Hesekiel 8 - AHYERƐLƐ KRONGRON

Asɔneyɛɛ sua nu akyiwadeɛ

¹ Afoɛ bɔ ɔtɔ so nzia ne, bosome bɔ ɔtɔ so nzia ne anu, ye elennu ne aso, né nde m’awuro bɔ Yuda mbanyi bɛtete me nyunu ɔ, na AWURADE Nyameɛ tumi wale me so wɔ berɛ.

² Nneane, na nwuni sona sue bie bɔ ye sue ne te kyɛ see ɔ. Ofi ye nekaa bɔ osoma ye yaase ne bɔ ɔkwaadwu ase ne, ɔte see; yeɛ ofi ye yaase bɔ ɔkɔ ye anwuro ne koso, osoma nikyee bɔ wata ɔ, kyɛ kɔɔbere bɔ wasɔ gonn ɔ.

³ Ɔtengyɛle nikyee bie bɔ ye sue te asaa ɔ, ɔfa sɔle me ti nwiaa nu, na Sunzum ne mane me so hɔle anwuro ne ase b’afia, na ɔfale me wale Yerusalem wɔ nyekyire bɔ ofi Nyameɛ berɛ ɔ nu. Ɔfale me wale asɔneyɛɛ sua ne akunu dɔ anoa piri bɔ ye nye kyire sorɔ dɔ ne anyunu berɛ, nekaa bɔ nungunɛhwenɛ amoen bɔ ɔtwetwe nungunɛ ba ne ogyi ne.

⁴ Na yieee! Né Yisrael Nyameɛ ye animnyam ne wɔ berɛ, bɔ ɔte kyɛ nyekyire bɔ nwuni ye bɔnza ne anu ne ala ɔ.

⁵ Na osele me kyɛ, “Sona awa, to wɔ nye nea sorɔ dɔ.” Yiti ndole me nye nneane sorɔ dɔ. Na yieee, afɔleɛ bokyea anoa ne, ye sorɔ dɔ, wɔ anoa nu berɛ yeɛ né nungunɛhwenɛ amoen ne ogyi ɔ.

⁶ Yeɛ osa sele me kyɛ, “Sona awa, aso enwu bɔ bɛyɔ ye? Enwu akyiwadeɛ mbiri mbiri bɔ Yisraelfoɛ bɛyɔ ye wa, kyɛ bɛfa betu me befi me nekaa krongron ne anu maa mekɔ dededede ye? Na ekosa konwu akyiwadeɛ mbiri mbiri bieku.”

⁷ Ɔfale me wale aluo berɛ anoa nu berɛ, na nneane nen, nwuni tokuro bie wɔ fasue ne anu.

⁸ Yeɛ osele me kyɛ, “Sona awa, bɔngye fasue ne anu tokuro.” Na mmɔngyele fasue ne anu nen, nwuni anoa bie.

⁹ Yeɛ osele me kyɛ, “Woro nu kɔnea akyiwadeɛ bra fiɛ bɔ bɛ́bɔ ye wa ɔ.”

¹⁰ Yiti nworole nu ngɔneane. Na né bakurukyire ngaka mukoraa bɔ bɛtwe bɛ nwo ase ɔ, yeɛ ngaka mukoraa bɔ bekyi ɔ, ɔne Yisrael mmosoen amukoraa bagua fasue ne anwo babra bayia.

¹¹ Né mmienzua aburasoo bɔ bɛte Yisrael mbanyi ɔ, bɔ Safan awa Yaasania boka bɛ so ɔ begyigyi mmosoen nemɔ anyunu berɛ. Né ebiala tira ye see kulie, na ɛyɛɛ nwosina ne dwɔsole munguu.

¹² Afei obisale me kyɛ, “Sona awa, yeɛ anwu bɔ Yisrael awuro ama mbanyi bɛ́yɔ ye wɔ awosii nu ne, bɔ ebiala ɔwɔ ye sua bɔ ɔsɔne mmosoen mɔ nu nu ɔ? Ofikyɛ bɛnwa: ‘AWURADE nnwu yɛ, AWURADE apo aseɛ ne.’ ”

¹³ Yeɛ osa sele me kyɛ, “Ekosa konwu akyiwadeɛ mbiri mbiri bieku bɔ bɛyɔ ɔ.”

¹⁴ Afei ɔfale me wale AWURADE awuro berɛ sorɔ dɔ anoa ne anu berɛ, na nwuni mmrasua bɔ bɛtete berɛ besu Tamuse ɔ.

¹⁵ Yeɛ osele me kyɛ, “Sona awa, yeɛ anwu ye? Ekosa konwu akyiwadeɛ mbiri mbiri bɔ bɛtra ɛhemɔ ɔ.”

¹⁶ Afei ɔfale me wale AWURADE awuro ne akunu dɔ. Na AWURADE asɔneyɛɛ sua anoa nu berɛ, abrannaa ne ne afɔleɛ bokyea ne b’afia berɛ, na nwuni mmienzua kɔyɛ aburanyɔ ne nnu wɔ berɛ. Né bɛ si kyire AWURADE asɔneyɛɛ sua ne; yeɛ né bɛ nyunu kyire eyia afiteleɛ bɔ bɛsɔne eyia, bɔ bɛ nye kyire eyia afiteleɛ ɔ.

¹⁷ Na obisale me kyɛ, “Sona awa, yeɛ anwu he? Aso ɔte edwirɛ baa kyɛ Yuda awuro ama bɛkɔbɔ akyiwadeɛ bra bɔ bɛbɔ ye wɔ ɛwa ye ɔ, bɔ bafa nzɛmmɔne bapete aseɛ ne aso amukoraa, bɔ besa behu m’ahone ɔ? Nea, kyɛ bɛ́nwaha bakaa nyaa ne wɔ bɛ bonyi noa ɔ.

¹⁸ Ye sɔ ne ati, ngɔhwe bɛ so anyeborolɛ so. Mengɔkorɔkorɔ bɛ, yeɛ mengonwu bɛ anwumvoin. Na ɔwɔ nu kyɛ bɛkɔteatea nu bekosu bɛkɔfrɛ me de, nakoso mengɔtɛ bɛ so.”