Lewitikɔso 3 - AHYERƐLƐ KRONGRON

Asomdwee afɔleɛ

¹ “Sɛ ebie afɔleɛ te asomdwee afɔleɛ a, sɛ ɔfa nandwie nyii anaa beleɛ bɔ ofi nandwie kure ne anu a, odi kyɛ ɔfa bɔ ollili nnɛen ɔ ɔbɔ afɔleɛ ne wɔ AWURADE nyunu.

² Odi kyɛ ɔfa ye sa to kaka ne ti afia, ná oku ye wɔ ɛtena sua atenaleɛ anoa nu berɛ; na Aarɔn mma mmienzua bɔ bɛ yeɛ bɛte asɔfo ne, odi kyɛ bɛfa mogya ne behwie begua afɔleɛ bokyea ne anwo bɛbra beyia.

³ Odi kyɛ ɔye ɛloe bɔ wato wafa ye kunu nningyein anwo ne, ɔne ɛloe bɔ ɔwɔ ye kunu nningyein ne anwo amukoraa fi asomdwee afɔleɛ ne anu, ná ɔ́fa see yera ye fa bɔ afɔleɛ ma AWURADE.

⁴ Odi kyɛ ɔfa ɛhemɔ koso boka so: ye saa nyɔ ne ɔne bɛ nwo loe bɔ ɔwɔ ye sisia nu ne, ɔne ye boɛ ne bie bɔ ɔkɔye kɔboka ye saa nemɔ aso ne.

⁵ Na odi kyɛ Aarɔn mma mmienzua nemɔ, bɛfa begua naen yeralɛ afɔleɛ bɔ ogua see so wɔ afɔleɛ bokyea so ne aso, ná bɛyera ye; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

⁶ “Sɛ asomdwee afɔleɛ bɔ ɛbɔ ma AWURADE ne fi mmoaen kure ne anu a, nyii oo, beleɛ oo, odi kyɛ ɔyɛ kaka bɔ ollili nnɛen biala ɔ.

⁷ Sɛ wɔ afɔleɛ ne te boaen ba a, ye de odi kyɛ ɛfa ba AWURADE nyunu.

⁸ Odi kyɛ ɛfa wɔ sa to kaka ne ti afia ná eku ye wɔ ɛtena sua atenaleɛ ne anyunu, ná Aarɔn mma mmienzua nemɔ béhwie ye mogya ne bégua afɔleɛ bokyea ne anwo bɛ́bra béyia.

⁹ Odi kyɛ ɛfa ɛhemɔ fi ye asomdwee afɔleɛ ne anu ná ɛyera bɛ bɔ afɔleɛ ma AWURADE: ye loe, ye dua pue bɔ baye bafi ye sisia ne anu, ɛloe bɔ wato wafa ye kunu nningyein anwo, ɔne ɛloe bɔ ɔwɔ ye kunu nningyein anwo ne amukoraa,

¹⁰ ye saa nyɔ ne ɔne bɛ nwo loe bɔ ɔwɔ ye sisia ne anu ne, ɔne ye boɛ ne bie bɔ ɛkɔye kɔboka saa nemɔ aso ne.

¹¹ Na odi kyɛ ɔsɔfo ne ɔyera ye afɔleɛ bokyea ne aso maa ɔyɛ aleɛ bɔ bɛyera ye see so bɛma AWURADE ɔ.

¹² “Sɛ w’afɔleɛ ne te abɔngye a, odi kyɛ ɛfa ba AWURADE nyunu,

¹³ odi kyɛ ɛfa wɔ sa to kaka ne ti afia, ná beku ye wɔ ɛtena sua atenaleɛ ne anyunu, na odi kyɛ Aarɔn mma mmienzua nemɔ behwie mogya ne begua afɔleɛ bokyea ne anwo bɛbra beyia.

¹⁴ Ɛloe bɔ wato wafa ye kunu nningyein anwo ne, ɔne ɛloe bɔ ɔwɔ ye kunu nningyein anwo ne amukoraa, odi kyɛ ɛye fi asomdwee afɔleɛ ne anu ná ɛfa see yera ye ɛbɔ afɔleɛ ma AWURADE.

¹⁵ Odi kyɛ ɛfa ɛhemɔ koso boka so: ye saa nyɔ ne ɔne bɛ nwo loe bɔ ɔwɔ ye sisia ne anu ne, ɔne ye boɛ ne bie bɔ ɛkɔye kɔboka saa nemɔ aso ne.

¹⁶ Na odi kyɛ ɔsɔfo ne ɔyera bɛ wɔ afɔleɛ bokyea ne aso maa ɔyɛ aleɛ bɔ bɛyera ye see so ná bɔ ɔbo fona ɔ. Ɛloe ne amukoraa te AWURADE deɛ.

¹⁷ Na ɛhe kɔyɛ ahyɛdeɛ afebɔɔ kɔma ɛmɔ wɔ ɛmɔ aworɛ ndoatoasoɛ amukoraati nu, wɔ nekaa biala bɔ ɛmɔkɔtena ɔ, kyɛ nnɛma ɛmɔdi ɛloe anaa mogya.”