Lewitikɔso 10 - AHYERƐLƐ KRONGRON

Nadabo ne Abihu yɔ bɔne

¹ Aarɔn mma mmienzua Nadabo ne Abihu, bɛ nu biala fale ye see kulie. Bɛfale see beguale nu, na bɛfale ɛyɛɛ beguale so. Bɛfale see bɔ ye nwo nde ɔ bɛwale AWURADE nyunu, see bɔ nna AWURADE yeɛ wahyɛ bɛ kyɛ bɛfa bɛbra ye nyunu ɔ.

² See fili AWURADE berɛ ɔɔyerale bɛ ná bɛtotɔle wɔ AWURADE nyunu.

³ Na Mose sele Aarɔn kyɛ, “Bɔ AWURADE aha hɔ ɛhe: ‘Ɔnate bɛ bɔ bepingye me ne aso, ngɔmaa bekonwu me kyɛ nde krongron, na bɛkɔhyɛ me animnyam wɔ mmenia ne amukoraati nyunu.’ ” Na Aarɔn yɛle konn.

⁴ Mose tole ye sa frɛle Aarɔn ɔse aliɛma Yusiɛl ye mma mmienzua Misael ne Ɛlsafan, na osele bɛ kyɛ, “Ɛ́mɔpingye wa ná ɛmɔsoa ɛmɔ aliɛma nemɔ béfi nekaa krongron ne anyunu berɛ bɛhɔ asikyeleɛ ne asi dɔ.”

⁵ Yiti kyɛbɔ Mose hyɛle ne, bepingyele berɛ na bɛsoale bɛ fuin nemɔ wɔ b’aguasoɛ nu befili asikyeleɛ ne anu.

⁶ Na Mose sele Aarɔn, ɔne Aarɔn mma mmienzua Eleasa ne Yitama kyɛ, “Nnɛmɔma ɛmɔ ti nwiaa fu gua ye nwo fusaa, yeɛ nnɛma ɛmɔsunzua ɛmɔ ndaadeɛ nu. Sɛ ɔba ye sɔ a, ɛmɔkowu, na AWURADE ɛyaafɛlɛ piri kɔwa maen ne amukoraa so. Nakoso ɛmɔ aliɛma mɔ, Yisrael awuro ama mukoraa de, bɛkɔhora bekosu bɛ bɔ AWURADE afa see wayera bɛ ne.

⁷ Nnɛma ɛmɔfi ɛtena sua atenaleɛ ne anoa nu berɛ bɛkɔ, anyɔ a ɛmɔkowu, ofikyɛ AWURADE afa ɛpopalɛ ngoo wapopa ɛmɔ.” Na bɛyɔle kyɛbɔ Mose hyɛle ne ala.

⁸ AWURADE sele Aarɔn kyɛ,

⁹ “Ɛne wɔ mma mmienzua mɔ, sɛ ɛmɔkɔ ɛtena sua ne anu a, nnɛma ɛmɔno bobe nzaa anaa nzaa serɛ biala amaa ɛmɔanwu; ɔsɛ kyɛ ɔyɛ ahyɛdeɛ afebɔɔ wɔ ɛmɔ aworɛ ndoatoasoɛ amukoraa nu.

¹⁰ Odi kyɛ ɛmɔnwu nzonzoleɛ bɔ ɔla nikyee bɔ ɔte krongron ɔne nikyee bɔ ɔtte krongron b’afia, nzonzoleɛ bɔ ɔla nikyee bɔ ye nwo nde ɔne bɔ ye nwo te ɔ b’afia;

¹¹ na odi kyɛ ɛmɔkyirekyire Yisraelfoɛ ahyɛdeɛ bɔ AWURADE nate Mose so ha hyirele bɛ ne amukoraa.”

¹² Mose sele Aarɔn ɔne Aarɔn mma bɔ baha bɔ bɛ ole Eleasa ne Yitama kyɛ, “Afɔleɛ mɔ bɔ bɛbɔle ye see so bɛmane AWURADE ne, ɛ́mɔfa aburoo afɔleɛ ngaa ne, ná ɛ́mɔli ye kabrɛdi wɔ afɔleɛ bokyea ne ngyɛnu, ofikyɛ ɔte krongron paa.

¹³ Odi kyɛ ɛmɔdi ye wɔ nekaa bɔ ɔte krongron ɔ, ofikyɛ afɔleɛ bɔ babɔ ye see so bama AWURADE ne, ɛne wɔ mma mɔ bɛ deɛ ɛne; sɔ yeɛ AWURADE ahyehyɛ ama me ɔ.

¹⁴ Nakoso ye sa bɔ bɛnwaha ne, ɔne ye sɔ bɔ bɛfa bɛbɔle afɔleɛ ne, ɛ́mɔli ye wɔ nekaa bɔ berɛ te sannwuu ɔ. Ɛne wɔ mma mmienzua ne wɔ mma mmrasua mɔ yeɛ beli ɔ, ofikyɛ Yisraelfoɛ asomdwee afɔleɛ ne, ɛne wɔ mma mɔ, ɛmɔ deɛ bɔ ɔwɔ nu hɔ ɛne.

¹⁵ Ye sɔ bɔ bɛfa bɛbɔ afɔleɛ ne, ɔne ye sa bɔ bɛnwaha ne de, odi kyɛ bɛfa bɛboka ɛloe bɔ bɛfa see bɛyera bɛbɔ afɔleɛ ne aso bɛba, ná bɛfa bɛbɔ ɛnwahanɛ afɔleɛ wɔ AWURADE nyunu, na ɔkɔyɛ wɔ ne wɔ mma mɔ deɛ afebɔɔ, kyɛbɔ AWURADE ahyɛ ne.”

¹⁶ Na bɔne nwo afɔleɛ abɔngye ne de, Mose penane ye fɛle, nakoso né bayera ye dada. Yiti ɔfɛle Eleasa ne Yitama, bɔ bɛ ole Aarɔn mma mmienzua bɔ baha ne bɛ so yaa, na obisale kyɛ,

¹⁷ “Nzu ati yeɛ ɛmɔanni bɔne nwo afɔleɛ ne wɔ nekaa bɔ ɔte krongron ɔ? Ofikyɛ ɔte nikye krongron paa, na Nyameɛ afa ama ɛmɔ, amaa ɛmɔaprapra mmenia nemɔ amumuyɛɛ bagua na ɛmɔapata bama bɛ wɔ AWURADE nyunu.

¹⁸ Ɛ́mɔnea, ɛmɔamva ye mogya ne bamma nekaa krongron ne anu. Ahaa odi kyɛ ɛmɔdi ye wɔ nekaa krongron ne anu berɛ, kyɛbɔ nhyɛle ɛmɔ ne.”

¹⁹ Na Aarɔn sele Mose kyɛ, “Tie, ɛnɛ bafa bɛ bɔne nwo afɔleɛ ne bɛ naen yeralɛ afɔleɛ bawa Nyameɛ nyunu, yeɛ koso edwirɛ hemɔ ato me ye! Aso sɛ nnili bɔne nwo afɔleɛ ye ɛnɛ a, ahaa AWURADE nye kɔsɔ anaa?”

²⁰ Na Mose tele sɔ nen, ye ahone tɔle ye kunu.