Lewitikɔso 9 - AHYERƐLƐ KRONGRON

Aarɔn bɔ afɔleɛ

¹ Ɛlɛbɔtwɛ ne aso Mose tole ye sa frɛle Aarɔn ne ye mma mmienzua nemɔ ɔne Yisrael mbanyi;

² na osele Aarɔn kyɛ, “Fa nandwie nyii akrɔngrɔma bɔ bɔne nwo afɔleɛ ma AWURADE, ná fa boaen nyii bɔ naen yeralɛ afɔleɛ ma AWURADE. Onni kyɛ ngaka ne anu biala yɛ bɔ wali nnɛen ɔ.

³ Na ka kyire Yisraelfoɛ kyɛ, ‘Ɛ́mɔfa abɔngye nyii bɛ́bɔ bɔne nwo afɔleɛ, ná ɛ́mɔfa nandwie akrɔngrɔma ne boaen akrɔngrɔma bɔ bali afoɛ ngoko ngoko, bɔ bellili nnɛen biala ɔ bɛ́bɔ naen yeralɛ afɔleɛ.

⁴ Ɛ́mɔfa nandwie nyii ne boaen nyii, ɔne aburoo afɔleɛ bɔ bafa ngoo bafra ye ɔ bɛbɔ asomdwee afɔleɛ wɔ AWURADE nyunu; ofikyɛ ɛnɛ Nyameɛ kɔye ye nwo ali kohyire ɛmɔ.’ ”

⁵ Bɛfale bɔ Mose hyɛle bɛ ne bɛwale ɛtena sua atenaleɛ ne anyunu berɛ, na Yisraelfoɛ amukoraa bɔ pingyele beegyinane AWURADE nyunu.

⁶ Na Mose sele kyɛ, “Nikyee bɔ AWURADE hyɛle ɛmɔ kyɛ ɛmɔyɔ ɛhe, amaa ɔnate so AWURADE aye ye animnyam ali wahyire ɛmɔ.”

⁷ Yeɛ Mose sele Aarɔn kyɛ, “Twe pingye afɔleɛ bokyea ne, ná bɔ bɔne nwo afɔleɛ ɔne naen yeralɛ afɔleɛ ma wɔ nwo, ná yɛ mbata ma wɔ bɔbɔ wɔ nwo ne wɔ mmenia ne; ná fa mmenia nemɔ afɔleɛ nningyein ne bra baapata ma bɛ, kyɛbɔ AWURADE ahyɛ ne.”

⁸ Aarɔn pingyele afɔleɛ bokyea ne, na ohuni nandwie bɔ ɔfa bɔ bɔne nwo afɔleɛ mane ye nwo ne.

⁹ Aarɔn mma mmienzua nemɔ fale mogya ne bɛbrɛle ye. Ɔfale ye sa mmɛseka bɔle mogya ne anu fa yɛle afɔleɛ bokyea ne mmɛen nemɔ anwo, na mogya bɔ waha ne, ohwiele guale afɔleɛ bokyea ne abo.

¹⁰ Nakoso bɔne nwo afɔleɛ loe ne, ye saa nemɔ, ɔne ye boɛ ne bie de, ɔyerale bɛ wɔ afɔleɛ bokyea ne aso, kyɛbɔ AWURADE hyɛle Mose ne.

¹¹ Na ye naen ne ye nwomaa ne de, ɔfale see yerale bɛ wɔ asikyeleɛ ne asi.

¹² Afei Aarɔn huni naen yeralɛ afɔleɛ kaka ne, na ye mma mmienzua nemɔ fale kaka ne mogya ne bɛbrɛle ye, na ohwie guale afɔleɛ bokyea ne anwo bra yiale.

¹³ Na bɛfale naen yeralɛ afɔleɛ ne naenguma naenguma ɔne ye ti ne bɛbrɛle ye; na ɔyerale bɛ wɔ afɔleɛ bokyea ne aso.

¹⁴ Onwunzini ye kunu nningyein ne ɔne ye gya nemɔ anwo, na ɔfa bokale naen yeralɛ afɔleɛ ne aso ɔyerale bɛ wɔ afɔleɛ bokyea ne aso.

¹⁵ Ye si ye, ɔfale maen afɔleɛ ne wale. Ɔfale maen bɔne nwo afɔleɛ abɔngye ne. Ohuni ye, na ɔfa bɔle bɔne nwo afɔleɛ kyɛbɔ ɔyɔle bɔ oli moa ne ala.

¹⁶ Ɔfale naen yeralɛ afɔleɛ ne wale, na ɔbɔle afɔleɛ ne kyɛbɔ nhyehyɛleɛ ne te ne.

¹⁷ Ɔfale aburoo afɔleɛ ne wale. Ɔsale ye sa bum ko, ɔfa bokale ngyerɛmɔ naen yeralɛ afɔleɛ ne aso, na ɔyerale bɛ wɔ afɔleɛ bokyea ne aso.

¹⁸ Aarɔn huni nandwie nyii ne ɔne boaen nyii ne fa bɔle asomdwee afɔleɛ mane maen ne; na ye mma nemɔ fale mogya ne bɛbrɛle ye, maa ohwie guale afɔleɛ bokyea ne anwo bra yiale.

¹⁹ Bɛfale ɛhemɔ koso bɛbrɛle ye: nandwie nyii loe ne ɔne boaen nyii loe ne, bɛ dua pue ne, ɛloe bɔ wato wafa bɛ kunu nningyein ne anwo ne, bɛ saa nyɔ ne, ɔne ye bɛ boɛ ne bie.

²⁰ Belili moa bɛfale ɛloe ne beguale ye sa nemɔ aso, na ɔyerale ɛloe ne wɔ afɔleɛ bokyea ne aso.

²¹ Nakoso ye sa nemɔ ne ye sɔ famaa ne de, Aarɔn pagyale fa bɔle ɛnwahanɛ afɔleɛ wɔ AWURADE nyunu kyɛbɔ Mose hyɛle ne.

²² Aarɔn mane ye sa so fa hyirele mmenia ne aso, na oyirale bɛ. Ɔbɔle bɔne nwo afɔleɛ, naen yeralɛ afɔleɛ ɔne asomdwee afɔleɛ yiele nen, odwu wale ase.

²³ Mose ne Aarɔn wurale ɛtena sua atenaleɛ ne anu. Afei befi berɛ befitele beeyirayirale mmenia ne, na AWURADE yele ye animnyam ali hyirele mmenia ne amukoraa.

²⁴ See fili AWURADE berɛ ɔɔyerale naen yeralɛ afɔleɛ ne, ɔne ɛloe bɔ ɔwɔ afɔleɛ bokyea ne aso ne. Mmerɛ bɔ mmenia ne amu benwuni ye ne, bɛteateane nu, na bɛfale bɛ nyunu bebutubutuli ase.