Lewitikɔso 26 - AHYERƐLƐ KRONGRON

Sotie nwo akatuaa

¹ “Nnɛma ɛmɔyɔ mmosoen, yeɛ nnɛma ɛmɔgyina amoen bɔ base anaakyɛ bonima biala bɛma bɛ nwo; nnɛma ɛmɔfa nyɔboɛ bɔ ɛmɔali so adwii bɛpenapena ɛmɔ aseɛ so bɛsɔne bɛ, ofikyɛ me ole AWURADE ɛmɔ Nyameɛ.

² Ɛ́mɔli m’afofingyẽa ne aso ná ɛ́mɔli me nekaa krongron ne ni: Me ole AWURADE.

³ “Sɛ ɛmɔdi m’ahyɛdeɛ so, ɛmɔyɛ me mmeraa dwirɛ nwo sotie, ná ɛmɔfa bɛyɔ adwuma nahorɛ nu a,

⁴ ngɔma esue kɔtɔ kɔma ɛmɔ wɔ mmerɛ bɔ ɔsɛ ɔ nu, aseɛ ne kɔhye aleɛ, ná fieso nningyein asu mmaa.

⁵ Ɛmɔkɔhɔ so bɛkɔboro aburoo alaa maa okoodwu mmerɛ bɔ ɛmɔte bobe ɔ, na ɛmɔkɔhɔ so bɛkɔte bobe alaa maa okoodwu mmerɛ bɔ ɛmɔdua aburoo ɔ. Ɛmɔkodidi maa ɛmɔ ko koyi, ná ɛmɔatena aseɛ ne aso asomdwee nu.

⁶ Ngɔma maen ne konya asomdwee, na ɛmɔkɔla wɔ aberɛ bɔ ebiala ngonwunanwuna ɛmɔ ɔ; ngɔfoa ngaka bɔ bɛte awerɔm ɔ ngofi aseɛ ne aso, na koɛ biala ngɔhɔ so wɔ ɛmɔ aseɛ ne aso.

⁷ Ɛmɔkɔfoa ɛmɔ pɔfoɛ mɔ, na bɛkɔtotɔ ɛmɔ ngrandɛ noa.

⁸ Ɛmɔ nu mmenia nnu kɔfoa mmenia ɛyaa ko, yeɛ ɛmɔ nu mmenia ɛyaa ko kɔfoa mmenia apee buru, na ɛmɔ pɔfoɛ mɔ kɔtotɔ ɛmɔ ngrandɛ noa.

⁹ Ngɔlo ɛmɔ, ngɔma ɛmɔkɔwo, ná ɛmɔata pee; ngɔma apam bɔ me ne ɛmɔ yayɛ ne kotimu.

¹⁰ Fieso aleɛ daa bɔ ɛmɔafa basie pata so bahyɛ ɔ yeɛ ɛmɔkoli ɔ; ɛmɔkogyi aleɛ daa ne bekogua, koraka né ɛmɔanya ate bafa foforɛ basi ye gya nu.

¹¹ Ngɔyɛ m’atenaleɛ wɔ ɛmɔ afia, na mengɔpɔ ɛmɔ.

¹² Me ne ɛmɔ kɔnate; nde ɛmɔ Nyameɛ, na ɛmɔ koso ɛmɔkɔyɛ me mmenia.

¹³ Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so kyɛ, mengɔma ɛmɔ ngɔyɛ bɛ nganga ko ne. Mabubu ɛmɔ kɔnnua ná mamaa ɛmɔanate bafa bɛ sa basi bɛ hue.

Asoserɛ nwo asohwenɛ

¹⁴ “Nakoso sɛ ɛmɔanyɛ sotie bamma me, ná ɛmɔanni mmeraa dwirɛ hemɔ amukoraati so,

¹⁵ sɛ ɛmɔpo m’ahyɛdeɛ, ná ɛmɔtwi bɛfa me nhyehyɛleɛ so, ná ɛmɔanni me mmeraa dwirɛ amukoraa so, ná ɛmɔbu m’apam so a,

¹⁶ bɔ me koso ngɔfa ngɔyɔ ɛmɔ ɛhe: ngɔmaa asane kandinga kɔto ɛmɔ; anwonyerɛ koangɔ kɔbɔ ɛmɔ, yeɛ ebunu bɔ ɔma bɛ nye yɛ wusiwusi ná ɔma sona ngoa so te ɔ kɔhye ɛmɔ. Sɛ ɛmɔdua nningyein a, ɛmɔkɔfɛ bekogua mbaen, ofikyɛ ɛmɔ pɔfoɛ mɔ yeɛ bekoli ɔ.

¹⁷ Ngotu me nye ngosie ɛmɔ so, na ɛmɔkɔtotɔ ɛmɔ pɔfoɛ mɔ ngrandɛ noa. Ɛmɔ pɔfoɛ mɔ koli ɛmɔ so, na ɛmɔkɔnwati wɔ aberɛ bɔ ebiala ɔmvoa ɛmɔ ɔ.

¹⁸ Na sɛ ɛhe amukoraa si ye po, ɛmɔanyɛ sotie bamma me a, ɔnate ɛmɔ bɔne ti, ngɔhɔ so ngɔhwe ɛmɔ so mmɔhoɛ nzoo.

¹⁹ Ngɔbrɛ anwoserɛ bɔ ɛmɔfa bekyire bɛ nwo ne ase, ngɔma ewienu bɔ ɔkata ɛmɔ so ne kɔyɛ kyɛ buralɛ, ná aseɛ bɔ ɛmɔte so ne ayɛ kyɛ kɔɔbere.

²⁰ Ɛmɔkɔsɛkye ɛmɔ anwoserɛ mbaen: ɛmɔ aseɛ ngɔhye aleɛ, yeɛ aseɛ ne aso mmakaa ngosu mmaa.

²¹ “Sɛ ɛmɔkɔso bedwɔso betia me, na ɛmɔandie me dwirɛ a, ɔnate ɛmɔ bɔne ti, ngɔhɔ so ngɔfa amaneɛ piri ngɔto ɛmɔ so pɛen nzoo.

²² Ngɔsoma ngaka aboyaa maa bɛkɔwa ɛmɔ so, na bekohũhũ ɛmɔ mma mɔ maa bekofi ɛmɔ sa; bekohũhũ ɛmɔ nyɛmmoa. Bɛkɔma ɛmɔ somaa so kɔte, bɔ ɔnate so sona fee ngɔfa ɛmɔ atee nemɔ aso ɔ.

²³ “Na sɛ asohwenɛ hemɔ amukoraati si, ɛmɔanza banga bamma me nwo, na mmom ɛmɔkɔso bedwɔso betia me a,

²⁴ ye de me koso ngɔhɔ so ngodwɔso ngotia ɛmɔ, ná ɔnate ɛmɔ bɔne ti, mahwe ɛmɔ so pɛen nzoo.

²⁵ Na ngɔhwe ɛmɔ so ngrandɛ, ná matɔ ɛmɔ so wereɛ, ɔnate apam bɔ ɛmɔabu so ne ati. Na sɛ ɛmɔkɔfeafea ɛmɔ nguro nemɔ anu a, ngɔsoma anwonyerɛ tɛɛ maa ɔkɔbɔ ɛmɔ, na ngɔfa ɛmɔ ngowura ɛmɔ pɔfoɛ mɔ sa.

²⁶ Ngɔma ɛhɔen kɔwa ɛmɔ aseɛ so; mmrasua buru yeɛ bɛkɔto ɛmɔ aleɛ wɔ bokyea komapɛ aso ɔ. Mmrasua nemɔ kosusu aleɛ ne mmaa mmaa bie yeɛ bɛkɔma ɛmɔ ɔ, yiti sɛ ɛmɔdi a, ɛmɔ ko ngoyi.

²⁷ “Nakoso sɛ ɛhe asi ye, ɛmɔyɛ asoserɛ betia me ná ɛmɔdwɔso betia me a,

²⁸ ye de nne ɛyaa piri ngodwɔso ngotia ɛmɔ, na ɔnate ɛmɔ bɔne ti, me bɔbɔ ngɔhwe ɛmɔ so pɛen nzoo.

²⁹ Ɛmɔkohũhũ ɛmɔ mma mmienzua mɔ ɔne ɛmɔ mma mmrasua mɔ bekoli.

³⁰ Ngɔsɛkye ɛmɔ asɔneyɛɛ so nemɔ ná mabubu ɛmɔ ɛyɛɛ afɔleɛ bokyea nemɔ magua. Ngɔboaboa ɛmɔ fuin noa ngogua ɛmɔ mmosoen wuruwaa nemɔ aso. Na ngɔpɔ ɛmɔ.

³¹ Ngɔma ɛmɔ nguro nemɔ kɔbɔ, ná masɛkye ɛmɔ nekaa krongron nemɔ, na me nye ngɔgye ɛmɔ afɔleɛ fonafona nemɔ anwo.

³² Ngɔsɛkye ɛmɔ aseɛ ne pasaa, maa ɛmɔ pɔfoɛ mɔ bɔ bekotu bɛkɔɔtena nu ne, ɔkɔyɛ bɛ nwanwa.

³³ Na ɛmɔ de, ngɔma ɛmɔ kɔbɔ aya bɛkɔhɔ maen maen mɔ so, na ngɔhwe ɛmɔ so ngrandɛ; ɛmɔ aseɛ nemɔ kɔsɛkye bɔkɔɔ, ná ɛmɔ nguro nemɔ koso kɔbɔ.

³⁴ “Sɔ mmerɛ bɔ aseɛ ne la berɛ mbaen ne, okoli ye afofi afoɛ mɔ; mmerɛ bɔ ɛmɔwɔ ɛmɔ pɔfoɛ mɔ aseɛ so ne, aseɛ ne kole ye nwome, ná wahɔ so wali ye afofi afoɛ mɔ.

³⁵ Afoɛ mɔ bɔ ɛmɔtenane aseɛ ne aso belili afofi ne, sɛ aseɛ ne da berɛ mbaen a yeɛ okole ye nwome ɔ.

³⁶ Na ɛmɔ nu mmenia bɔ bekonya bɛ ti bekodidi nu ne, ngɔfa ahunundetelɛ ngɔto bɛ so wɔ bɛ pɔfoɛ mɔ aseɛ nemɔ aso. Nyaa bɔ mvrama bɔ ye ne, ye nwo dede po kɔmaa bɛkɔnwati, bɛkɔnwati kyɛ ebie bɔ ɔnwati fi ngrandɛ noa ɔ, na bekofifi ase wɔ aberɛ bɔ ebiala mvoa bɛ ɔ.

³⁷ Ɔwɔ nu kyɛ ebiala mvoa bɛ de, nakoso bekofifi ase bɛkɔfofo bɛ nwo so kyɛ mmenia bɔ bɛnwati befi ngrandɛ noa ɔ. Na ɛmɔngonya anwoserɛ bengogyina ɛmɔ pɔfoɛ mɔ nyunu.

³⁸ Ɛmɔkowuwu wɔ maen maen so maa bekosie ɛmɔ wɔ ɛmɔ pɔfoɛ mɔ aseɛ so.

³⁹ Na ɛmɔ nu mmenia bɔ bekonya bɛ ti bekodidi nu ne, ɔnate b’amumuyɛɛ ti, bɛ nwo kɔhyere bɛ wɔ ɛmɔ pɔfoɛ mɔ aseɛ so. Afei ɔnate bɛ nana mɔ amumuyɛɛ ti, bɛ bɔ banya bɛ ti badidi nu ne, bɛ nwo kɔhyere bɛ.

⁴⁰ “Nakoso sɛ bɛka b’amumuyɛɛ ɔne bɛ nana mɔ amumuyɛɛ: kyɛ bɛyɛle ɛlɔen betiale me, na afei bɛtoale so bedwɔso betiale me,

⁴¹ maa ɔnate so me koso ngɔle so ndwɔso ndiale bɛ, na mvale bɛ mmale bɛ pɔfoɛ mɔ aseɛ so; sɛ bɛbrɛ b’ahone bɔ wapini ne ase, ná bede bɛto nu kyɛ bedi fɔ a,

⁴² ye de ngɔkaye m’apam bɔ me ne Yakob yɛyɛle ne. Ngɔkaye m’apam bɔ me ne Yisake yɛyɛle ne ɔne bɔ me ne Abraham yɛyɛle ne koso, na ngɔkaye aseɛ ne.

⁴³ Na bɛkɔyakyi aseɛ ne berɛ maa okoli ye afofi afoɛ mɔ wɔ mmerɛ bɔ ɔla berɛ mbaen ɔ; bekole bɛkɔto nu kyɛ bedi fɔ, ɔnate kyɛ bɛpole me nhyehyɛleɛ, na m’ahyɛdeɛ nwo yɛle bɛ kra nya.

⁴⁴ Nakoso ɛhe amukoraa asi ye, sɛ bɛwɔ bɛ pɔfoɛ mɔ aseɛ so po a, mengɔpo bɛ, yeɛ mengɔpɔ bɛ bɔ ɔkɔmaa bɛ boso konua, bɔ ɔkɔmaa ngɔsɛkye apam bɔ ɔla me ne b’afia ne ɔ; ofikyɛ me ole AWURADE bɛ Nyameɛ.

⁴⁵ Nakoso apam bɔ me ne bɛ nana mɔ bɔ nyele bɛ mvili Misraim aseɛ so yɛyele, kyɛ nde bɛ Nyameɛ, bɔ maen maen amukoraa nye tua ne, ɔnate bɛ bɔ banya bɛ ti badidi nu ne ati ngɔkaye; Me ole AWURADE.”

⁴⁶ Ɛhe mɔ ole ahyɛdeɛ, nhyehyɛleɛ ne mmeraa bɔ AWURADE nate Mose so hyehyɛle tole ye ne Yisraelfoɛ afia wɔ Sinai bokaa aso ne.