Biblia Todo Logo
Bìoball air-loidhne

- Sanasan -

Lewitikɔso 25 - AHYERƐLƐ KRONGRON


Afofi afoɛ
( Deuteronomi 15.1-11 )

1 Na AWURADE sele Mose wɔ Sinai bokaa ne aso kyɛ,

2 “Ka kyire Yisraelfoɛ kyɛ, ‘Sɛ ɛmɔdwu aseɛ bɔ méfa méma ɛmɔ ne aso a, afoɛ nzoo biala, odi kyɛ ɛmɔma aseɛ ne da berɛ de ye nwome ma AWURADE.

3 Afoɛ nzia yeɛ fa yɔ wɔ boo nu adwuma ɔ. Wɔ bobe mmakaa ne, sɔ afoɛ nzia ne ala yeɛ fa pepɛ bɔ wafifi ye nwo ne, ná fa te ye mma ne ɔ.

4 Nakoso afoɛ bɔ ɔtɔ so nzoo ne de, odi kyɛ ɔyɛ afofi afoɛ bɔ aseɛ ne de ye nwome bɔkɔɔ ma AWURADE ɔ. Nnɛdua hwee wɔ wɔ fieso yeɛ nnɛpepɛ bɔ wafefɛ wɔ bobe mmakaa nwo ne.

5 Sɛ ɛfa wɔ fieso aleɛ ne yie a, aleɛ bɔ okofifi ye si ne, nnɛfa; yeɛ wɔ bobe mmakaa bɔ ambepɛ bɔ wafifi ye nwo ne, nnɛtete ye mma: ma aseɛ ne ole ye nwome bɔkɔɔ sɔ afoɛ ne.

6 Aleɛ bɔ okosu wɔ aseɛ ne aso wɔ ye afofi afoɛ ne anu ne, ɔkɔyɛ ɛmɔ aleɛ: ɛne wɔ ngoaa ne w’afaneɛ mɔ, w’apaafoɛ ɔne ɛwɔfoɛ bɔ baatena wɔ berɛ ɔ;

7 wɔ nyɛmmoa koso, ɔne eburo ngaka bɔ bɛwɔ w’aseɛ ne aso ne, sɔ aleɛ ne amukoraa kɔyɛ b’aleɛ.


Yubilee afoɛ

8 “Ka afofi afoɛ nzoo, afoɛ nzoo ahoroɔ nzoo, na afofi afoɛ ahoroɔ nzoo ne kɔyɛ afoɛ aburanna ne ngona.

9 Na bosome bɔ ɔtɔ so nzoo ne, eleburu ne aso bɔ yeɛ ɔte mbata kyẽa ne, maa behu totorobɛndo serɛserɛ; maa behũ ye wɔ ɛmɔ maen ne anu amukoraa.

10 Ɛ́mɔma afoɛ bɔ ɔtɔ so aburannu ne ɔyɛ krongron, ná ɛ́mɔbɔ fawɔnwodi nwo dawure behyire aseɛ ne aso ama mukoraa wɔ maen ne amukoraati nu. Ɔte Yubilee afoɛ ma ɛmɔ, na ɛmɔ nu biala, odi kyɛ ye sa osa ka ye aseɛ bɔ wafi ye sa ɔ, ná sona biala bɔ ɔwɔ ngoaasolɛ nu ne, osa kɔ ye abusua nu.

11 Ɛ́mɔma afoɛ aburannu ne ɔyɛ Yubilee ɔma ɛmɔ. Nnɛma ɛmɔdua hwee; sɛ ɛmɔfa ɛmɔ fieso aleɛ a, aleɛ bɔ okofifi ye si ne, nnɛma ɛmɔbu, yeɛ bobe mmakaa bɔ ambepɛ bɔ wafifi bɛ nwo ne, nnɛma ɛmɔtete bɛ mma.

12 Ofikyɛ ɔte Yubilee afoɛ; na odi kyɛ ɔyɛ krongron ma ɛmɔ: ɛ́mɔli aleɛ bɔ ye bɔbɔ okofifi wɔ aseɛ ne aso angome.

13 “Sɔ Yubilee afoɛ ye, odi kyɛ ɛmɔ nu biala ye sa osa ka ye aseɛ bɔ wafi ye sa ɔ.

14 Kyɛ ɛtɔne nikyee ma ebiɛngo oo, anaakyɛ ɛtɔ nikyee fi ye berɛ oo, nnɛma ɛmɔdi bɛ nwo aminɛ.

15 Sɛ ɛtɔ nikyee fi ebiɛngo berɛ a, afoɛ bɔ waha kora ne Yubilee ne aso ne yeɛ okohyire ye nyɔboɛ ɔ; bɔ ɔtɔne ye ne koso, afoɛ somaa bɔ ɛkɔfa kɔyɛ so adwuma ne yeɛ odi kyɛ ogyina so pɛ ye nyɔboɛ ɔ.

16 Sɛ afoɛ bɔ waha ne sone a, to ye nyɔboɛ ne anu, nakoso sɛ afoɛ bɔ waha ne anzo a, te ye nyɔboɛ ne aso; ofikyɛ afoɛnoa afoɛnoa aleɛ bɔ ekonya ye ne yeɛ ɔtɔne ye ma wɔ ɔ.

17 Nnɛma ɛmɔ nu biala sisi obiɛngo, na mmom suro wɔ Nyameɛ; ofikyɛ me ole AWURADE ɛmɔ Nyameɛ.


Afoɛ nzoo ne anwo ahunundetelɛ

18 “Ɛ́mɔli m’ahyɛdeɛ so ná ɛ́mɔyɛ sotie bɛ́ma me nhyehyɛleɛ nahorɛ nu, amaa ɛmɔatena aseɛ ne aso asomdwee nu.

19 Aseɛ ne kɔhye aleɛ, na ɛmɔkoli ma ɛmɔ ko koyi, ná ɛmɔatena aseɛ ne aso asomdwee nu.

20 Ebiaa né ɛmɔabisa kyɛ, ‘Sɛ yɛngolua hwee anaakyɛ yɛngɔfa yɛ boo nu noa de a, né nzaade nzikyɛ yeɛ yɛkoli ye afoɛ bɔ ɔtɔ so nzoo ne anu ɔ?’

21 Ngɔma me saleɛ kohwie kogua ɛmɔ so wɔ afoɛ bɔ ɔtɔ so nzia ne anu, ná aseɛ ne kɔma ɛmɔ afoɛ nza aleɛ.

22 Sɛ ɛmɔdua nningyein afoɛ mmɔtwɛ ne anu a, ɛmɔkɔhɔ so bekoli aleɛ daa ne; ɛmɔkɔhɔ so bekoli aleɛ daa ne maa okoodwu afoɛ ngona ne bɔ afoɛ mmɔtwɛ ne anu aleɛ koti ɔ.

23 Onni kyɛ bɛte aseɛ ne terama, ofikyɛ aseɛ ne te me deɛ, na me nyunu de, ɛmɔte ɛwɔfoɛ ne hwɛsofoɛ.

24 Aseɛ biala bɔ ɔwɔ ɛmɔ sa nu ne, ɛ́mɔma ye nwo ate ma bɛpɔ ye.

25 “Sɛ ebiɛngo nwo kyere ye, ná ɔtɔne ye agyapadeɛ bie ma wɔ a, odi kyɛ ye nwoniɛ kaenn ɔbapɔ bɔ ye abusuaniɛ ne atɔne ye ne.

26 Sɛ sona ne olle ebiala bɔ ɔkɔpɔ agyapadeɛ ne, nakoso nziɛ ye ye bɔbɔ ɔbayɛ yee, ná onya sikaa bɔ ɔkɔhora kɔpɔ agyapadeɛ ne a,

27 odi kyɛ bɛnea afoɛ somaa bɔ watɔne agyapadeɛ ne maa wali ye berɛ ɔ, ná bɛsesẽ afoɛ bɔ waha ne nwo sikaa betua bɛma sona bɔ ɔtɔle agyapadeɛ ne, ná agyapadeɛ ne osa ooli ye mene ne sa nu.

28 Nakoso sɛ olle sikaa bɔ ɔkɔso agyapadeɛ ne pɔ a, agyapadeɛ bɔ watɔne ye ne kɔha sona bɔ watɔ ne berɛ maa okoodwu Yubilee afoɛ ne; sɛ Yubilee afoɛ ne so a, odi kyɛ ɔfa ye mene ne nikyee ma ye, ná agyapadeɛ ne sa bayɛ ye mene deɛ.

29 “Sɛ ebie tɔne awuro, wɔ kuro bɔ bato ye nwo fasue nu, ná onnya ɔbbole afoɛ ko a, sona ne kɔhora kɔpɔ ye; ole ye nwo ate alaa maa okodwu afoɛ ko kyɛ ɔkora pɔ ye ɔ.

30 Sɛ wambɔ ye ná afoɛ ko pɛ nu a, ye de awuro bɔ ɔwɔ kuro bɔ bato ye nwo fasue nu ne kɔyɛ bɔ ɔtɔle ne deɛ afebɔɔ wɔ ye aworɛ ndoatoasoɛ nu; onni kyɛ bɔ ɔtɔle ne kakyi ma ye mene Yubilee afoɛ ne anu.

31 Nakoso awuro mɔ bɔ bɛwɔ nguraa mɔ bɔ fasue ɔnne bɛ nwo nu ne de, odi kyɛ bebu bɛ kyɛ bɛte namue; bɛkɔhora bɛkɔpɔ bɛ, na odi kyɛ besa bɛkakyi bɛma bɛ mene mɔ Yubilee afoɛ ne anu.

32 Na Lewifoɛ nguro nemɔ de, Lewifoɛ le ye nwo ate afebɔɔ kyɛ bɛpɔ bɛ nguro nemɔ anu awuro mɔ ɔ.

33 Sɛ Lewiniɛ bie wambɔ ye awuro bɔ batɔne ye wɔ bɛ nguro ne bie aso a, ye de odi kyɛ besa bɛkakyi awuro ne bɛma ye mene wɔ Yubilee afoɛ ne anu; ofikyɛ awuro mɔ bɔ bɛwɔ Lewifoɛ nguro nemɔ anu ne, bɛte Lewifoɛ mɔ agyapadeɛ wɔ Yisraelfoɛ nu.

34 Nakoso aseɛ bɔ wapɛ Lewifoɛ nguro nemɔ anwo wayia ne de, onni kyɛ bɛtɔne ye; ofikyɛ ɔte Lewifoɛ mɔ agyapadeɛ afebɔɔ.

35 “Sɛ wɔ nwoniɛ bie kɔ anwokyere nu, ná ɔfa ye anwokyere ne bato wɔ so a, odi kyɛ ɛboka ye ɔ; maa ɔne wɔ bɛtena kyɛ ɛwɔfoɛ anaa bataniɛ bɔ waasikye wɔ ɔ.

36 Nnɛde ye dɔ nzihoɛ, yeɛ nnɛdidi ye nwo, na mmom suro wɔ Nyameɛ, ná ma eliɛma ne ɔne wɔ bɛtena.

37 Sɛ ɛbɔ ye bosea a, nnɛde ye dɔ nzihoɛ, yeɛ w’aleɛ bɔ ɛfa ma ye ne, nnɛhuru ye nyɔboɛ.

38 Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so kyɛ mefa Kanaan aseɛ mema ɛmɔ ɔ, na me yeɛ nde ɛmɔ Nyameɛ ɔ.

39 “Sɛ ohia ebiɛngo Yisraelniɛ bie alaa maa ɔyɛ ye nwo atɔen ma wɔ a, nnɛfa ye yɛ kanganiɛ.

40 Maa ɔne wɔ bɛtena kyɛ paaniɛ anaa bataniɛ, ná ɔso wɔ maa oodwu kyɛ Yubilee afoɛ ne kodwu ɔ.

41 Na ɛhe asi ye, ɔne ye mma mɔ bekofi wɔ bo, bekosa bɛkɔhɔ b’abusua nu ná basa baafa bɛ nana mɔ agyapadeɛ.

42 Ofikyɛ bɛte me ngoaa bɔ nyele bɛ mvili Misraim aseɛ so ɔ; onni kyɛ bɛtɔne bɛ kyɛbɔ bɛtɔne nganga ɔ.

43 Nnɛhyɛ bɛ so, na mmom suro wɔ Nyameɛ.

44 Wɔ nganga ne w’afaneɛ mɔ de, maen maen bɔ bapɛ ɛmɔ nwo bayia ne anu yeɛ odi kyɛ ɛtɔ bɛ fi ɔ.

45 Ɛmɔkɔhora koso bɛkɔtɔ bie bekofi ɛhemɔ anu: ɛwɔfoɛ mɔ bɔ baatena ɛmɔ nu, yeɛ b’abusuafoɛ bɔ baawo bɛ wɔ ɛmɔ maen nu, amaa bayɛ ɛmɔ deɛ.

46 Ɛmɔkɔhora bɛkɔfa bɛ bɛkɔyɛ agyapadeɛ bɛkɔyakyi ɛmɔ mma mɔ, yeɛ ɛmɔkɔhora bɛkɔfa bɛ bɛkɔyɛ ɛmɔ nganga. Nakoso ɛmɔ mmango Yisraelfoɛ de, nnɛma ebiala hyɛ obiɛngo so.

47 “Na sɛ ɛwɔfoɛ bie bɔ waatena ɛmɔ nu bayɛ sikaniɛ, ná sɛ ohia eliɛma Yisraelniɛ bie ma ye sɔ ti ɔtɔne ye nwo ma ɛwɔfoɛ ne anaakyɛ ɛwɔfoɛ ne sasoniɛ biala a,

48 sɛ ɔtɔne ye nwo yie a, atee wɔ berɛ ma ye kyɛ bɛpɔ ye ɔ; oliɛma Yisraelniɛ kɔhora kɔɔpɔ ye.

49 Ye baba aliɛma bienzua, anaakyɛ ye baba aliɛma bienzua awa bienzua anaa ye nwoniɛ kaenn kɔhora kɔpɔ ye. Anaakyɛ ye bɔbɔ sɛ sikaa ba ye sa nu a, ɔkɔhora kɔpɔ ye nwo.

50 Odi kyɛ Yisraelniɛ ne, ɔne ɛwɔfoɛ bɔ ɔtɔle sɔ Yisraelniɛ ne, bɛsesẽ befi afoɛ bɔ ɔtɔnene ye nwo mane ye ne maa okodwu Yubilee afoɛ ne. Ye pɔlɛ ne nyɔboɛ kogyina afoɛ ne somaa so: mmerɛ bɔ ne ɔwɔ ye mene sa nu ne, bekobu ye kyɛ ɔte paaniɛ mmerɛ.

51 Sɛ afoɛ bɔ waha ne sone a, ye ti nyɔboɛ bɔ bɛfa bɛtɔle ye ne, odi kyɛ otua ye bue bɔ ɔte piri ɔ ɔfa ɔpɔ ye nwo.

52 Nakoso sɛ afoɛ bɔ waha koraka né Yubilee afoɛ ne aso ne ɔnzone de a, sɔaa yeɛ odi kyɛ ɔsese ye ɔ: ɔ́nea afoɛ bɔ waha ne ná ótua ye pɔlɛ sikaa ne.

53 Nakoso sɛ ɔtɛwura ɛwɔfoɛ ne bo de a, odi kyɛ ɔyɛ afoɛnoa afoɛnoa paaniɛ ma ye mene ne. Na ɛ́mɔnea kyɛ ye mene ne, ɔngɔhyɛ ye so ɔ.

54 Na sɛ bamva sɔ atee he biala so bambɔ ye a, ye de sana Yubilee afoɛ ne anu yeɛ ɔne ye mma mɔ bekonya bɛ fawɔnwodi ɔ.

55 Ofikyɛ Yisraelfoɛ te me ngoaa, bɛte me ngoaa bɔ nyele bɛ mvili Misraim aseɛ so ɔ: Me ole AWURADE ɛmɔ Nyameɛ.

Esahie Bible © Bible Society of Ghana, 2018.

Bible Society of Ghana
Lean sinn:



Sanasan