Lewitikɔso 11 - AHYERƐLƐ KRONGRON

Aleɛ bɔ ye nwo te ɔne bɔ ye nwo nde ɔ

¹ AWURADE sele Mose ne Aarɔn kyɛ,

² “Ɛ́mɔhã behyire Yisraelfoɛ kyɛ, ‘Aseɛ ye aso ngaka amukoraa, bɛ nu horɛ bɔ ɛ́mɔli ɛhe:

³ Kaka biala bɔ ye gya ne anu apakye, bɔ ye gya ne wura mbaboa, ná opu ye aleɛ sá pesa ne, ɛmɔkɔhora bekoli.

⁴ Nakoso bɛbɔ bepu b’aleɛ besa bɛpesa anaa bɛ gya ne anu apakye ne, nnɛma ɛmɔdi ɛhemɔ: afupɔngɔ, ofikyɛ ɔwɔ nu kyɛ opu ye aleɛ sá pesa de, nakoso ye gya ne anu de ɔppakyele, yiti ye nwo nde mma ɛmɔ,

⁵ ɔne akrande, ofikyɛ ɔwɔ nu kyɛ opu ye aleɛ osa pesa de, nakoso ye gya ne anu de ɔppakyele, yiti ye nwo nde mma ɛmɔ;

⁶ yeɛ adango, ofikyɛ ɔwɔ nu kyɛ opu ye aleɛ osa pesa de, nakoso ye gya ne anu de ɔppakyele, yiti ye nwo nde mma ɛmɔ;

⁷ ɔne prako, ofikyɛ ɔwɔ nu kyɛ ye gya ne anu apakye, bɔ ye gya ne wura mbaboa de, nakoso ombu ye aleɛ mbesa, yiti ye nwo nde mma ɛmɔ.

⁸ Nnɛma ɛmɔdi bɛ naen, yeɛ bɛ fuin koso nnɛma ɛmɔsɔ nu; bɛ nwo nde mma ɛmɔ.

⁹ “Nzue nu naen mɔ koso, ɛhemɔ yeɛ ɛ́mɔli ɔ: kaka biala bɔ ɔwɔ nzue nu, bɔ ole ndɛtɛ ne ɛboen ne, kyɛ ɔwɔ ɛpo nu oo, anaa asue nu oo, ɛmɔkɔhora bekoli.

¹⁰ Nakoso nzue nu ngaka worawora ɔne nzue nu ngaka bɔ bele ngoa de, bɛ nu biala bɔ olle ndɛtɛ ɔne ɛboen ne, kyɛ ɔwɔ ɛpo nu oo, kyɛ ɔwɔ asue nu oo, ɔte akyiwadeɛ ma ɛmɔ.

¹¹ Bɛkɔhɔ so bɛkɔyɛ akyiwadeɛ; nnɛma ɛmɔdi bɛ naen, ná bɛ fuin koso ɛ́mɔbu ye akyiwadeɛ.

¹² Nzue nu kaka biala bɔ olle ndɛtɛ ɔne ɛboen ne, ɔte akyiwadeɛ ma ɛmɔ.

¹³ “Nnomaa mɔ nu koso ɛhemɔ kɔyɛ ɛmɔ akyiwadeɛ; onni kyɛ bedi ɔ, bɛte akyiwadeɛ: kɔleɛ, pɛtɛ, akorɔma,

¹⁴ akompɛtɛ, senza ahoroɔ,

¹⁵ adene ahoroɔ amukoraati,

¹⁶ soholi, kɔngɔen akorɔma, ɛpo so dabodabo, akorɔma ahoroɔ,

¹⁷ patue, nandwinoma, patue mbiri,

¹⁸ asudabo, ɛserɛ so patue, pɛtɛ fufue,

¹⁹ akyemvona katakyie, asunoma ahoroɔ, asuakwaa ne apena.

²⁰ “Kaka biala bɔ ole ndaa, ná ɔnate ye gya nna so ne, ɔte akyiwadeɛ ma ɛmɔ.

²¹ Nakoso ngaka bɔ bele ndaa ná bɛfa bɛ gya nna amukoraa bɛnate, ná bele agyirɛ wɔ nziɛ bɔ bɛfa behuru fɛen fɛen wɔ aseɛ so ne,

²² bɛ nu ɛhemɔ yeɛ ɛ́mɔli ɔ: mmɛbɛ ahoroɔ, mmɛbɛ mbiri ahoroɔ, ngetekyire ahoroɔ, yeɛ torɔka ahoroɔ.

²³ Nakoso ngaka ngaa bɔ bele ndaa ná bele agyirɛ nna ne de, bɛte ɛmɔ akyiwadeɛ.

²⁴ “Ɛhemɔ yeɛ ɔma ɛmɔ nwo gua fiɛ ɔ: ebiala bɔ ye nwo kɔha bɛ fuin ne, ye nwo kogua fiɛ maa okoodwu nɔsoa,

²⁵ na ebiala bɔ ɔkɔsoa bɛ nu biala fuin nen, odi kyɛ ɔpo ye nwo nningyein, na ye nwo kogua fiɛ maa okodwu nɔsoa.

²⁶ Kaka biala bɔ ye gya ne anu apakye nakoso ye gya ne owwura mbaboa, anaakyɛ ombu ye aleɛ mbesa ne, ye nwo nde mma ɛmɔ; sona biala bɔ ye nwo kɔha bɛ ne, ye nwo kogua fiɛ.

²⁷ Na ngaka amukoraa bɔ bɛnate bɛ gya nna so ne, bɛ nu biala bɔ ɔnate ye gya tasaa nu ne, ye nwo nde mma ɛmɔ; ebiala bɔ ye nwo kɔha bɛ fuin ne, ye nwo kogua fiɛ maa okoodwu nɔsoa.

²⁸ Ebiala bɔ ɔkɔsoa bɛ fuin ne, odi kyɛ ɔpo ye nwo nningyein, na ye nwo kogua fiɛ maa okoodwu nɔsoa; bɛ nwo nde mma ɛmɔ.

²⁹ “Ngaka bɔ bɛtwe bɛ nwo ase ne, ɛhemɔ yeɛ bɛ nwo nde mma ɛmɔ ɔ: abotokura, mmurokuruwa, benze ahoroɔ,

³⁰ ɛlaleɛ, benze, epo, bɔmɔtebɔmɔ ɔne dodowurowuro.

³¹ Bɛ bɔ bɛtwe bɛ nwo ase ne, ɛhemɔ bɛ nwo nde mma ɛmɔ. Sɛ bewu a, ebiala bɔ ye nwo kɔha bɛ fuin ne, ye nwo kogua fiɛ maa okoodwu nɔsoa.

³² Nikyee biala bɔ bɛ nu biala fuin kɔtɔ so ne, kyɛ bakaa yeɛ bafa bayɔ hɔ oo, anaa ɛtena oo, anaa nwomaa oo, anaa bɔtɔ oo, anaa nikyee biala bɔ bɛfa bɛyɔ adwuma biala oo, odi kyɛ bɛfa bewura nzue nu na ye nwo kogua fiɛ maa okoodwu nɔsoa koraka ne ye nwo ate.

³³ Kukue biala bɔ bɛ nu biala kɔte kɔtɔ nu ne, nikyee biala bɔ ɔwɔ sɔ kukue ne anu nwo kogua fiɛ na odi kyɛ ɛmɔbɔ kukue ne.

³⁴ Aleɛ biala bɔ odi kyɛ bedi nakoso sɔ kukue ne anu nzue kogua so ne, ye nwo agua fiɛ, na anonneɛ biala bɔ bɛno nakoso ofi sɔ kukue ne anu ne, ye nwo agua fiɛ.

³⁵ Nikyee biala bɔ bɛ nu biala fuin ye nekaa biala kɔtɔ so ne, kyɛ ɔte foonoo oo, anaa bokyea oo, odi kyɛ bebubu ye begua; ye nwo nde, na odi kyɛ ɛmɔbu ye kyɛ ye nwo nde.

³⁶ Mbombonzue anaa abura nu nzue nwo te; nakoso sɛ nikyee bie la nu, ná sɔ ngaka nemɔ nu bie fuin ka ye a, sɔ nikyee ne nwo nde.

³⁷ Sɛ bɛ fuin ne, ye nekaa biala te tɔ mmakaammaa bɔ bɛkwaalua so a, mmakaammaa ne nwo te;

³⁸ nakoso sɛ bɛfa mmakaammaa ne begua nzue nu, na sɛ kaka ne fuin ne nekaa biala te tɔ so a, mmakaammaa ne nwo nde mma ɛmɔ.

³⁹ “Kaka biala bɔ ɛmɔle ate kyɛ bedi ne, sɛ owu a, sona biala bɔ ye nwo kɔha ye fuin ne, ye nwo kogua fiɛ maa okoodwu nɔsoa.

⁴⁰ Sona biala bɔ okoli ye naenmvuin ne bie ne, odi kyɛ ɔpo ye nwo nningyein, na ye nwo kogua fiɛ maa okodwu nɔsoa; sona bɔ ɔkɔsoa kaka fuin ne koso, odi kyɛ ɔpo ye nwo nningyein na ye nwo kogua fiɛ maa okoodwu nɔsoa.

⁴¹ “Kaka biala bɔ ɔtwe ye nwo ne ase, ɔte akyiwadeɛ; onni kyɛ ɛmɔdi ɔ.

⁴² Kaka biala bɔ ɔnate ye ko so, ɔne kaka biala bɔ ɔnate ye gya nna so, anaa kaka biala bɔ ole agyirɛ pee, ɔne ngaka biala bɔ bɛtwe bɛ nwo ase ne, nnɛma ɛmɔdi; ofikyɛ bɛte akyiwadeɛ.

⁴³ Nnɛma ɛmɔfa kaka biala bɔ ɔtwe ye nwo ase begua ɛmɔ nwo fiɛ, nnɛma ɛmɔfa bɛ begua ɛmɔ nwo fiɛ amaa ɛmɔanyɛ mmenia bɔ bɛ nwo nde ɔ.

⁴⁴ Ofikyɛ me ole AWURADE ɛmɔ Nyameɛ; yiti ɛ́mɔte ɛmɔ anwo, ná ɛ́mɔyɛ krongron ofikyɛ nde krongron. Nnɛma ɛmɔfa kaka biala bɔ ɔtwe ye nwo ase begua ɛmɔ nwo fiɛ.

⁴⁵ Ofikyɛ me ole AWURADE bɔ nyele ɛmɔ mvili Misraim aseɛ so mmale ne, bɔ me yeɛ nde ɛmɔ Nyameɛ ɔ; yiti ɛ́mɔyɛ krongron, ofikyɛ nde krongron.”

⁴⁶ Ɛhe ole mmeraa bɔ ɔfa aseɛnwo ngaka, nnomaa, nzue nu kaka biala bɔ ole ngoa ɔne kaka biala bɔ ɔtwe ye nwo ase nwo ɔ,

⁴⁷ kyɛ ɛmɔkɔma nzonzoleɛ kɔla nningyein bɔ bɛ nwo te ɔne bɛbɔ bɛ nwo nde afia; ngaka bɔ odi kyɛ ɛmɔdi ɔne bɔ onni kyɛ ɛmɔdi ɔ afia.