Maenbulɛfoɛ 19 - AHYERƐLƐ KRONGRON

Lewiniɛ bie ne ye somaa

¹ Mmerɛ bɔ né ɛhene biala nne Yisrael nen, né Lewiniɛ bie te namue bie anu bɔ ɔwɔ dedeede wɔ Efraim mmokaa aseɛ ne aso. Ɔɔfale sómaa wɔ Betlehem bɔ ɔwɔ Yuda.

² Nakoso ye sómaa ne fɛle ye so yaa. Braa ne fili ye berɛ sa hɔle ɔse awuro wɔ Betlehem bɔ ɔwɔ Yuda, na oolili kɔyɛ bosome nna.

³ Yeɛ ohu ne pole ye so kyɛ ɔkwaagu se ye maa osa ba. Ɔne ye somvoɛ ne afunum nyɔ yeɛ bɛhɔle ɔ. Oodwuli braa ne baba awuro berɛ ne, taluwa ne baba nwuni ye, na ooyiale ye nyemene so.

⁴ Taluwa ne baba bɔ ɔte Lewiniɛ ne sia ne, ɔmaa Lewiniɛ ne sikyele ye awuro olili berɛ ɛlɛsa. Yiti bedidili bɛnone na ɔtenane berɛ.

⁵ Ye ɛlɛnna ne aso, bedwɔsole ngyerɛmɔ tutuutu, na Lewiniɛ ne boaboale ye nwo kyɛ ɔkɔ ye kuro. Nakoso ye sia bienzua ne sele ye kyɛ, “Didi kãa nya anwoserɛ koraka né ahɔ.”

⁶ Yiti mmienzua nyɔ nemɔ tenane poen nwo bedidili bɛnone, na taluwa ne baba sele Lewiniɛ ne kyɛ, “Nzu ati yeɛ ɛnna wa ɛnɛ ná ɛmma wɔ nye ngye ɔ?”

⁷ Lewiniɛ ne dwɔsole kyɛ ɔkɔ ne, ye sia ne hɔle so gu sele ye kɔpem kyɛ osa lale berɛ sɔ kyẽa ne koso ɔ.

⁸ Ye elennu ne aso, Lewiniɛ ne dwɔsole ngyerɛmɔ tutuutu kyɛ ɔkɔ; na taluwa ne baba sele ye kyɛ, “Didi koraka.” Yiti belele bɛ nwome maa oodwuli kyɛ aleɛ dwole ɔ, na bɛ munyɔ bedidili bɛnone.

⁹ Mmerɛ bɔ Lewiniɛ ne, ye sómaa ne, yeɛ ye somvoɛ ne bedwɔsole kyɛ bɛkɔ ne, taluwa ne baba bɔ ɔte Lewiniɛ ne sia ne, osele Lewiniɛ ne kyɛ, “Nea, mmerɛ ahɔ, aleɛ ayie sa. Ɛ́mɔla wa ɛnɛ, na aleɛ adwo. Ɛ́mɔla wa ɛnɛ, ná ma wɔ nye gye. Ɛhema ɛmɔkɔhora bekodwɔso ngyerɛmɔ tutuutu bekosi nu bɛkɔhɔ ɛmɔ kuro.”

¹⁰ Nakoso Lewiniɛ ne wambene so kyɛ ɔkɔla berɛ sɔ kyẽa ne. Osili nu, na oodwuli Yebusi (ye ala ole Yerusalem) ndendeneɛ so. Ɔne ye afunum nyɔ bɔ nningyein gua bɛ so, ɔne ye sómaa ne yeɛ bɛhɔle ɔ.

¹¹ Ɔka kãa maa bedwu Yebusi ne, né aleɛ adwo. Na somvoɛ ne sele ye mene kyɛ, “Maa yɛmakye yɛhɔ Yebusifoɛ kuro ye aso na yɛɛla berɛ ɛnɛ kɔngɔen ye.”

¹² Nakoso ye mene sele ye kyɛ, “Amanvorafoɛ mɔ bɔ nna Yisraelfoɛ ahɔ ɔ ne de, yɛngɔhɔ bɛ kuro so; na mmom yɛkɔtoa so yɛkɔhɔ Gibea.”

¹³ Na osele ye somvoɛ ne kyɛ, “Maa yɛmia yɛ nye yɛɛdwu nguro nemɔ ko aso, ná yɛɛla Gibea anaa Rama ɛnɛ kɔngɔen ye.”

¹⁴ Yiti bɛtoale b’ateetulɛ ne aso; na eyia tɔle ne, né bapingye Gibea bɔ ɔte Benyamin kuro ne.

¹⁵ Bɛmakyele bɛhɔle Gibea kyɛ bɛkwaala berɛ. Lewiniɛ ne hɔle kuro ne anu ɔɔtenane kuro ne dwaaso, nakoso ebiala wamva bɛ wangɔ ye awuro kyɛ beesikye berɛ sɔ kɔngɔen ne.

¹⁶ Aleɛ dwole ne, benwuni biaa aworowaa bie kyɛ ofi ye fieso ɔba. Biaa ne fi Efraim mmokaa aseɛ ne aso, na Gibea yeɛ né ɔte ɔ. (Kuro berɛ ama te Benyaminfoɛ.)

¹⁷ Biaa aworowaa ne pagyale ye ti so, na onwuni akwanduniɛ ne wɔ kuro ne dwaaso ne, obisale ye kyɛ, “Nisua yeɛ ɛkɔ ɔ, na efi ni po yeɛ ɛba ye?”

¹⁸ Lewiniɛ ne buale ye kyɛ, “Yɛfi Betlehem bɔ ɔwɔ Yuda, na yɛsẽ yɛkɔ namue bie bɔ ɔwɔ dedeede anu wɔ Efraim mmokaa aseɛ ne aso. Berɛ yeɛ mvi ɔ. Ngɔle Betlehem bɔ ɔwɔ Yuda, na mesa mekɔ AWURADE awuro. Nakoso ebiala ɔmmane me nekaa maa nnzikyele.

¹⁹ Wɔ ngoaa mɔ, yɛle ɛserɛ ne nzenzaen bɔ yɛkɔfa yɛkɔma yɛ afunum mɔ ɔ, yeɛ me ne braa ye ne aberandeɛ bɔ ɔboka yɛ so ye, yɛle aleɛ ne nzaa. Yɛnhia hwee ko.”

²⁰ Biaa aworowaa ne sele kyɛ, “Nyameɛ ɔma wɔ asomdwee. Ngɔma wɔ nikyee biala bɔ ekohia ɔ. Onhia kyɛ ɛkɔla dwaaso wa ɔ.”

²¹ Yiti ɔfale ye hɔle ye awuro, na ɔmane afunum nemɔ aleɛ. Ɛwɔfoɛ nemɔ nwunzini bɛ gya bo, na bedidili bɛnone.

Gibeafoɛ bɔ musue

²² Na begu so bɛgye bɛ nye ne, kuro berɛ mmienzua asanzafoɛ biemɔ bɛɛpɛle awuro ne anwo beyiale, na bɛhyɛle ye bo bɛborole anoa ne anu. Besele biaa aworowaa bɔ yeɛ ɔte awuro ne mene ne kyɛ, “Biaa bɔ wawa w’awuro wa ne, ye ye fite bra maa yɛne ye la.”

²³ Yeɛ biaa ne bɔ ɔte awuro ne mene ne, ofite ooyiale bɛ, na osele bɛ kyɛ, “Daabi, daabi, nniɛma mɔ, nnɛma ɛmɔyɔ sɔ amumuyɛɛ he. Biaa he te me wɔfoɛ, yiti nnɛma ɛmɔyɔ sɔ nyanzoen nikyee he.

²⁴ Mma brasua bɔ onwuni biaa le, yeɛ ɛwɔfoɛ ne sómaa ne, bɛwɔ wa. Ɛ́mɔma nye bɛ mvite kekesaala ye. Ɛmɔ ne bɛ la, na bɔ ɛmɔ kuro biala, ɛ́mɔfa bɛ́yɔ bɛ; na mmom biaa he de, nnɛma ɛmɔfa sɔ nyanzoen dwirɛ he bedi ye.”

²⁵ Nakoso mmenia nemɔ bandie ye dwirɛ ne. Yiti Lewiniɛ ne sɔle ye sómaa ne anu, na ɔwɔle ye tole aluo dɔ mane bɛ. Bɛtole ye mmɔnaa pasaa, na bɛhyɛle ye bɛ ne ye lale kɔngɔen ne amukoraa mane aleɛ hyene. Na alebahyene ne, bɛyakyili ye kyɛ ɔhɔ.

²⁶ Ewienu yɛle kyɛ ɔtete ne, braa ne hɔle ɔɔpɛ fini biaa n’awuro n’anoa nu berɛ, nekaa bɔ né ye somaa ne wɔ ne, na ɔlale berɛ toonn mane aleɛ hyene.

²⁷ Aleɛ hyene ne, braa ne somaa ne dwɔsole, na obukyebukyele awuro berɛ anoa nemɔ. Na ofitele kyɛ ɔtoa ye ateetulɛ ne aso ne, onwuni kyɛ ye sómaa ne la awuro n’anoa nu berɛ, bɔ ye sa gua aponnwaa ne aso ɔ.

²⁸ Osele ye kyɛ, “Dwɔso maa yɛhɔ.” Nakoso braa ne andwudwo. Yeɛ ɔfale braa ne tole afunum ne aso, na osili nu hɔle ye kuro.

²⁹ Odwuli ye awuro ne, ɔfale dadeɛ ba. Ɔsɔle ye sómaa ne fuin ne anu, na ɔpepɛle nu ahuronzi ahuronzi buru ne nyɔ wɔ ye aporɛ aporɛ so, na ɔfa somane maa bɛhɔle Yisrael maen amukoraa nu.

³⁰ Na ɔfale ngraa mane ɛbɔfoɛ nemɔ kyɛ, “Ɛ́mɔbisa Yisraelfoɛ amukoraa sɔ dwirɛ he: ‘Ofi mmerɛ bɔ Yisraelfoɛ fili Misraim aseɛ so bɛwale bɔ ɔbaadwu ɛnɛ ɔ, aso sɔ dwirɛ he, ebie asi le? Ɛ́mɔdwene ye nwo, ɛmɔhɔ ye nwo agyina, ná ɛ́mɔbua ye nwo bie.’ ”