Luka 20 - AHYERƐLƐ KRONGRON

Yesu tumi nwo adwobisa

¹ Na ɔwale kyɛ ɛlɛho bie, bɔ né Yesu ɔyɛ ngyerɛkyerɛ kyire mmenia wɔ asɔneyɛɛ sua ne anu, ná osa kã nzɛmba nen, asɔfo mbanyi ne ahyerɛlɛfoɛ ne maen mbanyi bɛwale ye berɛ,

² na besele ye kyɛ, “Kã kyire yɛ, tumi beni yeɛ egyi so bɔ ɛyɔ sɔ nningyein hemɔ ye? Anaakyɛ, nwa yeɛ ɔmane wɔ sɔ tumi ne ɔ?”

³ Na obuale bɛ kyɛ, “Me koso ngobisa ɛmɔ dwirɛ ko, na ɛ́mɔma me mmuayɛɛ:

⁴ Yohane asubɔlɛ ne, ofi nyameɛso anaakyɛ ofi mmenia berɛ?”

⁵ Na bɛdwenedwenene ye nwo besisele bɛ nwo kyɛ, “Sɛ yɛkã kyɛ, ‘Ofi nyameɛso’ a, okobisa kyɛ, ‘Nzaade, nzu ati yeɛ ɛmɔanne ye banni ɔ?’

⁶ Yeɛ sɛ yɛkã kyɛ, ‘Ofi mmenia berɛ’ a, mmenia ne amukoraa bɛkɔboro yɛ nyɔboɛ; ofikyɛ bede bedi amba kyɛ Yohane te ngɔmhyɛlɛniɛ.”

⁷ Yiti bebuale kyɛ, “Yɛnze nekaa bɔ ofi ɔ.”

⁸ Na Yesu sele bɛ kyɛ, “Nzaade me koso mengɔhã tumi horɛ bɔ ngyi so meyɔ sɔ nningyein hemɔ ɔ mengohyire ɛmɔ.”

Hwɛsofoɛ bɔnefoɛ biemɔ nwo anyandera

⁹ Na Yesu hyɛle ye bo buli anyandera he hyirele mmenia nemɔ kyɛ, “Biaa bie yɔle bobe boo, ɔfa wurale hwɛsofoɛ biemɔ sa, na otuli atee hɔle maen bie aso dedeede ɔɔhyɛle.

¹⁰ Na bobe mmaa telɛ dwuli ne, ɔsomane ye somvoɛ ko maa ɔhɔle hwɛsofoɛ nemɔ berɛ, kyɛ bɛ́ma ye bobe boo ne anu mmaa ne bie. Nakoso hwɛsofoɛ nemɔ bole ye, na bɛmaa osa hɔle nzanza.

¹¹ Na ɔsomane somvoɛ foforɛ; na ye koso bɛbole ye beguale ye nyunu ase, na bɛmaa osa hɔle nzanza.

¹² Na ɔsomane bɔ ɔtɔ so nza ɔ; na ye koso bepurapurale ye bɛfoane ye befili berɛ.

¹³ Yeɛ bobe boo mene ne sele kyɛ, ‘Ɛhe de, ngɔyɛ ye sɛ? Ngɔsoma mma bɔ ɔla m’ahone nwo ɔ; ebiaa ye de bɛkɔfa anidie bɛkɔma ye!’

¹⁴ Nakoso hwɛsofoɛ nemɔ nwuni ye nen, besisele bɛ nwo kyɛ, ‘Bɔ odi ye bia ne ɛhe; ɛmɔma yɛhu ye, ná agyapadeɛ ne ɔyɛ yɛ deɛ.’

¹⁵ Yiti bɛhwene ye befili bobe boo ne anu beehuni ye. “Yiti nzikyɛ yeɛ bobe boo mene ne ɔkɔfa kɔyɛ bɛ ɔ?

¹⁶ Ɔkɔwa koohu sɔ hwɛsofoɛ nemɔ, ná wafa bobe boo ne wawura mmenia foforɛ sa.” Na bɛtele sɔ dwirɛ ne nen, besele kyɛ, “Nyameɛ pa gua!”

¹⁷ Nakoso ɔneane bɛ haa, na obisale kyɛ, “Né nzaade, ye bo kyire sɛɛ, ɛhe bɔ bahyerɛ ye kyɛ, ‘Nyɔboɛ bɔ suasilɛfoɛ bɛpole ye ne, ye ala yeɛ waayɛ sua ne ndweasoɛ nyɔboɛ titire ɔ.’

¹⁸ Ebiala bɔ okofi ase kɔtɔ sɔ nyɔboɛ ne aso ne, okobubu ye nu ahuronzi ahuronzi; yeɛ sɛ ɔte tɔ ebie so a, okonuku ye nyokonyoko.”

Ɛtoɔtualɛ nwo adwobisa

¹⁹ Na ahyerɛlɛfoɛ ne asɔfo mbanyi nemɔ benwuni kyɛ anyandera he bɔ Yesu buli ne, ɔne bɛ, yiti ahaa bɛpena kyɛ bɛkye ye berɛ ne ala, nakoso né besuro ɛlɔen ne.

²⁰ Yiti bɛtetɛle ye. Na bɛsomane mmenia biemɔ bɔ bayɛ bɛ nwo kyɛ bɛte mmeni paa ɔ maa bɛhɔle ye berɛ, kyɛ bɛɛfa dwirɛ besua ye ngaen, ná bagyina so baye ye bawura amrado tumi ne ye mmeraa sa.

²¹ Yiti bebisale ye kyɛ, “Kyerɛkyerɛniɛ, yɛse kyɛ wɔ noa dwirɛ ne wɔ ngyerɛkyerɛ te turoloo, yeɛ ɛmva wɔ nye ndo sona ye dibea, na mmom ekyirekyire Nyameɛ atee ne nahorɛ nu.

²² Aso otia mmeraa kyɛ yɛtua ɛtoɔ yɛma Kaesare, anaakyɛ ondia?”

²³ Na Yesu nwuni b’adwenemmɔne nen, osele bɛ kyɛ, “[Nzu ati yeɛ ɛmɔso me bɛnea ɔ]

²⁴ Ɛ́mɔma me denare ko maa nnea! Nwa mvonini ne dumaa yeɛ ɔwɔ so ye?” Bebuale kyɛ, “Kaesare deɛ ɔ!”

²⁵ Na osele bɛ kyɛ, “Nzaade ɛ́mɔfa Kaesare deɛ bɛ́ma Kaesare, ná ɛ́mɔfa Nyameɛ deɛ bɛ́ma Nyameɛ.”

²⁶ Na bangora bannya ye noa dwirɛ nu mvomsoɛ bangyina so wɔ mmenia n’anyunu berɛ, na mmom ye mmuayɛɛ ne yɛle bɛ nwanwa maa bɛhane bɛ noa bɛtole nu.

Ewutingyelɛ nwo adwobisa

²⁷ Na Sadusiifoɛ bɔ bɛnwa awufoɛ dwɔsolɛ nne berɛ ne, bɛ nu biemɔ wale Yesu berɛ beebisale ye

²⁸ kyɛ, “Kyerɛkyerɛniɛ, Mose hyerɛ mane yɛ kyɛ, ‘Sɛ bienzua bie oliɛma bienzua bɔ ogya braa ɔ owu, ná wanwo ba a, odi kyɛ oliɛma ne gya sɔ braa ne ná ɔwo mmaa ma bɔ wawu ne.’

²⁹ Tie, né aliɛmaa mmienzua nzoo bie wɔ berɛ. Bɔ oli moa ne gyale braa, na owuli bɔ wanwo ba ɔ.

³⁰ Bɔ ɔtɔ so nyɔ ne gyale braa ne,

³¹ yeɛ bɔ ɔtɔ so nza ne koso gyale ye; na sɔ alaa yeɛ aliɛmaa nzoo ne amukoraa begyale braa ne bɔ banwo ba ɔ, na bewuwuli.

³² Na bɔ ɔpɛ ye bo ɔ, braa ne koso wuli.

³³ Yiti awufoɛ dwɔsolɛ ne anu, bɛ nu nwa yeɛ braa ne te ɔye ɔ? Ofikyɛ aliɛmaa nzoo ne gyale ye.”

³⁴ Na Yesu buale bɛ kyɛ, “Ewiase he anu mmenia begya, na bɛfa bɛ bɛma agyaa;

³⁵ nakoso bɛ bɔ bekobu bɛ kyɛ bɛfata kyɛ benya kyɛfa wɔ wiase bɔ ɔ́ba ne ne awufoɛ dwɔsolɛ nu ne de, bengya, yeɛ bɛmva bɛ bɛmma agyaa,

³⁶ na bɛngora benwu ko; ofikyɛ bɛtɛ kyɛ abɔfo mɔ, na bɛte Nyameɛ mma, ofikyɛ bɛte ewutingyelɛ nu mmaa.

³⁷ Na ɔfa awufoɛ dwɔsolɛ nwo de, Mose koso maa yɛnwu ye wɔ ngyɛkyerɛ ne nwo dwirɛ ne anu, mmerɛ bɔ ɔfrɛ Awurade kyɛ: Abraham Nyameɛ, Yisake Nyameɛ ne Yakob Nyameɛ’ ne.

³⁸ Yiti, ɔtte awufoɛ Nyameɛ, na mmom ɔte ateasefoɛ Nyameɛ; ofikyɛ bɛ mukoraa bɛte ase bɛma ye.”

³⁹ Yeɛ ahyerɛlɛfoɛ nemɔ anu biemɔ buale kyɛ, “Kyerɛkyerɛniɛ, aye ye noa yé.”

⁴⁰ Yiti bangora bammisa ye dwirɛ biala ko.

Kristo ne nwo adwobisa

⁴¹ Na Yesu bisale bɛ kyɛ, “Ɔyɛle sɛɛ bɔ bɛnwa Kristo ne te Dawide awa ɔ?

⁴² Ɔnate kyɛ Dawide bɔbɔ kã ye wɔ Edwein Nwomaa ne anu kyɛ, ‘Awurade sele me Mene kyɛ, Tena me sa famaa so,

⁴³ kodwu kyɛ ngɔfa wɔ pɔfoɛ mɔ ngɔyɛ wɔ gya bo ndiasoɛ ɔ.’

⁴⁴ Na sɛ Dawide frɛ ye me Mene a, né ɔwale ye sɛ bɔ ɔɔyɛle ɔwa ɔ?”

Ahyerɛlɛfoɛ nwo kɔkɔbɔlɛ

⁴⁵ Na mmenia ne amukoraa begu so bɔ betie Yesu nen, osele ye asuafoɛ nemɔ kyɛ,

⁴⁶ “Ɛ́mɔnea ɛmɔ nwo yé wɔ ahyerɛlɛfoɛ nemɔ anwo. Bɛ yeɛ bekuro ndaadeɛ ndendenn wuralɛ bɛnate, ɔne kyɛ mmenia kobisa bɛ ahye wɔ dwaaso ɔ, ɔne mbanyi bia wɔ nyianu sua mɔ nu, ɔne mbanyi bia wɔ ɛpoentolɛ bo ɔ;

⁴⁷ bɛ yeɛ bɛbɔ akunafoɛ mmrasua apoo bede bɛ nningyein ɔ, nakoso bɛpati bɛbɔ mbaeɛ tendenn bekyire. Na bɛ yeɛ bekobua bɛ foɛ piri paa ɔ.”