Hesekiel 6 - AHYERƐLƐ KRONGRON

Nyameɛ bua maen ne ndɛen

¹ Na AWURADE lale ye dwirɛ ali hyirele me kyɛ,

² “Sona awa, fa wɔ nye kyire Yisrael mmokaa nemɔ, ná hyɛ ngɔm tia bɛ,

³ ná kã kyɛ, ‘Ɛmɔ, Yisrael mmokaa, ɛ́mɔtie AWURADE Nyameɛ noa dwirɛ. Bɔ AWURADE Nyameɛ ɔkã kyire mmokaa ne pambaa mɔ, asue mɔ ne bɔnza mɔ ɛhe: Ɛ́mɔtie, me, mebaafa ngrandɛ meba ɛmɔ so, na ngɔsɛkye ɛmɔ asɔneyɛɛ nemɔ.

⁴ Ɛmɔ afɔleɛ mmokyea nemɔ kodwiri kogua, ngobubu ɛmɔ mmosoen nemɔ, na ngogyi ɛmɔ mmenia bɔ batotɔ ne ngogua ɛmɔ mmosoen nemɔ anyunu.

⁵ Ngɔfa Yisraelfoɛ bɛ fuin nemɔ ngogua bɛ mmosoen nemɔ anyunu, ná mato ɛmɔ mmowue mapete ɛmɔ afɔleɛ mmokyea nemɔ anwo mabra mayia.

⁶ Kuro biala bɔ ɛmɔte so ne, ɔkɔkakyi kurofoen, ɛmɔ asɔneyɛɛ nemɔ kɔsɛkye kɔlela berɛ mbaen, na ɛmɔ afɔleɛ mmokyea nemɔ kodwiri kogua kɔsɛkye; ngobubu ɛmɔ mmosoen nemɔ ngogua ngɔsɛkye bɛ, ngobubu ɛmɔ amoen nemɔ ngogua, na ngɔsɛkye ɛmɔ sa noa adwuma nemɔ.

⁷ Bɛ bɔ batotɔ ne, bɛkɔlela ɛmɔ nu, na ɛmɔkonwu kyɛ me ole AWURADE.

⁸ “Nakoso ngɔma ɛmɔ nu biemɔ konya bɛ ti bekodidi nu. Bɛkɔnwati bekofi ngrandɛ noa bɛkɔhɔ maen maen nemɔ anu, wɔ mmerɛ bɔ bɛkɔbɔ aya bɛkɔhɔ maen maen mɔ so ne.

⁹ Na ɛmɔ nu mmenia bɔ bekonya bɛ ti bekodidi nu ne, bɛkɔkaye me wɔ maen maen bɔ bahye bɛ nnure bahɔ so nemɔ aso, ofikyɛ ngɔbrɛ b’adwaman ahone bɔ wapo me ne ase, yeɛ ngosi bɛ nye bɔ bɛfa bɛbɔ adwaman bedi bɛ mmosoen mɔ si ne. Na bɔne bɔ bayɔ, ɔne akyiwadeɛ mukoraa bɔ bayɔ ne, ɔkɔma bɛ bɔbɔ bɛ nwo kɔyɛ bɛ tɛ.

¹⁰ Na bekonwu kyɛ me ole AWURADE; na edwirɛ bɔ mahã, kyɛ ngɔprapra sɔ musue he ngogua bɛ so ne, manga ye mbaen.”

¹¹ AWURADE Nyameɛ nwa nyoo, “Bɔ wɔ sa nu, fa wɔ gya pem pem berɛ, ná kã kyɛ, ‘Aa!’ Ɔnate Yisrael awuro ama b’akyiwadeɛ bɔne bɔ bayɔ ne amukoraa ti ɔ; ofikyɛ bɛkɔtotɔ ngrandɛ noa, na ɛhɔen ne ewue anwonyerɛ kohũhũ bɛ.

¹² Bɔ ɔwɔ dedeede ne, ewue anwonyerɛ yeɛ okohũ ye ɔ; bɔ opingye ne, ngrandɛ noa yeɛ ɔkɔtɔ ɔ; na bɔ waha bɔ mamaa wanya ye ti wadidi nu ne, ɛhɔen yeɛ ɔkɔmaa okowu ɔ. Sɔ yeɛ me yaafɛlɛ ne kɔyɔ bɛ nwo adwuma koyie ɔ.

¹³ Na ɛmɔkonwu kyɛ me ole AWURADE, mmerɛ bɔ bɛ mmenia kɔtotɔ kɔlela bɛ mmosoen nemɔ afia, bɔ bɛkɔpɛ b’afɔleɛ mmokyea nemɔ anwo bɛkɔbra bekoyia ne, wɔ pambaa tendenn biala so, wɔ mmokaa mukoraa bɛ ti afia ne, wɔ bakaa monɛ biala bo, wɔ eluii kusuu mukoraa bo, nekaa biala bɔ bɛbɔle ayirefona afɔleɛ bɛmane bɛ mmosoen nemɔ amukoraa ne.

¹⁴ Ngɔtengyɛ me sa ngɔhwe bɛ so, ngɔkakyi aseɛ ne kurofoen wɔ nekaa biala bɔ bɛte ɔ, yoo, ɔkɔyɛ pralaa kɔtra ɛserɛ so bɔ ɔkwaadwu Diblata ne. Na afei bekonwu kyɛ me ole AWURADE.”