Maenbulɛfoɛ 5 - AHYERƐLƐ KRONGRON

Debora ne Barake dwein ne

¹ Sɔ kyẽa ne, Debora ne Abinoam awa Barake bɛtole edwein kyɛ,

² “Sɛ Yisrael nu koɛhonɛfoɛ di ye nyunu a, sɛ mmenia ne tu bɛ nwo sie berɛ a, ɛ́mɔye AWURADE ayɛ!

³ Ahemvo, ɛ́mɔtie. Atitire, ɛ́mɔma ɛmɔ so bra wa; AWURADE yeɛ ngɔto dwein ngɔye ye ayɛ ɔ, ngɔto anigye dwein ngɔye AWURADE Yisrael Nyameɛ ayɛ.

⁴ AWURADE, mmerɛ bɔ etuli wɔ bo fili Sɛre ne, mmerɛ bɔ ɛpɛle nu wɔ Edom mbɔtam ne, aseɛ wosole, nyameɛso tɔle nzue, yeɛ munungum tɔle nzue paa.

⁵ Mmokaa wosole serɛserɛ wɔ AWURADE Sinai Nyameɛ ne nyunu, bɛwosole wɔ AWURADE Yisrael Nyameɛ nyunu.

⁶ Anate awa Samega mmerɛ so, Yaele mmerɛ so, atimbire so yɛle bɔfonn; na akwandufoɛ makyele bɛɛfale eburo atee mɔ so.

⁷ Yisrael namue mɔ kakyili kurofoen, nguro nemɔ bɔle, kɔpem kyɛ Debora dwɔsole ɔ; odwɔsole kyɛ brataen wɔ Yisrael.

⁸ Beelili nyameɛ foforɛ mɔ si, maa ɔnate so koɛ ɔɔtoale bɛ wɔ kuro berɛ pambim nu. Aso benwuni akokyɛm ne pealɛɛ wɔ Yisrael koɛhonɛfoɛ apee aburanna nemɔ nwo?

⁹ M’ahone la Yisrael safohene mɔ anwo, bɔ betuli bɛ nwo besiele berɛ ne. Ɛ́mɔye AWURADE ayɛ.

¹⁰ Ɛmɔ bɔ ɛmɔtete afunum fufue mɔ so ɔ, ɛmɔ bɔ ɛmɔtete bɛen paa so ɔ, ɔne ɛmɔ bɔ ɛmɔnate atee noa ɔ, ɛ́mɔto ye nwo dwein.

¹¹ Edwein bɔ edweintolɛfoɛ bɛto wɔ asaleɛ berɛ ne, berɛ yeɛ bɛto AWURADE ayɛyelɛ dwein ɔ, bɛto ayɛyelɛ dwein wɔ Yisrael. Yeɛ AWURADE mmenia torotorole hɔle pambim nemɔ anwo.

¹² Dwɔso, Debora dwɔso e! Dwɔso, dwɔso to dwein! Barake, dwɔso ná di mmenia bɔ ahye bɛ nnure ne nyunu, O Abinoam awa.

¹³ Afei atitire bɔ baha ne bedwɔsole betiale anwoserɛfoɛ. AWURADE mmenia dwɔsole betiale anwoserɛfoɛ bɛmane ye.

¹⁴ Besili nu befili Efraim bɛhɔle Amalɛke bɔnza ne anu. Belili wɔ Benyamin, ne wɔ nwo ama si; Safohene nemɔ tuli bɛ bo befili Makyiri, yeɛ bɛ bɔ betira safohene pɔmaa mɔ koso, betuli bɛ bo befili Sebulɔn.

¹⁵ Yisaka safohene mɔ bɛ ne Debora yeɛ bɛwale ɔ, yeɛ Yisaka lili nahorɛ mane Barake; belili ye si bɛhɔle bɔnza ne anu. Ruben mmusua mmusua nemɔ, b’adwene anyɛ ko.

¹⁶ Nzu ati yeɛ ɛhale nziɛ wɔ mmoaen kure nemɔ anu ɔ? Kyɛ ɛkɔte ɛfrɛlɛ bɔ bɛfrɛ mmoaen nemɔ ti anaa? Ruben mmusua mmusua nemɔ, b’adwene anyɛ ko.

¹⁷ Gileade hale asue Yɔɔdan asi; na Dan de, nzu ati yeɛ ɔtenane ɛlɛen nemɔ anwo ɔ? Asɛ tenane konn wɔ mboanoa, na ɔbɔle ye atenaleɛ wɔ etii so.

¹⁸ Sebulɔnfoɛ fale bɛ ngoa tole serewa; sɔ ala yeɛ Nafetali koso yɔle ɔ, wɔ aseɛ pralaa mmokaa ne aso.

¹⁹ Ahemvo mɔ wale, na bɛhone; yeɛ Kanaan ahemvo koso bɛhone, wɔ Taanake bɔ opingye Megido nzue noa; bannya koɛ nu nzesadeɛ bɔ ɔte ɛdwetɛ ɔ.

²⁰ Nzramaa mɔ fili nyameɛso bɛɛhone; bɛnate b’atee so bɛhone betiale Sisera.

²¹ Kison asue piane bɛ hɔle, Kison asue bɔ ɔse worɔworɔ ne. Me kra, tu agyirɛ anwoserɛ nu kɔ wɔ nyunu!

²² Mbɔngɔ gya mbaboa bobɔle ase, ofikyɛ behuruhuruli fɛen fɛen betuli amirika.

²³ AWURADE abɔfo nwa: Ɛ́mɔnoma Merose, ɛ́mɔnoma nu ama paa, ofikyɛ bamma ammoka AWURADE, bamma ammoka AWURADE maa wango wandia anwoserɛfoɛ nemɔ.

²⁴ Wɔ Yaele bɔ anya saleɛ atra mmrasua amukoraa ɔ, Keniniɛ Heberi aye, mmrasua bɔ bɛtete ɛtena sua nu ne, anya saleɛ atra bɛ mukoraa.

²⁵ Sisera srɛle nzue, nakoso Yaele mane ye nandwie nyɔfonesue, ɔfale nandwie nyɔfonesue nye loe guale ahemvo kulie nu brɛle ye.

²⁶ Ɔtengyɛle ye sa fale ɛtena sua pɛmbɛen, ole ye sa famaa fale adwumayɔlɛfoɛ bɔsobaka; ɔfa bɔle Sisera, ɔfa bɔle ye ti pɛkyɛle ye, ɔfa bɔle ye so taa nu maa omi hɔle nu.

²⁷ Sisera nye so buruli ye. Ɔte tɔle. Ɔte tɔle Yaele gya bo kenananana; Yaele gya bo yeɛ ye nye so buruli ye ɔ; ɔte tɔle, nekaa bɔ ye nye so buruli ye ne, berɛ ala yeɛ ɔhale nu ɔ.

²⁸ Sisera oni fale ye ti tɛle mboma nu neane, mboma nu yeɛ ɔfale ye nye tɛle bɔle awuye kyɛ, ‘Nzu ati yeɛ dadaada ye, ye teaseɛnam ɔmma ye? Nzu ati yeɛ ye teaseɛnam mɔ ahyɛ bɔ yɛnde bɛ gya boso ye?’

²⁹ Na braa ne, ye somvoɛ mmrasua nworɛfoɛ mɔ mane ye mmuayɛɛ. Amba, ye bɔbɔ ɔyele ye adwobisa ne noa kyɛ,

³⁰ ‘Aso nna koɛ nu nzesadeɛ yeɛ bɛsesa bɛkyɛ ɔ? Bienzua biala konya taluwa ko anaa nyɔ; Sisera konya koɛ nu nzesadeɛ ɛtena bɔ bawura ye ayire ɔ, koɛ nu nzesadeɛ ɛtena bɔ bali adwii bagua nu ɔ, koɛ nu nzesadeɛ ɛtena sii nyɔ bɔ bawura ye ayire, bɔ bali adwii bagua nu, bɔ ngɔfa ngogua me kɔme anu ɔ?’

³¹ Yiti AWURADE, ma wɔ pɔfoɛ amukoraa, bɛ boso ónua! Nakoso bɛ bɔ bekuro wɔ dwirɛ de, maa bɛyɛ kyɛ eyia bɔ ɔbɔ gyireingyirein ɔ.” Na asomdwee wale aseɛ ne aso afoɛ aburanna.