Luka 11 - AHYERƐLƐ KRONGRON

Mbaeɛbɔlɛ nwo ngyerɛkyerɛ

¹ Na ɔwale kyɛ, né Yesu wɔ nekaa bie ɔbɔ mbaeɛ, na oyiele nen, ye asuafoɛ nemɔ anu ko sele ye kyɛ, “Awurade, kyire yɛ mbaeɛbɔlɛ, kyɛbɔ Yohane koso ohyirele ye asuafoɛ nemɔ ne.”

² Na osele bɛ kyɛ, “Sɛ ɛmɔbɔ mbaeɛ a, ɛmɔhã kyɛ, ‘Baba [bɔ ɛwɔ nyameɛso so ɔ,] Wɔ dumaa nwo ɔte; w’ahennie ɔbra.

³ Ma yɛ yɛ daa daa aleɛ daa;

⁴ ná fa yɛ bɔne kyɛ yɛ, ofikyɛ yɛ koso yɛfa ebiala bɔ ɔfõ yɛ ɔ ye deɛ yɛkyɛ ye. Na nnɛfa yɛ kɔ nzɔhwɛ nu.’ ”

⁵ Na osele bɛ kyɛ, “Yɛfa ye kyɛ, ɛmɔ nu bie ole obiɛngo, ná ɔkɔ ye berɛ abunnamu kose ye kyɛ, ‘Me damvo, fɛmo me paanoo nza,

⁶ na mmiɛngo bie fi atee so wawa m’awuro, na aleɛ biala nne berɛ bɔ ngonya ngɔma ye ɔ.’

⁷ Na okobua ye kofi ye sua nu dɔ kyɛ, ‘Nnɛha me! Mato m’anoa nu, na me mma lela me nwo wa wɔ mba so, na mengɔhora dwɔso mengɔma wɔ nikyee biala.’

⁸ Na mekã mekyire ɛmɔ kyɛ, sɛ ɔte obiɛngo po a, ongodwɔso ngɔɔma ye huu, nakoso ɔnate edwanenɛ bɔ odwane ye nwo ne ati, okodwɔso kɔɔma ye bɔ ohia ne amukoraa.

⁹ “Yiti mekã mekyire ɛmɔ kyɛ: Ɛ́mɔbisa, na bɛkɔfa bɛkɔma ɛmɔ; ɛ́mɔpena, na ɛmɔkonwu ye; ɛ́mɔbɔ nu, na bekobukye ɛmɔ.

¹⁰ Ofikyɛ ebiala bɔ obisa ne, ye sa kã ye; na ebiala bɔ ɔpena ne, onwu ye; yeɛ bɔ ɔbɔ nu ne, bebukye ye.

¹¹ Ɛmɔ nu nwa yeɛ ɔte seɛ ná ɔwa bisa ye [paanoo a, ɔkɔma ye nyɔboɛ ɔ? Anaakyɛ obisa ye] tiré a, ɔkɔma ye ewoo ɔ?

¹² Anaakyɛ obisa ye kyiremvua a, ɔkɔma ye anyanyangyeleɛ ɔ?

¹³ Na sɛ ɛmɔ po bɔ ɛmɔte bɔnefoɛ ɔ ɛmɔse kyɛbɔ ɛmɔma ɛmɔ mma mɔ nningyein paa a, ɔkɔyɛ sɛɛ bɔ ɛmɔ Baba bɔ ɔwɔ nyameɛso ne ɔngɔfa Sunzum Krongron ngɔma bɛ bɔ bebisa ye ɔ?”

Bɛto Yesu soen

¹⁴ Ɛlɛho bie, né Yesu otu sunzummɔne bie bɔ ɔte mumu ɔ. Na ɔwale kyɛ sunzummɔne ne tu fili ye nu nen, emumu ne dwudwole, na ɔyɛle ɛlɔen ne nwanwa.

¹⁵ Nakoso bɛ nu biemɔ hane kyɛ, “Sunzummɔne mɔ panyi Beɛsebul tumi yeɛ ɔfa tutu sunzummɔne mɔ ɔ.”

¹⁶ Yeɛ ebiemɔ koso besole ye bɛneane, na bebisale nzɛngyerɛnneɛ bɔ ofi nyameɛso ɔ befili ye berɛ.

¹⁷ Nakoso ye de, né ɔse b’adwene ne ati, osele bɛ kyɛ, “Ahennie biala bɔ ɔne ye nwo ko ne, ogu; yeɛ awuro bɔ ɔne ye nwo ko ne, ɔbɔ.

¹⁸ Na sɛ Satan koso ɔne ye nwo ko a, ɔkɔyɛ sɛɛ né ye ahennie agyina? Ofikyɛ, ɛmɔnwa Beɛsebul tumi yeɛ mefa metutu sunzummɔne mɔ ɔ.

¹⁹ Na sɛ Beɛsebul tumi yeɛ mefa metutu sunzummɔne mɔ de a, né nzaade nwa tumi yeɛ ɛmɔ mma mɔ bɛfa betutu bɛ ɔ? Yiti bɛ yeɛ bɛkɔyɛ ɛmɔ ndɛenbualɛfoɛ ɔ.

²⁰ Nakoso sɛ Nyameɛ sa mmɛseka yeɛ mefa metu sunzummɔne mɔ a, né nzaade Nyameɛ ahennie ne anya awa ɛmɔ so.

²¹ “Sɛ kwabranoa ole akodeɛ ɔwɛne ye awuro a, ye anwodeɛ nwo sonn.

²² Nakoso sɛ ebie bɔ ye nwo yɛ se tra ye ɔ ɔba ye so ná odi ye so ngonim a, ode ye sa nu akodeɛ bɔ wafa ye nye wato so ne, na ɔkyekyɛ ye koɛ nu nzesadeɛ ne anu.

²³ Ebiala bɔ ɔbboka me so nen, né otia me; yeɛ ebiala bɔ ɔne me mmoaboa ye noa nen, né ɔsande nu.

Sunzummɔne sa ba ye si

²⁴ “Sɛ sunzummɔne tu fi sona nu a, okokyinikyini aseɛ katerepee mɔ so pena nekaa bɔ okole ye nwome ɔ; na onnya bie a, ɔkã kyɛ, ‘Ngosa ngɔhɔ me sua bɔ mvili nu mmale ne anu.’

²⁵ Na ɔba a, ɔbanwu ye kyɛ bapoapoa nu ná basiesie berɛ ɔ.

²⁶ Afei ɔkɔ kɔfa sunzum nzoo foforɛ bɔ bedi bɔne bɛtra ye ɔ ɔboka ye nwo so, na bɛbawura nu bɛtena berɛ. Na sɔ sona ne, ye asetena bɔ oli nziɛ ne te bɔne asetena tra daa ne.”

Nyameɛ dwirɛ nwo sotie ma saleɛ

²⁷ Na ɔwale kyɛ ogu so ɔkã edwirɛ hemɔ nen, braa bie bɔ ɔwɔ mmenia ne anu ɔ ɔteane nu sele ye kyɛ, “Koɛ bɔ ɔwole wɔ, ɔne nyɔfone bɔ ɛnone ne, banya saleɛ!”

²⁸ Nakoso osele kyɛ, “Bɛ bɔ bɛte Nyameɛ dwirɛ ne ná bedi so ne mmom yeɛ banya saleɛ ɔ!”

Ɛnɛmmafoɛ pena sɛngyerɛnneɛ

²⁹ Na mmenia yɛle berɛ birikabirika nen, ɔhyɛle ye bo hane kyɛ, “Ɛnɛmmafoɛ te bɔnefoɛ. Bɛpena sɛngyerɛnneɛ, nakoso bɛngɔma bɛ sɛngyerɛnneɛ biala, sana Yona sɛngyerɛnneɛ deɛ ne ala.

³⁰ Na kyɛbɔ né Yona te sɛngyerɛnneɛ ma Ninewefoɛ nen, sɔ ala yeɛ Sona Awa ne kɔyɛ kɔma ɛnɛmmafoɛ ɔ.

³¹ Ngwaen dɔ hemmaa ne, ɔne ɛnɛmmafoɛ bekodwɔso wɔ ndɛenbualɛ ne anu, na ɔkɔbɔ bɛ kwaadu, ofikyɛ ofili aseɛ noa dɔ paa wale ootiele Solomon nworɛ dwirɛ; na tie, bɔ odi mu tra Solomon wɔ wa!

³² Ninewefoɛ ne ɛnɛmmafoɛ bekodwɔso wɔ ndɛenbualɛ ne anu, na bɛkɔbɔ bɛ kwaadu, ofikyɛ Ninewefoɛ tele Yona nzɛmba nen, bɛsakyerale b’adwene; na tie, bɔ odi mu tra Yona wɔ wa!

Nipadua kanea

³³ “Ebiala nzɔ kanea mva mvea anaa ɔmva nwura ɛkorɛ bo; na mmom ɔfa sie kanea bakaa so, amaa bɛ bɔ bɛba awuro berɛ ne banwu ye hyireinn ne.

³⁴ Wɔ nye te nipadua ne kanea. Yiti sɛ wɔ nye nwu nikyee yé a, wɔ nipadua ne amukoraa te hyireinn; nakoso sɛ wɔ nye te wusiwusi a, wɔ nipadua ne amukoraa koso te awosii.

³⁵ Yiti nea yé né kanea bɔ ɔwɔ wɔ nu ne wangakyi awosii.

³⁶ Sɛ wɔ nipadua ne amukoraa te hyireinn bɔ awosii nne ye nekaa biala a, nipadua ne amukoraa kɔyɛ hyireinn, kyɛbɔ kanea ta hyireinn ma wɔ ne.”

Yesu twi Farasiifoɛ ne ahyerɛlɛfoɛ nyunu

³⁷ Yesu noa wɔ so bɔ odwudwo nen, Farasiiniɛ bie tole ye sa frɛle ye kyɛ ɔbra ma beedidi. Yiti ɔhɔle nu ɔɔtenane ase kyɛ odidi.

³⁸ Na Farasiiniɛ ne nwuni kyɛ Yesu annwunzi ye sa koraka yeɛ odidi nen, ɔyɛle ye nwanwa.

³⁹ Na Awurade sele ye kyɛ, “Ɛmɔ Farasiifoɛ de, ɛmɔnwunzi kwangoa ne prɛte nwo, nakoso ɛmɔ nu de, apoo ne bɔne yɔleɛ ayi ye tɛkyɛ.

⁴⁰ Ngwaseafoɛ! Bɔ ɔyɔle bɛ nwo ne, aso nna ye ala yeɛ ɔyɔle nu ne koso ɔ?

⁴¹ Odi kyɛ ɛmɔfa bɔ ɔwɔ nu ne bɛyɛ adɔeɛ, na tie, nikyee biala nwo kɔte kɔma ɛmɔ.

⁴² “Ɛmɔ Farasiifoɛ, ɛmɔ yaakɔ! Ofikyɛ, ɛmɔfa ɛmeɛ, ɛmanyire ne nyaanyaa biala buru nu ngyɛmuɛ ko bɛma, nakoso ɛmɔbu bɛ nye begua pɛpɛɛpɛyɛlɛ ne Nyameɛ nwo dɔ so. Na ɛhemɔ yeɛ ahaa odi kyɛ ɛmɔyɔ ɔ, bɔ ɛmɔnyakyi ye ngaa nemɔ koso yɔlɛ ɔ.

⁴³ “Ɛmɔ Farasiifoɛ, ɛmɔ yaakɔ! Ofikyɛ, mbanyi bia yeɛ ɛmɔkuro wɔ nyianu sua mɔ nu ɔ, ɔne kyɛ mmenia kobisa ɛmɔ ahye wɔ dwaaso ɔ.

⁴⁴ Ɛmɔ yaakɔ! Ofikyɛ, ɛmɔte kyɛ asieleɛ mɔ bɔ bennwu bɛ, bɔ mmenia nate so nakoso bɛnze ɔ.”

⁴⁵ Yeɛ mmeraa nwo nimdeɛfoɛ nemɔ anu ko sele ye kyɛ, “Kyerɛkyerɛniɛ, sɛ ɛkã sɔ de a, né awɔ yɛ koso safure!”

⁴⁶ Na Yesu buale ye kyɛ, “Mmeraa nwo nimdeɛfoɛ, ɛmɔ koso, ɛmɔ yaakɔ! Ofikyɛ, ɛmɔfa nningyein bɔ ye soalɛ yɛ yea ɔ bɛsoa mmenia, nakoso ɛmɔ bɔbɔ de, ɛmɔndengyɛ ɛmɔ sa mmɛseka ko po bɛmva bɛnga nningyein ne.

⁴⁷ Ɛmɔ yaakɔ! Ofikyɛ, ngɔmhyɛlɛfoɛ bɔ ɛmɔ nana mɔ behuhuni bɛ ne, ɛmɔto b’asieleɛ so.

⁴⁸ Yiti, ɛmɔdi ɛmɔ nana mɔ yɔleɛ ne nwo adanzeɛ, na ɛmɔpene so, kyɛ bɛ yeɛ behuhuni bɛ ɔ, yeɛ ɛmɔ koso ɛmɔto b’asieleɛ so ɔ.

⁴⁹ Na ɛhe ati koso yeɛ Nyameɛ Nworɛ ne kã kyɛ, ‘Ngɔsoma ngɔmhyɛlɛfoɛ ne asomafoɛ maa bɛkɔhɔ bɛ berɛ; na bekohu biemɔ, ná batane ebiemɔ anye.’

⁵⁰ Yiti ngɔmhyɛlɛfoɛ amukoraa bɛ mogya bɔ bahã bagua fi ewiase ahyɛaseɛ ne, ye nwo asodie la ɛnɛmmafoɛ so,

⁵¹ ofi Abel mogya so kodwu Sakaria bɔ behuni ye wɔ afɔleɛ bokyea ne ne nekaa krongron berɛ b’afia ne, ye mogya so. Yoo, mekã mekyire ɛmɔ kyɛ, ye nwo asodie kɔla ɛnɛmmafoɛ so.

⁵² “Ɛmɔ, mmeraa nwo nimdeɛfoɛ, ɛmɔ yaakɔ! Ofikyɛ, ɛmɔafa nimdeɛ safoaa ne; ɛmɔ bɔbɔ a, ɛmɔangɔ nu, nakoso bɛ bɔ bɛ́kɔ nu ne koso, ɛmɔsi bɛ ate.”

⁵³ Na Yesu fili berɛ bɔ ɔkɔ nen, ahyerɛlɛfoɛ ne Farasiifoɛ mɔ hyɛle ye bo bɛfɛle ye so yaa, na bɛfale edwirɛ pee bɛtetale ye bɛfa bɛgyegyele ye,

⁵⁴ kyɛ ebiaa ɔkɔhã dwirɛ bɔ ɔkɔma ye noa kɔtɔ ɔ.