Lewitikɔso 2 - AHYERƐLƐ KRONGRON

Aburoo afɔleɛ

¹ “Sɛ ebie fa aburoo afɔleɛ brɛ AWURADE a, odi kyɛ ye afɔleɛ ne yɛ esam paa; óhwie ngoo ógua so, ɔ́fa ɛyɛɛ gua so,

² ná ɔ́fa brɛ Aarɔn mma mmienzua nemɔ bɔ bɛ yeɛ bɛte asɔfo ne. Odi kyɛ ɔsa esam paa bɔ ngoo ne ɛyɛɛ fra ye ne ye sa bum ko, ná ɔsɔfo ne ɔ́yera kãa bɔ wasa ne wɔ afɔleɛ bokyea ne aso; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

³ Aburoo afɔleɛ ne ngaa ne kɔyɛ Aarɔn ne ye mma mmienzua mɔ deɛ; afɔleɛ bɔ bɛbɔ ye see so bɛma AWURADE ne, ɛhe yeɛ ɔte krongron paa ɔ.

⁴ “Sɛ w’afɔleɛ ne te aburoo afɔleɛ bɔ bato ye foonoo nu a, odi kyɛ ɛfa esam paa: taterɛ kabrɛdi bɔ bafa ngoo bafete ɔ, anaakyɛ apiti kabrɛdi bɔ bafa ngoo bafa ye nwo ɔ.

⁵ Na sɛ w’afɔleɛ ne te aburoo afɔleɛ bɔ bahye ye kyɛnzee nu a, odi kyɛ esam kabrɛdi paa bɔ bafa ngoo bafra ye, yeɛ bɛfa bɛkye ɔ;

⁶ Odi kyɛ ebubu nu mmaa mmaa ná éhwie ngoo gua so; ɔte aburoo afɔleɛ.

⁷ Na sɛ w’afɔleɛ ne te aburoo afɔleɛ bɔ bato ye turonzemaa nu a, odi kyɛ esam paa bɔ bafa ngoo bafra ye, yeɛ bɛfa bɛyɔ ɔ.

⁸ Fa aburoo afɔleɛ bɔ bafa sɔ nningyein nemɔ bayɔ brɛ AWURADE; na sɛ ɛfa ma ɔsɔfo ne a, ye koso ɔkɔfa kɔhɔ afɔleɛ bokyea ne aso.

⁹ Odi kyɛ ɔsɔfo ne sa aburoo afɔleɛ ne bie fa yɛ ngayeɛ nikye, ná ɔyera ye wɔ afɔleɛ bokyea ne aso; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

¹⁰ Aburoo afɔleɛ ne ngaa ne, ɔte Aarɔn ne ye mma mmienzua mɔ deɛ; afɔleɛ bɔ bɛbɔ ye see so bɛma AWURADE ne, ɛhe yeɛ ɔte krongron paa ɔ.

¹¹ “Aburoo afɔleɛ biala bɔ ɛmɔbɔ bɛma AWURADE ne, onni kyɛ ɛmɔfa mɔle harewaa bɛbɔ; ofikyɛ onni kyɛ ɛmɔfa mɔle harewaa anaa woɛ bɛbɔ see so afɔleɛ bɛma AWURADE.

¹² Ɛ́mɔfa sɔ nningyein ye bɛ́brɛ AWURADE kyɛ fieso nningyein bɔ oli moa ɔ, nakoso nnɛma ɛmɔyera bɛ wɔ afɔleɛ bokyea ne aso kyɛ afɔleɛ bɔ ɔbo fona ɔ.

¹³ Ɛ́mɔwura ɛmɔ aburoo afɔleɛ amukoraati ngyee; ɛmɔ ne ɛmɔ AWURADE apam ngyee ne, nnɛmɔma ɔpa ɛmɔ aburoo afɔleɛ ne anu; ɛ́mɔfa ngyee bɛboka ɛmɔ afɔleɛ amukoraa so.

¹⁴ “Sɛ ɛmɔfa aburoo bɔ bekoli moa bekobu ne bie bɛbɔ afɔleɛ bɛma AWURADE a, odi kyɛ ɛmɔfa aburoo monɛ bɔ bekoli moa bekobu ne bie, bɔ bahye ye see so ná basi ɔ.

¹⁵ Ɛ́mɔfa ngoo bégua so, ná ɛ́mɔfa ɛyɛɛ koso bégua so; ɔte aburoo afɔleɛ.

¹⁶ Ɔsɔfo ne kɔyera aburoo bɔ basi, ná bafa ngoo ne ɛyɛɛ ne amukoraa bafra ye ne bie kyɛ ngayeɛ nikye; ɔte afɔleɛ bɔ bɛbɔ ye see so bɛma AWURADE ɔ.