Hosea 11 - AHYERƐLƐ KRONGRON

Nyameɛ kuro ye maen dwirɛ

¹ Yisrael te akwadaa nen, né mekuro ye dwirɛ, na Misraim yeɛ mvrɛle mma bienzua ne mvili ɔ.

² Na ngu so bɔ mefrɛ bɛ ne, né me nwo ala yeɛ befi bɛkɔ ɔ. Bɛbobɔle afɔleɛ mɔ bɛmane Baal mɔ, na bɛyerale ɛyɛɛ bɛmane amoen mɔ.

³ Me yeɛ ngyirekyirele Efraim natelɛ ɔ, ngyili ye wɔ me sa so, nakoso né bɛnze kyɛ me yeɛ nzale bɛ anwonyerɛ ɔ.

⁴ Mvale anwumvoinnwunɛ nyamaa yeɛ ndwetwene bɛ ɔ, mvale ɔdɔ nyamaa; na nyɛle kyɛ ebie bɔ ɔsangye b’awogyee kɔnnua ɔ mmane bɛ, na ngunduni bɛ nwo berɛ mmane bɛ aleɛ.

⁵ Ongosa ngɔhɔ Misraim aseɛ so, na mmom Asiria koli ye so hene, ofikyɛ bapo kyɛ bekosa bɛkɔwa me berɛ ɔ.

⁶ Ɔnate b’agyirɛ bɔ batu ne ati, ngrandɛ kohũhũ mmenia wɔ ye nguro nemɔ aso, na okobubu mmuralɛ bɔ ɔbrambram ye anoa nemɔ asi ne.

⁷ Me maen asi bɛ hue kyɛ bɛtwe bɛ nwo befi me nwo, ɔwɔ nu kyɛ bɛfrɛle bɛ kyɛ bɛhã bɛhɔ Anwuro Anwuroniɛ ne anwo, nakoso bɛ nu biala wangamvo ye.

⁸ Ao Efraim, ɔkɔyɛ sɛɛ né maye wɔ mama? Ao Yisrael, ɔkɔyɛ sɛɛ né maye me sa mafi wɔ bo? Ɔkɔyɛ sɛɛ né masɛkye wɔ kyɛ Adema? Ɔkɔyɛ sɛɛ né mabɔ wɔ tɔɔ kyɛ Seboyim? Me nyaa woso wɔ me kunu, ao, m’anwumvoinnwunɛ ayɛ piri paa.

⁹ Me yaafɛlɛ kandinga ne, mengɔye mengofite, mengosa mengɔsɛkye Efraim ko, ofikyɛ nde Nyameɛ, na nnde sona; nde Krongronniɛ bɔ ɔwɔ wɔ nu ɔ, na mengɔwa mengɔsɛkye kuro ne.

¹⁰ Bekoli AWURADE si. Afei ɔkɔbobɔ nu kyɛ gyata, na sɛ ɔbobɔ nu a, ye mmaa mɔ kofi eyia atɔleɛ bɛkɔwa bɔ bɛ nwo wosowoso bɛ ɔ.

¹¹ Bekofi Misraim bɛkɔwa bɔ bɛ nwo wosowoso bɛ kyɛ anomaa ɔ, ɔne Asiria aseɛ so bɛkɔwa bɔ bɛ nwo wosowoso bɛ kyɛ abubure ɔ, na ngɔfa bɛ ngɔtena b’awuro mɔ nu, AWURADE noa dwirɛ ɛne.

¹² Efraim afa ngondombo wapɛ me nwo wayia, yeɛ Yisrael awuro ama koso, bafa nnakannaka bapɛ me nwo bayia. Nakoso Yuda de, ɔtɛ ne Nyameɛ nate; na odi nahorɛ ma Krongronniɛ ne.