Kolosefoɛ 2 - AHYERƐLƐ KRONGRON

¹ Mekuro kyɛ ɛmɔnwu mmɔden paa bɔ mebɔ mema ɛmɔ, yeɛ afei bɛ bɔ bɛwɔ Laodikea, ɔne ebiala bɔ onnwuni me nyunu le ɔ.

² Meyɔ ɛhe kyɛbɔ bɛ wora kɔkyekye ná bayɛ ko wɔ ɔdɔ nu, ná banya ndeaseɛ bɔ osi pi, ɔne kyɛ bekonwu Nyameɛ mvealeɛ nu dwirɛ ne, bɔ ye ole Kristo ɔ.

³ Na ye nu yeɛ bafa nworɛ ne nimdeɛ agyapadeɛ mukoraa basie ɔ.

⁴ Meka ɛhe kyɛbɔ ebie ngɔbobɔ ye noa nu ngɔfa ngɔlakalaka ɛmɔ ɔ.

⁵ Ɔwɔ nu kyɛ anwoɔnaen nu de nna me ne ɛmɔ yeɛ yɛwɔ dɔ ɔ, nakoso me ne ɛmɔ yɛwɔ dɔ sunzum nu. Na ɔyɛ me fɛ kyɛ ɛmɔgyi berɛ pindinn ná ɛmɔ gyidie koso atindim wɔ Kristo nu ɔ.

Kristo nu brabɔlɛ

⁶ Yiti kyɛbɔ ɛmɔale Awurade Kristo Yesu bato nu nen, ɛmɔhɔ so bɛnate wɔ yde nu.

⁷ Ɛmɔtira ndii wɔ ye nu, ná ɛ́mɔnea ye so bɛbɔ bɛ bra, ná ɛ́mɔtindim wɔ gyidie nu kyɛbɔ behyirehyirele ɛmɔ ne, ná ɛ́mɔla Nyameɛ ase daa.

⁸ Ɛ́mɔnea yé ná ebiala amva ewiase nworɛ ne nnakannaka mbaen bɔ ɔnate tetesɛm ne wiase sunzum nu dwirɛ ngyerɛkyerɛ so, bɔ ɔnnate Kristo so ɔ wamva ɛmɔ wanyɛ ngoaa.

⁹ Ofikyɛ ye nu yeɛ Nyameɛ sue mumua ne amukoraa ɔte ɔ wɔ nipadua nu ɔ.

¹⁰ Na ɛmɔali mu bɔkɔɔ wɔ ye nu, ye bɔ ɔte tumi ne ahennie amukoraa bɛ ti.

¹¹ Na ye nu koso yeɛ bapɛ ɛmɔ bienzua bɔ bamva bɛ sa yeɛ bɛpɛle ɔ; na bɔ ɔwɔ anwoɔnaen nipadua nu bɔ bapuro bagua berɛ ne, bapuro bagua wɔ Kristo bienzuapɛlɛ nu.

¹² Besiele ɛmɔ ne Kristo wɔ asubɔlɛ nu, na ɔnate ɛmɔ gyidie wɔ Nyameɛ tumi dwumadie bɔ ɔfa tingyele ye fili ewue nu ne ati, batingye ɛmɔ ne ye koso.

¹³ Na ɛmɔ bɔ ahaa né ɛmɔte awufoɛ, ɔnate ɛmɔ mvomsoɛ ne ɛmɔ nwonaen bɔ né bienzuapɛlɛ nne nu ne ati nen, Nyameɛ amaa ɛmɔanya ye ngoa ne bie, na wafa yɛ mvomsoɛ amukoraa wahyɛ yɛ,

¹⁴ na wakyikyi ahyɛdeɛ ne anu ahyerɛlɛ bɔ otia yɛ bɔ bɛfa bɛbɔle yɛ kwaadu ne, na waye wafi berɛ wafa wabɔ mmeamudua ne anu.

¹⁵ Olele mbanyililɛ ne tumililɛ bɛ sa nu tumi, na ɔlale bɛ ali pefee wɔ badwa nu, na olili bɛ so ngonim wɔ mmeamudua ne aso.

¹⁶ Yiti nnɛmɔma ebiala bua ɛmɔ ndɛen fa aleɛ anaa anonneɛ, anaa aluolue, anaa ɛsraen foforɛ anaa afofingyẽa nwo.

¹⁷ Ɛhemɔ te nningyein bɔ ɔba nemɔ wawoɛ, nakoso ye paapaa ne ole Kristo.

¹⁸ Nnɛmɔma sona biala bɔ ɔpati brɛ ye nwo ase, bɔ ɔsɔne abɔfo mɔ, bɔ ɔnwa wanya nyekyire, bua ɛmɔ foɛ; ofikyɛ ye adwene mbaen yeɛ ɔfa tu ye nwo yɔ sɔ ɔ.

¹⁹ Sɔ sona ne wapo kyɛ okotira Tire ne bɔ nipadua ne fa ye aporɔ so ne ye ndii so onya aleɛ ná ɔtoatoa nu ne, na onyi wɔ enyinɛ bɔ ofi Nyameɛ berɛ ɔ nu.

Pɔɔlo bɔ ngyerɛkyerɛ tɛɛ nwo kɔkɔ

²⁰ Sɛ ɛmɔ ne Kristo banya bawu bafi wiase sunzum nu ngyerɛkyerɛ nu a, nzu ati yeɛ ɛmɔbɔ ɛmɔ bra kyɛ ɛmɔtɛwɔ wiase ɔ? Nzu ati yeɛ ɛmɔdi ahyɛdeɛ sɔaa mɔ so ɔ:

²¹ “Bɛ nwo nga he, benni he, bɛnzɔ he anu?”

²² Na ɛhemɔ te nningyein bɔ bɛfa bedi dwumaa ɔsɛkye ɔ, yeɛ bɛpɛ nu bɛkɔ; ofikyɛ bɛte kuro sona ahyɛdeɛ ne ngyerɛkyerɛ.

²³ Osoma kyɛ nworɛ wɔ sɔ ngyerɛkyerɛ ne anu, bɔ ɔma sona sɔ ɛsom nu kateree ɔ, bɛpati bɛyɛ anwobrɛaseɛ, na bɛhyɛ nipadua ne anyeborolɛ; nakoso mvasoɛ biala nne ɛhemɔ so, yeɛ bɛngora benzi anwoɔnaen nu akɔnnɔ atee.