Lewitikɔso 20 - AHYERƐLƐ KRONGRON

Asoserɛ nwo asohwenɛ

¹ Na AWURADE sele Mose kyɛ,

² “Sá ka kyire Yisraelfoɛ kyɛ: Yisraelniɛ biala anaa ɛwɔfoɛ biala bɔ ɔte Yisraelfoɛ maen nu, bɔ yeɛ ɔkɔfa ɔwa biala kɔbɔ afɔleɛ kɔma bosoen Moleke ne, odi kyɛ beku ye; aseɛ ne aso mmenia bɛ́boro ye nyɔboɛ béhu ye.

³ Me bɔbɔ deinn ngotu me nye ngosie sɔ sona ne aso, na ngɔpɛ ye asue ngofi ye maen nu, ofikyɛ wafa ɔwa wama Moleke; wafa efiɛ waha me nekaa krongron ne, na wagua me dumaa krongron ne anyunu ase.

⁴ Na sɛ ɔfa ɔwa ma Moleke, ná maen ne anu mmenia bu bɛ nye begua so, ná bangu ye a,

⁵ ye de me bɔbɔ ngotu me nye ngosie sɔ sona ne ɔne ye abusuafoɛ so, na ngɔpɛ bɛ asue ngofi bɛ maen nu; sɔ sona ne ɔne mmenia amukoraa bɔ bali ye si bɛ ne ye baaso Moleke ne.

⁶ “Na ebiala bɔ ɔkɔhɔ nzamangɔmhyɛlɛfoɛ ne ahɔmeɛ so, ná okoli bɛ si ne, ngotu me nye ngosie sɔ sona ne aso, na ngɔpɛ ye asue ngofi ye maen nu.

⁷ Yiti ɛ́mɔte ɛmɔ nwo, ná ɛ́mɔyɛ krongron, ofikyɛ me ole AWURADE ɛmɔ Nyameɛ.

⁸ Ɛ́mɔli m’ahyɛdeɛ so, ná ɛ́mɔfa bɛ́bɔ bɛ bra: Me ole AWURADE, Me yeɛ mete ɛmɔ nwo ɔ.

⁹ Ebiala bɔ ɔkɔnoma ɔse anaa oni ne, odi kyɛ beku ye, ɔnate kyɛ wanoma ɔse anaa oni, na ye wue kɔbɔ ye bɔbɔ ye ti so.

¹⁰ “Sɛ bienzua bie ne obiɛngo aye bɛbɔ adwaman a, odi kyɛ beku bienzua ne ɔne brasua bɔ babɔ adwaman ne bɛ munyɔ.

¹¹ Bienzua bɔ ɔne ɔse aye bɛkɔla ne, wagua ɔse nyunu ase; odi kyɛ beku bɛ munyɔ: baa ne ɔne braa ne, na bɛ wue kɔbɔ bɛ bɔbɔ bɛ ti so.

¹² Sɛ bienzua bie ne ɔwa bienzua aye bɛda a, odi kyɛ beku bɛ munyɔ: baba ne ɔne sia ne; na bɛ wue kɔbɔ bɛ bɔbɔ bɛ ti so.

¹³ Sɛ bienzua bie ne obiɛngo bienzua bɛda kyɛbɔ ɔne brasua bɛda a, bɛ munyɔ babɔ musue. Odi kyɛ beku bɛ ɔ, na bɛ wue kɔbɔ bɛ bɔbɔ bɛ ti so.

¹⁴ Sɛ bienzua gya braa ná osa gya braa ne maame boka so a, wabɔ musue; odi kyɛ bɛyera bɛ: biaa ne ɔne mmrasua nemɔ, amaa musue anga ɛmɔ.

¹⁵ Sɛ bienzua bie ne kaka bɛda a, odi kyɛ beku sɔ sona ne, na kaka ne koso odi kyɛ ɛmɔku ye.

¹⁶ Sɛ brasua bie fa ye nwo ma kaka bie maa ɔne ye bɛda a, ku brasua ne ɔne kaka ne; odi kyɛ beku bɛ ɔ, na bɛ wue kɔbɔ bɛ ti so.

¹⁷ “Sɛ bienzua bie fa oliɛma brasua bɔ ɔte ɔse awa anaa oni awa, ná ɔne ye bɛda fa ye yɛ ɔye, ma brasua ne wora fa ye yɛ ohu a, ɔte animguaseɛ; odi kyɛ bɛpɛ bɛ asue befi bɛ maen nu, bɔ bɛ maen ne anu ama nye tua bɛ ɔ. Ɔne oliɛma bala, odi kyɛ bɛtwe ye so.

¹⁸ Sɛ bienzua bie ne brasua bɔ wabu ye sa bɛda a, wabukye nekaa bɔ brasua ne mogya fi ba ɔ so, yeɛ brasua ne koso wabukye nekaa bɔ ye bɔbɔ ye mogya fi ba ɔ so; odi kyɛ bɛpɛ bɛ munyɔ asue befi maen ne anu.

¹⁹ Nnɛne eni aliɛma brasua anaa wɔ sewaa bɛda; sɛ ɛyɔ sɔ a, wɔ bɔbɔ wɔ nwoniɛ yeɛ ɛne ye ala ɔ; odi kyɛ bɛtwe bɛ so.

²⁰ Sɛ ebie ne ye wɔfa aye bɛda a, wagua ye wɔfa nyunu ase, na ɔne brasua ne bɛ musue kɔbɔ bɛ ti so. Bɛ mma amukoraati kofi bɛ sa koraka né bawu.

²¹ Sɛ bienzua bie ne oliɛma aye bɛda a, wabɔ musue; wagua oliɛma ne nyunu ase na ɔne braa ne, bɛ mma amukoraati kofi bɛ sa koraka né bawu.

²² “Ɛ́mɔli m’ahyɛdeɛ amukoraa ne me nhyehyɛleɛ amukoraa so, ná ɛ́mɔfa bɛ́bɔ bɛ bra, ná mamma aseɛ bɔ méfa ɛmɔ mékɔ so ne wambo ɛmɔ.

²³ Maen maen bɔ mefoa bɛ mefi ɛmɔ nyunu ne, bɛ yɔleɛ nemɔ, nnɛma ɛmɔyɔ bie. Ɔnate kyɛ bɛyɔle sɔ nningyein nemɔ ati, mvɛle bɛ so yaa paa.

²⁴ Nakoso mahã mahyire ɛmɔ kyɛ, Ɛmɔ yeɛ ɛmɔkɔfa b’aseɛ ne ɔ, na ngɔfa aseɛ bɔ nyɔfonesue ne woɛ tengyɛ wɔ so ɔ ngɔma ɛmɔ maa ɔkɔyɛ ɛmɔ deɛ. Me ole AWURADE ɛmɔ Nyameɛ, na maye ɛmɔ masie ahameɛ mafi maen maen ngaa nemɔ anu.

²⁵ Yiti ɛ́mɔma nzonzoleɛ ɔ́la ngaka bɔ bɛ nwo te, ɔne bɛ bɔ bɛ nwo nde ɔ afia, yeɛ nnomaa bɔ bɛ nwo te ɔne bɛ bɔ bɛ nwo ɔnde ɔ afia. Kaka anaa anomaa anaa nikyee biala bɔ ɔtwe ye nwo ase, bɔ yeɛ maye masie berɛ kyɛ bɛ nwo nde mma ɛmɔ ne, nnɛma ɛmɔfa bɛ begua ɛmɔ nwo fiɛ.

²⁶ Ɛ́mɔyɛ krongron bɛ́ma me, ofikyɛ me AWURADE, nde krongron, na maye ɛmɔ masie ahameɛ mafi maen ngaa nemɔ anu mayɛ me deɛ.

²⁷ “Bienzua anaa brasua bɔ ɔte nzamangɔmhyɛlɛniɛ anaa kɔmeɛ ne, odi kyɛ beku ye ɔ; bɛ́boro bɛ nyɔboɛ béhu bɛ, na bɛ wue kɔbɔ bɛ ti so.”