Hosea 4 - AHYERƐLƐ KRONGRON

Nyameɛ bɔ Yisrael kwaadu

¹ Yisraelfoɛ, ɛ́mɔtie AWURADE noa dwirɛ; ofikyɛ AWURADE ne aseɛ ne aso ama banya dwirɛ, ɔnate kyɛ nahorɛlilɛ, anwumvoinnwunɛ, ɔne Nyameɛ nwo nimdeɛ biala nne aseɛ ne aso.

² Ndaentalɛ, anoanupɛlɛ, awuelilɛ, awue ne adwamanbɔlɛ yeɛ ɔwɔ so ɔ’. Bebu mmeraa so, na mogya alaa yeɛ bɛkã begua ɔ.

³ Yiti aseɛ ne di aworabɔlɛ, na bɔ ɔwɔ so amukoraa ayɛ hodwoo: eburo ngaka, ewienu nnomaa, yeɛ ɛpo nu naen po bekoyie.

⁴ Nakoso nnɛma ebiala odwudwodwudwo, anaa ofu obiɛngo: ofikyɛ wɔ maen te kyɛ mmenia bɔ bɛ ne ɔsɔfo banya dwudwolɛ ɔ.

⁵ Yiti ekosoti eyia, na ngɔmhyɛlɛniɛ ne koso ɔne wɔ bekosoti kɔngɔen, na ngonua wɔ maame boso.

⁶ Nimdeɛ bɔ wabɔ me maen ne ati, bɛ boso konua; ɔnate kyɛ apo nimdeɛ ne ati, me koso mapo wɔ, kyɛ ɛngɔyɛ me sɔfo. Ɔnate kyɛ wɔ wora afi wɔ Nyameɛ mmeraa ne ati, me koso me wora kofi wɔ mma mɔ.

⁷ Kyɛbɔ bɛhɔle so bɛsonene ne, sɔ alaa yeɛ bɛhɔle so bɛyɔle bɔne betiale me ɔ; yiti b’animnyam ne, ngɔkakyi ye animguaseɛ.

⁸ Me maen, bɔne yeɛ ɔte b’aleɛ ɔ, na b’amumuyɛɛ yeɛ wali bɛ ti ɔ.

⁹ Na bɔ ɔkɔto maen ne nen, sɔ ala yeɛ ɔkɔto ɔsɔfo ɔ; ngɔhwe bɛ so wɔ bɛ bɔne nwo, na ngotua bɛ kerɛ kyɛbɔ bɛ yɔleɛ te ɔ.

¹⁰ Bekodidi, nakoso bɛ ko ngoyi; bɛkɔbɔ gyandera, nakoso bɛngɔta pee, ofikyɛ bapo AWURADE.

¹¹ Gyanderabɔlɛ ne nzaa, yeɛ nzaa foforɛ yeɛ owua sona adwene ɔ.

¹² Me maen kɔ bɛ mmakaa berɛ abisa, na bɛ pɔmaa yeɛ ɔye bɛ musue ɔ, ofikyɛ gyanderabɔlɛ sunzum amaa bali makyebu, na bafi bɛ Nyameɛ nwo baabɔ gyandera.

¹³ Bɛbobɔ afɔleɛ wɔ mmokaa ti afia, bɛyera ɛyɛɛ wɔ pambaa mɔ so, yeɛ eluii, tanure ne ɛmee mɔ abo, ofikyɛ bɛ bo te fɔnwoo. Yiti ɛmɔ mma mmrasua mɔ kɔbɔ gyandera, na ɛmɔ aye mɔ kɔsɛkye agyaa.

¹⁴ Sɛ ɛmɔ mma mmrasua mɔ bɛbɔ gyandera, anaa sɛ ɛmɔ aye mɔ bɛsɛkye agyaa a, mengɔhwe bɛ so; ofikyɛ mmienzua nemɔ bɔbɔ deinn bɛkɔ gyanderafoɛ nemɔ nekaa, na bɛ ne asɔneyɛɛ so gyanderafoɛ yeɛ bɛbɔ afɔleɛ ɔ. Yiti maen bɔ nimdeɛ abɔ ye ne, ɔkɔbɔ.

¹⁵ Wɔ, Yisrael, ɔwɔ nu kyɛ ɛbɔ gyandera de, nakoso Yuda de, onni kyɛ ɔyɔ sɔ bie. Nnɛma ɛmɔba Gilgal, nnɛma ɛmɔkɔ Bete Awen, yeɛ nnɛma ɛmɔta ndaen kyɛ, “Kyɛ AWURADE te ase ye.”

¹⁶ Yisrael so yɛ se kyɛ nandwie beleɛ akrɔngrɔma bɔ ye so yɛ se ɔ. Afei AWURADE kɔma bɛ aleɛ kyɛ boaen ba bɔ ɔwɔ aseɛ tɛtrɛtɛɛ bɔ ndire wɔ so ɔ so.

¹⁷ Efraim afa ye nwo wabɔ mmosoen, yiti po ye bra ma ye.

¹⁸ Bɛno bɛ nzaa ngapealaa ne a, gyandera alaa yeɛ bɛbɔ ɔ; animguaseɛ yeɛ bɛ mbanyi mɔ bekuro ɔ.

¹⁹ Mvrama bie amoa ye awura ye ndaa nu, na ɔnate bɛ bosoen sɔnenɛ afɔleɛ nemɔ ati, bɛ nyunu kogua ase.