Maenbulɛfoɛ 18 - AHYERƐLƐ KRONGRON

Danfoɛ tu kɔtena Layise

¹ Sɔ mmerɛ ne, né ɛhene biala nne Yisrael. Na sɔ mmerɛ ne, né Dan abusua kure ne bɛpena bɛ bɔbɔ b’aseɛ bɛtena so. Ofikyɛ ɔbaadwu sɔ mmerɛ ne, Yisrael mmusua kure ne anu, né bɛ de bɛmmane bɛ aseɛ biala.

² Yiti Danfoɛ yele bɛ mmusua nemɔ anu mmienzua ahoneserɛfoɛ nnu, bɔ befi Sora ne Esetao, kyɛ bɛɛtetɛ aseɛ ne, ná bɛneanea so. Na besele bɛ kyɛ, “Ɛmɔhɔ bɛɛneanea aseɛ ne aso.” Beedwuli Mika awuro wɔ Efraim mmokaa aseɛ ne aso ne, besikyele berɛ.

³ Bɛwɔ Mika awuro berɛ ne, bɛtele Lewiniɛ aberandeɛ ne komvi. Yiti bɛhɔle ye nwo berɛ beebisale ye kyɛ, “Nwa yeɛ ɔfale wɔ wale wa ɔ? Nzikyɛ yeɛ ɛyɔ ye wɔ wa ɔ? Ɛpena nzu wɔ wa?”

⁴ Obuale bɛ kyɛ, Bɔ Mika ayɔ ama me ɛhe: wafa me adwuma, na me yeɛ nde ye sɔfo ɔ.”

⁵ Yeɛ besele ye kyɛ, “Bisa Nyameɛ ma yɛ maa yɛnwu ye sɛ atee bɔ yɛkɔ ye, okoyie yɛ yé a.”

⁶ Na ɔsɔfo ne buale bɛ kyɛ, “Ɛmɔhɔ asomdwee nu. Atee bɔ ɛmɔkɔ ye, AWURADE gyi ɛmɔ si.”

⁷ Mmienzua nnu ne toale b’ateetulɛ ne aso, na beedwuli Layise ne, benwuni kyɛ berɛ ama te berɛ asomdwee nu kyɛ Sidonfoɛ nemɔ ala, bɔ bɛndwene kyɛ edwirɛ tɛɛ bie kɔto bɛ ɔ. Né banya bɛ nwo tam bɔ hwee nhia bɛ ɔ. Afei koso né bembingye Sidonfoɛ koraa, yeɛ né bɛ ne Siriafoɛ koso belle hwee bɛnyɔ.

⁸ Besale bɛ si bɛhɔle bɛ kuro ama berɛ wɔ Sora ne Esetao, na bebisale bɛ amaneɛ kyɛ, “Nekaa bɔ ɛmɔhɔle ɔ?”

⁹ Bebuale kyɛ, “Ɛ́mɔdwɔso, ɛ́mɔma yɛfa koɛ yɛɛteta bɛ, ofikyɛ yanwu aseɛ ne, na ɔte paa paa. Ɛmɔnwondɛ nzu? Nnɛma ɛmɔtwetwe ɛmɔ gya bo ase, na mmom ɛmɔhɔ aseɛ ne aso bɛɛfa.

¹⁰ Sɛ ɛmɔkɔ dwu berɛ a, ɛmɔkɔɔto mmenia bie bɔ bɛndwene kyɛ edwirɛ tɛɛ bie po kɔto bɛ ɔ. Aseɛ ne terɛ, na wiase wa nikyee biala nhia bɛ wɔ berɛ. Aseɛ ne, Nyameɛ afa awura ɛmɔ sa.”

¹¹ Dan abusua kure nu koɛhonɛfoɛ ɛyaa nzia bɔ betiratira akodeɛ ɔ, besili nu befili Sora ne Esetao,

¹² na bɛɛkyekyele asikyeleɛ wɔ Kiriate Yearim wɔ Yuda. Yiti ɔbaadwu ɛnɛ ye, bɛfrɛ berɛ Mahane Dan. Ɔwɔ Kiriate Yearim eyia atɔleɛ so.

¹³ Befili berɛ ne, bɛtoale so bɛhɔle Efraim mmokaa aseɛ ne aso, na beedwuli Mika awuro.

¹⁴ Yeɛ mmienzua nnu bɔ bɛɛtetɛle Layise aseɛ ne, besele bɛ mmango nemɔ kyɛ, “Aso ɛmɔse kyɛ ɔsɔfo ataadeɛ, abusua amoen, ɔne buralɛ amoen wɔ sua hemɔ anu ɔ? Bɔ odi kyɛ ɛmɔyɔ ne, nna ebie yeɛ ɔbaahyire ɛmɔ ɔ.”

¹⁵ Yiti bɛmakye bɛhɔle Mika awuro berɛ nekaa bɔ Lewiniɛ aberandeɛ ne ɔte ne, na bebisale Lewiniɛ ne ahye.

¹⁶ Danfoɛ koɛhonɛfoɛ ɛyaa nzia bɔ betiratira akodeɛ ne, mmerɛ bɔ begyigyi pambim ne anoa nu berɛ ne,

¹⁷ mmienzua nnu bɔ bɛɛtetɛle aseɛ ne, bɛhɔle awuro berɛ bɛɛsesale buralɛ amoen ne, ɔsɔfo ataadeɛ ne ɔne abusua amoen nemɔ. Né ɔsɔfo ne, ɔne mmienzua ɛyaa nzia bɔ betiratira akodeɛ ne, begyigyi pambim ne anoa nu berɛ.

¹⁸ Mmienzua nnu ne hɔle Mika awuro berɛ bɛɛsesale buralɛ amoen ne, ɔsɔfo ataadeɛ ne ɔne abusua amoen nemɔ nen, ɔsɔfo ne bisale bɛ kyɛ, “Na nzikyɛ yeɛ ɛmɔyɔ ye?”

¹⁹ Bebuale ye kyɛ, “Mua wɔ noa! Ka wɔ noa ne to nu di yɛ si, na maa yɛfa wɔ yɛyɛ yɛ baba ne yɛ sɔfo. Kyɛ ɛkɔyɛ sona horɛ awuro sɔfo, ɔne kyɛ ɛkɔyɛ abusua kure ne abusua sɔfo wɔ Yisrael ɔ, beni yeɛ ɔte paa ma wɔ ɔ?”

²⁰ Ɔsɔfo ne penene b’edwirɛ ne aso. Ɔfale ɔsɔfo ataadeɛ ne, abusua amoen ne, ɔne amoen ne, na ɔne mmenia nemɔ sili nu bɛhɔle.

²¹ Yiti Danfoɛ bɛfale bɛ mma mɔ, bɛ nyɛmmoa ne bɛ nningyein belili bɛ nyunu moa, na besa bɛtoale b’ateetulɛ ne aso.

²² Befili Mika awuro berɛ bɛhɔle moa kãa ne, Mika frɛfrɛle mmenia bɔ b’awuro mɔ pingye ye deɛ ne, na bɛpole Danfoɛ ne aso bɛɛtole bɛ.

²³ Bɛteateane nu beguale Danfoɛ nemɔ aso, na Danfoɛ kakyili bɛ nye bebisale Mika kyɛ, “Nzikyɛ dwirɛ ti yeɛ afa ɛlɔen he ali wɔ si ye?”

²⁴ Na Mika buale kyɛ, “Ɛmɔasesa me mmosoen bɔ mayɔ ɔ ɔne me sɔfo bahɔ, na beni yeɛ waha me sa nu ɔ? Nzu ati yeɛ ɛmɔbisa me kyɛ, ‘Nzikyɛ dwirɛ’ ahɔ ɔ?’ ”

²⁵ Na Danfoɛ sele ye kyɛ, “Nnɛteatea nu gua yɛ so. Sɛ ɛyɔ sɔ a, mmenia bɔ bafɛ yaa paa kɔwa wɔ so, na ɛne w’awuro ama ɛmɔkɔhwere ɛmɔ ngoa.”

²⁶ Afei Danfoɛ sili nu bɛhɔle b’atee. Na Mika nwuni kyɛ bɛ nwo yɛ se tra ye ne, osale ye si hɔle ye awuro.

Danfoɛ batena Layise

²⁷ Danfoɛ fale Mika amoen bɔ wayɔ ne, yeɛ ye sɔfo ne. Bɛhɔle Layise, na bɛɛtole mmenia bie bɔ né bɛndwene kyɛ edwirɛ tɛɛ bie kɔto bɛ ɔ. Behuhuni bɛ, na bɛyerale kuro ne.

²⁸ Layisefoɛ bannya defoɛ biala, ofikyɛ né bembingye Sidon, yeɛ afei né belle abiɛngoɛ biala. Né Layise wɔ Bete Rehobo bɔnza ne anu. Danfoɛ sa kyekyele kuro ne bɛtenane nu.

²⁹ Bɛfale kuro ne bɛtole bɛ nana Dan bɔ ɔte Yisrael awa ne. Nakoso daa ne, né kuro ne dumaa li Layise.

³⁰ Afei Danfoɛ gyinane amoen ne bɛsɔnene ye. Yonatan bɔ ɔse ole Gɛsɔm bɔ ɔse ole Mose ne, ɔne ye mma mɔ yeɛ né bɛte Dan abusua kure asɔfo kɔpem kyɛ ebiemɔ bɛɛhyele Danfoɛ nnure bɛhɔle ɔ.

³¹ Yiti Mika bɔbɔ ye amoen bɔ ɔyɛle ne, bɛhɔle so bɛfa bɛyɛle bɛ deɛ, mmerɛ amukoraa bɔ né Nyameɛ awuro ne wɔ Silo ɔ.