Maenbulɛfoɛ 20 - AHYERƐLƐ KRONGRON

Yisraelfoɛ ngaa ne Benyaminfoɛ bɛko

¹ Afei Yisraelfoɛ ngaa amukoraa, ofi Dan bɔ ɔkwaadwu Beɛ Hyeba, bɔ Gileade mbɔtam boka so ɔ, bɛbɔle nu bɛwale AWURADE nyunu wɔ Misepa.

² Na Yisrael mbanyi amukoraa, mbanyi bɔ bɛlela mmusua kure ne amukoraa noa, beegyinane nekaa bɔ Nyameɛ mmenia babɔ dwaa ne. Koɛhonɛfoɛ bɔ betiratira akodeɛ bɔ babɔ dwaa ne, né bɛ somaa te apee ɛyaa nna.

³ (Yeɛ Benyaminfoɛ tele kyɛ Yisraelfoɛ bahɔ Misepa.) Na Yisraelfoɛ bisale kyɛ, “Sɔ musue dwirɛ he, ɔyɛ sɛɛ bɔ osili ɔ? Ɛ́mɔhã behyire yɛ.”

⁴ Na Lewiniɛ bɔ ɔte braa bɔ behuni ye ne ahu ne, obuale kyɛ, “Mene me sómaa yɛhɔle Benyaminfoɛ kuro Gibea so yɛɛlale berɛ kɔngɔen.

⁵ Gibea mbanyi wale me so, na bɛpɛle awuro ne anwo beyiale kɔngɔen ne. Ahaa bɛpena me beku me, na bɛtole me sómaa ne mmɔnaa toonn maa owuli ɔ.

⁶ Yeɛ mvale me sómaa ne fuin mbepɛle nu ahuronzi ahuronzi maa bɛfa bɛhɔle Yisrael aseɛ so nekaa biala; ofikyɛ Gibeafoɛ babɔ musue ne nyanzoen bra wɔ Yisrael.

⁷ Yiti, ɛmɔ Yisraelfoɛ amukoraa, ɛ́mɔhyire ɛmɔ adwene, ná ɛmɔhã edwirɛ ne anwo bie.”

⁸ Mmenia ne amukoraa bɛbɔle nu bedwɔsole, na bɛhane kyɛ, “Yɛ nu biala ngɔhɔ ye ɛtena sua nu, yeɛ yɛ nu biala ngosa ngɔhɔ ye awuro.

⁹ Na bɔ yɛkɔfa yɛkɔyɔ Gibea kuro ne ɛhe: yɛkɔfa serewagualɛ so yɛkɔye mmenia bɔ bɛkɔfa koɛ bɛkɔɔteta bɛ ɔ.

¹⁰ Yisrael abusua kure amukoraa, yɛkɔye mmenia ɛyaa ko biala nu buru; mmenia apee ko biala nu ɛyaa ko, yeɛ mmenia apee buru biala nu apee ko. Sɔ mmenia ne yeɛ bɛkɔfa aleɛ bɛkɔbrɛ koɛhonɛfoɛ bɔ bɛkwaatɔ Benyaminfoɛ kuro Gibea so wereɛ ne ɔ, ɔnate nyanzoen bra amukoraa bɔ Gibeafoɛ babɔ ye wɔ Yisrael ne ati.”

¹¹ Yiti Yisraelfoɛ amukoraa, bɛbɔle nu kyɛ bɛfa koɛ bɛkɔteta kuro ne.

¹² Yisrael mmusua kure nemɔ somane mmenia maa behyinini Benyamin abusua kure ne anu ama mukoraa so bebisale bɛ kyɛ, “Nzikyɛ nzɛmmɔne yeɛ ɛmɔali ye wɔ wa ye?

¹³ Sɔ busuefoɛ bɔ bɛwɔ Gibea ye, ɛ́mɔye bɛ bɛma yɛ kekesaala ye maa yɛhu bɛ, ná yɛkyikyi bɔne ne yɛfi Yisrael.” Nakoso Benyaminfoɛ bandɛ b’eliɛma mɔ Yisraelfoɛ so.

¹⁴ Benyaminfoɛ fili bɛ nguro nemɔ aso bɛɛboale bɛ noa wɔ Gibea kyɛ bɛ ne Yisraelfoɛ bɛkwaaho.

¹⁵ Sɔ kyẽa ne, Benyaminfoɛ boaboale koɛhonɛfoɛ apee aburanyɔ ne nzia bɔ betiratira akodeɛ noa befili bɛ nguro nemɔ aso, asora koɛhonɛfoɛ ahoneserɛfoɛ ɛyaa nzoo bɔ befi Gibea ne.

¹⁶ Né koɛhonɛfoɛ ahoneserɛfoɛ ɛyaa nzoo bɔ bɛte bɛen ɔ wɔ sɔ ɛlɔen ne amukoraati nu. Bɛ nu biala nye gyene maa sɛ ɛtengyɛ wɔ sa po a, ɔkɔte bɔ ɔngɔto ngɔfo ɔ.

¹⁷ Na Yisraelfoɛ, sɛ ɛye Benyaminfoɛ fi nu a, bɛboaboale mmenia apee ɛyaa nna noa, bɔ bɛ mukoraa bɛte koɛhonɛfoɛ ɔ.

¹⁸ Yisraelfoɛ sili nu bɛhɔle Betel beebisale Nyameɛ kyɛ, “Yɛ nu abusua kure beni yeɛ oli moa ɔfa koɛ ɔɔteta Benyaminfoɛ ɔ?” Na AWURADE buale kyɛ, “Yuda abusua kure yeɛ odi kyɛ odi moa ɔkɔ ɔ.”

¹⁹ Yeɛ Yisraelfoɛ dwɔsole ngyerɛmɔ bɛɛkyekyele asikyeleɛ bepingyele Gibea.

²⁰ Yisraelfoɛ fale koɛ bɛɛtetale Benyaminfoɛ; bɛ ne Benyaminfoɛ bɛhone wɔ Gibea.

²¹ Benyaminfoɛ fili Gibea befitefitele, na sɔ kyẽa ne, behuhuni Yisraelfoɛ bɛ nu apee aburanyɔ ne nyɔ.

²² Yisraelfoɛ koɛhonɛfoɛ nemɔ sili bɛ hue, na besa beegyinagyinane nekaa bɔ beegyinane kyẽa bɔ oli moa ne.

²³ Yeɛ Yisraelfoɛ beesuni wɔ AWURADE nyunu maa oodwuli nɔsoa, na bebisale AWURADE kyɛ, “Aso yɛsa yɛɛfa koɛ yɛteta y’eliɛma mɔ Benyaminfoɛ anaa?” Na AWURADE buale kyɛ, “Ɛ́mɔfa koɛ bɛɛteta bɛ.”

²⁴ Yiti ye elenyɔ ne aso Yisraelfoɛ bɔ pingyele Benyaminfoɛ.

²⁵ Sɔ elenyɔ ne aso, Benyaminfoɛ fili Gibea bɛɛfale koɛ bɛtetale Yisraelfoɛ, na besa behuhuni Yisraelfoɛ bɔ bɛ mukoraa betiratira akodeɛ ɔ apee buru ne mmɔtwɛ.

²⁶ Yeɛ Yisrael koɛhonɛfoɛ ne amukoraa, besa bɛhɔle Betel bɛɛtenane AWURADE nyunu besuni. Sɔ kyẽa ne, bɛhyele ɛhɔen maa oodwuli nɔsoa. Afei bɛbobɔle naen yeralɛ afɔleɛ ne asomdwee afɔleɛ wɔ AWURADE nyunu.

²⁷ Na Yisraelfoɛ bisale AWURADE dwirɛ (ofikyɛ sɔ mmerɛ ne, né Nyameɛ apam alaka ne wɔ berɛ,

²⁸ na Finehase bɔ ɔse ole Aarɔn awa Eleasa ne, ye yeɛ né ɔte sɔfo wɔ Nyameɛ alaka ne nyunu ɔ.) Bebisale AWURADE kyɛ, “Yɛfa koɛ yɛɛteta y’eliɛma mɔ Benyaminfoɛ bieku, anaakyɛ yɛyakyi?” Na AWURADE buale kyɛ, Ɛmɔɔho, ofikyɛ ɛhema ngɔfa bɛ ngowura ɛmɔ sa.”

²⁹ Yiti Yisrael mane koɛhonɛfoɛ bɛɛfeale bɛpɛle Gibea nwo beyiale.

³⁰ Na ye ɛlɛsa ne aso, Yisraelfoɛ fale koɛ bɛɛtetale Benyaminfoɛ, na begyinagyinane bɛmane bɛ nye hyirele Gibea kyɛbɔ bɛyɔle ye daa ne ala.

³¹ Benyaminfoɛ fitele kyɛ bɛ ne Yisraelfoɛ bɛkwaaho ne, Yisraelfoɛ diediele bɛ hwene bɛ fili kuro ne anu. Kyɛbɔ bɛyɔle ye daa ne, bɛhyɛle ye bo behuhuni Yisraelfoɛ wɔ atimbire nemɔ aso. Atimbire ko kɔ Betel, yeɛ ko koso kɔ Gibea. Behuhuni ebiemɔ koso wɔ buro na behuni Yisraelfoɛ kɔyɛ aburasa.

³² Benyaminfoɛ susuli kyɛ, “Bali ngoguo wɔ yɛ nyunu kyɛ daa ne ala.” Nakoso Yisraelfoɛ hane kyɛ, Ɛ́mɔma yɛhyɛ da yɛsa yɛ si, na yɛtwetwe bɛ yɛfi kuro ne anu yɛbra atimbire nemɔ aso.”

³³ Yisrael koɛhonɛfoɛ kure piri paa ne, befili nekaa bɔ né bɛ wɔ ne bɛhɔle Baal Tamar. Yeɛ Yisraelfoɛ bɔ bapɛ kuro ne anwo bayia ne, befili b’afealeɛ bɔ ɔwɔ Gibea eyia atɔleɛ so ne befitefitele.

³⁴ Koɛhonɛfoɛ ahoneserɛfoɛ apee buru bɔ befi Yisrael maen ne anu amukoraa, bɛfale koɛ bɛɛtetale Gibea, na koɛ ne anu yɛle se paa. Nakoso Benyaminfoɛ bannwu ye kyɛ edwirɛ piri yeɛ wato bɛ ɔ.

³⁵ Na AWURADE lili Benyamin so ngonim mane Yisrael. Sɔ kyẽa ne, Yisraelfoɛ huhuni Benyaminfoɛ bɔ bɛ mukoraa betiratira akodeɛ ɔ apee aburanyɔ ne nnu ɔne ɛyaa ko.

³⁶ Yiti Benyaminfoɛ nwuni kyɛ bali ngoguo. Yisrael koɛhonɛfoɛ kure piri ne, bɛboapa bɛnwatili befili Benyaminfoɛ nyunu, ofikyɛ né bɛ nye la bɛ mmango koɛhonɛfoɛ bɔ baatetɛ Gibea ne aso.

³⁷ Yisraelfoɛ bɔ baatetɛ ne, bɛbɔle twi bɛhɔle Gibea. Na bele ngrandɛ behuhuni kuro berɛ ama amukoraati.

³⁸ Yisrael koɛhonɛfoɛ kure piri ne, bɛ ne bɛ bɔ bɛɛtetɛle ne, né bali moa babɔ porɛ kyɛ, sɛ bɛ bɔ baatetɛ ne, bɛma nwosina tu munguu fi kuro ne anu a,

³⁹ ye de Yisrael koɛhonɛfoɛ kure piri ne, odi kyɛ bɛkakyi bɛ nye bɛkɔ Benyaminfoɛ so. Nakoso né Benyaminfoɛ bali moa bahuhu Yisraelfoɛ kɔyɛ aburasa; yiti Benyaminfoɛ nyane adwene kyɛ, “Amba, yali bɛ so ngonim kyɛ daa ne ala.”

⁴⁰ Nakoso nwosina munguu hyɛle ye bo tu fili kuro ne anu ne, Benyaminfoɛ neane bɛ si, na benwuni kyɛ nwosina fi kuro ne anu amukoraa otu kɔ ewienu ɔ!

⁴¹ Afei Yisrael koɛhonɛfoɛ kure piri ne kakyili bɛ nye, na Benyaminfoɛ nye so tanene, ofikyɛ benwuni kyɛ edwirɛ piri ato bɛ.

⁴² Yiti Benyaminfoɛ kakyili bɛ nwo befili Yisraelfoɛ nyunu bɛfale bɛ nye behyirele ɛserɛ so atee ne aso; nakoso Yisraelfoɛ buale bɛ noa so, na Yisraelfoɛ bɔ né bɛwɔ kuro ne anu ne, bɛhane Benyaminfoɛ bemiane behuhuni bɛ.

⁴³ Yisraelfoɛ pɛle Benyaminfoɛ nwo yiale. Bɛfoane bɛ befili Noha, na behuhuni bɛ alaa beedwuli Gibea eyia afiteleɛ so.

⁴⁴ Benyaminfoɛ apee buru ne mmɔtwɛ totɔle; bɛ mukoraa bɛte koɛhonɛfoɛ ahoneserɛfoɛ.

⁴⁵ Bɛkakyili bɛ nwo bɛfale bɛ nye behyirele ɛserɛ so bɛhɔle Rimon nyɔbotaen ne anwo ne, Yisraelfoɛ huhuni bɛ nu apee nnu wɔ atimbire nemɔ aso. Bɛfoane bɛ alaa beedwuli Gidom, na behuhuni bɛ nu apee nyɔ.

⁴⁶ Yiti Benyamin koɛhonɛfoɛ amukoraa bɔ betiratira akodeɛ, bɔ bɛtotɔle sɔ kyẽa nen, bɛ somaa te apee aburanyɔ ne nnu; bɛ mukoraati bɛte koɛhonɛfoɛ ahoneserɛfoɛ.

⁴⁷ Nakoso bɛ nu ɛyaa nzia kakyili bɛ nwo bɛfale bɛ nye behyirele ɛserɛ so bɛhɔle Rimon nyɔbotaen ne anwo, na bɛtenane Rimon nyɔbotaen ne anwo alaa bosome nna.

⁴⁸ Yisraelfoɛ sa kakyili bɛ nye besa bɛwale Benyaminfoɛ so. Bɛbɔle kuro ne, na bele ngrandɛ behuhuni mmenia amukoraa ne ngaka amukoraa. Na nguro bɔ baha nemɔ koso, bɛtole bɛ nu see.