Maenbulɛfoɛ 13 - AHYERƐLƐ KRONGRON

Samson aworɛ

¹ Yisraelfoɛ sa yɔle bɔ ɔte bɔne wɔ AWURADE nyunu ɔ, na AWURADE fale bɛ wurale Filistifoɛ sa afoɛ aburanna.

² Né biaa bie wɔ berɛ bɔ bɛfrɛ ye Manoa. Ofi Dan abusua kure nu, na ye kuro ole Sora. Né ɔye te mmotaen bɔ ɔwwole baa le ɔ.

³ AWURADE abɔfo yele ye nwo ali hyirele braa ne, ná osele braa ne kyɛ, “Ɔwɔ nu kyɛ ɛte mmotaen bɔ ɛwwole baa le ɔ, nakoso ɛkɔnwonzɛ kɔwo baa bienzua.

⁴ Nea yé né anno bobe nzaa anaa nzaa serɛserɛ biala, yeɛ nnɛdi nikyee biala bɔ ye nwo nde ɔ,

⁵ ofikyɛ ɛkɔnwonzɛ kɔwo baa bienzua. Onni kyɛ bɛtete akwadaa ne ti, ofikyɛ ɔkɔyɛ nasiriteniɛ kɔma Nyameɛ fi ye aworɛ nu. Ye yeɛ ɔkɔhyɛ ye bo kɔpepɛ kole Yisrael kofi Filistifoɛ sa nu ɔ.”

⁶ Na braa ne hɔle ɔɔbɔle ohu amaneɛ kyɛ, “Nyameɛ sona bie wale me berɛ, na osoma Nyameɛ abɔfo. Ye nwo yɛ suro paa. Mammisa ye nekaa horɛ bɔ ofi wale ɔ, yeɛ ye koso wammɔ ye dumaa wangyire me.

⁷ Nakoso osele me kyɛ, ‘Ɛkɔnwonzɛ kɔwo baa bienzua. Yiti nnɛno bobe nzaa anaa nzaa serɛserɛ biala, yeɛ nnɛdi nikyee biala bɔ ye nwo nde ɔ, ofikyɛ akwadaa ne kɔyɛ nasiriteniɛ kɔma Nyameɛ fi ye aworɛ nu kɔpem kyẽa bɔ okowu ɔ.’ ”

⁸ Na Manoa srɛle AWURADE kyɛ, “O AWURADE, mesrɛ wɔ, Nyameɛ sona bɔ ɛsomane ye ne, maa osa bra yɛ wa, ná oohyire yɛ nikyee bɔ ɔsɛ kyɛ yɛyɔ yɛfa akwadaa bɔ yɛbaawo ye ne anwo ɔ.”

⁹ Nyameɛ tiele Manoa mbaeɛ ne, na Nyameɛ abɔfo ne sa hɔle braa ne berɛ wɔ mmerɛ bɔ né ɔte berɛ wɔ fieso ɔ. Nakoso ohu Manoa de, né ɔnne ye nwo berɛ bie.

¹⁰ Yiti braa ne tuli amirika oosele ohu kyɛ, “Biaa bɔ ɛlɛho ne ɔwale me wa ne, wasa waaye ye nwo ali wahyire me.”

¹¹ Yeɛ Manoa dwɔsole lili ɔye asi hɔle biaa ne berɛ, na obisale ye kyɛ, “Aso wɔ yeɛ ɛɛhane edwirɛ hyirele braa he ne?” Na obuale kyɛ, “Yoo, me ɔ.”

¹² Yeɛ Manoa bisale kyɛ, “Sɛ wɔ dwirɛ ne ba nu a, nzikyɛ nhyehyɛleɛ yeɛ ɔfa akwadaa ne anwo ɔ? Nzikyɛ yeɛ odi kyɛ ɔyɔ ɔ?

¹³ Na AWURADE abɔfo ne sele Manoa kyɛ, “Odi kyɛ braa ne di edwirɛ bɔ mahã mahyire ye ne amukoraati so.

¹⁴ Onni kyɛ odi nikyee biala bɔ ofi bobe nu ɔ. Onni kyɛ ɔno bobe nzaa anaa nzaa serɛserɛ biala, yeɛ onni kyɛ odi nikyee biala bɔ ye nwo nde ɔ. Ahyɛdeɛ bɔ mahyɛ mama ye ne amukoraati, odi kyɛ odi so.”

¹⁵ Yeɛ Manoa sele AWURADE abɔfo ne kyɛ, “Mesrɛ wɔ, tena yɛ nwo wa kãa maa yɛhu abɔngye akrɔngrɔma ko maa eli.”

¹⁶ Na AWURADE abɔfo ne buale Manoa kyɛ, “Sɛ ɛmaa metena wɔ nwo wa po a, mengoli w’aleɛ. Nakoso sɛ ekuro kyɛ ɛbɔ naen yeralɛ afɔleɛ a, ye de bɔ ma AWURADE.” (Né Manoa nze kyɛ AWURADE abɔfo ɔ.)

¹⁷ Afei Manoa bisale AWURADE abɔfo ne kyɛ, “Bɛfrɛ wɔ sɛ, amaa sɛ wɔ dwirɛ ne ba nu a, yahyɛ wɔ animnyam?”

¹⁸ Nakoso AWURADE abɔfo ne buale ye kyɛ, “Nzu ati yeɛ ebisa me dumaa ɔ? Me dumaa ne te dumaa bɔ ɔyɛ nwanwa paa ɔ.”

¹⁹ Yiti Manoa fale abɔngye akrɔngrɔma ne, ɔne aburoo afɔleɛ ne, na ɔfa bɔle afɔleɛ wɔ nyɔbotaen ne aso mane AWURADE. Anwanwadeɛ bie sili bɔ né Manoa ne ɔye bɛ nye tua ɔ.

²⁰ See gye fili afɔleɛ bokyea ne aso hɔle nyameɛso. Na AWURADE abɔfo ne fale afɔleɛ bokyea see bɔ ogye ne anu hɔle anwuro bɔ né Manoa ne ɔye bɛ nye tua ɔ. Na bɛfale bɛ nyunu bebutubutuli ase.

²¹ AWURADE abɔfo ne wanye ye nwo ali wangyire Manoa ne ɔye ko. Ɛhe mane Manoa nwuni kyɛ AWURADE abɔfo ɔ.

²² Yeɛ Manoa sele ɔye kyɛ, Ewue yeɛ yɛbaawu ɔ, ofikyɛ yanwu Nyameɛ.”

²³ Nakoso ɔye sele ye kyɛ, “Sɛ AWURADE pena kyɛ oku yɛ a, ahaa ongole yɛ naen yeralɛ afɔleɛ ɔne yɛ aburoo afɔleɛ ne ngɔto nu. Ahaa ɔngɔye nningyein hemɔ amukoraa ngohyire yɛ, anaa ɔngɔhã edwirɛ sɔaa mɔ ngohyire yɛ.”

²⁴ Braa ne wole bienzua na ɔtole ye dumaa Samson. Akwadaa ne nyini, na AWURADE yirale ye.

²⁵ AWURADE Sunzum hyɛle ye bo kanyane ye wɔ Mahane Dan bɔ ɔwɔ Sora ne Esetao b’afia ne.