Hosea 5 - AHYERƐLƐ KRONGRON

Nyameɛ bɔ asɔfo ne ahemvo kwaadu

¹ Ao asɔfo, ɛ́mɔtie edwirɛ he, ɛmɔ, Yisrael awuro ama, ɛ́mɔyɛ asoɛ betie. Ao, ɛhene awuro ama, ɛ́mɔtie, ofikyɛ ndɛenbualɛ ne, ɔ́ba ɛmɔ so; ofikyɛ ɛmɔakakyi ngaen wɔ Misepa, ɔne ɛtɛen bɔ batrɛtrɛ nu wɔ Tabɔ so ɔ.

² Ɛlɔenyɛlɛfoɛ nemɔ bɛ́pena kyɛ bédi awue piri paa, nakoso ngɔhwe bɛ mukoraa bɛ so.

³ Mese Efraim, na Yisrael koso ɔmvea me; afei, ao Efraim, abɔ gyandera, na Yisrael nwo agua fiɛ.

⁴ Bɛ yɔleɛ mma bɛ ate mma benza bɛmma bɛ Nyameɛ berɛ; ofikyɛ gyanderabɔlɛ sunzum wɔ bɛ nu, na bɛnze AWURADE.

⁵ Yisrael anwomasoɛ di adanzeɛ tia ye. Yiti Yisrael ne Efraim bekosoti wɔ b’amumuyɛɛ nu; Yuda koso ɔne bɛ yeɛ bekosoti ɔ.

⁶ Bɛkɔfa bɛ mmoaen kure ne bɛ nandwie kure bɛkɔhɔ kyɛ bɛkwaapena AWURADE. Nakoso bengonwu ye; wahwe ye nwo wafea bɛ.

⁷ Banni nahorɛ bamma AWURADE, ofikyɛ bawowo somaa mmaa. Bosome foforɛ ne kɔsɛkye bɛ ne bɛ boo mɔ.

⁸ Ɛ́mɔhu awɛen wɔ Gibea, yeɛ ɛ́mɔhu totorobɛndo wɔ Rama. Ɛ́mɔbɔ dawure wɔ Bete Awen, yɛli wɔ si, ao Benyamin.

⁹ Efraim kɔkakyi kurofoen wɔ asohwenɛ kyẽa ne anu; mafa edwirɛ bɔ ɔkɔwa nu amba ɔ mato dwaa wɔ Yisrael mmusua kure nemɔ anu.

¹⁰ Yuda ahemvo mɔ, bayɛ kyɛ mmenia bɔ betutu wɛen ɔ, yiti m’ahone kohu bɛ so kyɛ nzue.

¹¹ Bɛhyɛ Efraim so, babua ye fɔ wɔ ndɛenbualɛ nu, ofikyɛ ɔhyɛle da lili mmeraa mbaen mbaen si.

¹² Yiti nde kyɛ mvrɔlɔ mema Efraim, na nde kyɛ nikyee porɔlowaa mema Yuda awuro ama.

¹³ Mmerɛ bɔ Efraim nwuni ye anwonyerɛ, ná Yuda nwuni ye kena ne yeɛ Efraim hɔle Asiria ɔ, na ɔsomane maa bɛhɔle Nana Yarebo berɛ. Nakoso wangora wanza ɛmɔ anwonyerɛ, yeɛ wangora wamma ɛmɔ kena ne wangɔ.

¹⁴ Ofikyɛ ngɔyɛ kyɛ gyata ngɔma Efraim, yeɛ ngɔyɛ kyɛ gyata ba ngɔma Yuda awuro ama. Me, me yeɛ ngɔtete bɛ nu pasapasa ngɔhɔ ɔ; ngɔfa ngɔhɔ, na ebiala ngɔpepɛ ngole ye.

¹⁵ Ngosa ngɔhɔ m’atenaleɛ berɛ, kɔpem kyɛ bekole bɛ bɔne bɛkɔto nu, ná bɛkɔpena me si atee ɔ. B’amaneɛnwunɛ mmerɛ nu, bɛkɔpena me si atee ndɛndɛ.