Lewitikɔso 19 - AHYERƐLƐ KRONGRON

Krongronyɛlɛ ne ndɛenbualɛ turoloo

¹ AWURADE sele Mose kyɛ,

² “Ka kyire Yisrael maen ne amukoraati kyɛ, Ɛ́mɔyɛ krongron ofikyɛ me AWURADE, ɛmɔ Nyameɛ, nde krongron.

³ Odi kyɛ ebiala bu oni ne ɔse, ná ɛ́mɔli m’afofingyẽa nemɔ aso. Me ole AWURADE ɛmɔ Nyameɛ.

⁴ Nnɛma ɛmɔdi mmosoen si, yeɛ nnɛma ɛmɔhuro nikyee biala bɛfa bɛyɔ amoen biala bɛfa: Me ole AWURADE ɛmɔ Nyameɛ.

⁵ “Sɛ ɛmɔbɔ asomdwee afɔleɛ bɛma AWURADE a, odi kyɛ ɛmɔbɔ ye kyɛbɔ ɔkɔsɔ AWURADE nye ɔ.

⁶ Odi kyɛ ɛmɔdi ye kyẽa bɔ ɛmɔkɔbɔ ye ne ala, anaakyɛ ye alehyeleɛ ne ala; na bɔ yeɛ ɔkɔha berɛ maa okodwu ɛlɛsa ne aso nen, odi kyɛ bɛfa see bɛyera ye.

⁷ Na sɛ bedi ye ɛlɛsa ne aso a, ɔte musue; ɔngɔsɔ Nyameɛ nye.

⁸ Ebiala bɔ okoli bie ne, ye musue kɔbɔ ye ti so, ofikyɛ wafa efiɛ waha bɔ ɔte krongron ma AWURADE; na sɔ sona ne odi kyɛ bɛpɛ ye asue befi maen ne anu.

⁹ “Sɛ ɛmɔfa ɛmɔ fieso aleɛ a, nnɛma ɛmɔbu maa okodwu eboo ne noa, yeɛ nnɛsesa ye bo nwɔngyerɛmma ne.

¹⁰ Wɔ bobe boo koso, nnɛporo so mmaa ne amukoraa, yeɛ bɔ waporo wagua ye bo ne koso, nnɛsesa. Yakyi ye berɛ ma ehiafoɛ ne ɛwɔfoɛ mɔ. Me ole AWURADE ɛmɔ Nyameɛ.

¹¹ “Nnɛma ɛmɔwua, yeɛ nnɛma ɛmɔlakalaka bɛ biɛngo; nnɛma ɛmɔpepɛ anoanu bekyirekyire bɛ nwo.

¹² “Nnɛma ɛmɔfa me dumaa bɛta edwirɛ bɔ nahorɛ ɔnne nu ɔ nwo ndaen, ná angua wɔ Nyameɛ dumaa nwo fiɛ: Me ole AWURADE.

¹³ “Nnɛdi ebiɛngo ndurum, nnɛwua ye, yeɛ nnɛfa paaniɛ akatuaa wura wɔ nwo ma aleɛ kye so.

¹⁴ Nnɛnoma asotiniwaaniɛ, yeɛ nnɛfa nikyee to anyesiniwaaniɛ atee nu maa ɔfofo so, ná mmom suro wɔ Nyameɛ: Me ole AWURADE.

¹⁵ “Nnɛma ɛmɔbua ndɛengyea. Nnɛkã kyɛ ebie te ehianiɛ yiti ebua ye be, yeɛ nnɛkã kyɛ ebie te sona titire yiti ɛkɔ so tu ye dwirɛ hyɛ kyẽa, na mmom bua ebiɛngo ndɛen turoloo.

¹⁶ Nnɛkyinikyini kekã mmenia nwo dwirɛ tɛɛ, nnɛdi adanzewia ma ebiɛngo nya ewue, ná enya ye wue si mvasoɛ: Me ole AWURADE.

¹⁷ Nnɛdwene ebiɛngo nwo adwene tɛɛ, na mmom fa edwirɛ tɛɛ bɔ wayɔ ne to ye nyunu, ná anza ye nwo anyɔ bɔne.

¹⁸ Nnɛtɔ wɔ mmenia ne anu biala so wereɛ, yeɛ nnɛfa ebiala nwo dwirɛ sie wɔ ti anu, na mmom kuro ebiɛngo dwirɛ kyɛ wɔ bɔbɔ wɔ nwo: me ole AWURADE.

¹⁹ “Ɛ́mɔli m’ahyɛdeɛ so. Wɔ nyɛmmoa mɔ, sɛ bɛte ahoroɔ ahoroɔ a, nnɛmaa bedi mvrafra bɛfo bɛ nwo; nnɛdua mmakaammaa ahoroɔ nyɔ wɔ wɔ fieso, yeɛ nnɛwura ataadeɛ bɔ bafa ɛtena ahoroɔ nyɔ batoto ye nzaasaa ɔ.

²⁰ “Sɛ bienzua bie ne brasua bie bɔ ɔte afaneɛ bɔ bafa ye babɔ bienzua bie asiwa bɛda a, ɔwɔ nu kyɛ bienzua bɔ bafa ye babɔ ye asiwa ne onnya ottuale brasua ne ti kerɛ ɔffa ɔppɔle ye, yeɛ brasua ne sa onnya ɔhhane ye fawɔnwodi de, nakoso odi kyɛ bɛtwe bɛ so. Onni kyɛ beku bɛ ɔ, ofikyɛ né afaneɛ ne olle ye nwo.

²¹ Odi kyɛ bienzua ne fa ye foɛlilɛ afɔleɛ brɛ AWURADE wɔ ɛtena sua atenaleɛ anoa nu berɛ; odi kyɛ ɔfa boaen nyii yeɛ ɔbɔ foɛlilɛ afɔleɛ ne ɔ.

²² Odi kyɛ ɔsɔfo ne fa foɛlilɛ afɔleɛ boaen nyii ne pata ma bienzua ne wɔ AWURADE nyunu, ɔnate bɔne bɔ wayɔ ne ati; na AWURADE kɔfa bɔne bɔ wayɔ ne kɔhyɛ ye.

²³ “Sɛ ɛmɔbadwu aseɛ ne aso, ná ɛmɔdua fieso mmakaammaa ahoroɔ a, ɛ́mɔbu bɛ mma bɔ bekosu ne kyɛ akyiwadeɛ; ɛ́mɔma ɔ́yɛ ɛmɔ akyiwadeɛ afoɛ nza, na onni kyɛ ɛmɔdi ɔ.

²⁴ Ye afoɛ bɔ ɔtɔ so nna ne aso, mmaa bɔ bekosu ne amukoraati kɔyɛ krongron, bɔ ɔte ayɛyelɛ afɔleɛ ma AWURADE ɔ.

²⁵ Nakoso ye afoɛ nnu ne aso de, ɛ́mɔli bɛ mma bɔ bekosu ne bie, amaa ɔnate so basu pee bama ɛmɔ: Me ole AWURADE ɛmɔ Nyameɛ.

²⁶ “Nnɛma ɛmɔdi naen bɔ ye mogya wɔ ye nu ɔ. Nnɛma ɛmɔkɔ abisa, yeɛ nnɛma ɛmɔyɛ bayie.

²⁷ Nnɛma ɛmɔye ɛmɔ ti maa ɔka ɛmɔ ti angyɛnu nwiaa, yeɛ nnɛpiapia wɔ kanza nwiaa yɛ ye basaa.

²⁸ Sɛ ebie wu a, nnɛma ɛmɔfa nikyee bɛtete ɛmɔ nwonaen. Nnɛma ɛmɔdi ngyerɛleɛ begua ɛmɔ nwonaen nu.

²⁹ “Nnɛma ɛwa brasua bɔ gyandera ma ye nwo gua fiɛ, amaa aseɛ ne angakyi gyanderafoɛ aseɛ, ná nzɛmmɔne anzone wɔ so.

³⁰ Ɛ́mɔli m’afofingyẽa so, ná ɛ́mɔli me nekaa krongron ne ni: Me ole AWURADE.

³¹ “Nnɛma ɛmɔkɔ nzamangɔmhyɛlɛfoɛ ne ahɔmeɛ mɔ berɛ bɛkɔpena mmokalɛ befi bɛ berɛ maa begua ɛmɔ nwo fiɛ: Me ole AWURADE ɛmɔ Nyameɛ.

³² “Fa ebulɛ ma panyi, di nworowaa ni, ná suro wɔ Nyameɛ: Me ole AWURADE.

³³ “Sɛ ɛwɔfoɛ bie batena ɛmɔ nu wɔ ɛmɔ aseɛ ne aso a, nnɛma ɛmɔhyɛ ye so.

³⁴ Ɛwɔfoɛ bɔ waatena ɛmɔ nu ne, ɛ́mɔfa ye kyɛ ɔte kuromani; ná kuro ɛwɔfoɛ ne dwirɛ kyɛ wɔ bɔbɔ wɔ nwo, ofikyɛ né ɛmɔte ɛwɔfoɛ wɔ Misraim aseɛ so: Me ole AWURADE wɔ Nyameɛ.

³⁵ “Nnɛma ɛmɔdi aminɛ wɔ nikyee susulɛ nwo, ɔfa ye tendenn, nu nonɛ, ɔne ye somaa nwo.

³⁶ Ɛmɔ tonyi, ɛmɔ asusudeɛ nyɔboɛ, graa ɔne galɔn bɔ ɛmɔfa besusu nikyee ne, odi kyɛ ɔyɛ turoloo: Me ole AWURADE ɛmɔ Nyameɛ bɔ nyele ɛmɔ mvili Misraim aseɛ so mmale ne.

³⁷ Ɛ́mɔli m’ahyɛdeɛ amukoraa ne me nhyehyɛleɛ amukoraa so, ná ɛ́mɔfa bɛ́bɔ bɛ bra: Me ole AWURADE.