Maenbulɛfoɛ 2 - AHYERƐLƐ KRONGRON

Yisrael yɛ asoserɛ

¹ Afei AWURADE abɔfo fili Gilgal hɔle Bokim oosele Yisraelfoɛ kyɛ, “Me yeɛ nyele ɛmɔ mvili Misraim, ná mvale ɛmɔ mmale aseɛ bɔ mva nhyɛle ɛmɔ nana mɔ bɔ ne aso ɔ. Ngane kyɛ, ‘Mengobu apam bɔ me ne ɛmɔ yayɛ ne aso le.

² Ɛmɔ koso, nnɛma ɛmɔ ne aseɛ he aso ama bɛyɛ apam. Ɛ́mɔdwiri b’afɔleɛ bokyea nemɔ begua.’ Nakoso ɛmɔanni m’ahyɛdeɛ so. Ɛmɔanwu bɔ ɛmɔayɔ ɔ!

³ Yiti afei menwa, mengɔfoa bɛ mengofi ɛmɔ nyunu; na mmom bɛkɔkakyi ɛmɔ pɔfoɛ, na bɛ mmosoen nemɔ kɔyɛ ɛmɔ so ngaen.”

⁴ AWURADE abɔfo ne hane edwirɛ he hyirele Yisraelfoɛ amukoraa yiele nen, besuni hahii.

⁵ Yeɛ bɛfrɛle berɛ Bokim, na bɛbɔle afɔleɛ wɔ berɛ bɛmane AWURADE.

Yosua wue

⁶ Yosua tuli Yisraelfoɛ apo yiele ne, mmenia ne amukoraa bɛhɔle b’aseɛ bɔ bafa bama bɛ so bɛɛfale.

⁷ Mmerɛ amukoraa bɔ né Yosua te ase ne, maen ne sole AWURADE. Na Yosua wue asi ne koso, maen ne anu mbanyi bɔ né bɛtɛ te ase, ná afei benwuni anwanwadeɛ amukoraa bɔ AWURADE ayɔ ama Yisrael nen, mmerɛ mukoraa bɔ né bɛte ase ne, Yisrael hɔle so sole AWURADE.

⁸ Nun awa Yosua, bɔ ɔte AWURADE somvoɛ ne, olili afoɛ ɛyaa ko ne buru yeɛ owuli ɔ.

⁹ Na besiele ye wɔ ye bɔbɔ ye aseɛ ne aso wɔ Timinate Herese, wɔ Efraim mmokaa aseɛ so, wɔ Gaase bokaa ne sorɔ dɔ.

¹⁰ Afei koso, sɔ aworɛ ndoatoasoɛ ne amukoraa bewuwuli bɛɛtoale bɛ mbanyi mɔ, na aworɛ ndoatoasoɛ foforɛ fifili bɛ gya nu, bɔ né bɛnze AWURADE anaa nikyee bɔ wayɔ wama Yisrael ɔ.

Yisrael so mmosoen

¹¹ Yisraelfoɛ yɔle bɔ ɔte bɔne wɔ AWURADE nyunu ɔ, na bɛsole mmosoen Baal.

¹² Na AWURADE bɔ ɔte bɛ nana mɔ Nyameɛ bɔ ɔyele bɛ fili Misraim aseɛ so ne de, bɛyakyili ye si lilɛ. Nyameɛ foforɛ biemɔ bɔ bɛwɔ maen maen bɔ bapɛ bɛ nwo bayia nemɔ aso ne, beelili bɛ si, bɛsɔnene bɛ, na bewurale AWURADE apue mane ye ahone huli.

¹³ Bɛyakyili AWURADE si lilɛ, na bɛsole Baal ne Astarote.

¹⁴ Yiti AWURADE fɛle Yisrael so yaa paa, na ɔfale bɛ wurale apaabɔlɛfoɛ sa maa bɛfene bɛ nningyein bɛfale. Bɛ pɔfoɛ mɔ bɔ bapɛ bɛ nwo bayia ne, ɔmaa beewurale bɛ bo bɔ bangora bɛ pɔfoɛ nemɔ nyunu gyina ko ɔ.

¹⁵ Kyɛbɔ AWURADE bɔle bɛ kɔkɔ ná osa tale ye nwo ndaen hyirele bɛ ne, mmerɛ biala bɔ bɛhɔle koɛ ne, AWURADE yele ye sa fili bɛ bo maa musue tole bɛ, na bɛ nwo hyerele bɛ paa.

¹⁶ Yeɛ AWURADE yele maenbulɛfoɛ mane Yisraelfoɛ maa belele bɛ befili apaabɔlɛfoɛ nemɔ sa nu.

¹⁷ Nakoso maenbulɛfoɛ nemɔ po, Yisraelfoɛ andie bɛ; ofikyɛ Yisraelfoɛ beelili nyameɛ foforɛ biemɔ si bɛkotole bɛ. Bɛ nana mɔ bɔ belili AWURADE mmeraa dwirɛ so ne, Nyameɛ dwirɛ bɔ belili so ne, wangyɛ yeɛ Yisraelfoɛ lili ye nwo makyebu ɔ. Bɛ de, banni so.

¹⁸ Mmerɛ biala, sɛ né AWURADE ye maenbulɛfoɛ ma bɛ a, AWURADE gyina maenbulɛfoɛ nemɔ si. Na mmerɛ amukoraa bɔ maenbulɛniɛ ne te ase ne, AWURADE de bɛ fi bɛ pɔfoɛ mɔ sa nu. Ofikyɛ ndaneanyeɛ ne nhyɛsoɛ bɔ bɛ pɔfoɛ nemɔ fa di bɛ ne, aworabɔlɛ bɔ ɔmaa bedi ne, AWURADE fa ye nye to, na onwu bɛ anwumvoin.

¹⁹ Nakoso sɛ sɔ maenbulɛniɛ ne wu pɛ, né basa bɛ si baabɔ bra tɛɛ bɔ ɔtra bɛ nana mɔ deɛ ne ɔ. Bekodi nyameɛ foforɛ mɔ si, bɛso bɛ ná bɛkoto bɛ. Bɛnyakyi bɛ yɔleɛ tɛɛ anaa b’asoserɛ ne anu biala.

²⁰ Yiti AWURADE fɛle Yisrael so yaa paa, na osele kyɛ, “Ɔnate kyɛ maen he abu m’apam bɔ nhyehyɛle mane bɛ nana mɔ ne aso, ná bandie me dwirɛ ne ati,

²¹ maen maen bɔ Yosua wanni bɛ so ngonim koraka yeɛ owu ne, mengɔfoa bɛ nu biala mengofi bɛ nyunu ko.”

²² Kyɛbɔ ɔkɔyɛ ná AWURADE aso Yisrael wanea, kyɛ aso bekotie ye dwirɛ kyɛbɔ bɛ nana mɔ tiele ne, anaakyɛ bengotie,

²³ yiti AWURADE yakyili sɔ maen nemɔ maa bɛhale berɛ, na wamvoa bɛ mukoraati berɛ ne ala, na wamva bɛ wanwura Yosua sa.