Maenbulɛfoɛ 15 - AHYERƐLƐ KRONGRON

Samson di Filistifoɛ so ngonim

¹ Mmerɛ kãa pɛle nu, na atokoɔtelɛ mmerɛ dwuli ne, Samson hɔle kyɛ ɔkwaapasa ɔye ne anwo. Ɔfale abɔngye akrɔngrɔma ko hɔle. Ɔhane kyɛ, “Mepena kyɛ mekɔ me ye sua nu.” Nakoso braa ne baba amma ye ate.

² Braa ne baba nwa, “Né mese kyɛ enguro ye ko, yiti mafa ye mama wɔ damvo ne. Oliɛma brasua kãa ne nwo yɛ nyemene tra ye. Nzu ati yeɛ engya ye mmom ɔ?”

³ Samson sele bɛ kyɛ, “Afei de, sɛ meyɔ nikyee tɛɛ biala metia Filistifoɛ a, menni fɔ.”

⁴ Yiti Samson hɔle ɔɔhyehyele safuboa ɛyaa nza, na ɔfale ɛtɛen bokale so. Ɔkyekyele safuboa nemɔ dua mɔ bobɔle nu nyɔ nyɔ, na ɔkyekyele ɛtɛen wurale dua nyɔ biala b’afia.

⁵ Ɔfale see sosɔle ɛtɛen nemɔ anu, na ɔyakyili safuboa nemɔ maa bɛnwati bɛhɔle Filistifoɛ atokoɔ boo mɔ anu. See ne yerale b’atokoɔ bɔ bate baboa ye noa ɔne bɔ bennya bɛttele ne. Osa yerale bɛ bobe boo ne olive boo mɔ.

⁶ Yeɛ Filistifoɛ bisale kyɛ, “Nwa yeɛ wayɔ sɔ amumuyɛɛ ye?” Na bɛtele kyɛ, “Timinaniɛ ne, ye sia bienzua Samson yeɛ wayɔ sɔ ne, ofikyɛ biaa ne ale Samson aye wafa ye wama Samson abiɛngo.” Yiti Filistifoɛ fale see bɛɛyerale braa ne ɔne ye baba.

⁷ Yeɛ Samson sele bɛ kyɛ, “Sɛ sɔ yeɛ ɛmɔayɔ de a, ye de sana matɔ ɛmɔ so wereɛ koraka né m’ahone atɔ me kunu.”

⁸ Yiti ɔfale koɛ tetale Filistifoɛ huhuni bɛ pasaa; na osili nu ɔɔtenane Etam nyɔbotaen ne anu nekaa bie bɔ nyɔboɛ ne asi sua ɔ.

⁹ Afei Filistifoɛ hɔle bɛɛkyekyele asikyeleɛ wɔ Yuda, na bɛɛbɔle apaa wɔ Lehi.

¹⁰ Yudafoɛ bisale kyɛ, “Nzu ati yeɛ ɛmɔafa koɛ baatoa yɛ ye?” Na Filistifoɛ buale kyɛ, “Yawa kyɛ yɛbaahye Samson ná yɛkɔfa bɔ ɔfa lili yɛ ne bie yɛdi ye.”

¹¹ Yeɛ Yuda koɛhonɛfoɛ apee nza sili nu bɛhɔle nyɔboɛ bɔ wasi sua, bɔ ɔwɔ Etam nyɔbotaen anu ne, na besele Samson kyɛ, “Ɛnze kyɛ Filistifoɛ, yɛ mene mɔ ole bɛ ɔ? Nzikyɛ dwirɛ yeɛ aahwe aberɛ yɛ ye?” Na obuale kyɛ, “Nikyee bɔ bɛfa bɛyɔle me ne, sɔ ala yeɛ mafa mayɔ bɛ ɔ.”

¹² Yudafoɛ sele ye kyɛ, “Yawa kyɛ yɛbaahye wɔ, ná yɛfa wɔ yɛkowura Filistifoɛ sa.” Na Samson buale bɛ kyɛ, “Ɛ́mɔta ndaen kyɛ ɛmɔ bɔbɔ ɛmɔngohu me.”

¹³ Yeɛ bebuale Samson kyɛ, “Daabi, yɛ de, yɛkyekye wɔ mbaen na yɛfa wɔ yɛkowura bɛ sa; yɛngohu wɔ.” Yiti bɛfale nyamaa monɛ nyɔ bɛkyekyele ye, na bɛyele ye befili nyɔboɛ bɔ wasi sua ne anu.

¹⁴ Samson oodwuli Lehi ne, Filistifoɛ bɔle ese beeyiale ye. AWURADE Sunzum wale ye so, na nyamaa bɔ ogua ye sa ne yɛle kyɛ gyese bɔ see atɔ nu ɔ, na nyamaa ne sangye fili ye sa.

¹⁵ Samson nwuni afunum awogyee monɛ bie. Ɔkoto fale, na ɔfa huni mmienzua apee ko.

¹⁶ Na Samson sele kyɛ, “Mafa afunum awogyee, mamaa efuin mɔ ataataa so kure kure, mafa afunum awogyee mahu mmienzua apee ko.”

¹⁷ Odwudwo yiele ne, ogyili awogyee ne tole; na bɛfrɛle berɛ Ramate Lehi.

¹⁸ Sɔ mmerɛ ne, né nzuhɔen ku Samson paa, yiti osũ frɛle AWURADE kyɛ, “Ɛnate w’akoaa so ali ngonim kandinga he. Aso nzuhɔen baahu me, maa mmenia bɔ bɛmbɛ bɛ bienzua nemɔ bɛ sa ka me anaa?”

¹⁹ Yiti kumaa bɔ ɔwɔ Lehi ne, Nyameɛ dwale nu, na nzue pu fili nu wale. Samson none nzue ne, onyane anwoserɛ, na osa kendene ye nwo. Yiti bɛfrɛle mbombonzue ne Ɛn Hakore, na ɔwɔ Lehi maa waadwu ɛnɛ.

²⁰ Na Samson buli Yisrael maen ne afoɛ aburanyɔ wɔ Filistifoɛ aberɛ so.