Lewitikɔso 8 - AHYERƐLƐ KRONGRON

Bɛhyɛ Aarɔn ne ye mma sɔfo

¹ AWURADE sele Mose kyɛ,

² “Fa Aarɔn ne ye mma mmienzua nemɔ, ndaadeɛ ne, ɛpopalɛ ngoo ne, bɔne nwo afɔleɛ nandwie nyii ne, mmoaen nyii nyɔ ne, kɛndɛen bɔ paanoo kabrɛdi gua nu ne;

³ ná ma mmenia ne amukoraa bɛbɔ dwaa wɔ ɛtena sua atenaleɛ anoa nu berɛ.”

⁴ Mose yɔle kyɛbɔ AWURADE hyɛle ye ne; ɔmane mmenia ne amu bɛbɔle dwaa wɔ ɛtena sua atenaleɛ anoa nu berɛ.

⁵ Mose sele mmenia ne kyɛ, “Nikyee bɔ AWURADE ahyɛ yɛ kyɛ yɛyɔ ɛhe.”

⁶ Afei Mose fale Aarɔn ne ye mma mmienzua nemɔ wale anyunu, ná ɔfale nzue nwunzinwunzini bɛ nwo.

⁷ Ɔfale ataadeɛ aguasoɛ ne wurale Aarɔn, ɔfale abɔsoɛ ne bɔle ye, ɔfale ataadeɛ tendenn ne wurale ye, ɔfale ɔsɔfo ataadeɛ ne wurale ye, na ɔfale ɔsɔfo ataadeɛ abɔsoɛ bɔ bali adwii bagua nu ne bɔle ye nu mane ataadeɛ ne anu miane.

⁸ Ɔfale ahone so aguasoɛ ne wurale ye, na ɔfale Yurim ne Tumim ne wurale ahone so aguasoɛ ne anu.

⁹ Ɔfale abotire ne bɔle ye, na ɔfale sikaa kɔkorɛ taataa ne, bɔ yeɛ ɔte krongronyɛlɛ kyerɛ ne bɔle abotire ne aso wɔ ye nyunu, kyɛbɔ Nyameɛ hyɛle Mose ne ala.

¹⁰ Mose fale ɛpopalɛ ngoo ne, ɔpopale ɛtena sua ne ɔne nu nningyein amukoraati ngoo, na ɔfa tele bɛ nwo.

¹¹ Ɔfale ngoo ne bie petene afɔleɛ bokyea ne anwo pɛen nzoo, na ɔpopale afɔleɛ bokyea ne ɔne ye ngukue amukoraa, ayaa ne ɔne ayaa nyinasoɛ ne ngoo, na ɔfa tele bɛ nwo.

¹² Ohwiele ɛpopalɛ ngoo ne bie guale Aarɔn ti afia na ɔpopale ye ngoo fa tele ye nwo.

¹³ Na Mose mane Aarɔn mma mmienzua nemɔ koso wale anyunu, ɔfale aguasoɛ wurawurale bɛ, ɔfale abɔsoɛ bobɔle bɛ, ná ɔfale abotire bobɔle bɛ, kyɛbɔ AWURADE hyɛle Mose ne.

¹⁴ Mose fale bɔne nwo afɔleɛ nandwie nyii ne wale anyunu berɛ; na Aarɔn ne ye mma mmienzua nemɔ fale bɛ sa guale bɔne nwo afɔleɛ nandwie nyii ne ti afia.

¹⁵ Mose huni kaka ne, ɔfale ye mogya ne bie, na ɔfale ye sa mmɛseka bɔle mogya ne anu yeyɛle afɔleɛ bokyea mmɛen nemɔ anwo bra yiale. Ɔpetene afɔleɛ bokyea ne anwo, na ohwiele mogya ne guale afɔleɛ bokyea ne abo, ɔtele bokyea ne anwo, na ɔnate ɛhe aso fa yɛle bɔne nwo mbata mane afɔleɛ bokyea ne.

¹⁶ Mose fale ɛloe bɔ wato wafa ye kunu nningyein anwo ne amukoraa, ye boɛ ne bie, ye saa nyɔ ne ɔne bɛ loe, na ɔyerale bɛ wɔ afɔleɛ bokyea ne aso.

¹⁷ Nakoso nandwie nyii ne, ɔne ye nwomaa, ye naen, ɔne ye fure nu nningyein ne de, Mose fale see yerale bɛ wɔ asikyeleɛ ne asi dɔ kyɛbɔ AWURADE hyɛle ye nen.

¹⁸ Ɔfale naen yeralɛ afɔleɛ boaen nyii ne wale anyunu berɛ, na Aarɔn ne ye mma mmienzua nemɔ fale bɛ sa guale boaen nyii ne ti afia.

¹⁹ Mose huni kaka ne, na ohwiele ye mogya ne guale afɔleɛ bokyea ne anwo bra yiale.

²⁰ Bɛpepɛle boaen naen ne anu mmaa mmaa beyiele nen, Mose yerale ye ti ne, naen bɔ bapepɛ ye mmaa mmaa ne, ɔne ye loe ne.

²¹ Na bɛfale nzue benwunzini ye kunu nningyein ne ye gya nemɔ anwo beyiele nen, Mose yerale boaen nyii mumua ne amu wɔ afɔleɛ bokyea ne aso fa bɔle naen yeralɛ afɔleɛ bɔ ɔbo fona ná bafa see babɔ bama AWURADE ɔ, kyɛbɔ AWURADE hyɛle Mose ne.

²² Ɔfale boaen nyii bɔ ɔtɔ so nyɔ bɔ ɔte sɔfohyɛlɛ boaen ne wale anyunu berɛ, na Aarɔn ne ye mma mmienzua nemɔ fale bɛ sa guale boaen nyii ne ati afia.

²³ Mose huni ye, na ɔfale ye mogya ne bie hane Aarɔn so famaa, ye sa kokotire famaa ɔne ye gya kokotire famaa ne.

²⁴ Bɛfale Aarɔn mma mmienzua nemɔ bɛwale anyunu berɛ, na Mose fale mogya ne bie kekane bɛ so famaa, ɔne bɛ gya kokotire famaa; na Mose hwiele mogya ne ngaa ne guale afɔleɛ bokyea ne anwo bra yiale.

²⁵ Ɔfale ɛloe ne ye dua pue ne, ɛloe amukoraa bɔ wato wafa ye kunu nningyein anwo ne, ye boɛ ne bie, ye saa nyɔ nemɔ ɔne bɛ nwo loe ne, ɔne ye sɔ famaa ne;

²⁶ na ɔyele apiti kabrɛdi ko, paanoo mumua ko bɔ bafa ngoo bafra bato ɔ, ɔne taterɛ ko fili paanoo kabrɛdi kɛndɛen bɔ ogyi AWURADE nyunu ne anu, na ɔfa guale ɛloe ne ɔne ye sɔ famaa ne aso.

²⁷ Ɔfale ye mukoraa guale Aarɔn ne ye mma mmienzua nemɔ sa nu, na ɔmaa bɛpagyale so bɛyɛle ɛnwahanɛ afɔleɛ wɔ AWURADE nyunu.

²⁸ Afei Mose lele sɔ nningyein nemɔ fili bɛ sa nu, na ɔfa bokale naen yeralɛ afɔleɛ ne yerale bɛ wɔ afɔleɛ bokyea ne aso. Ɔte sɔfohyɛlɛ afɔleɛ bɔ yeɛ ɔbo fona, bɔ bɛfa see bɛyera ye bɛma AWURADE ɔ.

²⁹ Mose fale kaka ne sa ne, na ɔpagyale ye fa yɛle ɛnwahanɛ afɔleɛ wɔ AWURADE nyunu; sɔfohyɛlɛ boaen nyii ne, Mose bue deɛ bɔ ɔwɔ nu hɔ ɛne, kyɛbɔ AWURADE hyɛle Mose ne.

³⁰ Mose fale ɛpopalɛ ngoo ne bie, ɔne mogya bɔ ɔwɔ afɔleɛ bokyea ne aso ne bie, na ɔfa petene Aarɔn ne ye mma mmienzua nemɔ anwo ɔne bɛ ndaadeɛ nu. Yiti ɔtele Aarɔn ne ye ndaadeɛ nwo, yeɛ afei ɔtele ye mma mmienzua nemɔ ne bɛ ndaadeɛ nwo.

³¹ Na Mose sele Aarɔn ne ye mma mmienzua nemɔ kyɛ, “Ɛ́mɔto naen ne wɔ ɛtena sua atenaleɛ anoa nu berɛ. Naen ne ɔne paanoo bɔ ɔwɔ sɔfohyɛlɛ afɔleɛ kɛndɛen ne anu ne, berɛ yeɛ odi kyɛ ɛmɔdi ye ɔ, kyɛbɔ Nyameɛ hyɛle me kyɛ, ‘Aarɔn ne ye mma mmienzua mɔ yeɛ ɔsɛ kyɛ bedi ɔ.’

³² Naen ne paanoo bɔ ɔkɔha ne, ɛ́mɔfa see bɛ́yera ye.

³³ Nnɛma ɛmɔfi ɛtena sua atenaleɛ anoa nu berɛ befite alaa ɛlɛsoo, kɔpem kyɛ ngyẽa bɔ bɛfa bɛhyɛ ɛmɔ sɔfo ne kɔpɛ nu ɔ, ofikyɛ bɛkɔfa ɛlɛsoo yeɛ bɛkɔhyɛ ɛmɔ sɔfo ɔ.

³⁴ Na kyɛbɔ yayɔ ye ɛnɛ ne, AWURADE yeɛ wahyɛ kyɛ bɛyɔ bɛfa bɛpata bɛma ɛmɔ ɔ.

³⁵ Ɛ́mɔtena ɛtena sua atenaleɛ anoa nu berɛ eyia ne kɔngɔen ɛlɛsoo, ná ɛ́mɔyɔ bɔ AWURADE ahyɛ ne, amaa ɛmɔanwu ofikyɛ sɔ yeɛ AWURADE hyɛle me ɔ.”

³⁶ Na Aarɔn ne ye mma mmienzua nemɔ yɔle nningyein bɔ AWURADE nate Mose so hyɛle ne amukoraa.