Hosea 6 - AHYERƐLƐ KRONGRON

Adwenesakyera bɔ nahorɛ nne nu ɔ

¹ “Ɛmɔbra, ɛ́mɔma yɛsa yɛhɔ AWURADE berɛ, ofikyɛ ye yeɛ watete yɛ nu pasapasa ɔ, na ɔkɔsa yɛ anwonyerɛ; wapura yɛ, na okosa kɔkyekye yɛ ngena nemɔ aso.

² Elenyɔ asi, ɔkɔmaa yɛkosa yɛkonya ngoa, yoo, ye ɛlɛsa ne aso, ɔkɔpagya yɛ, na yɛkɔtena ngoa nu wɔ ye nyunu.

³ Ɛ́mɔma yɛnwu ye, ɛ́mɔma yɛpere yɛpena AWURADE nwo nimdeɛ. Ye walɛ ne, osi pi kyɛ ngyerɛmɔ; na ɔkɔwa yɛ berɛ kyɛ esue, kyɛ bamborɔ bɔ ɔtɔ gua aseɛ so ɔ.”

⁴ Ao Efraim, nzikyɛ yeɛ mva nyɔ wɔ ɔ? Ao Yuda, nzikyɛ yeɛ mva nyɔ wɔ ɔ? Ɛmɔ nahorɛlilɛ te kyɛ ngyerɛmɔ munungum, na ɔte kyɛ bosue bɔ ɔpɛ nu kɔ ndɛndɛ ɔ.

⁵ Yiti nnate me ngɔmhyɛlɛfoɛ so mapɛ bɛ magua, mafa me noa nu dwirɛ mahũhũ bɛ, na me ndɛenbualɛ te kyɛ kanea bɔ ɔ́ta ɔ.

⁶ Ofikyɛ anwumvoinnwunɛ yeɛ mépena ɔ, na nna afɔleɛbɔlɛ ɔ; na Nyameɛ nwo nimdeɛ mmom yeɛ mekuro metra naen yeralɛ afɔleɛ mɔ ɔ.

⁷ Na mmom babu apam ne aso kyɛ Adam ala, berɛ yeɛ banni nahorɛ bamma me ɔ.

⁸ Gileade te amumuyɛɛfoɛ bɛ kuro, mogya agua wɔ nu maa efiɛ ahã ye.

⁹ Kyɛbɔ awerɔm awuefoɛ kure bɛtetɛ sona ne, sɔ ala yeɛ asɔfo kure bɛbɔ porɛ bedi awue ɔ. Bedi awue wɔ Sɛkem atee so, amba, bɛbɔ musue.

¹⁰ Manwu anwodwiri nikyee wɔ Yisrael awuro ama nu. Berɛ yeɛ Efraim gyanderabɔlɛ ne wɔ ɔ; Yisrael nwo agua fiɛ.

¹¹ Ao Yuda, wɔ koso wahyehyɛ buberɛ wama wɔ, mmerɛ bɔ ngosa ngɔfa me maen ngofi nnurehyelɛ nu ngɔwa ɔ.