Luka 3 - AHYERƐLƐ KRONGRON

Asubɔlɛniɛ Yohane nzɛmbahanɛ

¹ Na Kaesare Tiberio ahennie afoɛ bɔ ɔtɔ so buru ne nnu ne, bɔ né Pontio Pilato te amrado wɔ Yudea nen, bɔ né Herode yeɛ ɔnea Galilea manzini ne aso ne, né oliɛma Filipo yeɛ ɔnea Yiturea ne Trakoniti manzini nemɔ aso ɔ, yeɛ né Lisania koso ɔne Abilene manzini so ɔ.

² Na mmerɛ bɔ né Anase ne Kaifa yeɛ bɛte asɔfo mbanyi paa ne, Nyameɛ lale ye dwirɛ ali hyirele Sakaria awa Yohane wɔ ɛserɛ so.

³ Yiti ohyinini asue Yɔɔdan nwo aseɛ ne aso amukoraa hane adwenesakyera asubɔlɛ nwo nzɛmba bɔ ɔmaa benya bɔnefakyɛ ɔ;

⁴ kyɛbɔ bahyerɛ ye wɔ ngɔmhyɛlɛniɛ Yesaya dwirɛ nwomaa ne anu kyɛ, “Ebie tea nu wɔ ɛserɛ so kyɛ, Ɛ́mɔsiesie Awurade atee! Ɛ́mɔma ye atimbire tengyɛ!

⁵ Bekotuatua mmɔnga mmɔnga amukoraa, bekodwiri mmokaa ne pambaa amukoraa maa bɛkɔhã ase; na atee bɔ wahyea ne, bɛkɔtengyɛ ye, na bɛkɔma atee mborɛ mborɛ nemɔ kɔla so yɔɔ.

⁶ Na anwoɔnaen amukoraa konwu Nyameɛ ngoalelɛ ne.”

⁷ Yeɛ osele mmenia wora bɔ bɛwale kyɛ ɔbɔ bɛ asu ne kyɛ, “Ɛbɔnaa mmaa! Nwa yeɛ ɔbɔle ɛmɔ kɔkɔ kyɛ ɛmɔnwati befi ɛyaafɛlɛ bɔ ɔ́ba ne ɔ?

⁸ Ɛ́mɔbɔ bra bɔ ɔfata adwenesakyera ɔ, na nnɛma ɛmɔhyɛ ye bo bɛkekã bekyirekyire ɛmɔ nwo kyɛ, ‘Abraham te yɛ nana’; na mekã mekyire ɛmɔ kyɛ, Nyameɛ kɔhora kotingye nnomaa kofi nyɔboɛ hemɔ anu kɔma Abraham.

⁹ Na kekesaala ye po, bafa akumaa ne babɔ bakaa ne ndii nu, na bakaa biala bɔ onzu mmaa paa nen, bɛkɔpɛ bekogyi bɛkɔto see nu.”

¹⁰ Na ɛlɔen ne bisale ye kyɛ, “Yiti nzikyɛ yeɛ odi kyɛ yɛyɔ ɔ?”

¹¹ Na obuale bɛ kyɛ, “Sona bɔ ole ataadeɛ aguasoɛ nyɔ ne, maa ɔhyɛ nu ma bɔ olle bie ɔ bie; yeɛ bɔ ole aleɛ ne koso, maa ɔyɔ sɔ ala.”

¹² Na ɛtoɔdidelɛfoɛ koso bɛwale kyɛ ɔbɔ bɛ asu, na bebisale ye kyɛ, “Kyerɛkyerɛniɛ, nzu yeɛ odi kyɛ yɛyɔ ɔ?”

¹³ Na osele bɛ kyɛ, “Nnɛma ɛmɔdide ɛtoɔ maa ɔbo bɔ bapɛ bama ɛmɔ ne aso.”

¹⁴ Yeɛ asraafoɛ koso bisale ye kyɛ, “Yɛ koso, nzu yeɛ odi kyɛ yɛyɔ ɔ?” Na obuale bɛ kyɛ, “Nnɛma ɛmɔhyɛ ebiala so, nnɛma ɛmɔto ebiala soen, yeɛ ɛ́mɔma ɛmɔ akatuaa ɔsɔ ɛmɔ nye.”

¹⁵ Na maen ne, né bɛ nye la ate, yiti bebisabisale bɛ nwo wɔ bɛ ti anu, sɛ ebiaa Yohane ole Kristo ne anaa, anaakyɛ nna ye ɔ.

¹⁶ Na Yohane buale bɛ mukoraa kyɛ, “Me de, mefa nzue yeɛ mebɔ ɛmɔ asu ɔ; nakoso ebie ɔ́ba bɔ odi mu tra me ɔ, bɔ ye mbaboa nyamaa po memvata kyɛ mesangye ɔ. Na ye de, ɔkɔfa Sunzum Krongron ne see yeɛ ɔkɔbɔ ɛmɔ asu ɔ.

¹⁷ Ye huhuamoa tira ye sa nu, kyɛ ɔfa prapra ye nekaa bɔ bɛboro aburoo ne ma berɛ yɛ sannwuu, ná ɔboaboa atokoɔ ne noa ogua ye pata so; nakoso afafu ne de, ɔkɔfa see bɔ onnua le ɔ yeɛ ɔkɔyera ye ɔ.”

¹⁸ Na ɔfale edwirɛ pee bokale so otuli maen ne foɛ, na ɔhane nzɛmba ne hyirele bɛ.

¹⁹ Né Yohane ahwi manzini hene Herode nyunu, ofikyɛ né Herode agya Herodiase bɔ ɔte oliɛma aye ɔ, afei koso né Herode ali edwirɛ tɛɛ pee;

²⁰ yiti sɔ dwirɛ he, ɔfa bokale ye mukoraa so, na ɔfale Yohane tole kuku nu.

Yohane bɔ Yesu asu

²¹ Na ɔwale kyɛ, ɔbɔle mmenia ne amukoraa asu nen, ɔbɔle Yesu koso asu, na ɔ́bɔ mbaeɛ nen, anwuro bukyele,

²² na Sunzum Krongron dwu wale ye so wɔ anwoɔnaen tebea nu, kyɛ abubure, na edwudwolɛ bie fili nyameɛso hane kyɛ, “Wɔ ole Mma bɔ mekuro wɔ dwirɛ bɔ ɛsɔ me nye paa ɔ.”

Yesu abusua aworɛ ndoatoasoɛ

²³ Yesu hyɛle ye adwuma ne abo nen, né wali afoɛ kɔyɛ aburasa. Ye baba (kyɛbɔ né mmenia bede bedi ne) ye ole Yosef bɔ ɔse ole

²⁴ Heli, bɔ ɔse ole Matate, bɔ ɔse ole Lewi, bɔ ye koso ɔse ole Mɛlki, bɔ ɔse ole Yana, bɔ ɔse ole Yosef,

²⁵ bɔ ɔse ole Matatia, bɔ ɔse ole Amose, bɔ ɔse ole Nahum, bɔ ɔse ole Esili, bɔ ɔse ole Nagae,

²⁶ bɔ ɔse ole Maate, bɔ ɔse ole Matatia, bɔ ɔse ole Semin, bɔ ɔse ole Yoseke, bɔ ye koso ɔse ole Yoda,

²⁷ bɔ ɔse ole Yoanan, bɔ ɔse ole Resa, bɔ ɔse ole Serubabɛl, bɔ ye koso ɔse ole Sɛtiɛl, bɔ ɔse ole Neri,

²⁸ bɔ ɔse ole Mɛlki, bɔ ɔse ole Adi, bɔ ɔse ole Kosam, bɔ ɔse ole Ɛlmadam, bɔ ɔse ole Ɛre,

²⁹ bɔ ɔse ole Yosua, bɔ ɔse ole Eliesa bɔ ɔse ole Yorim, bɔ ɔse ole Matate, bɔ ɔse ole Lewi,

³⁰ bɔ ɔse ole Simeon, bɔ ɔse ole Yuda, bɔ ɔse ole Yosef, bɔ ɔse ole Yonam, bɔ ɔse ole Eliakim,

³¹ bɔ ɔse ole Melea, bɔ ɔse ole Mena, bɔ ɔse ole Matata, bɔ ɔse ole Natan, bɔ ɔse ole Dawide,

³² bɔ ɔse ole Yese, bɔ ɔse ole Obɛde, bɔ ɔse ole Boase, bɔ ɔse ole Salmon, bɔ ɔse ole Nason,

³³ bɔ ɔse ole Aminadabo, bɔ ɔse ole Adimin, bɔ ɔse ole Ani, bɔ ɔse ole Hesron, bɔ ɔse ole Pɛrɛse, bɔ ɔse ole Yuda,

³⁴ bɔ ɔse ole Yakob, bɔ ɔse ole Yisake, bɔ ɔse ole Abraham, bɔ ɔse ole Tera, bɔ ɔse ole Nahɔ,

³⁵ bɔ ɔse ole Seruge, bɔ ɔse ole Reo, bɔ ɔse ole Pɛlɛge, bɔ ɔse ole Heberi, bɔ ɔse ole Sela,

³⁶ bɔ ɔse ole Kenan, bɔ ɔse ole Afasade, bɔ ɔse ole Sem bɔ ɔse ole Nowa, bɔ ɔse ole Lamɛke,

³⁷ bɔ ɔse ole Metusela, bɔ ɔse ole Henɔke, bɔ ɔse ole Yarede, bɔ ɔse ole Mahalaleel; bɔ ɔse ole Kenan,

³⁸ bɔ ɔse ole Enose, bɔ ɔse ole Sɛte, bɔ ɔse ole Adam, bɔ ɔse ole Nyameɛ ne.