Hosea 12 - AHYERƐLƐ KRONGRON

¹ Efraim li mvrama si, na ogu eyia afiteleɛ mvrama so daa biala. Ɔma ye anoanupɛlɛ ne basabasayɔlɛ ɔkɔ so yɛ pee, bɛ ne Asiria bɛyɛ apam, na bɛsoa ngoo bɛkɔ Misraim.

² AWURADE le dwirɛ tia Yuda. Ɔkɔhwe Yakob so kyɛbɔ ye yɔleɛ te ɔ, na okotua ye kerɛ kyɛbɔ ye nnwumaa te ɔ.

³ Ɔsɔle oliɛma gya si wɔ bɛ kunu, na ole ye anwoserɛ ɔne Nyameɛ bɛfa bɛtetale so.

⁴ Amba, ɔne abɔfo ne bɛtetale so, na olili ngonim, osuni, na ɔkoto srɛle ye. Onwuni Nyameɛ wɔ Betel, na berɛ yeɛ Nyameɛ ne yɛ dwudwole ɔ.

⁵ AWURADE Asafo Nyameɛ, ye dumaa bɔ bɛfa bɛkaye ye ole AWURADE.

⁶ “Yiti sa kɔ wɔ Nyameɛ berɛ, sɔ ɔdɔ ne pɛpɛɛpɛyɛlɛ nu yé, ná fa wɔ wora wura Nyameɛ nu daa.”

⁷ Kanaan tira ngondombo tonyi, na okuro aminɛlilɛ.

⁸ Efraim nwa, “Aa, manya me nwo, manya anwonyadeɛ.” M’adwumayɔlɛ amukoraa nu, bannwu amumuyɛɛ biala wɔ me nu, bɔ ɔte bɔne ɔ.

⁹ Ofi Misraim aseɛ so, me ole AWURADE wɔ Nyameɛ. Ngɔmaa ekosa kɔtena ɛtena sua mɔ nu, kyɛ aluolue ngyẽa bɔ mahyehyɛ mato berɛ ne ala.

¹⁰ Mafa ngɔmhyɛlɛfoɛ so madwudwo, mama nyekyire asone, na mafa ngɔmhyɛlɛfoɛ nemɔ so mabubu anyandera.

¹¹ Aso amumuyɛɛ wɔ Gileade? Amba, bɛte mbaen. Bɛfa nandwie nyii mɔ bɛbobɔ afɔleɛ wɔ Gilgal, amba, b’afɔleɛ mmokyea nemɔ, bɛte kyɛ nyɔboɛ kure bɔ ɔwɔ eburo ngofie mɔ b’afia ɔ.

¹² Yakob nwati hɔle Siria maen nu, Yisrael sole maa ɔfa nyane braa gyale, na braa ti, ɔneane mmoaen so.

¹³ Na AWURADE nate ngɔmhyɛlɛniɛ so yele Yisrael fili Misraim, na ɔnate ngɔmhyɛlɛniɛ so ɔbɔle ye nwo waen.

¹⁴ Efraim wurale ye apue maa ɔfɛle yaa paa, yiti AWURADE kɔma ye mogya bɔ wahwie wagua ne kɔbɔ ye ti so, na ye AWURADE kɔma ye animguaseɛ kosa kɔto ye.