Lewitikɔso 13 - AHYERƐLƐ KRONGRON

Anwoɔnaen anwonyerɛ nwo mmeraa

¹ AWURADE sele Mose ne Aarɔn kyɛ,

² “Sɛ asee gua ebie anwo, anaa edoee yɛ ye, anaa yira bobɔ ye ná ɔkakyi kwata wɔ ye nwo a, odi kyɛ bɛfa ye bɛbrɛ ɔsɔfo Aarɔn anaa Aarɔn mma mmienzua bɔ bɛte asɔfo nemɔ anu ko.

³ Odi kyɛ ɔsɔfo ne neanea nekaa bɔ anwonyerɛ ne agua ye ne; na sɛ berɛ nwiaa ne ayɛ hoyaa, ná berɛ ne adidi ahɔ nu atra ye nwonaen ngaa ne a, ye de né ɔte kwata anwonyerɛ; sɛ ɔsɔfo ne neanea ye nwo yie a, odi kyɛ ɔfa to dwaa kyɛ sɔ sona ne nwo nde.

⁴ Na sɛ ye nwonaen ne berɛ te hoyaa, nakoso wannidi wangɔ nu wandra ye nwonaen ngaa ne, ná berɛ nwiaa ne wanyɛ hoyaa a, ye de odi kyɛ ɔsɔfo ne ma yarefoɛ ne ngome ɔte ye nwo kɔtena nekaa bie ɛlɛsoo.

⁵ Ye ɛlɛsoo ne aso, odi kyɛ ɔsɔfo ne neanea ye nwo, ná sɛ onwu kyɛ anwonyerɛ ne ɔtɛte kyɛbɔ ɔte ne ala, ná wannidi wangɔ ye wereɛ nu a, ye de odi kyɛ ɔsɔfo ne ma ye ngome ɔte ye nwo kɔtena nekaa bie ɛlɛsoo bieku.

⁶ Ɛlɛsoo ne aso, odi kyɛ ɔsɔfo ne osa neanea ye nwo, ná sɛ anwonyerɛ ne noa abrɛ ase bɔ wannidi wangɔ ye wereɛ nu a, ye de odi kyɛ ɔsɔfo ne fa to dwaa kyɛ sɔ sona ne ye nwo te; edoee mbaen ɔ; odi kyɛ sɔ sona ne, ɔpo ye nwo nningyein, ná ye nwo ɔte.

⁷ Nakoso, sɛ ɔfa ye nwo kokyire ɔsɔfo maa ɔsɔfo ne fa to dwaa kyɛ ye nwo afi, ná ye si ye sɛ edoee ne sa didi kɔ ye wereɛ nu a, ye de odi kyɛ osa ba ɔsɔfo ne berɛ.

⁸ Odi kyɛ ɔsɔfo ne neanea ye nwo, na sɛ anwonyerɛ ne adidi ahɔ ye wereɛ nu a, ye de odi kyɛ ɔsɔfo ne fa to dwaa kyɛ ye nwo nde; kwata anwonyerɛ ɔ.

⁹ “Sɛ kwata anwonyerɛ yɛ ebie a, odi kyɛ bɛfa ye bɛbrɛ ɔsɔfo ne.

¹⁰ Odi kyɛ ɔsɔfo ne neanea yarefoɛ ne anwo, na sɛ mbɔmbɔ fufue bie anwu ye maa ye nwiaa ne ayɛ hoyaa, ná naen monɛ bie aworɔ tua mbɔmbɔ ne anu a,

¹¹ ye de né kwata koangɔ yeɛ wayɛ ye nwonaen ne. Odi kyɛ ɔsɔfo ne fa to dwaa kyɛ sɔ sona ne ye nwo nde. Ɔnzɛ kyɛ ɔma ye ngome ɔte ye nwo kɔtena nekaa bie, ofikyɛ sɔ sona ne ye nwo nde.

¹² Na sɛ kwata anwonyerɛ ne ye ye nwo ali wɔ ye wereɛ nu, maa kwata anwonyerɛ ne to pete yarefoɛ ne nwo fi ye ti so kɔpem ye gya bo, bɔ ɔsɔfo ne nye tua a,

¹³ ye de odi kyɛ ɔsɔfo ne neanea ye nwo, ná sɛ anwonyerɛ ne ayɛ sona ne nwo amukoraa a, odi kyɛ ɔsɔfo ne fa to dwaa kyɛ ye nwo te; ɔnate kyɛ ye nwo amu aturu hyɛnn, ná ye nwo te.

¹⁴ Nakoso sɛ naen monɛ worɔ tua ye nwo a, ye de ye nwo nde.

¹⁵ Odi kyɛ ɔsɔfo ne nea naen monɛ ne, ná ɔfa to dwaa kyɛ ye nwo nde. Naen monɛ ne nwo nde, ofikyɛ ɔte kwata anwonyerɛ.

¹⁶ Nakoso sɛ naen monɛ ne sá kakyi yɛ fufue a, odi kyɛ sɔ sona ne ba ɔsɔfo ne berɛ.

¹⁷ Odi kyɛ ɔsɔfo ne neanea ye nwo, na sɛ anwonyerɛ ne ayɛ hoyaa a, ye de odi kyɛ ɔsɔfo ne fa to dwaa kyɛ yarefoɛ ne, ye nwo te; ye nwo te.

¹⁸ “Sɛ mbɔmbɔ kenamvoen wɔ ebie anwo,

¹⁹ ná sɛ nikyee fufue bie anaa nikyee kɔkorɛ hoyaa bie nwu nu a, ye de odi kyɛ ɔfa kokyire ɔsɔfo ne.

²⁰ Odi kyɛ ɔsɔfo ne neanea ye nwo, na sɛ onwu kyɛ wadidi wahɔ ye wereɛ nu ná ye nwiaa ayɛ hoyaa a, ye de odi kyɛ ɔsɔfo ne fa to dwaa kyɛ ye nwo nde; kwata anwonyerɛ ɛne, wala ali wɔ mbɔmbɔ ne anu.

²¹ Nakoso sɛ ɔsɔfo ne nea, ná sɛ so nwiaa ne ɔyyɛle hoyaa, ná wannidi wangɔ ye wereɛ ne anu, ná mmom sɛ anwonyerɛ ne aberɛ ase a, ye de odi kyɛ ɔsɔfo ne ɔma ye ngome ɔte ye nwo kɔtena nekaa bie ɛlɛsoo.

²² Na sɛ wadidi wɔ ye wereɛ nu a, ye de odi kyɛ ɔsɔfo ne fa to dwaa kyɛ sona ne, ye nwo nde; anwonyerɛ aha ye.

²³ Nakoso sɛ anwonyerɛ ne wɔ neka horɛ bɔ wandrɛ de a, ɔte mbɔmbɔ kenamvoen; odi kyɛ ɔsɔfo ne fa to dwaa kyɛ ye nwo te.

²⁴ “Sɛ nikyee hyerɛ bie yera ebie ná ye berɛ wereɛ ne bɔ mvumvunya yɛ kɔkorɛ hoyaa anaa hyɛnn a,

²⁵ odi kyɛ ɔsɔfo ne ɔnea, na sɛ berɛ nwiaa ne ayɛ hoyaa, ná wadidi wahɔ ye wereɛ nu a, ye de né kwata anwonyerɛ ɔ; wala ali wɔ mvumvunya ne anu. Odi kyɛ ɔsɔfo ne fa to dwaa kyɛ sɔ sona ne ye nwo nde; ɔte kwata anwonyerɛ.

²⁶ Nakoso sɛ ɔsɔfo ne nea, ná sɛ berɛ nwiaa ne wanyɛ hoyaa ná wannidi wangɔ ye wereɛ nu, ná mmom wabrɛ ase a, odi kyɛ ɔsɔfo ne ma ye ngome ɔte ye nwo kɔtena nekaa bie ɛlɛsoo.

²⁷ Ɛlɛsoo ne aso, odi kyɛ ɔsɔfo ne neanea ye nwo. Sɛ anwonyerɛ ne adidi ahɔ ye wereɛ nu a, ye de odi kyɛ ɔsɔfo ne fa to dwaa kyɛ sɔ sona ne ye nwo nde; ɔte kwata anwonyerɛ.

²⁸ Na sɛ anwonyerɛ ne wɔ nekaa horɛ ná wandrɛ wɔ ye wereɛ nu, ná mmom wabrɛ ase a, ye de nikyee hyerɛ yeɛ wama berɛ abɔ mvumvunya ɔ; odi kyɛ ɔsɔfo ne ɔfa to dwaa kyɛ sona ne ye nwo te; ofikyɛ ɔte see kenamvoen.

²⁹ “Sɛ bienzua anaa brasua bie nya anwonyerɛ wɔ ye ti so anaa ye kanza nu a,

³⁰ odi kyɛ ɔsɔfo ne neanea anwonyerɛ ne. Sɛ wadidi wahɔ ye wereɛ nu, ná sɛ berɛ nwiaa ne ayɛ hoyaa ndrɛko ndrɛko a, ye de odi kyɛ ɔsɔfo ne fa to dwaa kyɛ sɔ sona ye nwo nde; ɔte anwonyerɛ bɔ ɔyɛ kyee ɔ; ɔte kwata anwonyerɛ bɔ wayɛ ye ti so anaa ye kanza ɔ.

³¹ Na sɛ ɔsɔfo ne nea anwonyerɛ kyeekyee ne, ná sɛ wannidi wangɔ ye wereɛ nu, ná sɛ nwiaa tunn biala offuli nu a, ye de odi kyɛ ɔsɔfo ne ɔma sɔ sona bɔ anwonyerɛ kyeekyee ayɛ ye ne ngome ɔte ye nwo kɔtena nekaa bie ɛlɛsoo.

³² Ye ɛlɛsoo ne aso, odi kyɛ ɔsɔfo ne nea anwonyerɛ kyeekyee ne; ná sɛ anwonyerɛ ne wandrɛ, ná sɛ nwiaa hoyaa ɔnne nu, ná sɛ anwonyerɛ kyeekyee ne wannidi wangɔ ye wereɛ nu a,

³³ ye de odi kyɛ ɔpoa ye nwo nwiaa, nakoso nnɛma ɔpoa anwonyerɛ kyeekyee ne anu; odi kyɛ ɔsɔfo ne ɔma sona bɔ anwonyerɛ kyeekyee ayɛ ye ne ngome ɔte ye nwo kɔtena nekaa bie ɛlɛsoo bieku.

³⁴ Ye ɛlɛsoo ne aso, odi kyɛ ɔsɔfo ɔneanea anwonyerɛ kyeekyee ne, ná sɛ anwonyerɛ ne wandrɛ wangɔ ye wereɛ nu ná wannidi wangɔ ye wereɛ nu a, ye de odi kyɛ ɔsɔfo ne fa to dwaa kyɛ sɔ sona ne ye nwo te. Odi kyɛ sɔ sona ne po ye nwo nningyein, ná ye nwo kɔte.

³⁵ Nakoso sɛ ɔsɔfo ne fa to dwaa kyɛ ye nwo te, ná ye si ye, anwonyerɛ ne trɛ wɔ ye wereɛ nu a,

³⁶ ye de odi kyɛ ɔsɔfo ne ɔneanea ye nwo, ná sɛ anwonyerɛ ne atrɛ wɔ ye wereɛ nu a, ye de ye nwo nhia kyɛ ɔsɔfo ne kɔpena nwiaa hoyaa ne ɔ; ye nwo nde.

³⁷ Na mmom sɛ ye adwene yɛ ye kyɛ anwonyerɛ kyeekyee ne ɔtɛte kyɛbɔ ɔte ɔ, ná nwiaa tunn afu wɔ nu a, ye de ne anwonyerɛ kyeekyee ne ahɔ. Ye nwo te; odi kyɛ ɔsɔfo ne fa to dwaa kyɛ ye nwo te.

³⁸ “Sɛ ndotɔndotɔ fufue bie gua bienzua anaa brasua bie nwo a,

³⁹ odi kyɛ ɔsɔfo ne ɔneanea ye nwo, ná sɛ ndotɔndotɔ bɔ wagua ye ne te fufue hoyaa a, ye de asee yeɛ wagua ye nwo ɔ; ye nwo te.

⁴⁰ “Sɛ ebie ti so tutu a, ye ti so yeɛ wapa ɔ nakoso ye nwo te.

⁴¹ Na sɛ ebie ye nwoma so pa ná ye ti angyɛnu tutu a, ye de ye nwoma so yeɛ wapa ɔ, nakoso ye nwo te.

⁴² Nakoso sɛ anwonyerɛ kɔkorɛ hoyaa bie wɔ ye ti bɔ wapa ne aso, anaa ye nwoma bɔ wapa ne aso a, ye de né kwata yeɛ wayɛ ye ti bɔ wapa ne aso anaa ye nwoma bɔ wapa ne aso ɔ.

⁴³ Odi kyɛ ɔsɔfo ne neanea yarefoɛ ne anwo, ná sɛ nikyee bɔ wagua ye ti afia anaa ye nwoma bɔ wapa ne aso ne, ɔte kɔkorɛ hoyaa, bɔ osoma kwata anwonyerɛ wɔ ye wereɛ nu a,

⁴⁴ ye de né ɔte kwataniɛ. Ye nwo nde, na odi kyɛ ɔsɔfo ne fa to dwaa kyɛ ye nwo nde; ye anwonyerɛ ne wɔ ye ti so.

⁴⁵ “Sona bɔ kwata anwonyerɛ kɔyɛ ye ne, odi kyɛ owura ndaadeɛ teterewaa ná ɔma ye ti nwiaa gua so basaa. Odi kyɛ ɔkata ye noa tuin anwuro ne aso ná ɔtea nu kyɛ, ‘Me nwo nde o, me nwo nde o!

⁴⁶ Na mmerɛ bɔ anwonyerɛ ne tɛ wɔ ye so ne de, ye de ye nwo nde. Ye nwo nde na ye ngome ɔkɔte ye nwo kɔɔtena asikyeleɛ ne asi.

⁴⁷ “Sɛ kwata anwonyerɛ kekã ataadeɛ nu a, kyɛ kundu ahɔ oo, anaa nwera ahɔ oo,

⁴⁸ kundu anaa nikyee biala bɔ bafa gyese banwo nu oo, anaa bɔ bafa boaen nwiaa banwo nu oo, anaa nwomaa, anaa ataadeɛ biala bɔ bafa nwomaa bapa nu oo,

⁴⁹ sɛ ngekalewa ne nye te nyaa monɛ anaa kɔkorɛ wɔ ataadeɛ ne anu a, kyɛ kundu anaa nikyee biala bɔ bafa gyese banwo ɔ, anaa nwomaa, anaa nikyee biala bɔ bafa nwomaa bapa hɔ oo, ye de kwata anwonyerɛ ɔ, na odi kyɛ bɛfa bekyire ɔsɔfo ne.

⁵⁰ Odi kyɛ ɔsɔfo ne neanea ngekalewa ne, na odi kyɛ ɔmaa bɛfa ataadeɛ ne ngome begua nekaa bie ɛlɛsoo;

⁵¹ Ye ɛlɛsoo ne aso, odi kyɛ ɔsɔfo ne nea ngekalewa ne. Sɛ ngekalewa ne atrɛ wɔ ataadeɛ ne anu a, kyɛ kundu anaa nikyee biala bɔ bafa gyese banwo ɔ, anaa nwomaa ne anu a, ye de né ɔmva ye nwo nikyee bɔ bɛfa nwomaa ne bɛyɔ ɔ, ngekalewa ne te kwata anwonyerɛ bɔ ɔtrɛ ɔ; ataadeɛ ne nwo nde.

⁵² Odi kyɛ ɔsɔfo ne yera ataadeɛ ne, kyɛ anwonyerɛ ne wɔ kundu nu oo, anaa nikyee biala bɔ bafa gyese banwo ɔ nu oo, anaa nwera nu oo, anaa nikyee biala bɔ bafa nwomaa bapa ɔ nu oo, ofikyɛ ɔte kwata anwonyerɛ bɔ ɔtrɛ ɔ; odi kyɛ bɛfa see bɛyera ye ɔ.

⁵³ “Nakoso sɛ ɔsɔfo ne nea ngekalewa ne, ná sɛ ngekalewa ne wandrɛ wɔ ataadeɛ ne anu, kyɛ kundu anaa nikyee biala bɔ bafa gyese banwo ɔ, anaa nikyee biala bɔ bafa nwomaa bapa ɔ nu a,

⁵⁴ ye de odi kyɛ ɔsɔfo ne ɔhyɛ maa bɛpo nikyee bɔ ngekalewa wɔ nu ne, ná afei ɔ́fa nikyee ne angome ógua nekaa bie ɛlɛsoo bieku.

⁵⁵ Sɛ bɛpo nikyee bɔ ngekalewa wɔ nu ne beyie a, odi kyɛ ɔsɔfo ne nea nikyee ne. Na nekaa bɔ ngekalewa ne wɔ ne, sɛ berɛ anwosue ne tɛ te kyɛ bɔ ɔte hɔ a, ye de sɛ anwonyerɛ ne wandrɛ po a, ye nwo nde. Nekaa bɔ kwata ne ayɔ ne, kyɛ ɔwɔ ye nyunu oo, anaa ye si oo, odi kyɛ ɛfa see yera ataadeɛ ne.

⁵⁶ Nakoso sɛ bɛpo ataadeɛ ne beyie, ná ɔsɔfo ne nea ataadeɛ ne, ná anwonyerɛ ne abrɛ ase a, ye de odi kyɛ ɔte berɛ ne fi ataadeɛ ne anu, kyɛ kundu ahɔ oo anaa nikyee biala bɔ bafa gyese banwo ɔ ahɔ oo, anaa nwomaa ahɔ oo.

⁵⁷ Nakoso sɛ ngekalewa ne sa ba ataadeɛ ne anu de a, kyɛ kundu anaa nikyee biala bɔ bafa gyese banwo ɔ, anaa nikyee biala bɔ bafa nwomaa bapa ɔ, ye de né anwonyerɛ ne ɔtrɛ; odi kyɛ ɛfa see yera nikyee bɔ ngekalewa ne wɔ nu ne.

⁵⁸ Nakoso sɛ bɛpo ataadeɛ ne, kyɛ kundu anaa nikyee biala bɔ bafa gyese banwo ɔ, anaa nikyee biala bɔ bafa nwomaa bapa ɔ, ná sɛ ngekalewa ne fi nu tu a, odi kyɛ bɛpo ye bieku, na ataadeɛ ne nwo kɔte.”

⁵⁹ Mmeraa bɔ ɔfa kwata anwonyerɛ bɔ ɔwɔ ataadeɛ nu nwo ɛhe: kyɛ bafa boaen nwiaa anaa gyese banwo ɔ, anaa bɔ bafa kundu anaa nwomaa bapa ɔ. Ɛhe kɔmaa ekonwu kyɛ ye nwo te anaa ye nwo nde.