Luka 15 - AHYERƐLƐ KRONGRON

Boaen bɔ wamini ne

¹ Afei, ɛtoɔdidelɛfoɛ ne bɔnefoɛ nemɔ amukoraa bepingyele Yesu nwo berɛ kyɛ bɛbaatie ye noa dwirɛ.

² Yeɛ Farasiifoɛ ne ahyerɛlɛfoɛ nemɔ bɛyɛle nwuhunwuhu kyɛ, “Biaa he ode bɔnefoɛ to nu, na osa ne bɛ bedidi.”

³ Yiti obuli bɛ anyandera kyɛ,

⁴ “Ɛmɔ nu nwa yeɛ sɛ ole mmoaen ɛyaa ko, ná nu ko mini a, ɔngɔyakyi aburahona ne ngona ne wɔ ɛserɛ so berɛ, ná ɔngɔɔpena ko bɔ wamini ne kɔpem kyɛ okonwu ye ɔ?

⁵ Na sɛ onwu ye a, ɔfa ye to ye kɔme anwo, na odi ahurusi.

⁶ Na sɛ ɔba awuro a, ɔfrɛfrɛ ye mmango mɔ ne ye mandamu berɛ ama maa bɛbayia, na ose bɛ kyɛ, ‘Ɛ́mɔma yɛgye yɛ nye, ofikyɛ manwu me boaen bɔ ominini ne.’

⁷ Na mekã mekyire ɛmɔ kyɛ, sɔ ala yeɛ sɛ bɔnefoɛ ko sakyera ye adwene a, ye nwo anigye ba nyameɛso tra bɔ ɔba mmenia tenenee aburahona ne ngona bɔ benhia adwenesakyera nwo ɔ.

Esikadwetɛ bɔ wamini ne

⁸ “Anaakyɛ brasua beni yeɛ ole sikadwetɛ buru, ná nu ko mini a, ɔngɔsɔ kanea ngɔpoa sua nu berɛ, ná ɔngɔyere ye nwo ngɔpena kɔpem kyɛ okonwu ye ɔ?

⁹ Na sɛ onwu ye a, ɔfrɛfrɛ ye mmango mɔ ne ye mandamu berɛ ama maa bɛbayia, na ose kyɛ, ‘Ɛ́mɔma yɛgye yɛ nye, ofikyɛ manwu sikadwetɛ bɔ ominini ne.’

¹⁰ Na mekã mekyire ɛmɔ kyɛ, sɔ ala yeɛ sɛ bɔnefoɛ ko sakyera ye adwene a, ye nwo anigye ba Nyameɛ abɔfo mɔ bɛ nyunu ɔ.”

Baa sɛkyefoɛ ne nwo anyandera

¹¹ Yeɛ Yesu sele kyɛ, “Né biaa bie wɔ berɛ bɔ ole mmaa mmienzua nyɔ ɔ.

¹² Bɛ nu kãa ne sele ye baba kyɛ, ‘Baba, agyapadeɛ ne, fa me kyɛfa deɛ bɔ ɔwɔ nu ɔ ma me!’ Yiti baba ne hyɛle ye nningyein nu mane bɛ.

¹³ Na wangyɛ biala yeɛ baa kãa ne boaboale ye agyapadeɛ deɛ amukoraa noa ɔ, na otuli atee hɔle maen bɔ ɔwɔ dede bie aso, na dɔ yeɛ ɔbɔle asanzabra mane ye anwodeɛ ne fili ye sa ɔ.

¹⁴ Na ye mukoraa fili ye sa yiele nen, ɛhɔen piri bie pene sɔ maen ne anu, na ye nwo hyɛle ye bo hyerele ye.

¹⁵ Yiti ɔfale ye nwo ɔɔbɔle kuromani bie wɔ maen ne anu, na ɔmaa ɔhɔle nekaa bɔ osie ye mbrako ɔ kyɛ ɔɔnea bɛ so.

¹⁶ Na ye komvi wale so kyɛ onya aleɛ bɔ mbrako nemɔ bedi ne bie a ahaa okoli kɔma ye ko koyi; nakoso ebiala amma ye bie.

¹⁷ Afei ye nye wale ye nwo so, na ɔhane kyɛ, ‘Apaafoɛ bɔ bɛwɔ me baba awuro ɔ bedidi bɛma bɛ ko yi ma ebie ka, yeɛ me de, ɛhɔen dosa me wɔ wa ye!

¹⁸ Ngodwɔso ngɔhɔ me baba berɛ, ná mahã mahyire ye kyɛ: Baba, mayɔ nyameɛso ne wɔ nyunu bɔne;

¹⁹ memvata kyɛ ɛkɔfrɛ me ɛwa ko ɔ, fa me yɛ kyɛ w’apaafoɛ nemɔ anu ko.’

²⁰ Yiti odwɔsole sili nu kyɛ osa kɔ ye baba berɛ. Na ɔwɔ dedeede nen, yeɛ ye baba nwuni ye ɔ, na ɔyɛle ye anwumvo, na baba ne tuli amirika ɔɔfale ye sa tole ye kɔme anu, na ɔyɛle ye awaawaatuu.

²¹ Na ɔwa ne sele ye kyɛ, ‘Baba, mayɔ nyameɛso ne wɔ nyunu bɔne, na memvata kyɛ ɛkɔfrɛ me ɛwa ko ɔ.’

²² Yeɛ ye baba ne sele ye ngoaa nemɔ kyɛ, ‘Ɛmɔhã bɛ nwo bɛɛfa ataadeɛ paa beewura ye; ɛ́mɔfa pɛteaa bewura, ná ɛ́mɔfa mbaboa bewura ye;

²³ ná ɛ́mɔfa nandwie akrɔngrɔma bɔ walɔ ɔ bɛbra beehu ye, ná ɛ́mɔma yɛgye yɛ nye;

²⁴ ofikyɛ mma he owuli, na watingye; ominini, na manwu ye.’ Na bɛhyɛle ye bo kyɛ bɛgye bɛ nye.

²⁵ “Na sɔ mmerɛ ne, né ɔwa panyi ne wɔ fieso. Na osa ba ná opingyele awuro nen, ɔtele edwein ne abiliegolɛ.

²⁶ Yiti ɔfrɛle ngoaa nemɔ nu ko, na obisale ye penane bɔ ye ti yeɛ sɔ nikyee ne ɔkɔ so ne.

²⁷ Na obuale ye kyɛ, ‘Eliɛma ne awa, na wɔ baba ahu nandwie akrɔngrɔma bɔ walɔ ne, ɔnate kyɛ ye sa ahã ye wɔ asomdwee nu.’

²⁸ “Nakoso ɔfɛle yaa, na wanguro kyɛ ɔkɔhɔ awuro berɛ ɔ. Yiti ye baba fite wale ɔɔkorɔkorɔle ye kyɛ ɔbra awuro.

²⁹ Na obuale ye baba kyɛ, ‘Tie, afoɛ worawora he yeɛ mafa maso wɔ ɔ, yeɛ wɔ dwirɛ koso nnyɛle ye nwo asoserɛ le; nakoso abɔngye ba po, ɛmmane me bie le kyɛ me ne me mmango mɔ yɛfa yɛgye yɛ nye.

³⁰ Nakoso ɛwa he bɔ wasɛkye w’agyapadeɛ wɔ gyanderafoɛ nwo ne, ɔwale ye ala pɛ, ahu nandwie akrɔngrɔma bɔ walɔ ne ama ye!’

³¹ Na osele ye kyɛ, ‘Mma, wɔ de, ɛwɔ me nwo wa mmerɛ biala, na me nikyee biala te wɔ deɛ.

³² Ɔsɛ kyɛ yɛgye yɛ nye ná yɛmaa ɔyɛ yɛ fɛ ɔ, ofikyɛ eliɛma ye, owuli, na watingye; ominini, na manwu ye.’ ”