Maenbulɛfoɛ 4 - AHYERƐLƐ KRONGRON

Debora ne Barake

¹ Ehude wue asi ne, Yisraelfoɛ sa yɔle bɔ ɔte bɔne wɔ AWURADE nyunu ɔ.

² Yiti AWURADE fale bɛ wurale Kanaan hene Yabin bɔ né odi hene wɔ Hasɔ ne sa. Ye safohene ole Sisera bɔ né ɔte Harosete Hagoyim ne.

³ Na Yisraelfoɛ sũ frɛle AWURADE kyɛ ɔɔpepɛ le bɛ. Ofikyɛ né Sisera le buralɛ teaseɛnam ɛyaa ngona, yeɛ afei né wahyɛ Yisraelfoɛ so yeayea afoɛ aburanyɔ.

⁴ Sɔ mmerɛ ne, ngɔmhyɛlɛniɛ brasua Debora bɔ ohu ole Lapidote ne, ye yeɛ né ɔla Yisrael noa ɔ.

⁵ Né ɔtaa tena Debora ayee bɔ ɔwɔ Rama ne Betel b’afia ne abo, wɔ Efraim mmokaa aseɛ ne aso. Berɛ yeɛ né Yisraelfoɛ fa b’edwirɛ bɛbato ye nyunu maa odi ɔ.

⁶ Debora somane maa bɛɛfrɛle Abinoam awa bienzua Barake befili Kedese bɔ ɔwɔ Nafetali ne bɛbrɛle ye. Na osele ye kyɛ, “AWURADE Yisrael Nyameɛ ahyɛdeɛ bɔ ɔfa ma wɔ ɛhe: ‘Yeye koɛhonɛfoɛ apee buru fi Nafetali ne Sebulɔn mmusua kure nu, ná di bɛ nyunu fa bɛ kɔ Tabɔ bokaa ne aso.

⁷ Na ngɔtwetwe Yabin ye safohene Sisera maa ɔne ye teaseɛnam mɔ ne ye koɛhonɛfoɛ mɔ bekooyia wɔ wɔ Kison bɔnza ne anu; afei ngɔfa ye ngowura wɔ sa.’ ”

⁸ Na Barake sele Debora kyɛ, “Sɛ ɛne me kɔhɔ de a, ye de ngɔhɔ; nakoso sɛ ɛne me ngɔhɔ de a, ye de mengɔhɔ.”

⁹ Yeɛ Debora buale kyɛ, “Amba me ne wɔ kɔhɔ; nakoso atee bɔ ɛkɔ ye, ye nwo animnyam ngɔyɛ wɔ deɛ, ofikyɛ AWURADE kɔfa Sisera kowura brasua bie sa.” Na Debora dwɔsole ɔne Barake bɛhɔle Kedese.

¹⁰ Barake boaboale Sebulɔn ne Nafetali mmusua kure noa wɔ Kedese. Olili koɛhonɛfoɛ apee buru nyunu ɔne bɛ hɔle, na Debora ne ye bɛhɔle.

¹¹ Né Keniniɛ Heberi wate ye nwo wafi Kenifoɛ ngaa nemɔ anwo. Kenifoɛ bɛte Mose sia bienzua Hobabo ye boso ama, na né bakyekye b’asikyeleɛ maa waadwu Elon Besananim, bɔ opingye Kedese ne.

¹² Mmerɛ bɔ bɛbɔle Sisera amaneɛ kyɛ Abinoam awa Barake wafa koɛhonɛfoɛ wahɔ Tabɔ bokaa ne aso ne,

¹³ Sisera boaboale ye buralɛ teaseɛnam ɛyaa ngona ne amukoraa, ɔne ye koɛhonɛfoɛ amukoraa bɔ bɛboka ye so ne noa, fi Harosete Hagoyim maa oodwuli Kison bɔnza ne anu.

¹⁴ Yeɛ Debora sele Barake kyɛ, “Dwɔso ɛne ye bɛɛho! Ofikyɛ ɛnɛ kyẽa ye yeɛ AWURADE afa Sisera wawura wɔ sa ɔ! Amba AWURADE li wɔ nyunu.” Yiti Barake torole Tabɔ bokaa ne, na né koɛhonɛfoɛ apee buru ne beli ye si.

¹⁵ Na AWURADE mane ahunundetelɛ tɔle Sisera so, ɔne ye teaseɛnamhanɛfoɛ amukoraa so, yeɛ ye koɛhonɛfoɛ amukoraa so wɔ Barake nyunu. Sisera dwu fili ye teaseɛnam ne aso nwatili ye gya kunu.

¹⁶ Barake foane teaseɛnam nemɔ ne koɛhonɛfoɛ nemɔ alaa oodwuli Harosete Hagoyim. Sisera koɛhonɛfoɛ ne amukoraa bɛtotɔle ngrandɛ noa bɔ komapɛ po anga ɔ.

¹⁷ Né Sisera anwati ye gya kunu, na ɔhɔle Keniniɛ Heberi ɔye Yaele ye ɛtena sua nu; ofikyɛ Hasɔ hene Yabin ɔne Keniniɛ Heberi abusuafoɛ, b’afia te wosee.

¹⁸ Yaele fite ooyiale Sisera, na osele Sisera kyɛ, “Me mene, baafea wa. Baafea me nwo wa. Nnɛsuro.” Yiti Sisera ɔɔfeale Yaele berɛ wɔ Yaele ye ɛtena sua nu, na Yaele fale ɛtena katale ye so.

¹⁹ Yeɛ Sisera sele ye kyɛ, “Mesrɛ wɔ, ma me nzue kãa maa nno, na nzuhɔen ku me.” Yiti Yaele tuli nandwie nyɔfonesue towaa so, ɔmane Sisera bie maa ɔnone, na osa katale ye nwo.

²⁰ Sisera sele ye kyɛ, “Ɛtena sua ne, gyina ye anoa nu berɛ. Na sɛ ebie ba bisa wɔ kyɛ, ‘Aso ebie awa wa’ a, bua ye kyɛ, ‘Daabi.’ ”

²¹ Nakoso Heberi aye Yaele fale ɛtena sua pɛmbɛen ɔne bɔsobaka otirale. Ɔyɛle nwaa hɔle Sisera nwo berɛ, na ɔbɔle pɛmbɛen ne aso wurale ye so taa nu maa pɛmbɛen ne oowurale ase. Né Sisera afɛ paa, yiti né walafe hatee, na ɔfale nu wuli.

²² Na Barake gu so ɔpena Sisera ne, Yaele fitele ooyiale ye sele ye kyɛ, “Bra maa ngyire wɔ biaa bɔ ɛpena ye ne.” Yiti Barake wurale Yaele ɛtena sua ne anu, na onwuni kyɛ Sisera wawu la berɛ, bɔ ɛtena sua pɛmbɛen ne wura ye so taa nu ɔ.

²³ Yiti sɔ kyẽa ne, Nyameɛ lili Kaanan hene Yabin so ngonim mane Yisraelfoɛ.

²⁴ Na Yisraelfoɛ hɔle so benyane Kaanan hene Yabin so tumi, kɔpem kyɛ behuni ye ɔ.