Lewitikɔso 5 - AHYERƐLƐ KRONGRON

Nningyein bɔ ohia bɔne nwo afɔleɛ ɔ

¹ “Sɛ ebie nye tua edwirɛ bie, anaakyɛ ɔte edwirɛ bie, ná bɛfrɛ ye kyɛ ooli ye nwo adanzeɛ, ná wangɔ maa ɔnate so ɔyɔ bɔne a, ye musue kɔbɔ ye ti so.

² Anaakyɛ sɛ ebie nwo ka nikyee biala bɔ ye nwo nde: sɛ kaka bɔ ye nwo nde fuin ahɔ oo, anaa ayɛmmoa bɔ ye nwo nde fuin ahɔ oo, anaa kaka bɔ ɔtwe ye nwo ase bɔ ye nwo nde fuin ahɔ oo, maa ɔnate so ye nwo gua fiɛ a, ɔwɔ nu kyɛ ɔnze de, nakoso odi fɔ.

³ Anaa sɛ ye nwo ka nikyee fiɛ biala bɔ ofi kuro sona nu a: nikyee biala bɔ ogua kuro sona nwo fiɛ, ná sɛ ɔnze po a, sɛ onya nwu ye a, okoli fɔ.

⁴ Anaa sɛ ebie bukye ye noa, ná ɔpere ye nwo hyɛ bɔ nikyee bie anwo a, kyɛ paa oo, anaa tɛɛ oo, ndaen biala bɔ sona perepere ye nwo ɔta ne, sɛ ɔnze po a, sɛ onya nwu ye a, okoli nu biala nwo fɔ.

⁵ Sɛ ebie nwu kyɛ odi ɛhemɔ biala nwo fɔ a, odi kyɛ ɔka sɔ bɔne bɔ wayɔ ne wɔ badwa nu,

⁶ ná ɔ́fa ye foɛlilɛ afɔleɛ ɔbrɛ AWURADE, ɔnate bɔne bɔ wayɔ ne ati. Odi kyɛ ɔfa boaen beleɛ anaa abɔngye beleɛ ɔbɔ foɛlilɛ afɔleɛ, na ɔsɔfo ne kɔsrɛ mbata kɔma ye, ɔnate ye bɔne ti.

⁷ “Na sɛ ye nwo ngɔso boaen so a, ye de maa ɔfa mmorɔma nyɔ anaakyɛ mmorɔnoma buruwa nyɔ ɔɔbɔ foɛlilɛ afɔleɛ ɔma AWURADE, ɔnate bɔne bɔ wayɔ ne ati; odi kyɛ ɔfa ko ɔbɔ bɔne nwo afɔleɛ ná ɔfa ko koso ɔbɔ naen yeralɛ afɔleɛ.

⁸ Odi kyɛ ɔfa ngaka nemɔ ɔbrɛ ɔsɔfo ne, ná ɔsɔfo ne oli moa ɔfa ko ne ɔbɔ bɔne nwo afɔleɛ, ókisa ye kɔme, nakoso nnɛmaa ɔte ye ti fi so.

⁹ Odi kyɛ ɔfa bɔne nwo afɔleɛ mogya ne bie ɔpete afɔleɛ bokyea ne ngyɛnu, na mogya ne ngaa ne de, ohwi ogua afɔleɛ bokyea ne abo; ɔte bɔne nwo afɔleɛ.

¹⁰ Odi kyɛ ɔsɔfo ne fa anomaa bɔ ɔtɔ so nyɔ ne ɔbɔ naen yeralɛ afɔleɛ, kyɛbɔ nhyehyɛleɛ ne te ɔ. Ɔsɔfo ne ɔ́pata ma ye wɔ bɔne bɔ wayɔ ne anwo, na Nyameɛ kɔfa ye bɔne kɔhyɛ ye.

¹¹ “Nakoso sɛ ye nwo ngɔso mmorɔma nyɔ anaakyɛ mmorɔnoma buruwa nyɔ so a, ye de ɔnate bɔne bɔ wayɔ ne ati, ɔ́fa aburoo esam paa olonka ko ɔɔbɔ bɔne nwo afɔleɛ. Nnɛmaa ɔfa ngoo anaa ɛyɛɛ gua so, ofikyɛ ɔte bɔne nwo afɔleɛ.

¹² Odi kyɛ ɔfa brɛ ɔsɔfo ne, ná ɔsɔfo ne ɔsa ye sa bum ko fa yɛ ngayeɛ nikye ogua afɔleɛ ne aso, ná ɔfa see yera ye wɔ afɔleɛ bokyea ne aso ɔma AWURADE; ɔte bɔne nwo afɔleɛ.

¹³ Yiti ɔsɔfo ne kɔpata kɔma ye wɔ bɔne bɔ wayɔ wɔ ɛhemɔ biala nu ɔ, na Nyameɛ kɔfa ye bɔne kɔhyɛ ye. Afɔleɛ ne ngaa ne koso kɔyɛ ɔsɔfo ne deɛ, kyɛ aburoo afɔleɛ ne ala.

Foɛlilɛ nwo afɔleɛ

¹⁴ Na AWURADE sele Mose kyɛ,

¹⁵ “Sɛ ɛmɔ nu bie yɔ bɔne, bɔ ɔyɔ bɔne fa AWURADE nningyein krongron ne anu biala nwo, ná sɛ sɔ sona ne ɔnze kyɛ wayɔ bɔne a, odi kyɛ ɔfa mmoaen kure ne anu boaen nyii ko bɔ ollili nnɛen biala ɔ ɔbɔ foɛlilɛ afɔleɛ ma AWURADE. Pɛ ye nyɔboɛ ne wɔ sikaa nu, kyɛbɔ nekaa krongron berɛ sekel te ɔ; ɔte foɛlilɛ afɔleɛ.

¹⁶ Na krongron nikyee bɔ wayɔ ye nwo bɔne ne, odi kyɛ ɔfa sɔ nikyee ne bie osi ye gya nu; odi kyɛ ɔbɔ ye nwo nnu nu ngyɛmuɛ ko na ɔ́fa ma ɔsɔfo ne, na ɔsɔfo ne kɔfa foɛlilɛ afɔleɛ boaen nyii ne kɔpata kɔma ye, na Nyameɛ kɔfa ye bɔne kɔhyɛ ye.

¹⁷ “Sɛ ebie yɔ bɔne, kyɛ ɔyɔ nningyein bɔ Nyameɛ abra kyɛ nnɛmaa bɛyɔ ne anu biala nwo a, sɛ ɔnze po a, odi ye nwo fɔ, na ye musue kɔbɔ ye ti so.

¹⁸ Odi kyɛ ɔfa mmoaen kure ne anu boaen nyii bɔ ollili nnɛen biala ɔ ɔbrɛ ɔsɔfo, kyɛbɔ ɛnea a, ye nyɔboɛ fata foɛlilɛ afɔleɛ ɔ, na ɔsɔfo ne kɔpata kɔma ye wɔ mvomsoɛ bɔ wayɔ na ɔnze kyɛ wayɔ ne anwo, na Nyameɛ kɔfa kɔhyɛ ye.

¹⁹ Ɔte foɛlilɛ afɔleɛ; odi fɔ wɔ AWURADE nyunu.”