Hosea 14 - AHYERƐLƐ KRONGRON

Yisrael, sa bra Nyameɛ berɛ nahorɛ nu

¹ Ao Yisrael, sa bra AWURADE wɔ Nyameɛ berɛ, ofikyɛ w’amumuyɛɛ amaa afi ase.

² Ɛ́mɔpena edwirɛ mɔ bɔ ɛmɔkɔhã ɔ, ná ɛ́mɔsa bɛbra AWURADE berɛ; ɛmɔhã behyire ye kyɛ, “Kyikyi amumuyɛɛ amukoraa; nwu yɛ anwumvoin de yɛ, na yɛkɔfa yɛ noa dwirɛ yɛkɔyɛ nandwie nyii yɛkɔbɔ afɔleɛ yɛkɔma wɔ.”

³ Asiria ngɔpepɛ ngole yɛ, yɛngɔtenatena mbɔngɔ so, yeɛ yɛngɔhã ngohyire yɛ sa noa nnwumaa ko kyɛ, ‘Ɛmɔte yɛ nyameɛ mɔ’, ofikyɛ wɔ nu yeɛ ayisiaaniɛ onya anwumvoinnwunɛ ɔ.

⁴ Ngɔsa bɛ nahorɛ bɔ benni ne anwonyerɛ, ngofia me kunu ngohuro bɛ dwirɛ, ofikyɛ me yaafɛlɛ ne, maye mafi bɛ so.

⁵ Ngɔyɛ kyɛ bosue ngɔma Yisrael: ɔkɔfefɛ kyɛ sukooko, na okonya ndii kyɛ Lebanon.

⁶ Ye mmaen mɔ kɔtrɛtrɛ, ye anwonyemene kɔyɛ kyɛ olive bakaa, na ye nwo fona kɔyɛ kyɛ Lebanon.

⁷ Bɛ bɔ bɛte ye fɔnwoo ne abo ne, bekosa bɛkɔwa, bekosa bekonyi puronn kyɛ aburoo, bɛkɔfefɛ kyɛ bobe, na bɛ nwo fona kɔyɛ kyɛ Lebanon bobe nzaa.

⁸ Ao Efraim, nzikyɛ yeɛ me ne mmosoen yɛle ye yɛyɔ bieku ɔ? Me yeɛ mema ye mmuayɛɛ, ná menea ye so ɔ; nde kyɛ ɛframmire monɛ bɔ ye nyaa mboro ɔ, na me so yeɛ enya wɔ mmakaammaa ɔ.

⁹ Nwa yeɛ ɔse nworɛ bɔ ɔte edwirɛ hemɔ abo ɔ? Nwa yeɛ ye adwene nu pi bɔ ole bɛ nwo nimdeɛ ɔ? Ofikyɛ AWURADE atee tengyɛ, teneneefoɛ kɔfa so, nakoso mmeraatolɛfoɛ de, bekofi ase wɔ so.