Hosea 1 - AHYERƐLƐ KRONGRON

¹ Yuda ahemvo Yusia, Yotam, Ahase ne Hesekia, yeɛ Yoase awa Yisrael hene Yeroboam, b’ahennie aberɛ so ne, AWURADE dwirɛ bɔ ɔlale ye ali hyirele Beeri awa Hosea ne, ye ɛhe.

² Mmerɛ bɔ AWURADE hyɛle ye bo fale Hosea so dwudwole ne, AWURADE sele Hosea kyɛ, “Kɔ ná kogya braa gyanderaniɛ, ná ɛne ye bɛwo gyanderafoɛ mmaa, ofikyɛ aseɛ ne wabɔ adwaman kandinga paa, na wali AWURADE nwo makyebu.”

³ Yiti ɔhɔle oogyale Diblaim awa brasua Gomɛre. Ɔne ye bɛnwonzɛle, na ɔwole baa bienzua.

⁴ Na AWURADE sele Hosea kyɛ, “To ye dumaa Yesreel; ofikyɛ ɔngɔhyɛ biala, ngɔtɔ Yehu awuro ama so wereɛ wɔ Yesreel mogya nwo, na ngɔma Yisrael awuro ama ahennie so kɔpɛ.”

⁵ Na sɔ kyẽa ne, ngobubu Yisrael agyaen nu wɔ Yesreel bɔnza ne anu.”

⁶ Osa nwonzɛle, na ɔwole baa brasua. Na AWURADE sele Hosea kyɛ, “To ye dumaa Lo Ruhama, ofikyɛ mengonwu Yisrael awuro ama anwumvoin ko bɔ ɔkɔmaa ngɔfa bɛ bɔne ngɔhyɛ bɛ bieku ɔ.

⁷ Nakoso ngonwu Yuda awuro ama anwumvoin, na ngɔfa AWURADE bɛ Nyameɛ so ngɔpepɛ ngole bɛ. Mengɔfa agyaen anaa ngrandɛ, anaa koɛ, anaa mbɔngɔ, anaa mbɔngɔhanɛfoɛ so yeɛ ngɔpepɛ ngole bɛ ɔ.”

⁸ Na ɔpɛle Lo Ruhama nyɔfone ne, ɔnwonzɛle, na ɔwole baa bienzua.

⁹ Yeɛ AWURADE sele kyɛ, “To ye dumaa Lo Ami, ofikyɛ nna me maen ole ɛmɔ, yeɛ me wora nnde ɛmɔ Nyameɛ.

¹⁰ Nakoso Yisraelfoɛ bɛ somaa kɔyɛ kyɛ mboanoa anweaa, bɔ bɛngora ye susu anaa bɛngora ye ka ɔ. Na nekaa bɔ bɛhã behyirele bɛ kyɛ, “Nna me maen ole ɛmɔ” nen, berɛ yeɛ bɛkɔhã bekohyire bɛ kyɛ, “Nyameɛ teasefoɛ mma ole ɛmɔ” ɔ.

¹¹ Yudafoɛ ne Yisraelfoɛ bɛkɔbɔ nu bekoyia, ná bɛkɔye panyi ko maa okotua bɛ noa. Na bekofi aseɛ ne aso bɛkɔwa, ofikyɛ Yesreel kyẽa ne kɔyɛ kyẽa piri.