me so kɔpepɛ kole Yisrael ne,

³⁷ mekwaafa gyese meto nekaa bɔ bɛboro aburoo ne. Sɛ bosue gua gyese ne angome so, ná sɛ aseɛnwo berɛ amukoraa te wosee a, ye de ngole ngoli kyɛ ɛkɔfa me so kole Yisrael, kyɛbɔ aha ne.”

³⁸ Na ɔwale nu sɔ. Odwɔsole ngyerɛmɔ tutuutu, ná ohwini gyese ne anu ne, bosue bɔ oguale gyese ne aso ne, onyane nzue komiti ko.

³⁹ Yeɛ Gideon sele Nyameɛ kyɛ, “Mesrɛ wɔ, nnɛfɛ me so yaa. Maa mva edwirɛ bieku ndo wɔ nyunu. Ma nza mva gyese ne nzo nnea. Ma gyese ne angome ɔ́yɛ wosee, ná ma bosue ógua aseɛnwo berɛ amukoraa.”

⁴⁰ Na sɔ kyẽa ne kɔngɔen, Nyameɛ yɔle ye sɔ ala. Gyese ne angome yɛle wosee, na bosue guale aseɛnwo berɛ amukoraa.