Hesekiel 47 - AHYERƐLƐ KRONGRON

Ngoa asue ne

¹ Afei osa fale me wale awuro berɛ anoa ne anu, na yieee, né nzue opu fi awuro berɛ aponnwaa ne abo ɔsẽ kɔ eyia afiteleɛ so dɔ (ofikyɛ né awuro ne nye kyire eyia afiteleɛ). Né nzue ne ɔtengyɛ bagua ase fi awuro ne famaa so, wɔ afɔleɛ bokyea ne ngwaen.

² Yeɛ ɔfale me fale sorɔ dɔ anoa piri ne anu maa yɛfitele; ɔfale me fale bondua dɔ bra yiale wale dwaaso anoa piri bɔ ye nye nea eyia afiteleɛ ne anwo, na nwuni kyɛ nzue ne ɔsẽ fi famaa so dɔ.

³ Biaa ne hɔle eyia afiteleɛ so dɔ, bɔ né otira nyamaa bɔ bɛfa besusu nikye ɔ. Osusuli agyirɛ apee ko; ɔfale me pɛle nzue ne, na né odwu me gya kɔme.

⁴ Yeɛ osa susuli agyirɛ apee ko, ɔfale me pɛle nzue ne, na né odwu me nangoroma. Osa susuli agyirɛ apee ko, ɔfale me pɛle nzue ne, na né odwu me sisia.

⁵ Osa susuli agyirɛ apee ko, na ɔte asue bɔ mangora ye pɛ ɔ, ofikyɛ né nzue ne wayi bɔ bɛngora ye pɛ ɔ, sana ebia pɛ ye.

⁶ Yeɛ obisale me kyɛ, “Sona awa, aso anwu ɛhe?” Afei ɔfale me fale asue ne noa maa nzale me si.

⁷ Na nza mmale ne, nwuni mmakaa pee wɔ asue ne noa wɔ ye bue nyɔ ne.

⁸ Na osele me kyɛ, “Asue he, ɔtengyɛ kɔ eyia afiteleɛ bue nu dɔ okogua Araba ne anu, na ɔtengyɛ kogua ɛpo nu a, ɔsa nzue ne anwonyerɛ.

⁹ Na ɔkɔwa kyɛ, nekaa biala bɔ asue ne kɔtengyɛ kɔfa ne, abɔdeɛ biala bɔ ngoa wɔ ye nu bɔ ɔkekã ye nwo ne, okonya ngoa. Asue nemɔ nu naen kɔsone pee, ofikyɛ sɔ asue he kɔtengyɛ kɔhɔ dɔ, na ɔkɔsa ɛpo nzue ne anwonyerɛ. Yiti nekaa biala bɔ asue ne tengyɛ kɔ ne, nikyee biala nya ngoa.

¹⁰ Bekogyina ɛpo ne noa fi Ɛn Gedi bɔ ɔkwaadwu Ɛn Englaim, na berɛ yeɛ bɛkɔworɛ asawu mɔ nu ɔ. Nu naen mɔ kɔyɛ ahoroɔ pee, kyɛ ɛpo piri nu naen ahoroɔ pembepembe ne ala.

¹¹ Nakoso ye boo ne ye asaa nemɔ anu de, bɛ nwo ngɔsa, bɛkɔha berɛ maa bekonya ngyee bekofi nu.

¹² Mmakaa ahoroɔ amukoraa bɔ bedi ɔ kofifi asue ne noa, wɔ ye bue nyɔ ne. Bɛ nyaa ngɔkese, yeɛ mmaa ngɔpa so. Bosome biala bekosu mmaa foforɛ, ofikyɛ nzue bɔ benya ye ne ofi nekaa krongron berɛ. Bekoli bɛ mma ne, né bafa bɛ nyaa koso bayɛ ayire.”

Aseɛ ne wɛen mɔ

¹³ AWURADE Nyameɛ nwa nyoo, “Aseɛ ne bɔ ɛmɔkɔhyɛ bɛkɔma Yisrael mmusua kure buru ne nyɔ ne maa ɔkɔyɛ b’agyapadeɛ ne, bɛ wɛen mɔ ɛhe: Odi kyɛ Yosef nya bue nyɔ.

¹⁴ Ɛ́mɔhyɛ bɛma ebiala deɛ ɔyɛ pɛpɛɛpɛ, ofikyɛ ndale ye nwo ndaen kyɛ ngɔfa ngɔma ɛmɔ nana mɔ, na aseɛ he kɔla berɛ kɔma ɛmɔ maa ɔkɔyɛ ɛmɔ agyapadeɛ.

¹⁵ “Aseɛ ne, ye wɛen ɛhe: Ye sorɔ dɔ, ofi ɛpo piri ne, ɔnate Hetelon atee so bɔ ɔkwaafite Sedade,

¹⁶ Hamate, Berota, Sibraim (bɔ ɔwɔ Damasko ne Hamate b’ɛwɛen n’afia), bɔ ɔkwaadwu Hasa Hatikon bɔ ɔla Hayuran wɛen so ne.

¹⁷ Ɛwɛen ne fi ɛpo ne okodwu Hasa Enan, bɔ ɔwɔ Damasko sorɔ dɔ ɛwɛen so, ɔne Hamate sorɔ dɔ ɛwɛen ne aso. Ye sorɔ dɔ ɛwɛen ɛne.

¹⁸ “Eyia afiteleɛ bue nu dɔ, ofi Hayuran ne Damasko ne Gileade, yeɛ ofi Yisrael aseɛ wɔ asue Yɔɔdan wɛen so, ɛ́mɔsusu befi ɛwɛen ne aso beedwu eyia afiteleɛ ɛpo ne; ɛhe yeɛ ɔte eyia afiteleɛ wɛen ɔ.

¹⁹ Ngwaen dɔ, ngwaen dɔ paa, ɛwɛen ne fi Tamar ɔkɔ alaa kodwu nzue bɔ ɔwɔ Meriba Kadese, na ɔfa Misraim bɔnza ne anwo kodwu ɛpo piri ne. Ngwaen dɔ ɛwɛen, wɔ ye ngwaen dɔ ɛne.

²⁰ “Eyia atɔleɛ bue nu dɔ ne, ɛpo piri ne kɔyɛ ɛwɛen maa okoodwu Hamate ndendeneɛ so. Eyia atɔleɛ ɛwɛen ɔ.

²¹ “Yiti ɛmɔhyɛ aseɛ he anu bɛfa, kyɛbɔ Yisrael mmusua kure nemɔ bɛte ɔ.

²² Odi kyɛ ɛmɔfa serewagualɛ so bɛkyɛ maa ɔyɛ ɛmɔ agyapadeɛ, ɛmɔ ne amanvrafoɛ bɔ baatena ɛmɔ nu ná bawowo mmaa bagua ɛmɔ nu ne. Odi kyɛ ɛmɔbu bɛ kyɛ Yisrael mmaa bɔ bɛwole bɛ maen ne anu ne ala. Bɛ ne ɛmɔ yeɛ bekonya agyapadeɛ wɔ Yisrael mmusua kure nu ɔ.

²³ Na ɔkɔwa kyɛ, abusua kure biala bɔ amanvraniɛ waatena nu ne, berɛ ala yeɛ odi kyɛ ɛmɔfa ye agyapadeɛ bɛma ye ɔ, AWURADE Nyameɛ noa dwirɛ ɛne.