Luka 17 - AHYERƐLƐ KRONGRON

Sundiduatolɛ

¹ Na Yesu sele ye asuafoɛ nemɔ kyɛ, “Ɔyɛ sɛɛ ala a, sundiduatolɛ kɔwa, nakoso sona bɔ ɔnate ye so ɔkɔwa ne de, ye yaakɔ!

² Ahaa ɔte paa ma ye kyɛ bɛkɔfa nyɔboɛ bɔ bɛfa beti aburoo bekosinze ye kɔme, ná bagyi ye bato ɛpo nu, tra kyɛ ɔkɔto ngwadaammaa hemɔ anu ko sundidua ɔ.

³ Yiti ɛ́mɔnea ɛmɔ nwo yé! Sɛ eliɛma yɛ wɔ tɛɛ a, kã ye nyunu, na sɛ ɔsakyera ye adwene a, fa kyɛ ye.

⁴ Na sɛ ɔyɛ wɔ tɛɛ pɛen nzoo ɛlɛho, ná osa ba wɔ berɛ pɛen nzoo bakã kyɛ, ‘Masakyera m’adwene’ a, odi kyɛ ɛfa kyɛ ye.”

Tumi wɔ gyidie nu

⁵ Na asomafoɛ nemɔ sele Awurade kyɛ, “Ma yɛ gyidie onyi!”

⁶ Na Awurade buale kyɛ, “Sɛ ɛmɔle gyidie bɔ ye piri te kyɛ sinapi baa ko a, ahaa ɛmɔkɔhora bɛkɔhã bekohyire akyea he kyɛ, ‘Wɔ bo tutu, ná kogyina ɛpo nu!’ Na okotie ɛmɔ.

Akoaa asɛdeɛ

⁷ “Ɛmɔ nu nwa yeɛ ole akoaa bɔ ɔyɔ fieso adwuma, anaakyɛ ɔnea mmoaen so, ná akoaa ne fi eburo ba a, ɔkɔhã kohyire akoaa ne kyɛ, ‘Ka wɔ nwo bra baadidi’ ɔ?

⁸ Aso ongose ye kyɛ, ‘To m’aleɛ, ná bɔ w’abɔsoɛ so me, na medidi ná meno meyie a, ye si ye né wɔ koso adidi ná ano.’?

⁹ Aso ɔda akoaa ne ase kyɛ wayɔ bɔ ɔhyɛle ye kyɛ ɔyɔ ne?

¹⁰ Sɔ ala yeɛ ɛmɔyɔ koso, sɛ ɛmɔyɔ ahyɛdeɛ amukoraa bɔ bafa bama ɛmɔ ne a, odi kyɛ ɛmɔkã kyɛ ‘Yɛte ngoaa bɔ mvasoɛ biala nne yɛ so ɔ, na bɔ ɔte y’asɛdeɛ yeɛ yayɔ ɔ.’ ”

Yesu sa kwatafoɛ buru anwonyerɛ

¹¹ Na ɔwale kyɛ ɔkɔ Yerusalem nen, ɔɔfale Samaria ne Galilea ɛwɛen so.

¹² Na mmerɛ bɔ ɔkwaawura akuraa bie anu nen, mmienzua buru bie bɔ bɛte kwatafoɛ ɔ beeyiale ye, bɔ né baagyinagyina dedeede ɔ,

¹³ na bɛteateane nu kyɛ, “Yesu, Yɛ mene, nwu yɛ anwumvoin oo!”

¹⁴ Na onwuni bɛ nen, osele bɛ kyɛ, “Ɛ́mɔfa ɛmɔ nwo beehyire asɔfo nemɔ.” Na ɔwale kyɛ bɛ́kɔ nen, bɛ nwo fili.

¹⁵ Na bɛ nu ko nwuni kyɛ ye nwo asa nen, osale ye si teateane nu yele Nyameɛ ayɛ;

¹⁶ na ɔfale ye nyunu butuli ase wɔ Yesu gya bo lale ye ase. Né ye de, ɔte Samarianiɛ.

¹⁷ Yeɛ Yesu sele kyɛ, “Aso nna mmenia buru yeɛ bɛ nwo fili ɔ? Na ngona ne de, bɛwɔ nisua?

¹⁸ Bannwu bɛ nu biala kyɛ wasa ye si wawa kyɛ ɔbaafa animnyam ma Nyameɛ ɔ, sana amanvraniɛ he ngome?”

¹⁹ Na osele ye kyɛ, “Dwɔso kɔ, wɔ gyidie ale wɔ.”

Nyameɛ ahennie ne walɛ

²⁰ Farasiifoɛ nemɔ bisale Yesu mmerɛ bɔ Nyameɛ ahennie ne kɔwa ɔ, na obuale bɛ kyɛ, “Nyameɛ ahennie ne, ɔmma bɔ mmenia bɛ nye tua ɔ;

²¹ yeɛ bɛngɔhã kyɛ, ‘Nea, ye ɛhe!’ Anaakyɛ: ‘Nea, ye yeɛ ɔwɔ dɔ ne!’ Na ɛ́mɔtie, Nyameɛ ahennie ne, ɔwɔ ɛmɔ nu.”

²² Na osele ye asuafoɛ nemɔ kyɛ, “Mmerɛ bie kɔwa bɔ Sona Awa ne, ɛmɔkohuro kyɛ ɛmɔkonwu ye ngyẽa nemɔ anu ko ɔ, nakoso ɛmɔngonwu ye.

²³ Na bekose ɛmɔ kyɛ, ‘Nea dɔ!’ anaa ‘Nea wa!’ Nakoso nnɛma ɛmɔkɔ, yeɛ nnɛma ɛmɔdi bɛ si.

²⁴ Na kyɛbɔ agralaa bɔ frɛ, ná ɔta ewienu fi ye bue ko kɔkã ye bue ko ne, sɔ ala yeɛ Sona Awa ne kɔyɛ wɔ ye kyẽa ne anu ɔ.

²⁵ Nakoso ɔsɛ kyɛ onwu amaneɛ pee ná ɛnɛmmafoɛ he bɛpo ye koraka.

²⁶ Na kyɛbɔ Nowa mmerɛ ne yɛle ne, sɔ ala yeɛ Sona Awa ne mmerɛ koso kɔyɛ ɔ.

²⁷ Bedidili, bɛnone, begyigyale mmraa, na bɛmane agyaa maa oodwuli kyẽa bɔ Nowa fole ɛlɛen ne anu, ná nzueyilɛ ne wale oohuni bɛ mukoraa ɔ.

²⁸ Sɔ ala koso yeɛ Lɔto mmerɛ ne yɛle ɔ. Bedidili, bɛnone, bɛtɔle nningyein, bɛyɛle nningyein atɔen, beluale nningyein, na besisili sua mɔ.

²⁹ Na kyẽa bɔ Lɔto fili Sodom hɔle nen, see ne sɔfe tɔ fili nyameɛso oohuhuni bɛ mukoraa.

³⁰ Na sɔ ala yeɛ ɔkɔyɛ ɔ wɔ kyẽa bɔ Sona Awa ne kɔye ye nwo ali ne.

³¹ “Sɔ kyẽa ne, sona bɔ ɔwɔ sua ti afia, bɔ ye nningyein wɔ sua nu ne, onni kyɛ odwu ba kyɛ ɔbaafa kɔ; yeɛ sona bɔ ɔwɔ fieso ne koso, onni kyɛ osa ye si ba.

³² Ɛ́mɔkaye Lɔto aye ne!

³³ Ebiala bɔ ɔkɔpere kyɛ okole ye bɔbɔ ye ngoa ne, ɔkɔhwere ye; nakoso ebiala bɔ ɔkɔhwere ye ngoa ne, okonya ye ngoa.

³⁴ Mekã mekyire ɛmɔ kyɛ, sɔ kɔngɔen ne, mmenia nyɔ bɔ bɛla bɛen ko aso ɔ, bɛkɔfa ko bɛkɔhɔ, né bayakyi ko berɛ.

³⁵ Mmrasua nyɔ bɔ bési aburoo bɛ́bɔ nu ɔ, bɛkɔfa ko bɛkɔhɔ, né bayakyi ko berɛ.

³⁶ [Mmienzua nyɔ bɔ bɛwɔ fieso ɔ, bɛkɔfa ko bɛkɔhɔ, né bayakyi ko berɛ.”]

³⁷ Yeɛ bebisale ye kyɛ, “Awurade, nisua ɔ?” Na obuale bɛ kyɛ, “Nekaa bɔ efuin la ne, berɛ yeɛ mbɛtɛ bɛboa bɛ noa ɔ!”