Maenbulɛfoɛ 1 - AHYERƐLƐ KRONGRON

Yuda ne Simeon mmusua kure di Adoni Beseke so ngonim

¹ Yosua wue asi ne, Yisraelfoɛ bisale AWURADE kyɛ, “Yɛ nu abusua kure beni yeɛ oli moa ɔfa koɛ ɔɔteta Kanaanfoɛ ɔma yɛ ɔ?”

² Na AWURADE buale kyɛ, “Yuda abusua kure yeɛ odi kyɛ odi moa ɔkɔ ɔ. Mafa aseɛ ne mawura ye sa.”

³ Yeɛ Yuda abusua kure sele oliɛma Simeon abusua kure kyɛ, “Baaboka me wɔ aseɛ bɔ bafa bama me ne aso, maa yɛ ne Kanaanfoɛ yɛho; na me koso me ne wɔ kɔhɔ ngɔɔboka wɔ ma wɔ sa kɔha w’aseɛ deɛ bɔ bafa bama wɔ ne.” Yiti Simeon ne ye bɛhɔle.

⁴ Yuda abusua kure sili nu, na AWURADE fale Kanaanfoɛ ne Perisifoɛ wurale bɛ sa. Belili bɛ nu apee buru so ngonim wɔ Beseke.

⁵ Bɛɛtole Adoni Beseke wɔ Beseke. Bɛfale koɛ bɛtetale ye, na belili Kanaanfoɛ ne Perisifoɛ so ngonim.

⁶ Adoni Beseke nwatili, nakoso bɛfoane ye bɛɛhyele ye, na bɛpepɛle ye sa kokotire ne ye gya kokotire.

⁷ Yeɛ Adoni Beseke sele kyɛ, “Ahemvo aburasoo, bɔ mapepɛ bɛ sa kokotire ne bɛ gya kokotire, yeɛ né bɛsesa m’aleɛ bo mboporowa bedi ɔ. Bɔ mayɔ ne yeɛ Nyameɛ atua me so kerɛ ɔ.” Bɛfale ye bɛwale Yerusalem, na berɛ yeɛ owuli ɔ.

Yuda di Yerusalem ne Hebron so ngonim

⁸ Afei Yudafoɛ fale koɛ bɛɛtetale Yerusalem, na bɛho bɛfale kuro ne. Bele ngrandɛ behuhuni nu ama, na bɛtole kuro ne anu see.

⁹ Ye si ye, Kanaanfoɛ bɔ bɛte bokaa aseɛ ne aso, ngwaen dɔ aseɛ ne aso, ɔne aseɛ frɛtɛɛ ne aso ne, Yudafoɛ hɔle bɛ ne bɛ bɛɛhone.

¹⁰ Yuda ɔɔfale koɛ tetale Kanaanfoɛ bɔ bɛte Hebron ne (daa ne, né bɛfrɛ Hebron Kiriate Aba); na belili Sesayi, Ahiman ne Talmae so ngonim.

Otiniɛl di Dɛbi kuro ne so ngonim

¹¹ Befili berɛ ne, bɛfale koɛ bɛɛtetale Dɛbifoɛ (daa ne, né bɛfrɛ Dɛbi Kiriate Sefa).

¹² Na Kalebo sele kyɛ, “Bienzua biala bɔ ɔkɔho koli Kiriate Sefa so ngonim nen, ngɔfa mma brasua Akesa maa okogya ye.”

¹³ Na Otiniɛl bɔ ɔte Kalebo aliɛma bienzua kãa Kenase awa ne, ɔho lili Kiriate Sefa so ngonim; yiti Kalebo fale ɔwa brasua Akesa maa ogyale ye.

¹⁴ Braa ne hɔle agyaa bo wɔ Otiniɛl awuro nen, osele ohu kyɛ ɔ́srɛ aseɛ ófi ye baba Kalebo berɛ. Na braa ne fili ye afunum ne aso dwuli ase nen, Kalebo bisale ye kyɛ, “Nzikyɛ yeɛ ekuro ɔ?”

¹⁵ Na obuale ye kyɛ, “Kyɛ me nikye. Ofikyɛ aseɛ bɔ afa ama me wɔ ngwaen dɔ ne, ɔte wosee. Yiti ma me mbombonzue koso.” Yiti Kalebo fale Gulote sorɔ dɔ ne Golote ngwaen dɔ bokale ye so.

¹⁶ Mose sia bienzua Hobabo bɔ ɔte Keniniɛ ne, ye boso ama mɔ, bɛ ne Yuda boso ama befili ayee kuro ne anu bɛhɔle Yuda ɛserɛ ne aso. Ɛserɛ ne wɔ ngwaen dɔ aseɛ bɔ opingye Arade ne aso. Bɛ ne Amalɛkefoɛ bɛɛtenane.

¹⁷ Yuda ne oliɛma Simeon besili nu bɛhɔle, na belili Kanaanfoɛ bɔ bɛte Sefate ne aso ngonim. Bɛsɛkyele kuro ne pasaa, na bɛfrɛle kuro ne Hɔma.

¹⁸ Yuda ho fale Gasa ne ye nwo aseɛ, Asekelɔn ne ye nwo aseɛ, yeɛ Ekron ne ye nwo aseɛ.

¹⁹ Né AWURADE gyi Yuda si, na Yuda ho fale bokaa aseɛ ne. Nakoso wangora wandu aseɛ frɛtɛɛ ne aso ama wamvi berɛ, ofikyɛ né bele buralɛ teaseɛnam mɔ.

²⁰ Yisraelfoɛ fale Hebron bɛmane Kalebo, kyɛbɔ Mose hyɛle ne; na Kalebo tuli Anake mma mmienzua nza nemɔ fili berɛ.

²¹ Nakoso Benyaminfoɛ bandu Yebusifoɛ bɔ né bɛte Yerusalem ne bamvi berɛ. Yiti Yebusifoɛ ne Benyaminfoɛ babɔ nu batena Yerusalem maa waadwu ɛnɛ.

²² Yosef boso ama koso bɛfale koɛ bɛɛtetale Betel, na AWURADE gyinane Yosef boso ama nemɔ asi.

²³ Yosef boso ama nemɔ somane maentetɛlɛfoɛ wɔ Betel (daa ne, né bɛfrɛ kuro ne Luse).

²⁴ Maentetɛlɛfoɛ nemɔ nwuni kyɛ biaa bie fi kuro ne anu ofite ɔ, na besele ye kyɛ, “Kyire yɛ atee bɔ ɔkɔ kuro ne anu ɔ, na yɛkɔmaa ekonya wɔ ti kodidi nu.”

²⁵ Yiti biaa ne hyirele bɛ atee bɔ ɔkɔ kuro ne anu ɔ. Bele ngrandɛ behuhuni kuro ne anu ama, nakoso bɛyakyili biaa ne, ɔne ye abusuafoɛ amukoraa.

²⁶ Biaa ne hɔle Hitifoɛ aseɛ so ɔɔkyekyele kuro. Ɔtole kuro ne dumaa Luse, na ɛnɛ ne ɛnɛ ye, sɔ yeɛ bɛfrɛ kuro ne ɔ.

²⁷ Bete Sean ne ye nwo nguraa mɔ, Taanake ne ye nwo nguraa mɔ, Dɔɔ ne ye nwo nguraa mɔ, Yiblim ne ye nwo nguraa mɔ, yeɛ Megido ne ye nwo nguraa mɔ de, Manasefoɛ bandu berɛ ama bamvi berɛ; na mmom Kanaanfoɛ nemɔ hɔle so bɛtenane aseɛ ne aso.

²⁸ Na nziɛ ye bɔ Yisrael nwo yɛle se ne, bɛhyɛle Kaananfoɛ maa bɛyɔle adwuma bɛmane bɛ, nakoso bandu bɛ bamvi aseɛ ne aso.

²⁹ Efraim andu Kanaanfoɛ bɔ bɛte Gɛsɛre ne wamvi berɛ, na mmom bɛ ne Kanaanfoɛ bɛbɔle nu bɛtenane Gɛsɛre.

³⁰ Sebulɔn andu Kitronfoɛ ne Nahalolfoɛ wamvi berɛ; na mmom bɛ ne Kanaanfoɛ bɔle nu bɛtenane, na Yisraelfoɛ hyɛle bɛ maa bɛyɔle adwuma bɛmane bɛ.

³¹ Asɛ andu Akofoɛ, Sidonfoɛ, Ahelabofoɛ, Akisibofoɛ, Helebafoɛ, Afikefoɛ, yeɛ Rehobofoɛ wamvi berɛ,

³² na mmom Kanaanfoɛ bɔ né bɛwɔ aseɛ ne aso ne, Asɛfoɛ ne bɛ bɔle nu bɛtenane; ofikyɛ bandu bɛ bamvi berɛ.

³³ Nafetali andu Bete Semesefoɛ ne Bete Anatefoɛ wamvi berɛ, na mmom Kaananfoɛ bɔ né bɛte aseɛ ne aso ne, Nafetalifoɛ ne bɛ bɔle nu bɛtenane berɛ. Nakoso Nafetalifoɛ hyɛle Bete Semesefoɛ ne Bete Anatefoɛ maa bɛyɔle adwuma bɛmane bɛ.

³⁴ Amorifoɛ foane Danfoɛ maa besale bɛ si bɛhɔle mmokaa aseɛ ne aso. Bamma bɛ ate maa bandorotoro bamma aseɛ frɛtɛɛ ne aso.

³⁵ Amorifoɛ hɔle so bɛtenane Hare Herese, Ayalɔn, yeɛ Saalebim. Nakoso Yosef boso ama nemɔ nwo yɛle se trale bɛ, na bɛhyɛle bɛ maa bɛyɔle adwuma bɛmane bɛ.

³⁶ Amorifoɛ aseɛ ne wɛen ne, ye noa hyɛ ye bo fi Akrabim pambaa ne, na ɔtoa so kɔ Sela kɔ sorɔ dɔ.