Lewitikɔso 6 - AHYERƐLƐ KRONGRON

¹ Na AWURADE sele Mose kyɛ,

² “Sɛ ebie yɔ bɔne bɔ wanni nahorɛ wamma AWURADE: kyɛ odi obiɛngo ndurum wɔ nikyee bie bɔ wafa wayakyi ye anaakyɛ wafa wawura ye sa nwo, anaa owua ye, anaakyɛ odi obiɛngo aminɛ,

³ anaakyɛ wanwu ye nikyee bɔ yeɛ wamini nakoso wanga nahorɛ, anaakyɛ ɔta ndaen fa kata nahorɛ so, anaakyɛ bɔne bɔ mmenia yɔ ne anu biala,

⁴ sɛ ebie nwu kyɛ wayɔ bɔne ná odi fɔ a, nikyee bɔ owuale ne, anaakyɛ bɔ ɔnate apoobɔlɛ so wanya ne, anaa bɔ bɛfa bewurale ye sa ne, anaa bɔ wamini ná wanwu ye ne,

⁵ anaa nikyee biala bɔ ɔnate ngondombo ndaentalɛ so nyane ye ne, odi kyɛ osa fa ye mu kɔ; na odi kyɛ ɔbɔ ye nwo nnu nu ngyɛmuɛ ko ɔfa ma nikyee ne mene, kyẽa bɔ ɔbɔ foɛlilɛ afɔleɛ ne.

⁶ Na odi kyɛ ɔfa ye foɛlilɛ nwo afɔleɛ bɔ ɔfa ma AWURADE ne ɔbrɛ ɔsɔfo: mmoaen kure ne anu boaen nyii bɔ ollili nnɛen biala ɔ, kyɛbɔ ɛnea ye nyɔboɛ fata foɛlilɛ afɔleɛ ɔ.

⁷ Ɔsɔfo ne kɔpata kɔma ye wɔ AWURADE nyunu, na Nyameɛ kɔfa ye bɔne kɔhyɛ ye wɔ nikyee biala bɔ sona yɔ a, ɔmaa odi fɔ ne anwo.”

Naen yeralɛ afɔleɛ

⁸ AWURADE sele Mose kyɛ,

⁹ “Hyɛ Aarɔn ne ye mma mmienzua nemɔ kyɛ, ‘Naen yeralɛ afɔleɛ nwo nhyehyɛleɛ ɛhe: Odi kyɛ naen yeralɛ afɔleɛ ne, ɔda agyegyemvia wɔ afɔleɛ bokyea ne aso kɔngɔen ne amukoraa maa okodwu ngyerɛmɔ, ná odi kyɛ see ne kɔ so gye wɔ afɔleɛ bokyea ne aso.

¹⁰ Odi kyɛ ɔsɔfo ne wura ye nwera ataadeɛ ne, ná ówura ye nwera pieto ne ɔ́fa kata ye nwo. Naen yeralɛ afɔleɛ bɔ bayera ye wɔ afɔleɛ bokyea ne aso ne, odi kyɛ ɔsesa ye nzoen ɔfa gua afɔleɛ bokyea ne ngyɛnu.

¹¹ Afei odi kyɛ ɔye ye ndaadeɛ ne, ná owura ndaadeɛ foforɛ, ná ɔsoa nzoen ne kɔ asikyeleɛ ne asi dɔ nekaa bɔ berɛ te sannwuu ɔ.

¹² Odi kyɛ ɔma see ne kɔ so gye wɔ afɔleɛ bokyea ne aso; onni kyɛ onnua ɔ. Ɔsɔfo ne ɔ́fa eyein gua nu ngyerɛmɔ biala, ɔ́hyehyɛ naen yeralɛ afɔleɛ ne wɔ so, ná ɔyera asomdwee afɔleɛ loe ne wɔ so.

¹³ Odi kyɛ see ne gye wɔ afɔleɛ bokyea ne aso daa; onni kyɛ onnua ɔ.

Aburoo afɔleɛ

¹⁴ “Aburoo afɔleɛ ne nwo nhyehyɛleɛ ɛhe: Odi kyɛ Aarɔn boso ama nemɔ bɛbɔ ye wɔ AWURADE nyunu wɔ afɔleɛ bokyea ne anyunu.

¹⁵ Aburoo afɔleɛ esam paa ɔne ngoo ne, ɔne ɛyɛɛ amukoraa bɔ ogua aburoo afɔleɛ ne aso ne, odi kyɛ ɔsɔfo ne sa ye sa bum ko, ná ɔyera ye wɔ afɔleɛ bokyea ne aso maa ɔyɛ ngayeɛ nikye bɔ ɔbo AWURADE fona ɔ.

¹⁶ Na ye ngaa ne, Aarɔn ne ye mma mɔ beli; odi kyɛ bedi ye kabrɛdi wɔ nekaa bɔ ɔte krongron ɔ; beli ye wɔ ɛtena sua atenaleɛ ne aluo.

¹⁷ Nnɛmaa bɛfa mɔle harewaa bɛfra ye bɛto; afɔleɛ bɔ bɛbɔ ye see so bɛma me ne, bɛ deɛ bɔ mafa mama bɛ hɔ ɛne. Ɔte krongron paa kyɛ bɔne nwo afɔleɛ ne foɛlilɛ afɔleɛ nemɔ ala.

¹⁸ Aarɔn bosoniɛ baa bienzua biala, oli AWURADE afɔleɛ bɔ bɛbɔ ye see so bɛma AWURADE ne bie, kyɛbɔ bahyehyɛ bato berɛ daa wɔ ɛmɔ aworɛ ndoatoasoɛ amukoraati nu ne; sona anaa nikyee biala bɔ ɔkɔfa ye nwo kɔha sɔ afɔleɛ nemɔ ne, ɔkɔyɛ krongron.

¹⁹ AWURADE sele Mose kyɛ,

²⁰ “Kyẽa bɔ bɛkɔpopa Aarɔn ngoo ne, afɔleɛ bɔ ɔne ye mma mmienzua mɔ ɔsɛ kyɛ bɛbɔ bɛma AWURADE ɛhe: daa biala aburoo afɔleɛ bɔ ɔte esam paa olonka ko; odi kyɛ bɛfa ye bue ngyerɛmɔ yeɛ ye bue nɔsoa.

²¹ Odi kyɛ bɛfa ngoo bɛkye ye kyɛnzee nu; fora ye yé ná toto ye mmaa mmaa kyɛ aburoo afɔleɛ, ná fa bɔ afɔleɛ bɔ ɔbo AWURADE fona ɔ.

²² Aarɔn bosoniɛ ɔsɔfo biala bɔ bɛkɔpopa ye ngoo maa okoosi Aarɔn gya nu ne, ye yeɛ ɔkɔbɔ sɔ afɔleɛ ne kɔma AWURADE kyɛbɔ bahyɛ ye afebɔɔ ɔ; odi kyɛ bɛyera ye mukoraa.

²³ Ɔsɔfo aburoo afɔleɛ biala, ɔsɛ kyɛ bɛyera ye mukoraa motoo; onni kyɛ bedi ɔ.

²⁴ Na AWURADE sele Mose kyɛ,

²⁵ “Ka kyire Aarɔn ne ye mma mmienzua mɔ kyɛ, ‘Bɔne nwo afɔleɛ nwo nhyehyɛleɛ ɛhe: Nekaa bɔ beku naen yeralɛ afɔleɛ ngaka nemɔ ne, berɛ yeɛ ɔsɛ kyɛ beku bɔne nwo afɔleɛ kaka ne wɔ AWURADE nyunu ɔ; ɔte krongron paa.

²⁶ Ɔsɔfo bɔ ɔkɔbɔ bɔne nwo afɔleɛ ne yeɛ ɔsɛ kyɛ odi ɔ; óli ye wɔ nekaa bɔ ɔte krongron ɔ, wɔ ɛtena sua atenaleɛ aluo berɛ.

²⁷ Nikyee biala bɔ ɔkɔfa ye nwo kɔha ye ne, ɔkɔyɛ krongron, na sɛ ye mogya ne bie bɔ pete ataadeɛ nu a, odi kyɛ ɛpo nekaa bɔ wabɔ wapete ne wɔ nekaa bɔ yeɛ ɔte krongron ɔ.

²⁸ Na kukue bɔ bɛkɔto ye wɔ nu ne, odi kyɛ bɛbɔ ye ɔ, nakoso sɛ bɛto ye wɔ dadesɛn nu de a, odi kyɛ betwi nu ná bɛfa nzue besale nu.

²⁹ Bienzua biala bɔ ofi asɔfokure ne anu ne, ɔkora odi bie; ɔte nikyee krongron paa.

³⁰ Nakoso bɔne nwo afɔleɛ biala bɔ bafa ye mogya ne bie bawa ɛtena sua atenaleɛ nu berɛ baayɛ mbata wɔ nekaa krongron ne anu ne de, onni kyɛ ebiala di ɔ; odi kyɛ bɛfa see bɛyera ye.