Hosea 9 - AHYERƐLƐ KRONGRON

Bɛkɔhwe Yisrael so

¹ Ao Yisrael, nnɛdi ahurusi! Nnɛma wɔ nye gye kyɛ maen maen nemɔ, ofikyɛ afi wɔ Nyameɛ si aabɔ gyandera. Ahuro gyanderaniɛ akatuaa, wɔ nekaa amukoraa bɔ bɛboro aburoo ɔ.

² Nekaa bɔ bɛboro aburoo ne nekaa bɔ betwi nzaa ɔ, ɔngɔma bɛ bɛ noa aleɛ, yeɛ nzaa foforɛ ne ngɔpe ngɔma bɛ.

³ Bɛngɔtena AWURADE aseɛ ne aso, na mmom Efraim kosa kɔhɔ Misraim, na bekoli nningyein bɔ bɛ nwo nde ɔ wɔ Asiria.

⁴ Bɛngɔbɔ anonneɛ afɔleɛ bɛngɔma AWURADE, yeɛ b’afɔleɛ mɔ ngɔsɔ ye nye. B’afɔleɛ kɔyɛ kyɛ ɛsɛenvoɛ aleɛ kɔma bɛ; ebiala bɔ okoli bie ne, ye nwo kogua fiɛ, ofikyɛ b’aleɛ ne, bɛ bɔbɔ yeɛ bekoli ɔ, na ɔngɔwa AWURADE awuro berɛ.

⁵ Aluolue kyẽa bɔ bahyehyɛ bato berɛ ne, AWURADE poentolɛ kyẽa ne dwu a, nzikyɛ yeɛ ɛmɔkɔyɔ ɔ?

⁶ Ofikyɛ, tie, ɔnate ehuhunɛ ne ati, mmenia nemɔ banwati bahɔ. Misraim kɔboa bɛ noa, na Memfise kosie bɛ. Ndetema kofifi nekaa bɔ bɛ dwetɛ nningyein paa gua ne, na agurɛ kofifi bɛ tena sua nemɔ anu.

⁷ Asohwenɛ ngyẽa ne adwu berɛ, akatuaa ngyẽa ne adwu berɛ. Yisrael kobu ngɔmhyɛlɛniɛ ne kyɛ ɔte kwaseaa, yeɛ sunzum nu sona ne kyɛ wabɔ laen, ɔnate w’amumuyɛɛ somaa ne, ɔne ɛpɔen piri ne ati.

⁸ Ngɔmhyɛlɛniɛ ne te Efraim wɛmvoɛ, me Nyameɛ maen ne, nakoso ngaensualɛniɛ asua ye ngaen wɔ ye atee amukoraa nu, na bɛpɔ ye wɔ ye Nyameɛ awuro.

⁹ Bɛ bɔbɔ bagua bɛ nwo fiɛ paa, kyɛ Gibea mmerɛ ne anu ala; yiti ɔkɔkaye b’amumuyɛɛ, na ɔkɔhwe bɛ so bɛ bɔne nwo.

¹⁰ Nwuni Yisrael kyɛ ɛserɛ so bobe mma. Nwuni ɛmɔ nana mɔ kyɛ bobe mma bɔ wali moa wasu wɔ ye sulɛ mmerɛ bɔ oli moa nu ɔ. Nakoso bedwuli Baal Peɔ nen, beguale bɛ nwo fiɛ bɛbɔle nyanzoen bra, na bɛ bɔbɔ bɛkakyili akyiwadeɛ te kyɛ nningyein bɔ né bekuro ne ala.

¹¹ Efraim de, b’animnyam kotu kɔhɔ kyɛ anomaa, aworɛ nne berɛ ko, nwonzɛen nne berɛ ko, yeɛ ebiala mva koɛ ko!

¹² Sɛ bɛtete mmaa po a, ngɔmaa bekoli abawuo bɔ baa ko po ngɔha ɔ; amba, sɛ meyakyi bɛ nu a, bɛ yaakɔ!

¹³ Nwuni Efraim kyɛ Tiro bɔ balua ye wɔ aseɛ paa so ɔ, nakoso Efraim kɔfa ye mma kɔɔma kodiawuniɛ ne.

¹⁴ Ao AWURADE, fa ma bɛ e! Nzikyɛ yeɛ ɛkɔfa kɔma bɛ ɔ? Ma bɛ koɛ bɔ ɔpɔ baa, ɔne nyɔfone bɔ nzue nne nu ɔ.

¹⁵ Bɛ bɔne yɔleɛ amukoraa wɔ Gilgal, ofikyɛ berɛ yeɛ nhyɛle ye bo mbɔle bɛ ɔ. Ɔnate bɛ bɔne yɔleɛ ne ati, ngɔfoa bɛ ngofi m’awuro, mengohuro bɛ dwirɛ ko; b’atitire amukoraa bɛte ɛlɔenyɛlɛfoɛ.

¹⁶ Bafa nikyee babɔ Efraim, bɛ ndii akese, bengosu mmaa. Sɛ bɛwo mmaa po a, ngohũ bɛ mma mɔ bɔ b’ahone la bɛ nwo paa ne.

¹⁷ Me Nyameɛ kɔpo bɛ, ofikyɛ banyɛ sotie bamma ye, na bekohyinihyini maen maen mɔ so.