Luka 22 - AHYERƐLƐ KRONGRON

Bɛbɔ Yesu ti so porɛ

¹ Né Paanoo Kabrɛdi aluolue bɔ bɛfrɛ ye Abɔtra ne wapingye.

² Né asɔfo mbanyi ne ahyerɛlɛfoɛ nemɔ bɛpena atee bɔ bɛkɔfa so bekohu Yesu ɔ, ofikyɛ né besuro ɛlɔen ne.

Yudase pene so kyɛ ɔkɔye Yesu kɔma

³ Na Abɔnzam oowurale Yudase bɔ oli Yiskariote, bɔ ɔte asuafoɛ buru ne nyɔ nemɔ bɛ nu ko ne anu.

⁴ Yiti osili nu hɔle asɔfo mbanyi ne asɔneyɛɛ sua nu awɛmvoɛ mbanyi nemɔ berɛ, na ɔne bɛ besusuli atee horɛ bɔ ɔkɔfa so kɔye Yesu kɔma bɛ ɔ nwo.

⁵ Ɔyɛle bɛ fɛ, na bɛ ne ye bɛhyehyɛle kyɛ bɛkɔfa ye nwo sikaa bɛkɔma ye.

⁶ Yiti Yudase penene so, na ɔbɔle ye nwo aporɔ kyɛ okonya atee bɔ ɔkɔfa so kɔye Yesu kɔma bɛ, bɔ ɛlɔen ne bɛnne berɛ ɔ.

Abɔtra aleɛ ne

⁷ Afei Paanoo kabrɛdi kyẽa bɔ ɔsɛ kyɛ beku Abɔtra boaen ne dwuli.

⁸ Na Yesu somane Petro ne Yohane kyɛ, “Ɛmɔhɔ beesiesie Abɔtra aleɛ ne bɛma yɛ, ná yɛɛli.”

⁹ Yeɛ bebisale ye kyɛ, “Nisua yeɛ ekuro kyɛ yɛkosiesie aleɛ ne ɔ?”

¹⁰ Na obuale bɛ kyɛ, “Ɛ́mɔtie, sɛ ɛmɔdwu kuro berɛ a, biaa bie bɔ ɔso bua bɔ nzue wɔ nu ɔ koyia ɛmɔ. Ɛ́mɔli ye si bɛhɔ awuro bɔ okoowura nu ne anu,

¹¹ ná ɛmɔhã behyire awuro ne mene kyɛ, ‘Kyerɛkyerɛniɛ ne, bɔ ɔkã kyire wɔ hɔ ɛhe: Ɛwɔfoɛ sua bɔ nu yeɛ me ne m’asuafoɛ yɛkoli Abɔtra aleɛ nen, ɔwɔ ni?’

¹² Na okohyire ɛmɔ aborɔsaen so asaso pirikua bɔ basiesie nu ɔ; na berɛ yeɛ ɛ́mɔsiesie Abɔtra aleɛ ne ɔ.”

¹³ Bɛhɔle beenwuni nikyee biala pɛpɛɛpɛ kyɛbɔ ɔhã hyirele bɛ ne; na besiesiele Abɔtra aleɛ ne.

Awurade adidie ne

¹⁴ Na mmerɛ ne dwuli nen, ɔɔtenane poen nwo, na né asomafoɛ nemɔ bɛboka ye so.

¹⁵ Na osele bɛ kyɛ, “Mayɛ m’adwene paa kyɛ me ne ɛmɔ yɛkoli Abɔtra aleɛ he koraka né manwu amaneɛ.

¹⁶ Na mekã mekyire ɛmɔ kyɛ, mengoli bie ko maa okoodwu kyɛ ɔkɔwa nu wɔ Nyameɛ ahennie nu ɔ.”

¹⁷ Afei Yesu fale kulie ne, ɔlale ase, na ɔhane kyɛ, “Ɛmɔle he, ná ebiala no bie.

¹⁸ Na mekã mekyire ɛmɔ kyɛ, ofi ɛnɛ bɔ ɔkɔ ɔ, mengɔno bobe nzaa he ko kɔpem kyɛ Nyameɛ ahennie ne kɔwa ɔ.”

¹⁹ Afei ɔfale paanoo, ɔlale ase, obubuli nu fa mane bɛ, na ɔhane kyɛ, “Ɛhe te me nwonaen bɔ ɛmɔ ti bɛ́fa bɛ́ma ɔ; ɛ́mɔyɔ he bɛ́fa bɛ́kaye me.”

²⁰ Sɔ ala yeɛ bedidili beyiele ne, ɔfale kulie, na ɔhane kyɛ, “Kulie he bɔ ɛmɔ ti béhwie bégua ye, ɔte apam foforɛ wɔ me mogya nu.

²¹ “Nakoso ɛ́mɔnea! Sona bɔ ɔ́ye me ma ne, ɔne me te poen nwo yɛdidi.

²² Nahorɛ nu, Sona Awa ne ɔ́kɔ kyɛbɔ bahyehyɛ ne, nakoso sona bɔ ɔkɔye ye kɔma ne de, ye yaakɔ!”

²³ Yeɛ bɛhyɛle ye bo bebisabisale bɛ nwo bɛpenane bɛ nu horɛ bɔ ɔbaayɔ sɔ nikyee ne ɔ.

Yesu dwudwo tia anwomasoɛ

²⁴ Na edwudwolɛ bie wale b’afia kyɛ, bɛ nu nwa yeɛ odi kyɛ bebu ye kyɛ ɔte titire paa ɔ.

²⁵ Na Yesu sele bɛ kyɛ, “Amaenmaensofoɛ b’ahemvo mɔ bedi bɛ mmenia so ahenzɛm; na bɛ bɔ tumi wura bɛ sa bɔ bedi bɛ so tumi ne, bɛfrɛ bɛ ‘Adaworoma.’

²⁶ Nakoso ɛmɔ de, ɔnzɛ kyɛ ɔba ye sɔ ɔ; na mmom bɔ ɔte titire wɔ ɛmɔ nu ne, ɔsɛ kyɛ ɔyɛ kyɛ ɔte kãa; yeɛ bɔ ɔla ɛmɔ noa ne, ɔsɛ kyɛ ɔyɛ kyɛ ebie bɔ ɔso ɔ.

²⁷ Na bɛ nu nwa yeɛ ɔte titire ɔ: bɔ ɔte poen nwo odidi ne, anaakyɛ bɔ ɔso ne? Aso nna bɔ ɔte poen nwo odidi ne ɔ? Nakoso me de, nwɔ ɛmɔ nu kyɛ ebie bɔ ɔso ɔ.

²⁸ “Ɛmɔ yeɛ ɛmɔ ne me banate alaa wɔ me nzɔhwɛ nu ɔ;

²⁹ na kyɛbɔ me Baba afa ahennie ne wama me ne, sɔ ala yeɛ me koso mefa mema ɛmɔ ɔ,

³⁰ amaa ɔnate so ɛmɔadidi ná ɛmɔano wɔ me poen so wɔ m’ahennie nu, ná ɛmɔatenatena ahennie bia so babua Yisrael mmusua kure buru ne nyɔ ne ndɛen.”

Yesu hyɛ ngɔm kyɛ Petro kɔpo ye

³¹ [Na Awurade sele kyɛ,] “Simɔn, Simɔn, tie, ahaa Abɔnzam kuro kyɛ ye sa kã ɛmɔ, ná ohuhu ɛmɔ so kyɛ aburoo.

³² Nakoso mabɔ mbaeɛ mama wɔ, kyɛbɔ wɔ gyidie ngɔtɔ ase ɔ, amaa sɛ esa gyina wɔ gya so a, ahyɛ eliɛma mɔ nguraen.”

³³ Na Petro buale ye kyɛ, “Awurade, maboaboa me nwo kyɛ me ne wɔ yɛkɔhɔ kuku nu ne ewue nu.”

³⁴ Na Yesu sele kyɛ, “Petro, mekã mekyire wɔ kyɛ, ɛnɛ, anzana akɔ kɔbɔ ne, né asa ye pɛen nza kyɛ ɛnze me.”

Kɔkɔbɔlɛ bieku

³⁵ Na obisale bɛ kyɛ, “Mmerɛ bɔ nzomane ɛmɔ bɔ ɛmɔamva sikaabɔtɔ, anaa ateetulɛ bɔtɔ, anaa mbaboa ne, nikyee bie hiane ɛmɔ anaa?” Na bebuale kyɛ, “Daabi, yanhia hwee.”

³⁶ Yeɛ osele bɛ kyɛ, “Nakoso afei de, ebiala bɔ ole sikaabɔtɔ ne, ɔsɛ kyɛ ɔfa, yeɛ ye ateetulɛ bɔtɔ koso sɔ ala; na ebiala bɔ olle ngrandɛ ne de, ɔsɛ kyɛ ɔtɔne ye tena fa tɔ ngrandɛ.

³⁷ Na mekã mekyire ɛmɔ kyɛ, sɔ dwirɛ he bɔ Ahyerɛlɛ ne ɔkã ne, ɔsɛ kyɛ ɔba nu wɔ me nwo kyɛ, ‘Bɛhale ye bɛfrale mmeraatolɛfoɛ.’ Ofikyɛ bɔ ɔfa me nwo ne, ye mmerɛ bɔ ɔsɛ kyɛ ɔba nu ne wadwu.”

³⁸ Yeɛ besele ye kyɛ, “Awurade, nea! Ngrandɛ nyɔ wɔ wa.” Na osele bɛ kyɛ, “Ɛ́mɔpɛ dwirɛ he aso!”

Yesu di aworabɔlɛ wɔ Getsemane

³⁹ Yesu fili berɛ, na kyɛbɔ né ɔtaa yɔ ne, ɔhɔle Olive Bokaa ne aso, na ye asuafoɛ nemɔ belili ye si.

⁴⁰ Na odwuli berɛ nen, osele bɛ kyɛ, “Ɛ́mɔbɔ mbaeɛ ná ɛmɔangɔ nzɔhwɛ nu!”

⁴¹ Na ɔhwene ye nwo fili bɛ nwo berɛ hɔle ye nyunu moa kãa nen, obuli ndwerɛ bɔle mbaeɛ kyɛ,

⁴² “Baba, sɛ ekuro a, ye sɔ kulie he fi me so; nakoso nna kyɛbɔ mekuro hɔ ɔ, na mmom bɔ ekuro ne yeɛ ɔyɛ berɛ ɔ.” [

⁴³ Na abɔfo fili nyameɛso ɔɔyele ye nwo ali hyirele ye, na ɔhyɛle ye nguraen.

⁴⁴ Né Yesu wora abɔ soma, na ɔhɔle so mane ye mbaeɛbɔlɛ nu yɛle se. Na ye nwo mvifire ne yɛle kyɛ mogya bɔ ɔpepe gua ase ɔ.]

⁴⁵ Na odwɔsole fili mbaeɛbɔlɛ ne anu nen, ɔwale asuafoɛ nemɔ nwo dɔ, na onwuni kyɛ aworabɔlɛ amaa balafelafe.

⁴⁶ Na osele bɛ kyɛ, “Nzu ati yeɛ ɛmɔdafe ye? Ɛ́mɔdwɔso bɛ́bɔ mbaeɛ ná ɛmɔangɔ nzɔhwɛ nu.”

Bɛhyele Yesu

⁴⁷ Na Yesu gu so odwudwo nen, yieee, ɛlɔen bie wale berɛ. Né asuafoɛ buru ne nyɔ ne anu ko bɔ oli Yudase yeɛ oli bɛ nyunu ɔ. Ɔwale Yesu nwo berɛ, na ɔfele ye noa.

⁴⁸ Na Yesu bisale ye kyɛ, “Yudase, aso ele bɛ noafelɛ yeɛ ɛfa ɛye Sona Awa ne ma ɔ?”

⁴⁹ Na mmenia bɔ né bɛwɔ ye nwo berɛ ne, benwuni bɔ ɔbaasi nen, bebisale ye kyɛ, “Awurade, yɛ́fa ngrandɛ yɛ́pepɛ bɛ anaa?”

⁵⁰ Na bɛ nu ko bɔle ɔsɔfo panyi paa n’akoaa, na ɔpɛle ye so famaa tole.

⁵¹ Na Yesu hane kyɛ, “Daabi, nnɛma ɛmɔyɔ sɔ ko!” Na ɔfale ye sa hane ye so ne maa ɔyɛle kyɛ ye daa ne ala.

⁵² Afei Yesu sele asɔfo mbanyi ne asɔneyɛɛ sua nu awɛmvoɛ nemɔ ne maen mbanyi bɔ bɛwale kyɛ bɛbaahye ye ne kyɛ, “Ɛmɔwale kyɛ ɛmɔbaahye awerɔm awueniɛ hɔ ɔ, bɔ ɛmɔtiratira ngrandɛ ne mmopura ye?

⁵³ Daa biala bɔ né me ne ɛmɔ yɛwɔ asɔneyɛɛ sua ne anu nen, ɛmɔangye me. Na ɛhe yeɛ ɔte ɛmɔ mmerɛ ne awosii tumi ɔ.”

Petro po Yesu

⁵⁴ Afei bɛhyele Yesu, na bɛfale ye bɛhɔle ɔsɔfo panyi paa n’awuro. Na Petro de, olili bɛ si nziɛ nziɛ.

⁵⁵ Behuane see wɔ aluo berɛ bɛtenane ye nwo, na Petro ɔɔtenane bɛ nwo berɛ bie.

⁵⁶ Yeɛ afaneɛ abaayaa bie nwuni ye kyɛ ɔte see ne anwo berɛ, na ɔneane ye haa sele kyɛ, “Akoaa he koso, né ɔne ye yeɛ bɛnate ɔ.”

⁵⁷ Nakoso ɔsale kyɛ, “Mmobraa, menze ye oo!”

⁵⁸ Na ɔhyɛle kãa nen, sona foforɛ nwuni ye, na ɔhane kyɛ, “Wɔ koso ɛboka bɛ so!” Nakoso Petro hane kyɛ, “Ngyabiaa, mmmoka bɛ so oo!”

⁵⁹ Na kɔyɛ dɔnhwere ko asi ne, sona foforɛ bieku sili so kyɛ, “Ɔte nahorɛ, akoaa he, né ɔne ye yeɛ bɛnate ɔ, ofikyɛ ɔte Galileaniɛ.”

⁶⁰ Nakoso Petro buale kyɛ, “Ngyabiaa, bɔ ɛkã ye, menze ye nwo hwee oo!” Na ye noa wɔ so bɔ odwudwo nen, berɛ ne ala akɔ bɔle.

⁶¹ Na Awurade pɛle ye nye neane Petro nyunu, na Petro kayele Awurade dwirɛ bɔ ɔhã hyirele ye kyɛ, “Ɛnɛ, akɔ ngɔbɔ né ahã ye pɛen nza kyɛ ɛnze me” ne.

⁶² Na Petro fite hɔle oosuni hahii.

Bɛgoro Yesu nwo besa bɛbo ye

⁶³ Na mmenia bɔ né betiratira Yesu nu ne, bɛgorole ye nwo, na bɛbole ye.

⁶⁴ Bɛkyekyele ye nye, na bebisale ye kyɛ, “Hyɛ ngɔm! Nwa yeɛ ɔbɔle wɔ ne?”

⁶⁵ Na musue dwirɛ pee boka so yeɛ bɛkekã betiale ye ɔ.

Yesu gyi badwa nyunu

⁶⁶ Na aleɛ hyene ne, maen mbanyi ne asɔfo mbanyi ne ahyerɛlɛfoɛ nemɔ beyiale, na bɛfale ye bɛhɔle bɛ badwa ne anyunu, na besele ye kyɛ,

⁶⁷ “Wɔ ole Kristo ne anaa? Kã kyire yɛ!” Na obuale bɛ kyɛ, “Sɛ mekã mekyire ɛmɔ a, ɛmɔngole ngoli,

⁶⁸ yeɛ sɛ mebisa ɛmɔ dwirɛ koso a, ɛmɔngɔma me mmuayɛɛ.

⁶⁹ Na ofi ɛnɛ bɔ ɔkɔ ɔ, Sona Awa ne kɔtena Nyameɛ tumi ne sa famaa so.”

⁷⁰ Yeɛ bɛ mukoraa bebisale kyɛ, “Yiti wɔ ole Nyameɛ Awa ne anaa?” Na obuale bɛ kyɛ, “Ye ala yeɛ ɛmɔahã ne. Me ole ye!”

⁷¹ Na bɛhane kyɛ, “Adanzeɛ beni bieku yeɛ yɛhia ɔ? Yɛ bɔbɔ yate yafi ye noa nu.”